Room 12:10 - Gooti Toolluro Yogalokwono

¹⁰ Aki kevu Krais toolluro a'mwo abolo avalo pubuuraino kemi poowokalago togai kalo buuropino neya duuwingovlavogaulo. Aki kevuge avalo tobuurai kwako tomuu'aro wiyopi ilaiyo to'no guureji neya domollomarogaulo.

Room 12:10 Referans Kwoze

Filipai 2:3

Kevu yovo aguto mallo'mo'mdeyo oo ilomoropunyo'mo'mdeyo tovino womdo puru'monodo kuruv nyumwalpiyo. Toro kuvi kuruv kevu kwako tomuu'aro bwolomoropinapi a'mwo abolo pubuuraino aro kuudo neya jaurogaulo. Oo a'mwo abolo su tobuuro nemi nekuuwolo'mdupudogano.

Hibruu 13:1

Kevu Jisasolluro a'mwo abolo tobuurekul kemi tellugwai'yago tello'mwo tonbusuko ikullumo'nodupudo Jisasolluro a'mwo abolo tobuuraino kalo buuropino imgu amgu me'no ikullunodowodo su tov kuuno domollogaulo.

1 Joon 4:11

Mi ibwoto'nyobuuravoo, Gooti tool nemino su toro tomgu'aro kalo buuropino winodowodekono. Toro tovino tov ne kunol kuruv yiuwi'nokai Jisasolluro a'mwo abolo tobuuraino imgu amgu kalo buuropino neya amollogawano.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Pita 2:17

Kevu yiuwi'nokai a'mwo abolo tonyu ilaiyo to'no jugologaulo. Kevu yiuwi'nokai Jisasolluro a'mwo abolo tobuuraino kalo buuropino domollogaulo. Kevu Gooti toolluno luko yopi kwako tomuu'aro duuwimovlavogaulo. Aki kemi kwako akavida'ai a'mwo aguto kig toolluno yovo kuruv neya julomodomoropiyogaulo.

1 Tesaloonaika 4:9

Kevu Jisasolluro a'mwo abolo tobuuraino kalo buuropino imgu amgu inyo'moneyokwe tov Gooti gavnokwe tool kemi me'no yekubwasodowodekono. Toro yekubwasodowodo togaikul supto mimwakovo. Toro tovino tov pasudo su tovino nevu pas akavi'aro aki aiko te miyodekubwasanonogano.

Galesiya 5:13

Miyobuuravoo, neya duu'nyulo. Kevu Moosesolluro loowo tovi ki'nato womdo wiyodopure togaikullu Gooti tool nobomollurolovekumokalokwiyo'moneyokwe me'no adekumarokaikono. Kevu ki'nato womdo tovida'ai me'no birolo'nugolokwodupudo togaikulluno tov kaiya'no kuudo aro nyau'mwalpiyo. Oo nevu loowo tovi dolago tomuu mamwalodowado tonolluno tov nemi kuudo uumdo tovuro kaiya'no pasudo toorai nokwo kirounugovla'mwalanonogano. Kevu kaiya'no kuudo su toro nyau'mwalpiyo. Toro kugaikul kuruv kalo buuropino winyo'moneyokwe pasudo su to'gwowi kevu Jisasolluro a'mwo abolo togaikul imgu amgu neya duuwinogaulo.

Galesiya 5:22

Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro

1 Joon 4:20

Toro te Jisasolluro a'mwo pwol aro donekono. “Oo nuu Gooti toolluno kalo buuropino nyunodowodonyugono.” Toro dowo'ji kwol kuruv gami avalo Jisasolluro a'mwo abolo pubuuraino suroguudo sauro'ji to'gwowi a'mwo su tool yiuno kuunano yogalo to'no youkuu'nadonekono. Su tov aro tovinokwono. A'mwo su tool gami avalo Jisasolluro a'mwo abolo pubuurai me'no wonodowodekono. Toro wonodowodo kwol kuruv su tobuuraino kalo buuropino mwino'ji to'gwowi Gooti mwonodowodo kwolluno kuruv kalo buuropino ku'nono mwinonekono.

2 Pita 1:7

Aki Gooti toolluro pasudo tonyu yomjomwekovla'mdupudo su tovi muunyu toru'aro kevu Jisasolluro a'mwo abolo tobuurai ibwoto'nyo neya jumo'nomollogaulo. Aki pasudo su tovi muunyu toru'aro kevu yiuwi'nokai a'mwo abolo tonyu kalo buuropino neya domollogaulo.

1 Pita 5:5

Toro to'busuko kubalno kevu a'mwo muugunyunodo kworekul kuruv a'mwono moduvomwallokwe toorai kwako tomuu'aro neya duuwiyogaulo. Aki kevu yiuwi'nokai a'mwo pwolno pwolnodo toorekul kevnokwerekulluno bwolomoropinapi kemida'ai a'mwo go'no go'nodo toorai kwako tomuu'aro to'no neya duuwimovlavogaulo. Su toro tovino Gooti toolluro yogalo puruv aro sakwollungikokwono. “Gooti tool a'mwo ilomoropunyu yodapudo toorai molo wiyokwekono. Toro kuvi kuruv a'mwo bwolomoropinodapudo tooraino'gwowi gamoro yasuwa'wino sugumaluko tov wiyokwekono.” Su toro sakwollungikokwono.

