Luuk 6:8 - Gooti Toolluro Yogalokwono

⁸ Toro kuvi kuruv Jisasol a'mwo su toro kuudo souromuugonallajupo toorai me'no suworovomarokaikono. Toro iworovoma'no sumaiyokwe Jisasol a'mwo ato amuullugolopingikokwe tekwoji, “Boulodavono,” kuudokaikono. Toro tool aboulodavokaikono.

Luuk 6:8 Referans Kwoze

Adodolukuu'nosungiko 2:23

Aki abolo su tovuro kwoloraiyo wimo'nodupudo tonyu nuu noromiyosumonyugono. Su toro aromiyosumi toga moro yiuwi'nokai mollu'bwoto go'no go'nodo ton mino aro kuudo yanuupinogano. Oo Krais tool yiuwi'nokai a'mwo abolo pwolno puru'monodo tonolluro kuudo togai'aro poowokalago togai'aro tonyu youranekwonodowodekono. Aki toro tool yiuwi'nokai pwolno puru'monodo tonolluro pasudo yodowado tonyuno mubiyo tov nonekubweyonoldeyo. Mino su toro kuudo yanuupinogano.

Matyuu 9:4

Toro kuvi kuruv Jisasol a'mwo su tooravuro kuudo yau'dopure tovi youroonyuno sumaiyokwe aro kuudokaikono. “Kemoro poowokalago tonyu kirovanyuvanyu kuudo tooro kuulaikwo'dupudo tov buro'nyo'mo'mdeyo? Su toro kuulaikwo'dupudo tov kavlo nonagutokwono.

1 Pita 4:1

Krais tool gamoro kulako tovi dado pun me'no amallajukekono. Toro to'busuko kubalno kev kugaikul kuruv kemoro kulako togai dado pun noma'mwalpinogaikikono. Toro tovino kevu neya jovrowosunogaulo. Kevu jurogudo imo'nyo'moneyokwe Krais toolluro kuudo saullajuko aval'nodo tomgu'aro neya jaurogaulo. Neya duu'nyulo. A'mwo pwol Krais toollu me'no uuguro'mwonyodowodo tovida'ai gamoro kulako tovi dado amaro'ji tool ma'no ma'no pasudo amjumelabiyajuko toorai me'no yuu'dapiyodowodekono.

Hibruu 4:13

Aki yiuwi'nokai Gooti toolluro sokwollosoka ton gamoro sumdo tovida'ai yiulo puru'monodo kuruv miyoupuu'na'dupudogano. Toro kuvi kuruv yiuwi'nokai ton Gooti toolluro sumdo tovi yiuno kuu'maiyo toru'no bomollolupto'nosodupudogano. Toro tonyu Gooti tool pi'mwono youroonodowodekono. Gooti su tool nemoro pasudo tonyuno nojainyubworonekono. Toro ajainyubworo'ji toga nevnokwe tonol nemoro pasudo su tonyuno kavlo ton kuu'maiyo toru nododowiyoku'bworosunanonogano.

Filipai 1:28

Aki aro kuudo yaikuu'mwalmonyugono. Oo a'mwo abolo su ton ikomago pworavuro surugolpi kuvino kuruv luko miyodupudodeyo. Kuudo yaikuu'mwalmonyugono. Kevu luko miyodupudo su togaikullu ikomago tooro aikwonpi tov kevnokweraino kuu'maiyo toru'no aro wuuduuwallonorogano. Kevu du'muudo tomuuno novlapino'mo toorekikono. Toro kuvi kuruv kemino'gwowi avalo toga aro tovino ikuduuwallonokwono. Gooti tool kemi ma'no ma'nodo tovuro kirumwallo tovida'ai nobomollurolovekumokalokwonogaikikono. Su toro tovino ikuduuwallonokwono.

Kuurotokwe 26:26

Aki moro yiuwi'nokai adadokwo akan yiulo tomuu mimo'nyajupogano. Toro kuvi kuruv yiuno kuu'maiyo toru'no sumo'nyajupogano. Yiuwi'nokai nyumo'nugelabodopure tonyu a'mwo aguto kig Agripa'wol me'no kuu'nugelabiyajukekono. Toro tool moro yiuwi'nokai adadokwo akanyuno me'no youroma'dowodekono. Toro toolluno tov nuu guureji moruujo'mo tovino luko miyadokwono.” Kuudokaikono.

