Toro te Krais tool i'noguropte tovi aboloka tovino kuuguudo su tokwe nevu moruudomollodowadonogano. Toro moruudomollodowa'jure toga Juu tooro kuuguudo su tovi wuu'nyo'mo kwoda'molo to'no yodupudorogano. Aki Juu tooravuro miyawosunodupudo kun kuruv aro dodupudogano. “Oo Gooti toolluro kuuguudo tov yiuno junoruko pworavuro yasuwa'yogalokwono.” Dodupudogano.
Galesiya 5:11 - Gooti Toolluro Yogalokwono11 Mi avalobuuravoo, aga'no'gwowi a'mwo tooro lakulkulako neya ado'nupureyokwe tovino nuu mamoruudodumdonyugono. Nuu su toro tovino kuuno amoruudo'mujuko'mno'juki a'mwo pworo mi kaiyako miyanyugolopujukonyugono. Aki Krais toolluro i'noguropte tovi aboloka su tovino kuuguudo tokwe nuu mamoruudo'mujuko'mno'juki a'mwo su toorai surodo mi'gwolo'mujukonyugono. Toro kuvi kuruv nuu Krais toolluno kuuno moruudodumdonyugono. Toro moruudodore tovi wuu'nyo'mo mwinodupudo su tooro mi kaiyako yanyugolodupudorogano. Gade chapit la |
Galesiya 5:11
17 Referans Kwoze
Neya duu'nyulo. A'mwo pworo lakulkulako do'nyo'mo tovino guureji dumuurolo'mdupudo su tooraino nuu me'no aikudumonyugono. A'mwo su tooro Juu a'mwo abolo punyu ilaiyo igollo'moneyokwe aro dumuurolo'mdupudorogano. “Kevu a'mwo toorekul lakulkulako neya dodo'nogaulo.” Dumuurolo'mdupudorogano. A'mwo su toro dumuurolo'mdupudo tooro aro tovino luko yodupudorogano. “Oo nevu i'noguropte tovi aboloka Krais toolluno kuuguudo tokwe amoruudomolla'ji tov nemi kaiyako nyanekullugolpiyo.” Luko yodupudorogano. Toro tovino tov a'mwo su tooro kev tekwojekullu lakulkulako neya do'numwalpino'moneyokwe daikumuurolo'mdupudorogano.
Kuudo neya jaullulo. Kwolaiyo Isumaiyolol kwako akavida'ai tonyuro yawosunodupudo tomgu'aro sumo'nokaikono. Toro tool Gooti toolluro Kuullo toolluro jurogudo tovida'ai sumo'noka kwolaiyo Aisakollu kaiyako sugollajukekono. Su toro to'busuko kubalno aga a'mwo abolo Moosesolluro loowo tovi gudupola'dupudo su ton kevu Gooti toolluro Kuullo toolluro jurogudo tovida'ai gamoro kwoloraiyo imo'nodupudo togaikullu kaiyako yaikullugolodupudogano.
Aki nevu Krais toollu guureji uumjunodowado tonollu kaiyako yanekullugolodupudonogano. Toro kuvi kuruv a'mwo abolo me'no bolodupudo tobuuro aiyo aiko te madukaiyo'mo'mno'juki nevu aro kuudo saurowa'jujukonogano. Oo nemi kaiyako nyanekullugolpiyokwe nevu Krais toollu guureji muumjungovlawanonogano. Kuudo saurowa'jujukonogano.
Aki kwolallo su tonyuro pun gumino puu'yogalo aro bomjodumoulodapudogano. Poolol Moosesolluro loowo tonyu muumjunyo'mo tool molluduvolno yokwekono. Toro tool Juu pworai yodubwasodowodekono. Juu su tooro a'mwo Juu toonolluro miyawosunodowado pworai wobo toru mwalodupudorogano. Toro mwalodopure toorai aro yodubwasodowodekono. Kevu Moosesolluro loowo tonyu dodukwopiyogaulo. Aki kemi kwolaiyo tooravuro lakulkulako ton mamado'mwalpinorekikono. Aki nevu Juu toonolluro pasudo judo'no judo'nodo tonyu muumjunpinono. Poolol toro yodubwasodowodekono. Gumino puu'yogalo su toro bomjodumoulodopure tovi bwotonyago ton me'no wuu'nopiyodupudokwono.
