Room 12:6 - Gooti Toolluro Yogalokwono

⁶ Toro te pwolno puru'monodo tonollu Gooti toolluro womdo go'no go'no nekullabodowodo su tonyu neya amjumovlavogawano. Womdo su ton Gooti gavnokwe toolluro yasuwa'wino sugumaluko tovida'ai nekullabodowodogano. Toro te womdo go'no go'no nekullabodowodo su ton arogano. Punol gamoro kuuguudo tokwe a'mwo abolo punyu moruudomollo'moneyokwe nekullabodowodonogano. Toro nekullabodowodo su tonol nemoro Krais toolluno kuudo uubweyodowado tomgu'aro to'no neya uumjunowa'ji kuuguudo tov a'mwo abolo punyu amoruudomollogawano.

Room 12:6 Referans Kwoze

1 Koorin 7:7

Nuvu aro tovino nyunodowodonyugono. Yiuwi'nokai Jisasolluno kuudo uubweyodupudo toorekul nuvu abolo maiyo mwalodumdo toonyubusuko amjomwekovlavogapureyokwe tovino nyunodowodonyugono. Toro kuvi kuruv Gooti toolluro kemi ikullabodowodo to'gwowi aval'nodo'maiyo. Kevu pworekullu abolo mallo'moneyokwe ikullabodowodekono. Aki pworekullu judo tekwojekul mujomwekovlaiyo'moneyokwe jurogudo tov ikullabodowodekono.

Room 12:3

Gooti tool gamoro yasuwa'wino sugumaluko tov me'no anubweyokanyugono. Toro tovino tov kevu yiuwi'nokai togaikullu aro ikudumo'monyugono. Kevu ilomoropunyu yapi noonyumwonyu womdo ku'nono mipino tonyuno aro kuudo nyaupiyo. Oo nevu yowa'no yanonogano. Toro kuvi kuruv pwolno puru'monodo togaikul aro kuudo neya jaurogaulo. Oo Gooti tool gamoro womdo tovi momjumovlaiyo'moneyokwe yasuwa'wino sugumaluko tollovo nubweyodowodonyugono. Toro nubweyodowodo tollovai'aro to'no uumjuno'mi gamoro womdo momjumovla'mwalmonyugono. Gooti tool gamoro womdo judo'no judo'nodo tonyu imwalano'moneyokwe tonollu aval'nodo toru'aro manekullabodowodekono.

Room 1:11

Nuu kemi jurogudo daikullumwojo'moneyokwe ikwonyo'mo anyunadopiyo. Toro toonyu kemi abekuru'ma'mi tov kemi yodekubwasumonyugono. Aki kuuguudo sodekubwasumi su tov Gooti toolluro Kuullo toolluda'ai yasuwa'wino tovibusuko nekullamonyugono.

1 Koorin 13:2

Aki nuvu Gooti toolluro proofet yogalo tokwe kuurokado amoruudumiyo'mdeyo oo yiuwi'nokai yiulo yogalo tonyu kuu'maiyo toru'no adodowiyoku'bworosumiyo'mdeyo oo yiuwi'nokai noonyumwonyu kuudo aguto togai amoruudumi kwonyu kuruv a'mwo abolo pubuuraino kalo buuropino manyuno'ji to'gwowi a'mwo yasuwa'nodo pwolbusuko imo'numonyugono. Aki nuvu Gooti toolluno kuudo guureji kuubwemi tovida'ai muumuudo pworai pumgu amodogulptowapimi kwonyu kuruv nuvu a'mwo abolo pubuuraino kalo buuropino manyuno'ji to'gwowi moro womdo su tov yasuwa'no plawonokwono.

Efesos 4:11

Yogalo su tovino kavlo tov arokwono. Krais tool yiuwi'nokai a'mwo abolo pwolno puru'monodo tonyu gamoro sugudo ton yasuwa'no uumwodeyodowodekono. Sugudo su tonyuda'ai pun arogano. A'mwo pworai kuurotokwe imo'nyo'mo womdo tov wiyodowodekono. Aki pworai Gooti toolluro yogalo tokwe a'mwo abolo tonyu kuurokado moruudomollo'moneyokwe womdo tov wiyodowodekono. Aki pworai gamoro kuuguudo sugudo tokwe a'mwo abolo tonyu modomollo'moneyokwe womdo tov wiyodowodekono. Aki pworai Gooti toolluro a'mwo abolo tonyu moduvomwallo'moneyokwe womdo tov wiyodowodekono. Aki pworai ibwasokwe imo'nyo'mo womdo tov wiyodowodekono.

