Joon 20:19 - Gooti Toolluro Yogalokwono

¹⁹ Toruda'ai iruko Sande su tollugwojuro sulato toga Jisasolluro uumjunyokwe tooro ago puvi aullu'bwo'nomwaloporogano. Toro tooro Juu tooraino luko sopo tovino tov kudo'aiko tovi guureji momjoguropino sumaveyokwe aullu'bwo'nomwaloporogano. Toro kuullu'bwo'nomwalodopure toga Jisasol anakuuto tomuu kuullalo'nyuno sumaiyokwe uumjunyokwe su tooravuro akuuto toru davo'no aro kuudokaikono. “Kemoro sumwoluko ton kavo to'no doosunyulo.”

Joon 20:19 Referans Kwoze

Joon 20:26

Toruda'ai 7-pela iruko pubuul me'no abawoka toga Jisasolluro uumjunyokwe tooro ago puvi aiko te aullu'bwo'nomwaloporogano. Su toro toga Toomasol kworogai aullu'bwo'nomwalokaikono. Toro kuullu'bwo'nomwalno sumaveyokwe kudo'aiko tonyu guureji momjoguropiyo'mno aulomwaloporogano. Toro kuulomwalodopure toga Jisasol kuullalo'no'no kworavuro akuuto toru aulodavokaikono. Toro kuuloda'mno sumaiyokwe aro kuudokaikono. “Kemoro sumwoluko ton kavo doosunyulo.”

Joon 14:27

Oo kevu sumwoluko kavo wosunmwalpino'moneyokwe tov nuu kemi ikubweyo'mi ikugollu'mo'monyugono. Sumwoluko kavo wosunyo'moneyokwe su tov a'mwo abolo kwako akavi mwalodupudo ton ku'nono maikullabupinokwono. Toro kuvi kuruv nuvnokwe toonyuno'gwowi moro sumwoluko kavo wosunyo'moneyokwe tov kemi aikullamono. Toro te kemoro poowokalago ton jul'nyo mibwosunpinono. Aki toro toorekul luko mipinono.

Joon 20:21

Toro yodopure toorai Jisasol aki aiko te aro kuudokaikono. “Kemoro sumwoluko ton kavo to'no doosunyulo. Moro Nyunumiyago tool mi amonuwopiyabokaikono. Toro to'busuko kubalno nuu kev kworekullu kuruv a'mwo abolo kwako akavi mwalodupudo tonyomno amekwapimono.” Kuudokaikono.

Efesos 2:14

Sumdomgu nevu Juu tonogai'aro kevu a'mwo abolo Juu toonolluro miyaikuuwosunodowado togaikike'aro tonol ikomago sunyajuwonogano. Nemoro ikomago sunyajuuwo pasudo su tov akuuto toru kuurupto to'busuko anekuwollajukokwono. Toro nekwo'duke kuvi kuruv Krais tool gavnokweyolluro kulako aboloka tovi'aro kuurupto su tovi yiunokuudo airowo'dolapiyokaikono. Toro kirowo'dolapino sumaiyokwe nevu judo'no judo'no amwallajuuwo kunollu kuruv sumwoluko yiuno puru'mono wosunyo'moneyokwe avalo toru amogurokuuranekubweyokaikono. Toro te aga'no'gwowi nevu yiuwi'nokai tonol sumwoluko puru'mono wosunyo'moneyokwe tov Krais Jisasol me'no anekumokabokakwono.

2 Tesaloonaika 3:16

Oo Aguto tool sumwoluko kavo wosunyo'moneyokwe tov yiuwi'nokai toga kemi nekubwemwalonekono. Toro te buro'nyo buro'nyodeyo pun kemi aikullumo'no'ji toga gamoro sumwoluko kavo wosunyo'moneyokwe tov nokwo ikullamwalonekono. Aki Aguto tool kevu yiuwi'nokai togaikike nokwo mujomwekovla'mwalonekono.

