Kuuguudo Sugudo akav Makolluro sakwollokakwono Mak 2:20 - Gooti Toolluro Yogalokwono

²⁰ Toro kuvi kuruv iruko pullugwoji abolo nomallo'mo su toollu nomokavlapinekono. Me'no amokavlapi toga'no'gwowi mamwaloduke toolluno tov gami ibwoto'nyo tooro wosamujuko tonyuno kumako mwalpinorogano.” Kuudokaikono.

Kuuguudo Sugudo akav Makolluro sakwollokakwono Mak 2:20 Referans Kwoze

Luuk 17:22

Aki Jisasol gami uumjunyokwe toorai aro kuudokaikono. “Puga kevu A'mwo Kwolaiyo Kuunodo toonyuro kuu'maiyo toru bai'meyo'moneyokwe iruko pullugwoji wonyo'mo ikullunonorekikono. Toro ikullunodowo'jure kuvi kuruv ku'nono mwonpinorekikono.

Adodolukuu'nosungiko 21:9

Toruda'ai 7-pela ensel tooraida'ai pwol miyomno abokaikono. 7-pela ensel su tooro Gooti toolluro aiyowo'mo 7-pela tabunyuwuulo surosungiko dis tonyu amworallajupo toorogano. Toro tooraida'ai ensel pwol miyomno bino sumaiyokwe aro anyudokaikono. “Guu dobono. Toro abubi tookuji nuu Sipsip Muugunyo toolluro abolo nomarono tovino guduuwallumonyugono.” Anyudokaikono.

Adodolukuu'nosungiko 19:7

Nemi poowokalago togai ilaiyo bwotonyo yanoo! Aki ilaiyo ibwosunowa'ji gamino yovo aguto neya wimwalanekono. Su tov aro tovinokwono. Aga Sipsip Muugunyo tool gami abolo tovi yolokuromallo'moneyokwe lubullu doto tovi yanyo'mo tov me'no abai'mo'mokogakono. Aki gamoro abolo tov me'no yovraimwonyodowo gami nuuma'nyo'moneyokwe kuunodo toga'no sogwollo kinodowodokwono.

2 Koorin 11:27

Nuu womdo bwotonyo yodumdo toga dukwogulo sumo'nallajonyugono. Aki toro toonyu sa ilaiyo mwollajonyugono. Aki mujuko'mo bolodum wonyo'mo kuuleyaluko ailanuwopiyajukonyugono. Aki youro tonyuno supto yodum lukuuto subwosunyajonyugono.

2 Koorin 11:2

Kuuguudo tov arokwono. Gooti tool kemino tov gami guureji neya uumjunpureyokwe tovino ilaiyo winodowodekono. Su toro to'busuko kubalno nuu kwonyu kuruv kemino tov Krais toollu neya uumjunpino'moneyokwe aval'no nyunodowodonyugono. Su tov aro to'busukokwono. Sujuraiyo kwonyalo mingiko puvi gami ganumiyago tool a'mwo pwolnodo toollu uumaso'moneyokwe me'no jesodowodekono. Su toro to'busuko kubalno kevu Krais toolluro a'mwo abolo kuunodo wimo'nyo'moneyokwe nuu kemi me'no ajaikubweyonyugono. Toro te kevu sujuraiyo kwonyalo miyodowodo to'busuko sugumaluko to'no sumo'nupi togaikullu nuu Krais toolluro ato tovi ikubweyo'mo ajudovaikubwemonyugono.

1 Koorin 7:5

Toro tovino tov a'mwo kwolabolo su teyaul sumwonyo yo'moneyokwe tovino, “Awiyo,” maduumjuku'nomwalbulluneyaukono. Toro kuvi kuruv a'mwo kwolabolo su teyaul sumwoluko yiuno puru'mono wosuno'bullu subusu'nyogalo domwallo'moneyokwe toga aro nokwo domdukuurosubullunovakono. “Oo navu subusu'nyogalo adomwalosi toga sumwonyo mimwalosuno'makono.” Su toro me'no domdukuurosuno'bullu sumwonyo mibullu su toga'gwo subusu'nyogalo nokwo dumwalbullunovakono. Subusu'nyogalo me'no dopiyo'bullu toga sumwonyo aki aiko te nokwo ibullunovakono. Su tov aro tovinokwono. A'mwo kwolabolo su toval kevnokwe teyaulluro kulako tov pi'mwono mamollomwalnubullu tov Satanyolluro yamju pun wiyoganodowo'jure toga yere nobwolorabullukwe tovinokwono.

