Filipai 2:16 - Gooti Toolluro Yogalokwono

¹⁶ Gooti toolluro yogalo tov aiyo yiunokuudo mujomwekovlaiyo'moneyokwe tov wiyodowodokwono. Yogalo su tovi kevu guureji neya dogudupolarogaulo. Kevu kuvinono agudopolapi tov Krais tool aikomgu kwolabwo'ji toga nuu kemino aro kuudo yau'monyugono. Oo moro dukwogulo sumo'nallajo tokwe'aro womdo bwotonyo sajo tokwe'aro su toval yasuwa'no mavlaiyajulovaldeyo. Kuudo yau'monyugono. Toro kuudo yauro'mi kemino ilaiyo nokwo imwalmonyugono.

Filipai 2:16 Referans Kwoze

1 Koorin 9:26

Aki a'mwo pwol resis tovuro aiyowo'mo do'gwapi tomuu kuulai'meyo'mo tool sumdo yasuwa'nodo tomuu miyenomollowo'ji yiuno ido'nyuno kano kano kuulawonekono. Su toro toolbusuko kubalno nuvu Gooti toollu po'dogalo uumjunodumdonyugono. Aki a'mwo pworal sumwonyo yo'moneyokwe kemi ato tokwe molo sunbullu toga yasuwa'nodo tomuu maromiyodubulorakono. Toro kuvi kuruv a'mwo pwol a'mwo pwollu kinamjowo'ji iwago yiuno'no romiyodowodekono. Su toro to'busuko kubalno nuu Gooti toolluro womdo nubweyodowodo tovi kuvinono kinomjumovla'mdumdonyugono.

Galesiya 2:2

Moro su toro amokavlavo tov aro tovinokwono. Gooti tool wojo to'busuko tovi'aro biyanyulo'nyuno sumaiyokwe aro anyudokaikono. “Guu wagwolago Jeruusalem tomuuno neya dovlavono.” Toro anyudoka tovino tov nuu kumuuno avlavonyugono. Toro plaino sumoneyokwe Jeruusalemda'ai Jisasolluro a'mwo yovokwe pworai kuuru'maronyugono. Toro toorai wuuru'ma'no sumoneyokwe judo tomuu su'bwo'nomwalowonogano. Toro i'bwo'nomwalno sumawoneyokwe a'mwo kuuru'maro su toorai kuuguudo sugudo tov nuu Juu miyawosunodupudo tonyu amoruudomollajo tovino kuudonyugono. Su tov aro tovinokwono. Nuuge'aro Jisasolluro a'mwo yovokwe su toorogai'aro toonol go'no go'no nomdukuu'na'jo. Nevu kuvinono amdukuu'na'ji to'gwowi moro womdo sajo tov yasuwa'no plawonokwono. Aki moro lukomguda'ai womdo sumi kun kuruv yasuwa'no plapinogano. Su toro nyumo'no'jokwe tovino tov nevu yiuwi'nokai toonol i'bwo'nomwalno sumawoneyokwe kuuguudo adomwalowonogano.

1 Joon 1:1

A'mwo pwol muudo'nodo togada'ai amwallajuko su toolluno nevu puukwollo sokwollaikubwemwakuuwono. Aki su tool aga kuga kuruv kuuno mujomwekovla'mdowodekono. Toro toolluro yogalo tov a'mwo abolo tonyuro poowokalago tonyu aiyo mujomwekovlaiyo'moneyokwe tov wiyodowodokwono. Aki toro toolluro yogalo tovi nevnokwe toonolluro kaduko tokwe me'no kuu'nowonogano. Aki toro toollu nevnokwenolluro sumdo togai me'no kwonowonogano. Aki toro toollu nevnokwenolluro ato tokwe me'no kuubogai'nowonogano. Toro toolluno to'no nevu moruudodowadonogano.

Joon 6:68

Toro kuudoganoka tovi Saimoon Pital aro kuudokaikono. “Agutoloo, nevu agugollu'mowa'ji tov ala'mwollomno plawanonoldeyo? Guu tookuno'gwowi aiyo yiunokuudo mujomwekovlaiyo'moneyokwe yogalo tov mwora'dumdekugono.

