Cyalatay 1:4 - Seysyo No Tao

⁴ Si Yeso Kizisto am na pahawahen yaten do raraten do karawan. Am ori o na pangozayan do nakenakem na ni Ama ta do to a mawakwak no raraten ta.

Cyalatay 1:4 Referans Kwoze

Matay 20:28

Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Loma 4:25

Nimawakwak si Yeso no raraten ta a kapirwa na rana mavyay. So ikanoyong ta na ipanci ni Ama ta do to abo so raraten do tangain na.

Cyalatay 2:20

Am ori an, ikabeken a yaken rana no yamavyay sicyaikwaya. Ta si Kizisto rana o yamavyay do onowned ko. O yako ikavyay sicyaikwaya am yako ipeyhanhan o Anak na ni Ama ta do to. Na nikarilaw yaken a na nyangay no inawan.

1 Pite 2:24

Nisabway na ni Kizisto o raraten ta do jyojika. Ori o karwan ta na do peyraratenan ta a somazap so isaray na vazay ni Ama ta do to. O kataotao na ni Yeso a yanimanngannga nyaten am yata nipakahap so to meyyonong a ikavyay no pahad ta.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

2 Kedinto 4:4

Da ji nganoyngi no tao, ta yana bengbengen ni Satan o onowned da no yaji manganoyong a tao. Am ori o da ji makatenngi do peypeypangayan no Mapasaray a Ciriciring na ni Ama ta do to a yaomagaz do azwazway na ni Yeso Kizisto. Ta si Yeso Kizisto rana am ta nipakacita rana si Ama ta do to.

1 Timotay 2:6

Apyapyahen na pa o kataotao na a mawakwak, a omalit do oyaoyyan na nyaten ni Ama ta do to a meyraraten a tao. O akman rana sang a vazay am nipeyvazay na rana ni Yeso a yongkad na ni Ama ta do to a ji mamyapya no tao do karawan a mangay do kararatan.

Ivoso 2:2

No kano nang am onotan nyo pa o malas a vazay da no ji manganoyong a tao a kano ciring ni Satan a yatomalamozong no meyraraten a tao.

1 Tesalonicya 3:13

Am ori o ikanoyong na ni Ama ta do to a mapakdeng so nakenakem nyo a omraralay nya. Ta no si meygegcin si Yeso a Panirsirngen ta kano niomraralay nya tao am manoyong kamo do tangain na ni Ama ta do to a ji meylimoteng so onowned a abo so karatan.

Loma 12:2

Ji nyo to panwanoda o kataotao nyo do yamarahet so yahahapan sya tao do karawan. Ta apyapya pa o kablis na so onowned nyo ni Ama ta do to. Ta ori o ipakateneng nyo do apya nakenakem na jinyo ni Ama ta do to a kano isaray ni Ama ta do to a vazay.

Veydipi 4:20

Inaoy no azwazwain ta si Ama ta do to a mangay do kaidan no karawan. Amin.

Ivoso 5:2

Patwawen nyo do icicirawat nyo o pangangasyan na ni Ama ta do to, akman si Yeso Kizisto a yamarilaw nyaten a yajingbeywan do inawan na nisomidong jyaten. Ta o akman rana sang a vazay na am isaray na ni Ama ta do to.

Ipaziman 1:5

a kani Yeso Kizisto a ta ipeyhanhan so ciring. Iya rana am ney manma na nimirwa a mavyay. Si Yeso Kizisto rana am yatomalamozong no panipanirsirngen do karawan. Na ikarilaw yaten. Na nipahawa yaten no rala na do yata peyraratenan.

Ipaziman 5:9

a kapeyyanwanood da so vayo a anood. O kanwanoodan na am, “Imo o makahap so vakong a mapakaro so nipadketan a vakong. Ta imo rana am niwakwak da imo. O nimvoyog a rala mo am nimapatastas so tao do peycyeylilyan na kano meykataretarek so ciring a kano meytaretarek a tao do sinokob no hanit a yaitoro ji Ama ta do to a yaponged na.

