1 Pite 3:18 - Seysyo No Tao

¹⁸ Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

1 Pite 3:18 Referans Kwoze

Sipolay 9:28

Yakman sang si Kizisto a ipisa mapatanang so kataotao na a ivonas na so raraten no aro a tao. So ikeypisa na pa mai do teyrahem. Am beken a raraten o vazay na. Ta mangay na hapen sira o mapanala sya tao.

Sipolay 9:26

O na icyakman sang ni Yeso a yarana ji vangovangon so iwawalam no tao do Yotay a mapatanang so rala am na rana nipatanang o kataotao na abo so raraten a ivoga na so raraten no tao. So na ikeypisa ni Yeso a mangay mawakwak nyaten a kato na rana meyyonongan a mavonas rana no raraten ta.

2 Kedinto 5:21

Na nikarilaw yaten ni Ama ta do to. So na nitovoyan si Kizisto abo so raraten a nimalit so raraten ta. Am ori o tanyo ipacikaop ji Kizisto a abwata rana so raraten do tangain na ni Ama ta do to.

1 Pite 4:6

Ori o yarana nipamizngan no Mapasaray a Ciriciring na ni Ama ta do to so yarana nimawakwak a tao. Ta tana meyyangangay o tao a tana mawakwak a komaro do karawan am o pahad da no nimraralay ni Ama ta do to am macitovong ji Ama ta do to do teyngato.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

1 Yowani 1:9

Am no si ji ta naywa o raraten ta ji Ama ta do to a yaji mapeycyakaban so tao am vonasen na o raraten ta, do kapangononong na do ciring na. So icyakma tey nikowyasan a malavang so onowned a abo rana so karatan.

Loma 4:25

Nimawakwak si Yeso no raraten ta a kapirwa na rana mavyay. So ikanoyong ta na ipanci ni Ama ta do to abo so raraten do tangain na.

1 Pite 4:1

Manoyong o kanimanngannga na ninyo ni Yeso Kizisto. Am ori an, no manngannga kamo do raralayan nyo ni Yeso Kizisto a kato nyo liliwan sya a makanakem si Kizisto a nisomabway no raraten nyo am manoyong kamo na nikomaro do peyraratenan nyo.

Loma 8:3

O iwawalam na ni Moyse am ji na sidong yaten a komaro do peyraratenan ta. Ta cinatao ta o kapeyraraten ta. Am si Ama ta do to am ori o yanisomidong jyaten. Na nitovoy o Anak na a yamacingay so keyteytawan do tao do karawan a yanimawakwak no raraten ta. So ji na rana nalamozongi nyaten no raraten.

Cyalatay 3:13

Am si Kizisto o nimalit jyaten do oyaoyyan na nyaten ni Ama ta do to a ji makataptap so iwawalam na ni Moyse. Ta o ciring pa do Seysyo am, “O nipadket da do jyojika am iya o nyangayan no peyoyaoyyan na ni Ama ta do to.”

Cyalatay 1:4

Si Yeso Kizisto am na pahawahen yaten do raraten do karawan. Am ori o na pangozayan do nakenakem na ni Ama ta do to a mawakwak no raraten ta.

2 Kedinto 13:4

Tana yakmey yabo oyowyat na ni Kizisto do yada kanimapadket sya do jyojika am oyowyat na ni Ama ta do to o yanimapeyvangon sya. So namen ikakman sang akmey abo so oyowyat a yamacikaop ji Kizisto. Am no namen ioya inyo am oyowyat na ni Ama ta do to o namen pangozayan an.

Loma 5:2

O ta ikakman sang sicyaikwaya am pangangarilawan na ni Ama ta do to, do ta kapeyhanhan ni Kizisto. Am ori o ikasaray ta, ta katenngan ta o kahap na jyaten ni Ama ta do to do teyngato a macikasaray do azwazway na.

Loma 1:4

No hapen do ka Tao do to na am iya o nipeyvangon na ni Ama ta do to a nimapo do heseb na. So ikanoyong na Anak na ni Ama ta do to.

Yake 5:6

Nyo pananakawen sira o yamakasi a tao. Nyo kawakwak pa siraha, do da kabo no oyowyat a yamapatonggal jinyo.

Nimlivolivon 3:14

Apyapyahen nyo pa o kalikod nyo do ji meylimoteng so onowned a tao a kapyapya nyo pa sya manci ni Pilato a mapasaway so asa ka nimanwakwak a tao.

2 Kedinto 1:24

Beken a namen gacigatan inyo a manganoyong, ta yakamo na makdeng so nakem ji Ama ta do to. So namen kagagan ninyo a pacivazayan do namen kapasaray jinyo.

Loma 8:11

No si myan jinyo o Seyzi na ni Ama ta do to a niomvyay si Yeso Kizisto am akman kamo sang a ipirwa na avyain ni Ama ta do to, do kowyat na jinyo no Seyzi na ni Ama ta do to.

Nimlivolivon 22:14

Maniring jyaken am, ‘Yana nipamnekan imo no Tao do to da no ineynapo ta a mahap so vazay na, do mo kanimakacita si Yeso a Anak na ni Ama ta do to, do kanimakamizing mo so ciring ni Yeso.

Matay 27:19

Pacicin ni Pilato am manovoy o mavakes na so tao a mangay manci nya jya so kaji na manaptan do abo so kararatan a tao, ta tey manganyahey o tatateynep na.

Matay 27:24

Ileylamdamen na sira ni Pilato am katenngan na rana o kabo na rana no pasapahen na jira ciring, ta ikanyahey na kapeyzavozavoz da no aro a tao. Meyratateng am mangap so ranom a pangain na do tangain no aro a tao a kapavanaw na. Maniring am, “No si mawakwak ya am cyaha, ta beken a raraten ko, ta monganay jinyo.”

Yowani 16:10

Da jyatenngi o manoyong a vazay. Ta yaken rana am yako mangay ji Ama. So ji nyo rana makacitai jyaken.

Ivoso 3:12

Am ori o ji ta na nyahei a mangay do tangain na ni Ama ta do to, do kapeyhanhan ta ni Kizisto.

Sipolay 9:14

Kakwakwan na rana no rala no kagling a kano baka a ipanci da makavoga so nikaratan da. Imanngo rana o oyowyat no rala ni Kizisto. Ta nioyatan no Seyzi a mapatanang so abo so karatan a kataotao na ji Ama ta do to. Jyabo kaji na haraharan pa makavonas so marahet do onowned ta a ombalinas so malas a icicirawat ta. No si manoyong o kakman ta sang am manoyong ta pahanhanen na ni Ama ta do to do vazay na.

Sipolay 10:10

Na nipangononongan ni Yeso o nakenakem ni Ama ta do to a yamahap so vazay na a yamapasansan so kataotao na do jyojika. Am yaipisaha na kato miminan so raraten ta yanivonas.

1 Pite 3:19

Nioyatan no Seyzi o pahad ni Yeso a mangay a mapamizing so pahad no nimawakwak rana tao.