1 Koorin 14:1

Kevu a'mwo abolo tonyu kalo buuropino winyo'moneyokwe pasudo su tovi guureji neya domovomjai'nogaulo. Aki aro kuudo neya jaurogaulo. Oo Gooti toolluro Kuullo tool yasuwa'wino judo'no judo'no nekullabodowodo tollovai neya amarogawano. Kuudo neya jaurogaulo. Gamoro yasuwa'wino nekullabodowodo aguto tollugwo Gooti toolluro yogalo tokwe kuurokado moruudomollo'moneyokwe womdo tokwono. Toro te kevu pugaikul Gooti toolluro yogalo tokwe kuurokado moruudomollo'mo tovino guureji aikulluno'ji tov ilaiyo kuunodokwono.

2 Koorin 8:12

Kuudo neya jaullulo. Kevu Jisasolluro a'mwo abolo supto yodopure tobuurai wiyo'mwojo'moneyokwe nokwo yovraimwonyumwalpinogaikikono. Kevu toro sovraimwonyupi tov noonyumwonyu mwora'dupudo tonyuda'ai to'no nokwo mollu'bworosupinogaikikono. Toro amollu'bworosupi su tonyuno Gooti tool ilaiyo winonekono. Toro kuvi kuruv kevu noonyumwonyu mamwora'dupudo punyuno'gwowi ku'nono mamollu'bworosupinogaikikono. Toro mamwora'dupudo su tonyuno kevu kuudo kwolallo nyourukwapimwalpiyo.

1 Tesaloonaika 5:20

Aki proofet yogalo ikudodopure tonyuno biyolo'mo aro nodupiyo. “Oo yogalo su tov kuunanokwono.” Nodupiyo.

1 Koorin 14:29

Aki puruv kevu su'bwo'nupi toga Gooti toolluro yogalo tokwe kuurokado mollajo'moneyokwe yiuno a'mwo pworalo'mdeyo oo pworapwolorodeyo toorono to'no yodekubwasumwalpinorogano. Me'no sodekubwosupi toga kevu Jisasolluro a'mwo abolo aulomwalpi togaikul a'mwo su tooravuro yogalo tonyu pi'mwono neya jainyubwopinogaikikono.

Kuurotokwe 15:32

Aki Juudaseke Sailaseke tooral Gooti toolluro kuuguudo tokwe modomollo'moneyokwe proofet toorakono. A'mwo su tooral Jisasolluro a'mwo abolo su tonyu kuuguudo bwotonyago togai sodubwosumovlavolorakono. Toro yodubwasuno sumaleyokwe a'mwo abolo su tonyu duuwimwojodole tovida'ai kemoro poowokalago ton jurogudo sumo'nyajupogano.

Kuurotokwe 2:17

“Gooti tool aro adokaikono. Aiyowo'mo iruko tov nobai'meyo'mo yodowo'jure toga aro ton imo'nonokwono. Moro Kuullo tool kemi poowokalago anakuuto kuulekumwallo'moneyokwe yiuwi'nokai togaikullu nekullamonyugono. Toro aikullami toga kemoro muugunyo toorogai'aro sujuraiyo togai'aro ton proofet tooravuro yogalo moruudodupudo to'busuko kubalno moro kuuguudo ton moruudupinogano. Aki kemoro muugunyo tooro wojo sumdo to'busuko pun noonpinorogano. Aki kemoro yadaiyo kworo kuruv wojo pun nyuwo'nupinorogano.

Filipai 3:15

Kevu pugaikul Gooti toolluro Kuullo toolluro yogullumwojekwapiyoduke tovida'ai aguto me'no imo'nodupudogaikikono. Kevu su toro imo'nodupudo togaikul nuuge avaikuudo neya jaurogaulo. Toro kuvi kuruv pugaikul avaikuudo miyaupi to'gwowi lukomgu Gooti tool kemoro kuudo kaiya'nodo tovi nomollaikudo'mowonekono.

Efesos 3:5

Krais Jisasolluno yiulo yogalo su tov aiyogasuro amwallajupo tonyu Gooti tool kuu'maiyo toru'no mabomollolupto'nubweyajukekono. Toro kuvi kuruv aga'no'gwowi Gooti toolluro Kuullo tool nevu gavnokweyolluro kuurotokwe kuunodo toonogai'aro proofet kuunodo toorogai'aro toonollu kuu'maiyo toru'no me'no bomollolupto'nanekubweyodowodekono. Toro tovino tov nevu yiulo yogalo su tovi kuu'maiyo toru'no kuudo me'no youroma'dowadonogano.