1 Yowani 3:16

O ta ipakateneng do pangangarilawan na ni Ama ta do to am si Kizisto nitomoro no inawan na jyaten. Am ori o ikasaray ta manidong so tao. Tana mangay rana o inawan ta do panidongan ta so akma tey kakteh do cinai am cyaha. Apya akman sang.

1 Yowani 2:2

Nimawakwak si Kizisto a omvonas so raraten ta. Am beken a yatehen, ta kazagoman no tao do karawan.

1 Pite 3:18

Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

Yake 4:4

To kamo makasi yaomalalas ji Ama ta do to a tao. Ta manngwa, nyo jyatenngi o kapeykavosoyan na si Ama ta do to no meyparai jya so nakem a tao? So ji na alasi no akman sang a tao a mapeykavosoyan si Ama ta do to.

Sipolay 6:5

Sira rana am mapeyneynara da rana o katey yapya na no ciriciring na ni Ama ta do to. So da ipakateneng do mapeyzokab a oyowyat ni Ama ta do to.

2 Tesalonicya 2:16

Na ikarilaw yaten ni Ama ta do to a kani Yeso Kizisto a Panirsirngen ta. O pangangarilawan na ni Ama ta do to am ori o yapwan no to meyyonong a sarasaray no onowned ta amnanala so nakem na jyaten.

Yowani 12:31

Oya rana o ipacici so tao do karawan. Oya rana o isakeb ni Satan a yatomalamozong no tao do karawan.

Matay 26:28

Oya rana am rala ko a nimvoyog a omaing do aro a tao a omvonas so raraten da. O rala ko rana ya am yongkad nyo do vayo a pangozayan nyo a ciring na ni Ama ta do to.

Sipolay 9:14

Kakwakwan na rana no rala no kagling a kano baka a ipanci da makavoga so nikaratan da. Imanngo rana o oyowyat no rala ni Kizisto. Ta nioyatan no Seyzi a mapatanang so abo so karatan a kataotao na ji Ama ta do to. Jyabo kaji na haraharan pa makavonas so marahet do onowned ta a ombalinas so malas a icicirawat ta. No si manoyong o kakman ta sang am manoyong ta pahanhanen na ni Ama ta do to do vazay na.

Sipolay 2:5

O yaomanam a yana amaogen a vayo a karawan ni Ama ta do to am beken a tinsi o nipamnekan na a tomalamozong nya.

1 Tesalonicya 3:11

Inaoy si peypalanginan na yaten ni Ama ta do to a kani Yeso Kizisto a Panirsirngen ta a kangay namen rana jinyo do dang.

Ivoso 6:12

Ta yaten rana am beken a ta macililiman do tao. Ta tamo macililiman ji Satan a kano aro a kalamsoyan na yatomalamozong no meyraraten a tao do karawan.

Ivoso 1:11

O makakaday do karawan am abo ji mangozay do ahahapan na sya ni Ama ta do to. So na to mangozai do nakenakem na a mapanop jyamen a amraralay ni Yeso Kizisto a tao do Yotay a akma ney anak a macikaop ji Kizisto.

Cyalatay 6:14

Am yaken rana am yabo ikadwa na no yako pazwain, ta si Yeso Kizisto a Panirsirngen ta o yako pazwain a yanimawakwak nyaten do jyojika. O peypeypangayan no jyojika jyaken am yanimavonas rana o marahet a nakenakem ko. O peypeypangayan no nang am yako na nimamlis.

Loma 8:32

Kakwakwan no Anak na yana ji ingbeywani a yana nitoro a mawakwak nyaten. Ney manngo rana o yamakakaday a kakzeben ta no nakem. Ta jyabo o na ingbeywan jyaten a.

Loma 8:3

O iwawalam na ni Moyse am ji na sidong yaten a komaro do peyraratenan ta. Ta cinatao ta o kapeyraraten ta. Am si Ama ta do to am ori o yanisomidong jyaten. Na nitovoy o Anak na a yamacingay so keyteytawan do tao do karawan a yanimawakwak no raraten ta. So ji na rana nalamozongi nyaten no raraten.

