Ipaziman 13:12 - Seysyo No Tao

¹² Amyan ori do tangain no nimanmanma a omalalam a mapeyvazay so rako a oyowyat no nimanma a omalalam ang. Iya rana am gacigatan na o tao do karawan mangay omraralay no nimapya rana so nipeyzazan a omalalam ang.

Ipaziman 13:12 Referans Kwoze

Ipaziman 19:20

So nirakpan da so omalalam a kapazanod da so nimeyvazay so mapangyangyalak a makahaw a tao a rakpen. O makahaw a tao am nimeyvazay ori so mapangyangyalak a vazay a ipeykawad na so yanan no ipatotodo no omalalam a kano niomraralay no kamamagenan na tao. Omalalam rana kano makahaw a tao am niwalit na sira do akman so awa so karakorako a lila no apoy.

Ipaziman 14:11

O amrahet so kangangay da aob am jimtad a meypangay do teyngato. Sira rana omraralay no omalalam a kano kamamagenan na kano adketan no ngaran na so zozogwan am ji sira makayaknen a makaliliw so kataotao da do apoy ang.”

Ipaziman 14:9

Maniring o ikatatlo no tinsi a amlololos am, “O amraralay no omalalam a kano kamamagenan na nipadketan rana so zozogwan a kano lima am,

2 Tesalonicya 2:4

Iya rana am ioya na sira o tao a ji raralay nya. Ta abneken na o kataotao na makarakarang pa kano iraralay da no tao. So yangay na omlisna do raralayan da ni Ama ta do to a mapakataotao do to.

Ipaziman 13:2

O nimacita ko a omalalam am akma raney kokoman so tao. O ai na am akmey ai no rako a kokoman so tao. Akman sang o ngongoy na. So nitorwan na no kamolay so oyowyat na kano lilisnan na kano keynakman na do omalalam.

Ipaziman 13:8

O tao rana do karawan a jidket so ngaran do vakong no niwakwak da Kagling a yanan na rana no to meyyonong a ikavyay no pahad da tao am ori o amraralay nya. O vakong rana ya am na adketan no ngarangaran da no kaji na pa mangamaogan so karawan.

Ipaziman 16:2

Mangay o ney manma na tinsi am paglowen na o panay na do teyrahem. Karahan am amlida o noka do kataotao da no yanan no yongkad no omalalam a kano nimraralay no kamamagenan na no omalalam a tao.

Ipaziman 17:8

O nimacita mo a omalalam am nimavyay pa no kakwa am yarana maliman sicyaikwaya. So ikakeykai na rana mai a apo do abo so takadan a gazawagaw a jyatenngi so karaherahem a meypangay do kararatan a ipasingkad na sya ni Ama ta do to. O tao do teyrahem a jidket so ngaran do vakong a yanan na rana no to meyyonong a ikavyay no pahad da no kaji na pa amaogan no karawan am mamimin sira malak no omalalam a nimavyay pa no kakwa yarana maliman sicyaikwaya. So ikanoyong da malak nya no meytotwaw no makwa.

Ipaziman 20:4

Macita ko o aro a lilisnan no panirsirngen a lisnan no tao. Sira rana am mamimin sira nipanta na so oyowyat da a mapacici a mapeykapyapinpin so tao. So nipakacittan ko so pahad da no niwakwak da a meylimwang no nanao ni Yeso a kano ciriciring na ni Ama ta do to a tao. Sira rana am ji da niraralay o omalalam a kano kamamagenan na. Jidket do zozogwan da kado lima da o ngaran no omalalam. Sira rana am nimamimin sira nimirwa a mavyay a kapacizanod da ji Yeso a meypanirsirngen do asa zivo (1000) a awawan.