Kuurotokwe 14:23

Toro duuwimwojuno sumaleyokwe yiuwi'nokai go'no go'no Jisasolluro mollu'bwoto tonyomno pla'mdubul mido mollomwalmwalpino'moneyokwe a'mwono moduvomwallokwe pworai ajesajulorakono. Toro tooral wosamujuko tonyuno kumako mwalodubul subusu'nyogalo ajajulorakono. Toro dodubulo toga Aguto toolluno kuudo uubweyodopure su tonyu kemi Aguto tool mollomwalmwalono'moneyokwe gavnokweyolluro ato tovi adubweyajulorakono. Yiuwi'nokai Jisasolluro mollu'bwoto go'no go'nodo tonyu toro amjumovlaiyajulorakono.

Kuurotokwe 3:21

Toro tool Gooti toolluro ago muunyu kai'muu mwalodowodo tool kuwai neya mujomwekovla'mwalonekono. Toro mujomwekovlavowo'ji yiuno Gooti toolluro me'no ajesoka toga'no aikomgu wolabwonekono. Su toro wolabwono toga'no aiyoga gamoro proofet tooro aro me'no amodomollajuporogano. Lukomgu Gooti tool yiuwi'nokai noonyumwonyu uumdo wo'dupudo tonyu aiyo aiko te nyokwollosonekono. Amodomollajuporogano. Toro amodomollajupo su tov kuvinono imo'nyo'mo kuunodo toga Jisasol aikomgu noolabwonekono.”

Kuurotokwe 1:9

Jisasol toro wuujuno sumaiyokwe kuga'gwo kuuno gamoro a'mwo kuurotokwe tooro muugona'dopure toga Gooti tool Jisasollu muunyu i'muuno amokailokaikono. Toro mokailno sumaiyokwe Jisasol sulu'wo tovi akuuto tomuu auloopuuropiyokaikono. Toro auloopuuropiyoka toollu a'mwo kuurotokwe tooro aki aiko te mwonopekono.

Joon 17:13

Nuu kwako akavi kuuno mwalodum yogalo agudumwako akavi a'mwo abolo su tobuuro me'no wuu'nodupudogano. Su tov aro tovinokwono. Moro ilaiyo tov kemoro poowokalago tonyu noullo'mowopimwalonokwono. Toro toonyu aga toga gumiyomno ilabiyo'mo sumwakono.

Joon 17:11

Nuu aga toga gumiyomno ilabiyo'mo sumwakono. Toro te nuu kwako akavi yiunokuudo mamwalmonyugono. Toro kuvi kuruv gumoro a'mwo abolo nyabodumdo su tobuurono'gwowi kwako akavi kuuno mwalmwalpinobuurogano. Mi Nyunumiyagoloo, guu judo tooku yiuno sugudo to'nodekugono. Toro te guvnokwekujuro yovo jurogudokwe su tovi'aro a'mwo abolo akabuurai po'dogalo domollovi'mwojomwalogawono. Gumoro yovo jurogudo su tov mi me'no anyabodekugono. Aki navu puru'mono imo'nodowolo to'busuko kubalno a'mwo abolo judo'no judo'nodo su to kubuuro kuruv puru'mono imo'numwalpino'moneyokwe guu pi'mwono domollomwalogawono.

Joon 16:28

Nuu mi Nyunumiyago su toolluda'ai kuvinono wolabino sumoneyokwe kwako akavi mwalodumdonyugono. Aki toro toonyu kwako akavi wobo toga wuugollu'movo'mi mi Nyunumiyago su toollomno aikomgu nyulamonyugono.” Kuudokaikono.

Joon 16:7

Toro kuvi kuruv nuu nebal'no ikudumo'mokwono. Moro avla'mi su tov kemi ilaiyo yaikullugollo'mokwono. Su tov aro tovinokwono. Nuu mavla'mi tov kemi ikullo'mwojo'moneyokwe tool ku'nono mabwonekono. Toro kwonyu kuruv nuu avla'mi to'gwowi kemi ikullo'mwojo'moneyokwe su toollu nomekwopiyamonyugono.

Joon 13:33

Mi kwolaiyekwojavoo, nuu yiuno kula'nyo toga'gwono kevuge kuuno mwalmonyugono. Lukomgu kevu mino a'mgono supi kuvi kuruv nuu Juu a'mwo aguto toorai me'no kuujajo to'busuko kubalno aga aval'no aro ikudumo'mokwono. Nuu lukomgu avla'mi su tomuu kevno'gwowi ku'nono mavlapinorekikono.