Loma 1:7

Am ori o yako peyteygamyan ninyo a na tey karilaw ni Ama ta do to a tao do Loma a yamanoyong a na italamozong ni Ama ta do to. Inaoy si itoro na o pangangarilawan na kano ikapiya no onowned nyo ni Ama ta do to a kani Yeso Kizisto a Panirsirngen ta.

Yowani 10:11

“Yaken rana am akma koy mapamangamangan so kagling a makapzat do omanop jyaken a tao. Ta mangay o kangay ko no inawan no omanop jyaken a tao.

Yowani 6:38

Ta yaken rana am ko apo do teyngato. So ko ji to mangozai do nakenakem ko. Ta ko pangozayan o nakenakem no yanitomovoy jyaken.

Yowani 5:30

“Abo angangayan ko ya no si to ko mangozai o nakenakem ko. Ko to mangozai o ciring na jyaken ni Ama ta do to a mapacici a mapeykapyapinpin so tao. So na ikanoyong no ko ahahapan sya. Ta ko ji mangozai o nakenakem ko do kataotao ko, do ko kahap so vazay no yanitomovoy jyaken.

Locya 22:42

Maniring am, “Mo Ama, no si apyahen mo am pakarwen mo o yamasagpaw a alalaw ko an. Am ji mo mangozai o nakenakem ko, ta kapangozay mo do nakenakem mo.”

Make 10:45

Ta o na nyai no Nipamnekan na ni Ama ta do to a tao am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Matay 26:42

Maniring do ipidwa na kangay a meynozi ni Yeso am, “Mo Ama, no ji mo amya o alalaw ko a komaro jyaken am to mo na mangozai o nakenakem mo.”

Matay 6:9

No meynozi kamo am inarahen nyo ya an. ‘Mo Ama do to, inaoy no si mamimin o tao a zomwazway so meylimwang a ngaran mo.

Ipaziman 7:9

Karahan am makacita ko so aro a tao am jyavilangi sira rana apo do peycyamahamahatawan na kano meykataretarek so ciriciring a meytatanek do sazapen no lilisnan a kano Kagling. Meyyayob sira so malavang a magorogod a meypinan so voovoong.

Loma 8:27

Si Ama ta do to o yamakateneng do onowned ta. Katenngan na o nakenakem no Seyzi. Ta o Seyzi am na to mangozai o nakenakem na ni Ama ta do to a yameynozi nyaten a yamanoyong a italamozong na tao.

Locya 22:19

Meyratateng am ahapen na o pang a kasaray na nya ji Ama ta do to a kakcikcil na sya vonongen jira. Maniring am, “Oya rana am kataotao ko ya a mapatazadang jinyo do teyngato. So to nyo na amwamooni sya a iyapapaw nyo jyaken.”

Matay 13:22

O nizomsi do katamtamkan am katonodan no tao a omamizing so nanao ni Ama ta do to. Am masanga no vazay na do karawan a kalita jya no peymeymasaodan na. Am ori o ikabengbeng no ciring na ni Ama ta do to do onowned na.

1 Kedinto 15:3

Ninanao ko na jinyo o yaney makdeng na nimahap ko ji Yeso. Ori rana am nimawakwak si Yeso no raraten ta. So na idket do Seysyo no ciring eya.

Ivoso 5:16

No to ngyan so sidongen a tao am sidongen nyo sira. Ta ji nyo painini. Ta aliket rana o ta iyan do karawan.

1 Tesalonicya 1:3

No namen meynozi am namen isaray ji Ama ta do to o apiya vazay nyo a yongkad no nyo kapeyhanhan ni Yeso Kizisto a Panirsirngen ta, kano nyo kazikna yamangarilaw so tao, do nyo raralayan ni Ama ta do to a yatongbo so alalaw nyo a yaomapanala si Yeso Kizisto a Panirsirngen ta a yameygegcin.