Joon 7:13

Toro sajunopo kun kuruv Juu a'mwo aguto tooraino luko sajupogano. Toro tovino tov a'mwo pwolnodo kwol kuruv Jisasolluno yogalo jo'moneyokwe kemi mago tokwe kuu'maiyo toru maraiyajupogano.

Kuuguudo Sugudo akav Makolluro sakwollokakwono Mak 16:14

Toruda'ai a'mwo 11-pela tooro noulonomwalodopure toga Jisasol kemoro sumdollu toru abwiyalo'nokaikono. Jisasol gamoro adukavoka tovino a'mwo abolo kwonopo tonyuro dodolubweyodopure tovi kuudo muubweyajupo tovino yogalo amojurugolokaikono. “Kevu kemoro poowokalago ton lumdo kuulopiyodupudo toorekul mino kuudo manubweyodupudorekikono.” Amojurugolokaikono.

Adodolukuu'nosungiko 1:4

Nuvu Joononyu kevu kwako Esiya tomuuda'ai Jisasolluro 7-pela mollu'bwoto go'no go'nodo togaikullu pas akav sokwollekwopiyamono. Toro togaikulluno nuvu aro nyunodowodonyugono. Gooti tool gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo ikubwemwalonekono. Agasuro Gooti mwalodowodo su tool aiyoga amjomwekelabiyajukekono. Aki lukomgu kuga kuruv kuuno mujomwekovla'mwalonekono. Aki Gooti toolluro Kuullo kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo aikubweyogawono. Gooti toolluro Kuullo su tool 7-pela kuullo toorobusuko imo'nodowodekono. Toro tool Gooti toolluro sia kig tovi sumdollu toru ilomwalodowodekono.

1 Koorin 15:5

Lukomgu Krais tool me'no dukaino sumaiyokwe Pitallu kwiyalo'nokaikono. Toro wiyalo'nyuno sumaiyokwe lukomgu 12-pela kuurotokwe toorai kwiyalo'nokaikono.

Joon 16:33

Toro te moro yogalo aikudumo su tov aro tovino'mokwono. Kevu mi nuguro'mwonyodupudo toorekul sumwoluko kavo to'no nokwo wosunmwalpinorekikono. Toro kworekul kuruv kwako akavi kuuno amwalpi toga jul'nyo tagunyo bwotonyago ton noma'mwalpinorekikono. Toro amapi kuvi kuruv nuvno'gwowi yiuwi'nokai kwako akavida'ai jurogudo tonyu me'no kuuwolovonyugono. Toro tovino tov kemi poowokalago ton jurogudo nokwo jumo'nogaulo.” Kuudokaikono.

Hibruu 7:2

Toro duubweno sumaiyokwe Eburaiyamol yiuwi'nokai kuto ivito aikomgu avipolomokaboka tonyu mollu'bworosuno sumaiyokwe atousal amomuudeyosokaikono. Toro te Eburaiyamol kuto ivito atousal amomuudeyosoka su tonyuda'ai puruv Melkisodekollu kwiyokaikono. Melkisodekolluro yovo tovino kavlo puruv arokwono. Aguto kig su tool pasudo idopto'nodo to'no yomjomwekovlaiyokwekono. Aki kavlo puruv wagwolago Salem tovuro aguto kig sumo'nyajukekono. Toro toolluro yovo su tovino aro mollovodo'mwojadodupudekono. Aguto kig su tool sumwoluko kavo wosunyo'moneyokweyolekono.

Filipai 1:2

Nemi Nellunumiyago Gooti tooke'aro nemi Aguto Jisas Kraiseke'aro tonumdalluro yasuwa'wino sugumaluko tovida'ai pun kemi nokwo ikubwemwalbullunonumdakono. Aki kemoro sumwoluko ton kavo wosungovlaiyo'moneyokwe nekullo'mwojumwalbullunonumdakono.

