Room 1:24 - Gooti Toolluro Yogalokwono

^24-26 Toro ton Gooti kuunodo toollu milomoropiyodapu aki ku'nono muumjunyajupekono. Toro kun kuruv gamoro sokwollosoka pworaino'gwowi sulomoropiyajupogano. Toro sulomoropiyajupo kuvi kuruv nevno'gwowi Gooti toollu yiunokuudo ilomoropimwolowano'moneyokwekono. Yogalo akav nebal'no kuunodokwono. Aki a'mwo abolo Gooti toollu muumjunyajupo su ton gamoro nebaikuuguudo tovi kuudo nokwo kuubweyopujuko kun kuruv Gooti toolluno nebaikuuguudo su tovi amodukwopiyajupogano. Toro modukwopiyodupu kemi kuunano yogalo tonyuno to'no kuudo kuubweyajupogano. Toro sajupo tovino tov Gooti tool nokwo wonyapino sajukekono. Wonyapino toro yoduke toga a'mwo abolo su ton kemi poowokalago ton kaiya'no kuumwiyo imo'nodupu ma'no ma'no kiroungovlaiyo'mo kwinyajupogano. Su toro yodopure tovida'ai kemi kulako ton kaiyako sugolamo'nyajupogano. Toro ton aro tomgu'aro sugolamo'nyajupogano. Abolo ton kemi a'mwo toorogai sumwonyo yo'mo mwinodupudo kun kuruv abolo pugai to'gwowi kevnokwe ton kwonyalo pasudo sajupogano.

Room 1:24 Referans Kwoze

Kuurotokwe 7:42

Ilaiyo toro sopo kuvi kuruv Gooti toolno'gwowi nemi nellukweyago su toorai buulo kuugunyumopiyokaikono. Aki toro tooro sulugumdo tovida'ai kuujo tooke lobako tooke sullugabwo togai tonyuno ilomoropiyodopure toorai Gooti tool nokwo wonyapino sajukekono. Gooti toolluro toro sajuko tov proofet tooravuro buukiyo tovida'ai kuuguudo me'no wo'dowodo tomgu'aro to'no kuvinono sokaikono. Proofet tooravuro buukiyo tovida'ai kuuguudo tov arokwono. “Oo Isuraiyoloravoo, kevu kwako a'mwomaiyo kuu'maiyo toru bai'movo'mno 40-pela kworomo tobuullu amwallajuporekikono. Toro mwalodupudo toga mi nyabiyo'moneyokwe sipsip buulmokauworodeyo pworai aromiroudapiyajuporekuldukono? Awiyo, miyo'mo kuunodo maromiroudapiyajuporekikono.

Kuurotokwe 14:16

Aki Gooti su tool aiyogasuro kwako go'no go'nodo tomuuda'ai amwallajupo pun kemi kuudo tovida'ai mujeroungovla'mdopure tonyu kuudo yere muuteyajukekono. Toro kwol kuruv nokwo wonyapino to'no sajukekono.

Matyuu 15:14

Su toro tooro a'mwo sumnowojokwe toorobusuko imo'nopi a'mwo sumnowojokwe gabovo pworai mollubworomokavla'mdupudorogano. Aki a'mwo sumnowojokwe pwol a'mwo sumnowojokwe gabovo pwollu amollubworomokavlawo'ji tov yiuwi'nokai su tooral buuso tovi wolorabullunorakono. Toro tovino tov a'mwo sumnowojokwe toorobusuko imo'nodupudo su toorai wonyapino to'no jogaulo.” Kuudokaikono.

1 Tesaloonaika 4:4

Aki kwako akavida'ai a'mwo pworo Gooti toolluno kuudomaiyorogano. A'mwo su tooro kwonyalpasudo yo'mo tooraino kwanyu sumdo kinuwiyodupudorogano. Su toro kinuwiyodupudo toorobusuko kubalno kevu aval'no nomjumovla'mwalpiyo. Toro kuvi kuruv kevno'gwowi Gooti toolluro ilaiyo winodowo'jure tovi uumjunopi yiuno sugupasudo to'no mujumovla'mwalpinorekikono. Kevu yiuwi'nokai pwolno pwolnodo toorekul kwonyalo pasudo toorai dugobiyoso'moneyokwe kevnokwerekulluro kulako tonyu po'dogalo neya domollomwalnogaulo.

1 Koorin 6:18

Toro tovino tov kevu kwonyalo nyumwalpiyokwe tovino lukado neya dovlavogaulo. Nemoro ma'no ma'no yodowado pun yiuno kwa'mgu kulako tovida'aiyogano. Toro kuvi kuruv a'mwo pwol kwonyalo so'ji to'gwowi gavnokweyolluro kulako su tovi kaiyako igolamo'nonekono.

1 Koorin 6:13

Aki pugaikul aro dodupudogaikikono. “Oo wosamujuko ton nemoro sumwoluko tovino'mokwono. Aki nemoro sumwoluko tov wosamujuko tovino'mokwono.” Su toro dodupudo tov nebalokwono. Nemoro sumwoluko tov wosamujuko ton kuulomnallo'moneyokweyokwono. Toro kuvi kuruv lukomgu Gooti tool nemoro sumwoluko tokwe'aro wosamujuko tokwe'aro tovallu kaiyako nomollounapiyonekono. Kevu sumwoluko tovino su toro dodupudo kuvi kuruv aro to'gwowi nodumwalpiyo. “Nemoro kulako tov kwonyalo tovino'mokwono.” Nodumwalpiyo. Gooti tool nemoro kulako tov kwonyalo'moneyokwe sokwollanekubweyokalmaiyo. Toro kuvi kuruv nemi Aguto toollu ilomoropimwolowano'moneyokwe to'gwowi sokwollanekubweyokakwono. Aki Gooti gavnokwe tool nemoro kulako tonyu mido mollomwalmwalono'moneyokwe sakwollosokakwono.

Room 6:12

Kevu Gooti tooke aiyo me'no mujomwekovla'mdupudo togaikul ma'no ma'nodo tov kemi aki aiko te mido nomollekumwalmwalo'jo. Aki kemoro kwako akavida'ai kulako ton ma'no ma'no yo'moneyokwe winodopure tonyu muu'nyubusuko to'no yopi nuumjunmwalpiyo.

Efesos 2:3

Su toro to'busuko kubalno ne kunol kuruv sumdomgu nevnokwenolluro kulako tovuro winoduke tomgu'aro kuumjungovlaiyajuwonogano. Su toro kuumjungovlaiyajuuwo toga nevnokwenolluro kulako tonyu ilaiyo igollunyo'mo pasudo togai'aro kaiya'no kuudo toorogai'aro toorai kuumjungovlaiyajuwonogano. Su toro toga Gooti toolluro surodo wuunodowodo tov nemi wobo toru kwollajukokwono. Gooti tool yiuwi'nokai kwako akavida'ai a'mwo abolo ma'no ma'nodokwe tonyuno surodo wuunodowodekono. Su toro to'busuko kubalno sumdomgu ne kunolluno kuruv Gooti tool surodo aval'no kuunyajukekono.