Ipaziman 16:6 - Seysyo No Tao

⁶ Sira rana am nipavoyog da o rala no yaomanop jimo a tao a kano panoyonoywan mo so ciring mo. Sicyaikwa rana ya am ipanta mo sira so rala a yopen da. Ta manoyong ori a ipasingsingkad mo sira.”

Ipaziman 16:6 Referans Kwoze

Ipaziman 11:18

Ta no kapeyoyaoya da no ji raralay nimo a tao am nipadna mo rana o peyoyaoyyan mo jira. Yarana marateng o araraw no yamo ipacici so nimawakwak a tao. O lamlamsoy mo a panoyonoywan mo so ciring mo a kano yaomanop jimo a yamraralay nimo a tao am tana meynakem sira, tana makasi a tao sira am mo miminen sira azawen. Sira rana yamapeykaraherahet so karawan a tao am yamo balinasen sira.”

Ipaziman 18:24

Manoyong o ili do Papilon a peydednan no peyoyaoyyan na ni Ama ta do to. Ta do ili rana ori am nikawakwakan da no panoyonoywan na so ciring a kano omanop jya tao. So ikanoyong na do ili ori nikawakwakan da no tao do teyrahem.

Ipaziman 13:15

Makahap o ikadwa na no omalalam so rako a oyowyat am avyain na o akma ney keyteytawan no nimanma na omalalam. So nipeyzezyak na rana a kawakwak na so ji raralay nya a tao.

Ipaziman 19:2

Manoyong o kaji na mapeycyakabanan so tao do pacicyan na so tao, ta na rana nipasingsingtan o rako a ili akman so somagpyan a mavakes a yatomirara so tao do karawan a yamraralay no malas a iraralay a na kawakwak pa so lamlamsoy na ni Ama ta do to.”

Ipaziman 13:10

O ipanci a vaoden am mangay kavaod sira an. O ipanci a mahap so inawan no ipangan am mangay kangay no inawan da no ipangan. So ikamimin da no amraralay ni Ama ta do to a ji macizizikna do kapeyhanhan da nya.

Ipaziman 18:20

“Somaray kamo do teyngato, ta yarana nimabalinas o rako a ili a meyngaran so Papilon. Inyo a yaomanop ji Ama ta do to a kano amlivolivon no ciriciring na ni Ama ta do to a kano panoyonoywan na so ciring am somaray kamo, ta na rana nipangonong inyo ni Ama ta do to. So na rana nipasingsingtan jya.”

Sipolay 10:29

O to ngolala so Anak na ni Ama ta do to a kano rala na a makavonas so raraten na, kato na nazibo no yamanta no tao so pangangasyan a Seyzi am o akman rana sang a tao am makongo so wanjin. Naknakmen nyo pala. Jyabo kaji nakdengan no ipasingsingkad na sya ni Ama ta do to a.

Matay 7:2

Ta o ahahapan nyo so panraherahetan nyo so icyatatao nyo am akman sang o ahapan da sya no tao a amraherahet jinyo. To macilocilolo do kakdekdeng no iraherahet nyo so icyatatao nyo o raherahetan da jinyo.

Locya 12:48

Am o ji makateneng do ciring no lawpan a keyyan no marahet a vazay na am alikelikey o oyyan na nya. Akman sang, ta no aro nipahanhan na jimo a vazay ni Ama ta do to am aro kakdain na jimo.