Efesos 6:23

Oo miyobuuravo, kevu sumwoluko kavo to'no neya dousunogaulo. Aki kevu yiuwi'nokai Jisasolluro a'mwo abolo tonyuno kalo buuropino domollogaulo. Aki toro togaikul Jisas Kraisolluno kuudo uubweyodupudo tovi guureji neya dogudupolarogaulo. Kevu yiuno Gooti Ganumiyago tooke'aro Aguto Jisas Kraiseke'aro tooralluro jurogudo ikubweyodo'bule tokwe kuvinono nokwo mujumovla'mwalpinogaikikono.

Room 15:33

Oo sumwoluko kavo wosunyo'moneyokwe nekullabodowodo Gooti su tool kevuge nokwo mujomwekovla'mwalonekono. Nebal'nodokwono.

Joon 16:22

Yovekurajo su to'busuko kubalno kevu aga toga kalo aikullunadopiko kuvi kuruv lukomguno'gwowi nuu kemi aiko te nekwonmonyugono. Su toro toga kemoro poowokalago ton ilaiyo bwotonyo ipinorekikono. Aki kemoro ilaiyo ipino su tovi a'mwo pwolnodo kwol kuruv ku'nono mamaikudukwopiyonokwono.

Matyuu 18:20

Neya duu'nyulo. A'mwo pworalo'mdeyo oo pworapwolorodeyo tooro mino yovo tovi su'bwo'nomwalpi tov nuu a'mwo su to kworai akuuto toru mwalodumdonyugono.” Jisasol toro kuudokaikono.

Matyuu 10:13

Ago su tovi kuulomwalodupudo ton kemi ilaiyo saikullugolpi tov kevu Gooti toolluro sumwoluko kavo wosunyo'moneyokwe yogalo tov kunyu nokwo duubwemwalpinorekikono. Toro kuvi kuruv kemi ilaiyo miyaikullugolpi to'gwowi kevu Gooti toolluro sumwoluko kavo wosunyo'moneyokwe yogalo me'no aduubwepi su tov mo'mweyado neya yomapinorekikono.

Joon 21:1

Toruda'ai Jisasolluro uumjunyokwe pworo wonyo buugo Taibiriyosovi wobo toru mwalodopure toga Jisasol aiko te aro tomgu'aro kwiyalo'nokaikono.

Joon 21:14

Jisasol aiyo aiko te me'no dukaino sumaiyokwe toga nevu gami uumjunyokwe toonollu pugasal me'no sanekulo'nokaikono. Toro yanekulo'nyuno sumaiyokwe akaro togasuro aiko te nemi sanekulo'noka su tov pugasal puga sumo'nokakwono.

Kuurotokwe 1:3

Aki Jisasol yere maboloduke toga sumdomgu danyu'nyuwuulo ton ibwosuno'no abolokaikono. Toro tool aiyo aiko te dukavo'no gami a'mwo kuurotokwe toorai kwiyalo'nyajukekono. Toro wiyalo'nodowo aguto kig Gooti toolluro mido mollomwalo tovi dolago tomuu mwallo'mo tovino sodubwasajukekono. Toro wiyalo'nodowo yodubwasoduke toollu wonodupu kuudo noullo maullo miyaullajuporogano. Toro kworo kuruv aro kuudo saullajuporogano. Oo nebalo'mdeyo, aiyo aiko te aduka'moka tool domwallo. Kuudo saullajuporogano. Toro toorai wiyalo'nyuno wiyalo'nyuno sumaiyokwe iruko 40-pela tobuul kuuwolo'nokaikono.

3 Joon 1:14

Nuu wobo toga gumi boguru'mallo'mo tovino sogwollo ainadokwono. Aki nuu kuvinono aboguru'ma'mi toga navu imgu amgu sumdomago tokwe yainyunowosi kuuguudo nokwo dosunonakono.