Mollurolovomato 16:15 - Gooti Toolluro Yogalokwono

¹⁵ Toro tonyu Isuraiyolda'ai ton sumdomgu mwonyajupo tovino tov aro samuugoju'nopogano. “Awi, kwako tovi kwokopo su ton burowo'nyodukono?” Toro yamuugoju'nodopure tonyu Moosesol kuudokaikono. “Kwako tovi kwokopo su ton Gooti Yawelluro kevu nonyo'moneyokwe bret aikullamoka togano.” Kuudokaikono.

Mollurolovomato 16:15 Referans Kwoze

Mollurolovomato 16:4

Toro wuujuno sumaveyokwe Gooti Yawel Moosesollu aro kuudokaikono. “Moro yodo'mure tovida'ai bret pun muunyu kai'muuda'ai buuruko to'busuko bwolovodapinogano. Toro bwolovoda'mdowo'jure iruko su tollugwoji kevu nokwo nonomwallo'mo toru'aro to'no domollu'bworomarogaulo. Toro aduuwimo yogalo akav a'mwo abolo tonyu wiyoganyo'mokwono. Moro yogalo tovi kuvinono uumjunpinodukono oo muumjunpinodukono. Toro tovino youromallo'mo toonyu yamju akav kuubwemono.

Joon 6:58

Muunyu kai'muuda'ai bret tov su torokwono. Aiyoga kemi tellukweyago tooro muunyu kai'muuda'ai bret mana wolaboduke tovi amanyajupo su ton me'no abolopogano. Toro kuvi kuruv muunyu kai'muuda'ai bret kwolabingiko akavino'gwowi a'mwo pwol amano'ji tov aiyo yiunokuudo mujomwekovla'mwalonekono.” Kuudokaikono.

Mollurolovomato 16:31

Isuraiyolda'ai a'mwo abolo ton wosamujuko anyajupo su tovino yovo tov Manavo sowaropokwono. Bret mana su tov mekwako punyuro wiyo buraujo'moneyokwe sulo pullovobusukokwono. Aki toro tov wiya'jokwono. Gamoro wuullo tov flauwa ton tamwallugwolamdo podopto togai iralodupudo to'busuko wuullokweyokwono.

1 Koorin 10:3

Aki Gooti tool muunyu kai'muuda'ai wosamujuko tov gavnokweyolluro jurogudo tokwe wiyoduke tovida'ai yiuwi'nokai su ton aval'no anyajupogano.

Joon 6:49

Aiyoga kemi tellukweyago ton kwako a'mwomaiyo yalukullo toru bret mana tovi anyajupo su ton me'no abolopiyopogano.

Jagillo 21:5

Toro ton Gooti Yaweke Mooseseke toorallu mebweyogalo aro kuudopogano. “Kev toorakul nemi Ijupda'ai kwako a'mwomaiyo kuu'maiyo akaru bolpino'moneyokwe anekumokabadokuulo tov buro'nyo kavlo tovino'mdeyo? Kwako anekumokabadokuulo akaru wosamujuko togai'aro wonyo togai'aro nonagutorukono. Aki bret mana kwoda'mollunyo akarai nodowa biyolo anekuu'nadopiyo.” Kuudopogano.

Mollurolovomato 16:33

Toro wuujuno sumaiyokwe Moosesol Eroonollu kuudokaikono. “Guu soospen puuwa maro'bi bret mana pun domollurosono. Toro molluroso'bi nemi nellukweyago kwoloraiyo lukomgu sumo'nupi ton wonpino'moneyokwe Gooti Yawelluro sumdollu toru doosono.” Kuudokaikono.

Adodolukuu'nosungiko 2:17

A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromaronekono. Kuuguudo su tov arokwono. A'mwo pwol Satanyolluro molo tovi kuuwolowo'ji tool bret mana pun kwimi tonyu nononekono. Bret mana su tov Gooti toolluro ago muunyu kai'muu yiulo tomuu wo'dowodokwono. Aki a'mwo kuuwolowo'ji su toollu nuu sulo wiya'jo tollugwo nuuwimonyugono. Sulo su tollugwoji yovo muuduko puruv puukwollo me'no sokwollosungikokwono. Yovo muuduko su tovino a'mwo yasuwa'no pwolnodo kwol kuruv kuudo ku'nono miyouromaronekono. Toro kuvi kuruv yiuno sulo su tollugwoji amaro'ji toolno yovo muuduko su tovino kuudo nokwo youromaronekono.”

Hibruu 9:4

Gooti Toolluro Pwekwapto Kuunodo su toru wobeya sudo kuunyokwe i'mujako tovi iroudapiyo'moneyokwe dukwagupto tokwe'aro subuu'yamjo'mo bookis tokwe'aro toval wo'dubulorukono. Bookis su tovuro yiuwi'nokai tomuu yiuno gool tokwe suropingikokwono. Aki soospen puruv bret mana tokwe surosungiko tov bookis su tovi anakuuto tomuu aullu'nallajukokwono. Aki Eroonolluro yodeko sodolokwe tokwe'aro aki Gooti toolluro subuu'yamju sokwollosungiko sulbweko tovake'aro su ton bookis tovi anakuuto tomuu aullu'nallajupogano.

Luuk 12:30

Kuudo neya jaullulo. Yiuwi'nokai kwako akavida'ai a'mwo abolo ton noonyumwonyu su tonyuno movomjai'nodupudogano. Toro kuvi kuruv kemi Tellunumiyago muunyu kai'muuda'ai toolno'gwowi kemoro yiuwi'nokai supto yodupudo su tonyuno kuudo me'no youroma'dowodekono.