Kuurotokwe 20:24

Toro dodoluvanubweyodowodo tovino tov nuu aro kuudo yaullokwenyugono. Oo nuvnokwe toonyuno kuudo bwotonyo nyau'mwalmiyo. Aki mi aromiyanubwepi kuruv nokwo'mokwono. Nuu su toro tonyuno jul'nyo mibwosunodumdo kwonyu kuruv aro tovino kuudo kwolallo yourukwapiyokwenyugono. Oo mi Aguto Jisasolluro womdo anubweyoka tovi yiuno'no sopimi tov ilaiyo imonyugono. Mi Aguto toolluro womdo anubweyoka su tov arokwono. Gooti toolluro yasuwa'wino sugumaluko nekullabodowodo tovino kuuguudo sugudo tokwe moruudomollumwalmo'moneyokwenyugono. Mi Aguto toolluro womdo anubweyoka su tov torokwono.

Joon 21:17

Aki lukomgu Jisasol pugasal puga toga aiko te aro kuudoganokaikono. “Joonolluro muugunyo Saimoonoloo, guu mino kalo buuropino gujunodowodekudeyo?” Kuudoganokaikono. Toro kuudoganoka toga'no'gwowi Pital jul'nyo subwosunokaikono. Su tov aro tovinokwono. Jisasolluro aro kuudoka tov, “Guu mino kalo buuropino gujunodowodekudeyo,” pugasal puga kuudoganoka su tovino Pital jul'nyo subwosunokaikono. Toro ibwosunyuno sumaiyokwe aro kuudokaikono. “Agutoloo, guu yiuwi'nokai noonyumwonyu tonyuno kuudo me'no youroma'dumdekugono. Toro tooku moro gumino kalo buuropino nyunodowodo su tovino kuudo me'no yanuu'dumdekugono.” Kuudokaikono. Toro kuudoka toollu Jisasol aro kuudokaikono. “Guu moro sipsip tobuurai wosamujuko neya duuwiyogawono.” Kuudokaikono.

Joon 9:4

Neya duu'nyulo. Bako tov kuuno pwopiyodowo'jure toga nuu mi amonuwopiyaboka toolluro womdo tonyu yere neya imwalmonyugono. Lukomgu dugumdo tov me'no aimwonyopiyo'ji toga'no'gwowi a'mwo pwolnodo kwol kuruv womdo ku'nono mimwalonekono.

Joon 2:25

Aki kuudo neya jaullulo. Jisasol gavnokwe tool yiuwi'nokai a'mwo abolo tonyuro pasudo kuuluuwo'dopure tooraino kuudo me'no souromallajukekono. Toro tovino tov pasudo su tooraino kuu'maiyo toru'no dodoluwoso'moneyokwe a'mwo pwolluno supto miyajukekono.

Luuk 5:22

Toro yajunodopure tooravuro kuudo tovi Jisasol me'no souroonokaikono. Toro youroonyuno sumaiyokwe aro kuudokaikono. “Kevu kemi poowokalago tonyu buro'nyo'mo su toro kuudo jourukwapimwakovo?

Luuk 6:9

Toro bouloda'mno sumaiyokwe Jisasol a'mwo kuudo souromuugonallajupo su toorai aro kuudokaikono. “Nuu yamuugojo aro ikudoganmo'monyugono. Nevu iruko Sabat tollugwoji pasudo nokwo yano tovino dojulo. Nevu sugudo yano'mdukono oo kaiya'no yano'mdukono? Aki nevu a'mwo toollu wiyo'mwojano'mdukono oo a'mwo toollu romiyosano'mdukono? Su toro tonyuda'ai nevu nokwo yano tov kevu neya dojulo.” Kuudokaikono.

Kuuguudo Sugudo akav Makolluro sakwollokakwono Mak 3:3

Toro yomuugona'dopure toga Jisasol ato amuullugolopingikokwe toollu, “Boulodavono,” kuudokaikono.

Luuk 13:12

Toro tobuullu Jisasol wonyuno sumaiyokwe gamiyomno abwoneyokweyo'mo adomarokaikono. Toro doma'no sumaiyokwe aro kuudokaikono. “Abolobuuloo, gumoro nobollo su tovida'ai irolo'nubino'moneyokwe agujukulmono.” Kuudokaikono.