Joon 3:29

Joonol toro wuujuno sumaiyokwe aki yovekurajo puruv aro kuudokaikono. “A'mwo pwol abolo tovi mallo'mo su toolluno, A'mwo nuumaso'mekono, dodowadekono. A'mwo nuumaso'mo su toolluro ibwoto'nyo pwol wobo toru davowo'ji gami ibwoto'nyo su toolluro yogalo tovino kadu'molo yonekono. Toro yodowo'jure toga a'mwo nuumaso'mo su toolluro yogaimaguurai tovi kuu'no'ji tov ilaiyo bwotonyo yonekono. Su toro to'busuko kubalno nuvu Krais toolluno ilaiyo yodumdo tov maluko'nyo'maiyo. Bwotonyo kuunodokwono. Aki moro ilaiyo yodumdo su tov mi poowokalago tovi kuullo'movanuwopiyodowodokwono.

Matyuu 26:31

Toro plaino sumaveyokwe Jisasol gami uumjunyokwe toorai aro kuudokaikono. “Surakuuto akallugwoji kevu yiuwi'nokai toorekul mino buulo nonyugunyumopipinorekikono. Gooti toolluro yogalo tov aro me'no sakwollungikokwono. “Nuu sipsip duuwatokwe toollu aromiyosumi toga yiuwi'nokai sipsip tooro lukado nyounopipinorogano.” Toro me'no sakwollungiko tov nobaiki'mowonokwono.

2 Koorin 6:5

Aki nemi iwago nekuromiyodupudo togai'aro aki wuulo killo'mo ago tonyu kuulomeranekubweyodupudo togai'aro aki magu'nyokwe tooro nemi mwodovonekuma'dupudo togai'aro su ton toro baneki'mo'mdupudonogano. Aki nevu womdo bwotonyo yodowado tekwojonol sa ilaiyo mwo'dowadonogano. Aki toro toonol mujuko bolodowadonogano.

Joon 12:8

A'mwo abolo apoo'nyaiyo tobuuro kevuge yiuwi'nokai toga nomjomwekovla'mwalpinogano. Su tobuurai kevu buro'nyo buro'nyoga'deyo toga ilaiyo nokwo mollumwalpinorekikono. Toro kuvi kuruv nuu toonyuno'gwowi kevuge yiuwi'nokai toga mamjomwekovla'mwalanonyugono.” Kuudokaikono.

Matyuu 9:15

Toro kuudoganopo toorai Jisasol yovekurajo puruv aro kuudokaikono. “A'mwo pwol abolo nomallo'mo tool kuuno mwalodowo'jure toga gami ibwoto'nyo pworo gavuge ilaiyo yopi wosamujuko tonyuno kumako mwalpinorodukono? Awiyo, wosamujuko ton neya nonomwalpinorogano. Toro kuvi kuruv iruko pullugwoji abolo nomallo'mo su toollu nomokavlapinekono. Su toro me'no amokavlapi toga'no'gwowi mamwalodowo'jure toolluno tov gamoro ibwoto'nyo tooro kalo winopi wosamujuko tonyuno kumako nomwalpinorogano.” Kuudokaikono.

Kuuguudo Sugudo akav Makolluro sakwollokakwono Mak 2:19

Toro kuudoganopo tovi Jisasol yovekurajo puruv aro kuudokaikono. “A'mwo pwol abolo nomallo'mo tool kuuno mwalodowo'jure toga gami ibwoto'nyo pworo gavuge ilaiyo yopi wosamujuko tonyuno kumako mwalpinorodukono? Awiyo, neya nonomwalpinorogano.

Kuuguudo Sugudo akav Makolluro sakwollokakwono Mak 2:21

Toro wuujuno sumaiyokwe aki yovekurajo puruv aro kuudokaikono. “A'mwo pwol youro uumnorojo tovi giwollo'mo tool youro aiyo tokwe madokuuragiwolonekono. Toro adokuuragiwolo'ji tov youro aiyo nodokuullo tov uumdo tovi guureji ki'nomarowo'ji bwotonyo rojonokwono. Toro tovino tov uumdo tokwe aiyo tokwe amolla'mo'bi tov kaiya'no imo'nonokwono.” Kuudokaikono.

Luuk 5:35

Toro kuvi kuruv iruko pullugwoji abolo mallo'mo su toollu nomokavlapinekono. Su toro me'no amokavlapi toga'no'gwowi abolo mallo'mo su tool mamwalodowo'jure tovino tov gami ibwoto'nyo tooro wosamujuko tonyuno kumako nokwo mwalpinorogano.” Kuudokaikono.