1 Tesaloonaika 3:5

Toro kuvi kuruv nuu kemino tov aro tovino luko sonyugono. “Oo a'mwo abolo su ton Satanyolluro yamju wiyoganoduke tovi nobwolorapiyo. Kuvinono abwolorapi tov kemi akuuto toru mwalowono nemoro womdo sajuuwo su tov yiuno yasuwa'no to'no plawonokwono.” Su toro tovino luko sonyugono. Toro tovino tov nuu kemino kuudo yourekumallo'moneyokwe sogwollo kuuno mainomwalodumdonyugono. Toro te tabunyuwuulo ton baiki'mo'mdopure toga kemoro kuudo uubweyodupudo tovi kevu buulo me'no uugunyumopiyodupudogaikuldukono oo muugunyumopiyodupudogaikuldukono? Su toro tovino nuu kuudo yourekumallo'mo tov Timootiyollu kemiyomno me'no amekwopiyabonyugono.

Joon 6:63

Neya duu'nyulo. Yiuno Gooti toolluro Kuullo judo toolno a'mwo abolo tonyu aiyo yiunokuudo mujomwekovlaiyo'moneyokwe tov wiyodowodekono. Toro te a'mwo abolo ton kevnokwenyuro jurogudo tokwe somjomwekovlapi tov ku'nono mwiyo'mwoju'nupinogano. Toro kuvi kuruv yiuno moro yogalo aikudadokwo su tovi'aro to'gwowi Gooti toolluro Kuullo tooke'aro aiyo yiunokuudo mujomwekovlaiyo'moneyokwe tokwe'aro toval nomapinogano.

Luuk 12:8

Aki Jisasol kuudokaikono. “Nuu aro ikudumo'mokwono. A'mwo pwol a'mwo abolo tonyuro sumdo tovi mino aro adodowiyoku'bworobweyo'ji tov, “Oo nuu su to kwolluno kuudo uubweyodumdonyugono.” Su toro adodowiyoku'bworobweyo'ji tov nuu A'mwo Kwolaiyo Kuunodo kwonyu kuruv Gooti toolluro ensel tooro sumdo muugonanuwo'dopure toru a'mwo su toolluno, “Morekono,” dodowiyoku'bworubwemonyugono.

Hibruu 4:12

Neya duu'nyulo. Gooti toolluro yogalo tov aiyo kurukweyokwono. Aki yogalo su tov womdo bwotonyo yodowodokwono. Gooti toolluro yogalo su tov molo'mo kwallu'mopto puul imgu amgu do'nyo do'nyo avairo'nyungiko tousi uuwolovowo'ji a'mwo abolo tonyuro poowokalago tovi juulowosodowodokwono. Kwallu'mopto su toul a'mwo abolo tonyuro suvlo'aru'wago tokwe'aro yogudo tokwe'aro tovallu do'mdowodo to'busuko kubalno Gooti toolluro yogalo tov a'mwo abolo tonyuro kuudo tokwe'aro kuullo tokwe'aro tovallu anakuuto tomuu kuuluuwo'dowodokwono. Gooti toolluro yogalo su tov nemi me'no kuulanekwo'dowodo tovino tov nemoro poowokalago tonyuro yiulkuudo yau'dowa'jure togai'aro nemoro noonyumwonyu pasudo pun yo'mo nekullunodowo'jure togai'aro su tonyu bomollolupto'nosowo'ji janekunyubwo'dowodokwono.

1 Pita 1:23

Kemoro aiyo tov kulako yere buuropiyodowodo tovi'aro sumo'nopogaikulmaiyo. Toro kuvi kuruv Gooti toolluro yogalo tovi'aro aiyo sumo'nopogaikikono. Yogalo su to'gwowi kaiyako mabuuropiyokweyokwono. Aki yogalo su tov a'mwo abolo tonyu aiyo yiunokuudo mujomwekovlaiyo'moneyokwe tov wiyodowodokwono. Gooti toolluro yogalo su tov yiunokuudo mujo'movla'mwalonokwono.

