Joon 8:47 - Gooti Toolluro Yogalokwono

⁴⁷ Neya duu'nyulo. Yiuwi'nokai Gooti toolluro kwoloraiyo kuunodo tobuuro Gooti toolluro yogalo tonyu kaduko wiyodupudogano. Toro kuvi kuruv kevno'gwowi Gooti toolluro kwoloraiyo mwimo'nodupudorekikono. Toro toorekulluno tov gamoro yogalo tonyu kaduko mwiyokwerekikono.” Kuudokaikono.

Joon 8:47 Referans Kwoze

2 Joon 1:9

A'mwo pwol Krais toolluno kuuguudo sodekubwasajuuwo tovi ku'nono magudupolaro'ji tov Gooti tool a'mwo su tooke mamwalodowodekono. Toro kuvi kuruv a'mwo pwol Krais toolluno kuuguudo sodekubwasajuuwo tovi kuvinono agudupolaro'ji toolno'gwowi Gooti Ganumiyago tooke'aro gamoro Kwolaiyo tooke'aro yiuwi'nokai tooral a'mwo su tooke mwalodubulorakono.

Joon 18:37

Jisasol toro wuujuno sumaiyokwe toga Pailatol aro kuudokaikono. “Guu a'mwo aguto kig pwekudukono?” Toro kuudoka tovi Jisasol aro kuudokaikono. “Mino tov, a'mwo aguto kig pwekono, anyudadokuudo su tov guvnokwe tooku kuvi anyudadokuuno. Nuvno'gwowi kwako akavi sonumaropo tov womdo yiuno puru'mono yo'moneyokwe tovino kwolabonyugono. Womdo su tov arokwono. Nuu nebaikuuguudo tokwe kuu'maiyo toru'no moruudomollo'moneyokwe kwako akavi kwolabonyugono. Toro te yiuwi'nokai a'mwo abolo nebaikuuguudo tokwe molluulnoda'mdupudo ton mi kaduko nyabodupudogano.” Kuudokaikono.

1 Joon 3:10

Kevu a'mwo abolo tonyuno Gooti toolluro kwoloraiyodukono oo Satanyolluro kwoloraiyoldukoneyokwe tovino kinodokwopiyomallo'moneyokwe tov kemoro pasudo tonyu'aro nokwo wonoma'mwalpinogaikikono. A'mwo abolo pun pasudo idopto'nodo ton mamjumovlapi tov Gooti toolluro a'mwo abolo mwimo'nodupudogano. Aki a'mwo abolo pun Jisasolluro a'mwo abolo pubuuraino kalo buuropino mwinpi kun kuruv Gooti toolluro a'mwo abolo mwimo'nodupudogano.

Joon 8:45

Nuvno'gwowi nebal'no yogalo to'no ikudodumdonyugono. Toro ikudodo'mure kuvi kuruv kevu kuudo manubweyodupudorekikono.

Joon 8:37

Nuu kuudo nyaikuu'mwakono. Kevu Eburaiyamolluro kwikweyago kwoloraiyorekikono. Toro kuvi kuruv kemida'ai pworekul mi romiyanubweyo'moneyokwe puuto tovino a'mgono sadokwoporekikono. Su tov aro tovinokwono. Kevu kemoro poowokalago ton kudo'aiko mausosodupudo tovino tov moro yogalo ton ku'nono maulaikwo'dowodorekikono.

Joon 8:43

Kevu moro yogalo ikudodumdo tonyuro kavlo tovi kuudo miyouroma'mwakopo tov aro tovinokwono. Kevu moro yogalo ikudodumdo tonyu ilaiyo mamolloma'dupudo tovinokwono.

Joon 6:65

Toro te Jisasol aro kuudokaikono. “A'mwo pwol miyomno biyo'moneyokwe tov yiuno moro Nyunumiyago toolluro kudo'aiko me'no ausubweyo'ji su toolno numiyomno nokwo bwonekono.” Kuudokaikono.

3 Joon 1:11

Mi ibwoto'nyekwonoo, guu a'mwo su toolluro kaiya'no pasudo guduuwallodowo'jure toorai nuumjunmwalbiyo. Toro kuvi kuruv guu sugupasudo tonyuno'gwowi neya duumjungovlavogawono. Aki aro tovino kuudo nyallulo'gwonmwalbiyo. A'mwo sugupasudo mujumovla'mdowodo pwol Gooti toolluda'ai billumo'nodowodekono. Toro kuvi kuruv a'mwo ma'no ma'no kiroungovla'mdowodo pwolno'gwowi Gooti toollu miyouroonomallokwekono.

1 Joon 5:1

A'mwo abolo pun aro kuudo uubweyodupudogano. “Oo Jisasol Gooti toolluro amonekwopiyaboka Krais tool kwekono.” Yiuwi'nokai su toro kuudo uubweyodupudo ton Gooti toolluro kwoloraiyo wimo'nodupudogano. Aki yiuwi'nokai a'mwo abolo su ton kemi Kuunumiyago toolluno kalo buuropino winodupudogano. Toro winodupudo su ton kemi Kuunumiyago toolluro kwoloraiyo kubuuraino kuruv kalo buuropino winodupudogano.

Joon 5:25

Aki nuvu nebal'no kuunodo aro ikudumo'mokwono. A'mwo abolo bolodupudo ton Gooti toolluro Kwolaiyo toonyuro yogaimaguurai tovi wuu'nyo'moneyokwe toga nobai'mowonokwono. Su toro wuu'nyo'mo tov aga toga me'no abai'mo'mokakwono. Toro te a'mwo abolo bolodupudo ton Gooti toolluro Kwolaiyo toonyuro yogaimaguurai tovi kuu'nupi ton aiyo nomjomwekovla'mwalpinogano.

Joon 12:48

Toro kuvi kuruv a'mwo pwol mi buulo nuugunyumopiyowo'ji moro yogalo tovi kisuvolo nyonekono. Moro yogalo moruudodumdo ton a'mwo kisuvolo so'ji su toollu nojainyubwopinekono. Toro te iruko aiyowo'mo toga moro yogalo ikudodumdo su ton kooti yogalo mollomwalokwe to'busuko nuuwimo'nupinogano.