Ivoso 4:10 - Seysyo No Tao

¹⁰ O nimeygegcin do karawan am iya o nimeycyakavat do teyngato. O ikakman na sang am na itoro do tao do karawan o mapeyzokab a aryarilaw na.

Ivoso 4:10 Referans Kwoze

Sipolay 7:26

So yana ikanoyong ni Yeso a ney manokdwan na a ta ipeyhanhan a mapatanatanang nyaten so nakem ta ji Ama ta do to. Ta yabo na karatan a yabo so raraten. Iya rana am na nipapinpin ni Ama ta do to do yameyraraten a tao. So ikanoyong na rana ney mazway na do teyrahem a kado teyngato.

Sipolay 4:14

Am ori o pangozayan ta do nakem ta yamraralay ni Ama ta do to. Ta yata ipeyhanhan si Yeso a ney manhama na mapatanatanang nyaten so nakem ta ji Ama ta do to. Iya rana am Anak ni Ama ta do to a yarana myan do tangain ni Ama ta do to.

Kelosi 2:9

Ta yamanoyong o nakem na ni Ama ta do to a yarana nimacimalag ji Kizisto.

Kelosi 1:19

Ta kakdain na ni Ama ta do to o Anak na macikto jya so kadmayan.

Matay 24:34

Naknakmen nyo an. Amyan so tao sicyaikwaya a makapis pa so vazay ang.

1 Timotay 3:16

Yata katenngan an, o makdeng a nanao a nipatwaw ni Ama ta do to a yata anoyngan. Nimatazak a tao si Kizisto. O Seyzi am yongkad na a abo so raraten. Nimacita da no tinsi, a yarana meylimwang do peycyamahamahatawan na, a yada rana anoyngan no aro a tao do karawan. So nikatkatan na sya ni Ama ta do to a yangay do teyngato.

Ivoso 3:19

Tana yajyatenngi no tao o na pamanmandan no mapeyzokab a pangangarilawan na ni Kizisto am inaoy si meypahagnat kamo so nakem a makateneng do pangangarilawan na. No si makman kamo sang am manoyong kamo na a yanan no aglaglaw na jinyo ni Ama ta do to.

Nimlivolivon 1:9

Teyka na rana ori a ciring am meycyakavat rana si Yeso do teyngato. Tangarahen da am amyan so asa ka cinalab ambengbeng so citahen da.

Sipolay 8:1

O yamakdeng a yata malavat am yamyan so ney manhama na mapatanatanang nyaten so nakem ta si Ama ta do to. Iya rana am si Yeso a yamhezsad do wanan na ni Ama ta do to do teyngato.

Nimlivolivon 3:18

No kakwa pa am nipanci na rana ni Ama ta do to do aro a panoyonoywan na so ciring o kapaziman da si Yeso a pakakasi nyo. Am yana nipangononongan sicyaikwaya o akman sang.

Nimlivolivon 2:33

So na rana nipeycyakavat a yamyan do wanan na ni Ama ta do to a yamahap so itoro na jya ni Ama ta do to a Seyzi. O nyo macita rana kano nyo mamizing sicyaikwaya am mamimin a yapo do oyowyat na no Seyzi a na nitoro ni Ama ta do to.

Nimlivolivon 1:11

“Inyo rana a tao do Cyadidi am ikongo nyo ipeytatanek do jya a yatomangara so hanit. Ta si Yeso eya yakomaro rana jinyo a yamangay rana do teyngato am akman sang, ta mirwa pa meysinaoli do teyrahem a maciralay do cinalab.”

Yowani 19:36

O peypeypangayan no nang am mangay mangononong o ciring do Seysyo. Ta maniring am, “Abo asa ka totowang na mavaci.”

Yowani 19:28

Katenngan na rana ni Yeso o kanikomavos no makakaday a vazay na. Maniring am, “Ko mawaw.” O ikakman na sang am mangay mangononong o ciring do Seysyo.

Yowani 19:24

Maniring sira o itaysang no Loma do kadwan jira am, “Ji ta misipisinga. Apyapya rana o kapasipangoyongoyot ta jya makahakahap rana sya.” O ikakman na sang am mangay mangononong o ciring do Seysyo. Ta maniring am, “Da nivonong o nipeyyayob ko a da kapasipangoyongoyot do magorogod ko.” So nikanoyong no nang a mina vazay da no itaysang no Loma.

Yowani 1:16

Yateywara o pangangarilawan na a na itoro jyaten. O aryarilaw na jyaten am yabo yakasaraw a na ipeywalam.

Locya 24:44

Meyratateng am maniring jira si Yeso am, “O aro a vazay rana ya am nimalavat ko na jinyo no kakwa pa. O nivatvatkan ni Moyse a kano panoyonoywan na so ciring ni Ama ta do to a kano nivatvatkan a Anwanood a yaomagaz jyaken am yarana nimangononong.”

2 Kedinto 12:2

Ko katenngan o keyyan no yasa ka sinjya a mina kapat so icyarwa (14) so awan a nikatkat na do teyngato ni Ama ta do to. Am ko jyatenngi kanimangay na no kataotao na, ta ala pahad na nimangay do teyngato.