1 Tesaloonaika 2:19

Nemi Aguto Jisasol aikomgu kwolabwo'ji toga nevuge'aro kev kugaikike'aro tonol gamoro sumdollu toru guureji daiyo'mo tovino sogwollo kinodowadonogano. Aki guureji da'mdowa'jure kev togaikulluno ilaiyo yowa'ji aro ilomodomoropiyowanonogano. “Oo nevu kemi akuuto toru mwalodowa kuuguudo tokwe amoruudekumollajuuwo tov sulo me'no ai'nokakwono. Sulo su ton kev togaikikono.” Toro togaikulluno ilaiyo ilomodomoropiyokwenogano.

Galesiya 4:11

Toro togaikulluno nuu kuudo kwolallo aro yourukwapiyodumdonyugono. Oo kemi akuuto toru moro womdo sajo tov yasuwa'no avlaiyajuko'mdukono. Kuudo kwolallo yourukwapiyodumdonyugono.

Adodolukuu'nosungiko 22:17

Gooti toolluro Kuullo tooke'aro aki Sipsip Muugunyo toolluro abolo nomallo'mo tokwe'aro toval aro dodubulovakono. “Oo kevu Krais toollomno dobogaulo.” Dodubulovakono. Aki yiuwi'nokai a'mwo abolo kuuguudo akavi kaduko kwipi kun kuruv aval'no aro neya adupuro. “Oo Krais toollomno dobogaulo.” Adupuro. Aki a'mwo kuuleyaluko kwino'ji tool Krais toollomno nokwo abwono. Aki yiuwi'nokai a'mwo abolo ton wonyo aiyo yiunokuudo mujomwekovlaiyo'moneyokwe lokabodowo'jure tovida'ai nonyo'mo kwinpi su ton wonyo su tovida'ai yasuwa'no nokwo abanupuro.

Kuurotokwe 13:26

Poolol toro wuujuno sumaiyokwe aki aro kuudokaikono. “Nevugeravoo, nemi kirumwallo tovida'ai bomollurolovonekumokalokwiyo'moneyokwe amonekwopiyaboka Jisasolluno kuuguudo tov Gooti tool nemi me'no anekullabokakwono. Kuuguudo sugudo su tov nevu Eburaiyamolluda'ai bodowado tonogai'aro a'mwo abolo Juu toonolluro miyawosunodupudo pugaikul Gooti toollu dolago tomuu mwalodupudo kugaikike'aro tonollu anekullabokakwono.

Matyuu 10:27

Kevu dugumdo tomuu mwalodopure toorekullu nuu yogalo aikudumi tokwe momworaropi kevno'gwowi bako tovi kuu'maiyo toru'no neya domoruudogaulo. Aki nuvu kemoro kaduko tovi bweyogalo aikudumi kuvi kuruv kevno'gwowi wuu'nopi kemi ago tovi muunyu toru ilodavopi kuu'maiyo toru'no neya domoruurodogaulo.

1 Koorin 1:8

Nemi Aguto Jisas Kraisol lukomgu aki aiko te kwolabwo'ji toga iruko su tollugwoji kevu jul'nyo nyubwosunpiyo. Toro tovino Gooti tool jurogudo daikullumwojodowodekono. Agada'ai yiuno aiyowo'mo toga'no kevu guureji daiyo'moneyokwe jurogudo tono tono daikullumwojumwalonekono.

Filipai 1:6

Aki aro kuudo tovi gudupola'dumdonyugono. Gooti tool kemi poowokalago tonyu anakuuto tomuu womdo sugudo muudu'no me'no aullokaikono. Toro tool kemi poowokalago tonyu akuuto tomuu womdo kuuno mujumovla'mwalonekono. Toro mujumovlavowo'ji iruko pullugwoji Jisas Kraisol aikomgu noolabwonekono. Toro kwolabwo'ji toga'no womdo mujumelabodowodo su tovi yiuno'no nyopiyonekono. Kuudo su toro tovino kuuno gudupola'dumdonyugono.

Filipai 1:10

Aki kevu pasudo sugudo tollovaino yenyubworomaropi pi'mwono neya domolludo'movlavogaulo. Toro togaikullu Krais tool kooti yogalo duuwiyo'moneyokwe kwolabwo'ji toga kevu kaiya'no nonagutokwe to'no imo'nupinogaikikono. Kevu su toro sumo'nupi togaikulluno a'mwo pwolnodo kwol kuruv ku'nono mabwolomekumwogapiyawonekono.