Luuk 17:1 - Gooti Toolluro Yogalokwono

¹ Aki Jisasol gami uumjunyokwe toorai aro kuudokaikono. “Kevu ma'no ma'no pasudo tovi bwolollo'moneyokwe judo'no judo'no ton nobaiki'mopinogano. Neya duu'nyulo. Kevu a'mwo pwolluro yodowo'jure tovi'aro abwolorapi tov a'mwo su tool tabunyu bwotonyo nomaronekono.

Luuk 17:1 Referans Kwoze

Matyuu 18:7

Toro te kwako akavida'ai a'mwo abolo ton a'mwo abolo pubuurai ma'no ma'no pasudo tovi ipureyokwe ai'nomapi tov tabunyu bwotonyo nomapinogano. Nebal'nodokwono. Buro'nyo buro'nyo pasudorodeyo su tooraida'ai a'mwo abolo ton ma'no ma'no ipureyokwe kuvinono ne'noma'mwalonogano. Toro te a'mwo pwol a'mwo abolo pubuurai ai'nomaro'ji su toolno'gwowi tabunyu bwotonyo nomaronekono.”

1 Koorin 8:13

Toro te nuvu sa'aiyo kuunano gooti toorai kwiroudapingiko tovi nodumdo toonyu Jisasolluro a'mwo pwekwo nuwonowo'ji moro nodo'mure tovi'aro yello nyove'namowo'jokwe tov nuvu sa'aiyo su tovi aki aiko te manmwalmonyugono. Krais toolluda'ai mi avalo nyumo'nodowodo su tekwo nobwolorawo'jokwe tovino tov nuvu sa'aiyo su tovi yiunokuudo manmwalmonyugono.

Room 14:13

Toro te nevu Jisasolluro a'mwo abolo pubuuravuro yodupudo tovino, “Oo ma'no ma'no sadokwovo,” dodowado su tov akaro'aro neya imwogapiyowa'ji aro kuudo neya yaurogawano. Nemoro buro'nyo buro'nyo'mdeyo sa'ji tovasuda'ai nevuge avalo pubuuro ma'no ma'no yopi nobwolorapiyokwe wako neya au'nogawano. Kuudo yaurogawano.

1 Koorin 11:19

Aki aro kuudo sau'mwakono. Kemoro yeru'mdeyomwalodopure su tovida'ai nevu kuu'maiyo toru'no aro suworovekuma'mwakuuwono. Oo Gooti tool a'mwo abolo su tobuuraino ilaiyo domolloma'mwallo. Pugaikulluno yiuno kuu'maiyo toru'no su toro suworovekuma'mwakuuwono.

Room 16:17

Miyobuuravoo, kevu wako neya kuu'numwalpino'moneyokwe nuu guureji aro ikudumo'mokwono. A'mwo pworo kevu Jisasolluro a'mwo abolo tobuurekullu kaiyako molleru'mdovekwapiyo'mo winodupudorogano. A'mwo su tooro nemoro kuuguudo sugudo yodubwasodowado tovi muu'nyubusuko to'no yopi kisuvolo mujumovla'mdupudorogano. Kevu su toro toorai manyu toru'aro neya duuwiyogaulo.

Matyuu 16:23

Toro mojurugoloduke toga Jisasol yadu'mwonyuno sumaiyokwe Pitallu moroono'no aro kuudokaikono. “Satanyoloo, guu moro buulo tomgu'aro dovlavono! Gumoro kuudo sau'mwakudo su tov Gooti toolluro kuudo yau'dowodo tomgu'aro'maiyo. Toro kuvi kuruv kwako akavida'ai a'mwo pworavuro kuudo yau'dupudo tomgu'aro sau'mwakuno.” Jisasol Pitallu yogalo su toro amojurugolokaikono.

1 Koorin 10:32

Aki Juu a'mwo abolo togai'aro Juu tooravuro miyawosunodupudo togai'aro Gooti toolluro mollu'bwoto togai'aro tonyu kevu kaiya'no puru'monodo kuruv nyugolmwalpiyo.

Adodolukuu'nosungiko 2:14

Toro kuvi kuruv gumi yogalo pun aro mojurugologumollumo'monyugono. Aiyogasuro a'mwo pwolluno yovo tov Balamolekono. Toro tool a'mwo gabovo pwollu aro sodubwasajukekono. Isuraiyolda'ai a'mwo abolo ton ma'no ma'no yopi bwolorapino'moneyokwe guu neya dode'nomarogawono. Sodubwasajukekono. A'mwo gabovo su toolluno yovo tov Balakolekono. Toro tool Isuraiyolda'ai tonyu ki'nomallo'moneyokwe wosamujuko ton kuunano gooti toorai me'no kwiroudapingiko tonyu nonyo'mo tokwe'aro aki kwonyalo yo'mo tokwe'aro tovalluno sodubwasajukekono. Su toro yodubwasoduke tovida'ai Isuraiyolda'ai ton uumjunodupu kuunano gooti su toorai sulomoropiyajupogano. Agasuro kemida'ai a'mwo pworo Balamolbusuko pasudo su toorai aval'no yodupudorogano. Su toro yodopure toorai guu wonyapino to'no yodumdo tovino nuu yogalo amodagujurogolmono.

Adodolukuu'nosungiko 2:20

Toro kuvi kuruv gumi yogalo aro modagujurugolmo'monyugono. Abolo puruv moro a'mwo abolo womdokwe tobuurai ma'no ma'nodo tomuuno mogaibworomokavla'mdowodokwono. Toro mogaibworomokavla'mdowo'jure tovi guu wonyapino to'no yodumdekugono. Abolo su tov aguto kwin Jesebelo'busukokwono. Toro tov aro dodowodokwono. “Oo nuu proofet to'migono.” Dodowodokwono. Toro tov moro womdokwe a'mwo abolo tobuurai kuunano ibwaso tokwe youkuu'nuudodowodokwono. Toro tovuro youkuu'nuudodowo'jure tovi moro womdokwe pubuuro uumjunodupu kwonyalo yodupudogano. Aki wosamujuko pun kuunano gooti toorai ilomoropiyo'moneyokwe me'no kwiroudapingiko tonyu nodupudogano.

Luuk 16:31

Toro kuudoka kuvi kuruv Eburaiyamol kuudokaikono. “Moosesolluro yogalo tokwe'aro proofet tooravuro yogalo tokwe'aro su tonyu muu'nupi tov a'mwo bwiyo adukawo'ji toolluro wuudodowo'jure kuvida'ai kuruv muu'nupinorogano.” Kuudokaikono.”

1 Timooti 4:1

Gooti toolluro Kuullo tool aro tovino kuu'maiyo toru'no dodowodekono. Aiyowo'mo toga a'mwo abolo pun kuudo me'no uubweyodupudo tovi buulo nuugunyumopipinogano. Toro ton kuunano youkuu'najokwe kuullo toorai uumjunopi aki kuullo ma'no ma'nodo tooravuro ibwaso kunyu kuruv nuumjunpinogano.