Ivoso 1:11 - Seysyo No Tao

¹¹ O makakaday do karawan am abo ji mangozay do ahahapan na sya ni Ama ta do to. So na to mangozai do nakenakem na a mapanop jyamen a amraralay ni Yeso Kizisto a tao do Yotay a akma ney anak a macikaop ji Kizisto.

Ivoso 1:11 Referans Kwoze

Loma 8:28

Tamo katenngan na kasidong ni Ama ta do to so yamraralay nya a tao a nipamnekan na mangozay do nakenakem na a tao. So na ikamimin no vazay da na ipeypalanginan ni Ama ta do to. So ikanoyong da meypapya nya.

1 Pite 1:4

So tamo ikanoyong a yaomamoon so peymeymasaodan na ni Ama ta do to a omanoyong jya tao. To meyyonong o itoro na jinyo do teyngato ni Ama ta do to.

Ivoso 1:14

O Seyzi na ni Ama ta do to am ori o akma tey yongkad a somidong jyaten a omamoon so nipanci na itoro ni Ama ta do to do monganay jya tao. So ikanoyong na ni Ama ta do to a mapatazadang jyaten do teyngato a yaomanoyong jya tao. So sarayan ta ni Ama ta do to a tey mazway a Tao do to!

Ivoso 3:11

O na akmanan sang ni Ama ta do to am na pangozayan o to meyyonong a pamnemnekan na. Am na rana nipangononongan ni Yeso Kizisto a Panirsirngen ta.

Ivoso 1:5

Am ori o na sarayan nyaten ni Ama ta do to a na panopen a akma ney anak, ta yata na macikaop ji Yeso Kizisto.

Cyalatay 3:18

Ta no si pangozayan ta o iwawalam na ni Moyse o torwan na jyaten so aryarilaw na ni Ama ta do to am beken a monganay ori do mina ciring na ni Ama ta do to. Ta o nitoro na aryarilaw na ji Apolahan am pangononongan na ni Ama ta do to o mina ciring na jya.

Sipolay 6:17

Mina to na rana mancyan ni Ama ta do to o kaji na ablisan no nakenakem na sira so tao a omamoon so mina ciring na jira. Am ori o nyaitan na do ciring na ni Ama ta do to akma ney yongkad. O nipasongsong na ciring am ngaran na ni Ama ta do to,

Tito 3:7

O pangangarilawan na ni Ama ta do to am ori o ikapya ta na so nakenakem jya, ta abwata rana o raraten ta do tangain na. So ikanoyong ta mapananala so kapakahap ta rana so to meyyonong a ikavyay no pahad ta.

Loma 8:17

No manoyong o kakma tey anak ni Ama ta do to am manoyong keyyan no itoro na jyaten no makwa. So ikakman ta sang a macikasaray do Anak na si Yeso Kizisto. Ta yaten rana am no macyanod ta do alalaw na ni Kizisto am macikazway ta do azwazway na.

Kelosi 1:12

Isaray nyo si Ama ta do to. Ta iya o yanimapanop jinyo a yamraralay nya. So nyo ikanoyong rana yamyan do kazngangan.

Kelosi 3:24

Manakem nyo o keyyan no nakem na jinyo ni Kizisto, do kanoyong nyo a makahap rana so nakem na so omanop jya tao. So ikanoyong ni Kizisto a ahapen nyo so vazay.

Nimlivolivon 26:18

Ko tovoin imo a omiwang do mata da kapakacita da rana so kazngangan a komaro do vazay ni Satan a omanoyong rana ji Ama ta do to. So ikanoyong da rana mavonas so raraten a macikaop do amraralay nyaken a tao,’ kwan na yaken ni Yeso.

Nimlivolivon 20:32

“Sicyaikwaya am ko na to norwan inyo ji Ama ta do to. Ta ko ipeyhanhan o pangangarilawan na ni Ama ta do to a somidong jinyo a to ngotokot so nakem a meyhanhan nya. No si makman kamo sang am mahap nyo na o igeygeglaw na so omraralay nya tao.

Nimlivolivon 2:23

O nakenakem na ni Ama ta do to no kakwa am hapen nyo si Yeso a itoro do marahet so nakenakem a tao a kapadket da sya do jyojika a wakwaken.

Nimlivolivon 20:27

Ta yabo rana o ko taywen a nanao ni Ama ta do to.

Nimlivolivon 4:28

Da pangononongan o mina ciring mo a omagaz do nipamnemnekan mo.

1 Pite 3:9

Ji nyo patonggali o karatan no kadwan jinyo. Ji kamo masyavavay. Ta kaovayovay nyo so kadwan jinyo. Ta no kapanop na jinyo ni Ama ta do to am akman so sang o nakenakem na jinyo.

Loma 11:34

Maniring do Seysyo am, “Sino makateneng do onowned na ni Ama ta do to. Sino makayokod nya tao.”

Yake 2:5

Amizngen nyo manga keypong an. Na nitenngan ni Ama ta do to sira o makasi a tao do karawan a makdeng so nakem a omraralay nya. So da ikanoyong a makahap so nakem na sira ni Ama ta do to a macikaop rana do italamozong na.

Ivoso 1:8

O pangangarilawan na ni Ama ta do to am ta na ipakateneng do na ahahapan sya ni Ama ta do to.

Nimlivolivon 13:48

Mamizing da no beken a tao do Yotay am masaray sira. Ori o nyazwazwayan da so ciring na ni Ama ta do to. Sira rana aro a tao am nakenakem na ni Ama ta do to o kapamnek na jira a mahap so to meyyonong a ikavyay no pahad da, do kanoyong da rana ji Yeso.

Loma 8:29

Ta o nipamnekan na ni Ama ta do to a amraralay nya tao am to na ji ngamoga sira akman so Anak na si Yeso Kizisto apiya so ahahapan sya. So ikanoyong na ni Yeso a akmey rakeh na jyaten akmey meyketeketeh do cinai.

Loma 8:30

Ta o tao a nipamnekan na ni Ama ta do to a amraralay nya am nipanop na sira a omanoyong jya, kabnek na sira abo so raraten do tangain na. So ikanoyong da macikazway jya do teyngato no makwa.

Loma 9:11

Am ikongo do nipamnekan na o asa ka anak na, am ori o nipacisirsiring na ni Ama ta do to ji Leypeycya. Maniring am, “Allamen na no rakrakeh o ananak.” Am no kapacisirsiring na jya am abo pa dang o marahet a kano apya a vazay. Ta ji sira pa nimalikey o meyketeh ang. Am ori o ikanoyong na ni Ama ta do to a mangozay do nakenakem na. So ji na monganai do kapyapya no icicirawat no tao o pamnekan na ni Ama ta do to.

Ivoso 1:9

So ta rana ipakateneng ji Kizisto akma ney kahanhanan a mapakavos so ji nitomwaw pa vazay na no kakwa.

Ivoso 1:18

Ko mapasyasi ji Ama ta do to a omiwang do onowned nyo a kapakateneng nyo na do peypeypangayan no na panopan jinyo a kapanta na ninyo so to meyyonong a ikavyay no pahad nyo do teyngato. So ikatey rako na no aryarilaw na so omanoyong jya tao.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.