Joon 15:17

Kevu kemida'ai pwolno pwolnodo toolluno kalo buuropino neya winmwalpino'moneyokwe loowo su tov adaikullumono.” Kuudokaikono.

Room 13:7

Aki gavman tooro buro'nyo buro'nyodeyo tonyuno, donekubilo, aikudupi tov kuvinono neya duuwiyogaulo. Aki takis nuugwiyo uubiyo'moneyokwe aikudupi kuruv kuvinono neya duubiyogaulo. Aki gavman mido mollomwalokwe toorai kwako tomuu'aro neya wiyopi a'mwo su tooravuro yovo tonyu nobwolomoropiyapiyo.

Kuurotokwe 4:32

Yiuwi'nokai Jisasolluno kuudo uubweyodupudo ton kemoro poowokalago togai'aro kuudo togai'aro ton yiuno avalou'no kwosunyajupokwono. Toro ton aro ajajupogano. “Oo nemi buro'nyo buro'nyo kuto ivitodeyo ton yiuno nevnokwenollo'mo'maiyo.” Toro dodupu kevuge avalo pubuurai abuuwingoullajupogano.

Luuk 14:10

Toro tovino tov a'mwo tool adogumaro'ji toga guu kuula'bi aiyowo'mo buulo tomuu neya doulomwalono. Su toro subi tov a'mwo adogumaro'ji tool bowo'ji aro gudonekono. “Oo ibwoto'nyoloo, guu bo'bi sumdollu toru julomwalono.” Su toro gudodowo'jure toga yiuwi'nokai guuge aulonomwalpi tooro gwonopi guu yovo aguto ma'binekugono.

Matyuu 20:26

Toro kuvi kuruv kevno'gwowi su toorobusuko nyumo'numwalpiyo. Kemoro tovida'ai pwol a'mwo aguto imo'nyo'mo kwino'ji su tool kemi womdokwe pwolbusuko neya aikullumo'nono.

2 Tesaloonaika 1:3

Nemi avalobuuravoo, kemoro Gooti toolluno kuudo uubweyodupudo tokwe'aro imgu amgu kalo buuropino ingovla'mdupudo tokwe'aro tovalluno kuudo yaikuu'dowadonogano. Kemoro pasudo su toval gullumovla'mno gullumovla'mno yodubul bwotonyo imo'nodubulovakono. Kevu su toro yomjomwekovla'mdupudo togaikulluno yiuwi'nokai toga Gooti toollu, “Nenoloo,” to'no wuudumwalano'monogano.

Kooloosi 1:4

Namoro, “Nenoloo,” wuudodowolo su tov kavlo aro tovallunokwono. Muudu'nodo tov kevu Krais Jisasolluno kuudo me'no uubweyodupudogaikikono. Aki puruv kevu Gooti toolluro yiuwi'nokai a'mwo abolo tonyuno kalo buuropino kuvinono mollodupudogaikikono. Toro tovalluno me'no wuu'nodowol Gooti toollu, “Nenoloo,” wuudodowolonakono.

Galesiya 5:6

Kuudo neya jaullulo. A'mwo pwol Krais Jisasollu me'no uuguro'mwonyodowodo tool gami lakulkulako tov ado'no'jo'mdeyo oo mado'no'jo'mdeyo kuruv su toval aguto mimo'nodubulovakono. Toro kuvi kuruv aguto to'gwowi arokwono. A'mwo pwol Krais Jisasolluno kuudo uubweyodowodo su tovi'aro a'mwo abolo punyuno kalo buuropino winmwalono to'gwowi agutokwono.

Joon 17:21

Aki su toro agudumwako tov aro tovino'mokwono. Guu Nyunumiyago tooku mi me'no nuguro'mwonyodumdekugono. Aki nuu kwonyu kuruv gumi me'no guguro'mwonyodumdonyugono. Toro te navu puru'mono imo'nodowolo to'busuko kubalno yiuwi'nokai a'mwo abolo judo'no judo'no kuudo kuubwepi su to kubuuro kuruv yiuno puru'mono neya imo'numwalpino'moneyokwe tovino agudumwakono. Aki a'mwo abolo su ton nami nokwo nakuguro'mwonyumwalpinogano. Su tov aro tovinokwono. Yiuwi'nokai a'mwo abolo kwako akavi mwalodupudo ton aro kuudo neya uubwepino'moneyokweyokwono. Oo guu Gooti tooku mi amonuwopiyabodekugono. Su toro tovino kuudo neya uubwepino'moneyokweyokwono.

Muuduko 13:9

Toro tovino tov navu gomno gomno yomuudeyapinolo. Guu yiuwi'nokai kwako tonyu doonomollono. Toro wonomollo'bi kwonamomguda'ai kwako tovi ama'bi tov nuvno'gwowi anatomguda'ai kwako tovino pla'monyugono. Aki guu anatomguda'ai kwako tovi ama'bi tov nuvno'gwowi kwonamomguda'ai kwako tovino pla'monyugono.” Eburamol Lootollu toro kuudokaikono.