Kuurotokwe 13:1

To'no'gwowi wagwolago Antiyookda'ai Jisasolluro mollu'bwoto ton su'bwo'nyajupogano. Toro i'bwo'nodupudo tonyuro pworo proofet kuuguudo amollajajuporogano. Aki pworo ibwasokwe imo'nodupu Jisasolluno sodubwasajuporogano. A'mwo su toro sumo'nyajupo tooraino yovo tov pwol Banabasolekono. Pwol Simiyoonolekono. Simiyoonolluno yovo puruv Naigerolekono. Aki pwol Sairinida'ai Luusiyosolekono. Aki pwol Manainolekono. A'mwo su tool mido mollomwalokwe Herootolluro ganyokwo pwekono. Aki a'mwo pwolluno yovo tov Soololekono.

Luuk 11:49

Kevu toro yodupudo tovino tov Gooti tool gami pi'mwo kuudo tokwe yogalo puruv aro adokaikono. “Nuu a'mwo abolo tonyomno proofet pworogai'aro a'mwo kuurotokwe pworogai'aro toorai nomorapimonyugono. Toro amorapimi kuvi kuruv su tooravuro pwekwojai noromiyosupinorogano. Aki pwekwojai kaiyako nyugolpinorogano.” Adokaikono.

Matyuu 23:34

Toro te neya duu'nyulo. Nuu kevu toorekullomno proofet pworogai'aro a'mwo pi'mwo kuudokwe pworogai'aro loowo tovino pi'mwo kuudokwe pworogai'aro tooro nomekwopiyamonyugono. Toro amekwopiyami kuvi kuruv kevu a'mwo su tooravuro pworai i'noguropte tovi nomovoromiyoguroptowosupinorekikono. Aki pworai Juu toorekulluro i'bwo'nyago tonyu anakuuto tomuu wuulo togai gunyukuurumollupinorekikono. Kevu su toro toorai wagwolago tonyuda'ai kwa'mgu tomuuno movomjapiyopi wagwolago go'no go'nodo tonyomno nomovomjomokaulapinorekikono.

1 Koorin 14:24

Toro kuvi kuruv kevu Gooti toolluro kuurokado mokavlaiyo'moneyokwe yogalo tokwe amolladupi su to'gwowi a'mwo kuudo muubweyodowodo pwol kevuge aulomwalo'ji toga yogalo tovi wuu'nowo'ji gami yiuwi'nokai kuullutago tokwe nokwo uubweyonekono. Aki Gooti toolluro kooti yogalo nerumwallono kuvino kuruv kuudo nyouromaronekono.

Kuurotokwe 21:9

Aki toro tool sujuraiyo aval aval kwolo yere muuma'nodupudo punodotai kuunumiyagekono. Sujuraiyo su tonodoto Gooti toolluro proofet wimo'nodupu gamoro yogalo tokwe moruudodupudogano.

1 Koorin 3:5

Kevu kuudo neya jaullulo. Apoolosol ala'mwoldukono? Aki nuvu Poolonyu ala'mwonyudukono? Yiuwi'nokai toonal yiuno Aguto toolluro womdo tovi wiyokwe tekwojonakono. Toro tekwojonalluno kevu yogalo youllajunodupudo tov navu ilaiyo mimwakuuwolo. Yiuwi'nokai toonal Aguto toolluro womdo tovi wiyo'moneyokwe gavnokwe tool ajonakubweyokanakono. Womdo su tovi yodowole tovida'ai kevu Krais toolluno kuudo kuubweyopogaikikono.

1 Koorin 12:18

Nemoro kulako tovi su toro sumo'nowo'jujuko'mno'juki nevu ilaiyo mimo'nowa'jujukonogano. Toro kuvi kuruv Gooti tool gavnokweyolluro kuudo tovi uumjuno'no nemoro kulako tovida'ai yiuwi'nokai suvlatodeyo judo'no judo'nodo ton sokwollomunyutovanekubweyokaikono.

2 Pita 1:20

Kuudo aguto kuunodo puvino sumdomgu kuudo neya jouromarogaulo. Kuudo aguto su tov arokwono. Gooti toolluro yogalo sakwollungiko tovino mollajo'moneyokwe tov proofet pwol gavnokweyolluro kuudo tovida'ai to'no mamollajajukekono.

Matyuu 25:22

Aki a'mwo ki'nato womdokwe nuugwiyo 2,000 kuubwemovlavoka su tool gami nuugwiyo 2,000 pugai'aro muunyu toru amollu'bworosajuko togai amokabokaikono. Toro mokabino sumaiyokwe aro kuudokaikono. “Agutoloo, gumoro nuugwiyo anubwemovlavodo tokwe nuvu mollodolovoma'dum 2,000 pugai'aro muunyu toru me'no mollu'bworosodumdonyugono.” Kuudokaikono.