A'mwo pworo mi galogunyukuuronumollodopure tovida'ai imuulo pun moro kulako tovi nuwo'dupudogano. Imuulo su ton aro tovino kuu'maiyo wuuduuwallo'mogano. Nuu Krais Jisasolluro kuunodonyugoneyo'mo tovino wuuduuwallo'mogano. Toro kuvi kuruv agada'ai a'mwo pworo jul'nyo kuuno nubweyo'mo yodopure su toorai kevu neya duumjukurogaulo.
A'mwo abolo pun kaiyako i'nyo'moneyokwe puuto tovi pla'mdupudogano. Toro pla'mdupudo su ton i'noguropte tovi aboloka Jisasolluno kuuguudo tovino aro dodupudogano. “Oo kuuguudo su tov junorukuudokwono.” Dodupudogano. Toro dodupudo kuvi kuruv Gooti tool nemi du'muudo tovida'ai amollurolovonekuma'mwalluko tonolno'gwowi junorukuudo manekullumo'nodowodokwono. Toro kuvi kuruv Jisasolluro i'noguropte tovi aboloka tovino kuuguudo su tov aro bomollolupto'nanekubweyodowodokwono. “Oo Gooti tool jurogudoldeyo.” Bomollolupto'nanekubweyodowodokwono.
Toro galomwora'no sumaveyokwe deko aro adopogano. “Isuraiyolda'ai a'mworavoo, kevu bopi banekullo'mwojulo! A'mwo akal nemi kaiyako maluko mojugolanekumeyokwekono. Toro tool yiuwi'nokai yomollodowodo tomuu a'mwo abolo tonyu nemi bwolomonekumwogapiyo'moneyokwe kuuguudo yodubwosumollodowodekono. Nevu Isuraiyolda'ai tonogai'aro Moosesolluro loowo togai'aro aki Gooti toollu ilomoropiyo'moneyokwe ago akakwe'aro tonolluno bwolomonekumwogapiyo'mo yogalo yodubwosumollodowodekono. Aki toro tool puga a'mwo Juu tooravuro miyawosunodupudo pworai Gooti toollu ilomoropiyo'moneyokwe ago tovuro agwapto akavi yasuwa'no amokaulabokaikono. Toro amokaulaboka tovino tov Gooti toolluro pwekwapto akaru kaiyako sugolamovokaikono.” Adoporogano.
Toro toolluno tov Poolol a'mwo su toollu mokavlaiyo'mo kwinokaikono. Toro winyuno sumaiyokwe aro adokaikono. “Nuu Timootiyolluro lakulkulako tov neya amado'mo.” Poololluro toro adoka tov aro tovinokwono. Wagwolago su towaida'ai yiuwi'nokai Juu mwalodupudo tooro Timootiyollu ganumiyago toolluno aro kuudo youroma'dupudorogano. Oo Juu toonolluro miyawosunowo Grik a'mwo su tool gami lakulkulako tov mado'nokaldeyo. Toro kuudo me'no youroma'dupudo tovino tov Poolol aro kuudo saurokaikono. Timootiyolluro kuuguudo wuudodowo'jure tovi kaduko mwipinorodeyo. Toro kuudo yau'no sumaiyokwe kaduko nokwo wimwalpino'moneyokwe Poolol Timootiyolluro lakulkulako tov amadovokaikono.
Oo Galesiyada'ai Jisasolluro a'mwo abolo togaikul junorukuudo yau'dupudogaikikonoo! Numoro me'no sodekubwasajo tovida'ai Jisas Kraisol i'noguropte tovi amovoguroptowosopo tovino kuu'maiyo toru'no me'no abomollulupto'naikubweyowokwono. Toro tovi kevnokwe togaikulluro sumdo tokwe me'no kwonomaropogaikikono. Toro kuvi kuruv a'mwo pworavuro kuunano youkuu'naikudodopure tovi kevu kaduko me'no kwimwakopogaikikono.
Piblisite