Efesos 1:13 - Gooti Toolluro Yogalokwono

¹³ Aki kevu a'mwo abolo Juu toonolluro miyaikuuwosunodowado kugaikul kuruv nebaikuuguudo tovi me'no wuu'nodupudogaikikono. Toro togaikulluno tov Gooti toolluro a'mwo abolo kuunodo me'no wimo'nodupudogaikikono. Nebaikuuguudo su tov Gooti tool kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe kuuguudo sugudo tokwono. Aki aiyoga Gooti tool gamoro Kuullo toollu ikullabiyo'moneyokwe subuu'yamju me'no sajukekono. Toro te kevu Krais toolluno kuudo kuubweyopo toga Gooti tool gamoro subuu'yamju tovi kuvinono uumjuno'no Kuullo tool aikullabokaikono. Toro aikullaboka su tov gamoro a'mwo abolo kuunodo wimo'nyo'moneyokwe ajaikubweyokagaikikono.

Efesos 1:13 Referans Kwoze

2 Koorin 1:22

Aki Gooti tool gavnokweyolluro duuwallo tov nemi aro nekubweyodowodekono. Gamoro Kuullo tool nemoro poowokalago tonyu kuulonekumwalodowodekono. Toro te nevu Kuullo su toollu sumdomgu me'no ma'dowadonogano. Sumdomgu kwolda'ai ma'dowado su tov aro tovino nekuduuwallo'mokwono. Lukomgu nevu Gooti toolluro yiuwi'nokai nonekullabiyo'mo subuu'yamju yodowodo su to kunyu kuruv kuvinono nomaranonogano. Su toro tovino nekuduuwallo'mokwono.

Efesos 4:30

Aki neya duu'nyulo. Gooti toolluro Kuullo aikullaboka tool aro tovino jaikubweyo'moneyokweyokwono. Lukomgu Gooti tool kemi ikumokailawo'ji ilaiyo to'no nyulomwalpinogaikikono. Su toro tovino jaikubweyo'moneyokwe Kuullo su tool aikullabokaikono. Toro tovino tov Gooti toolluro Kuullo su toollu kisuvolo wiyopi jul'nyo nuubwemwalpiyo.

2 Timooti 2:19

Toro kuvi kuruv Gooti tool gamoro mollu'bwoto tovi mojudapiyo'moneyokwe nebaikuuguudo to'gwowi sulo bwotonyo toolbusuko jurogudo me'no kuudapingikokwono. Toro kuudapingiko su tovi aro sakwollungikokwono. “Aguto tool gamoro a'mwo abolo tonyuno kuudo me'no youroma'dowodekono.” Aki puukwollo sakwollungiko puruv arokwono. “Yiuwi'nokai a'mwo abolo ton, Oo nevu Aguto toolluronogano, dodupudo su tobuuro kaiya'no pasudo toorai buulo neya uugunyumopiyogapuro.” Sakwollungikokwono.

1 Tesaloonaika 2:13

Toro te nevu yiuwi'nokai toga aro tovino, “Nenoloo,” subusu'nyogalo wuudodowadonogano. Nemoro Gooti toolluro yogalo yodekubwasodowore tovi kevu wuu'no'mno ilaiyo amollomaropogaikikono. Su toro amollomaropo toga kuuguudo tovino, Oo a'mwo pworavuro'mdeyo, kuudo miyaullajupogaikikono. Toro kugaikul kuruv aro kuudo sauropogaikikono. Oo kuuguudo su tov Gooti toolluro mago tovida'ai dobadopiyo. Su toro kuudo yau'no sumaveyokwe kuudo kuubweyopogaikikono. Toro te Gooti toolluro kuuguudo su tov kevu kuudo me'no kuubweyopo togaikulluro poowokalago tonyu womdo bekullumoulodawodokwono.

Room 4:11

Toro te lukomgu Gooti tool Eburaiyamollu kuudokaikono. “Ilaiyo me'no amolloguma'mo tovino duuwallo'moneyokwe gumi lakulkulako tov neya dodo'nono.” Kuudokaikono. Toro te agasuro a'mwo pworo kemi lakulkulako ton mado'nodupudo kworo kuruv yiuno Gooti toolluno kuudo kuubwepi toorai Gooti tool gamoro sumdo tovi sugudo wimo'nyo'moneyokwe ilaiyo mollomaronekono. Aki toro toorai Eburaiyamol kemi kuunumiyago kuunodo toolbusuko wimo'nonekono.

Taitos 2:11

Kuudo neya jaullulo. Gooti tool yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe Krais Jisasollu kwolomoropiyabokaikono. Toro wolomoropiyaboduke toga Gooti toolluro yasuwa'wino sugumaluko tov kuu'maiyo toru'no me'no abiyanekulo'nokakwono.

Galesiya 3:14

Krais toolluro abiyonekumoraboka su tov aro tovino'mokwono. Aiyoga Gooti tool Eburaiyamollu sugudo uubweyo'moneyokwe subuu'yamju me'no aduuwiyokaikono. Toro aduuwiyoka su tov a'mwo abolo Juu miyawosunodupudo kunyuda'aiyo'mokwono. Gooti tool Krais Jisasolluro womdo sopiyoka tovi'aro gamoro sugudo su tov kuvinono uubweyodowodekono. Aki nevu Gooti toolluro Kuullo toollu mallo'moneyokwe tovino Gooti tool subuu'yamju me'no ajajukekono. Toro te subuu'yamju su tovi nevu yiuno Krais Jisasolluno kuudo uubweyodowado tomgu'aro to'no Kuullo su toollu kuvinono ma'dowadonogano.

Room 1:16

Krais Jisasolluno kuuguudo sugudo su tov jurogudokwono. Toro tovi'aro Gooti tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Toro te a'mwoldeyo oo abolo'mdeyo kuuguudo sugudo su tovino kuudo kuubwepi tonyu Gooti tool kuvinono wiyo'mwojodowodekono. Nevu Juu kuudo uubweyodowa'jure tonolluda'ai sumdomgu nekullo'mwojodowo lukomgu a'mwo abolo Juu tonolluro miyawosunodowado kunyu kuruv wiyo'mwojodowodekono. Toro te nuu kuuguudo sugudo su tovino wogulo mibwosunodumdonyugono. Aki toro tokwe moruujo'moneyokwe luko miyokwenyugono.

Kuurotokwe 2:33

Toruda'ai Gooti tool Jisasollu moduka'mno sumaiyokwe muunyu kai'muuno amokailokaikono. Toro mokailno sumaiyokwe Gooti tool noonyumwonyu pworai muunyu toru'aro uuwoleyo'moneyokwe Jisasollu gamoro anato toru amorumwallokaikono. Toro mwalodowodo toollu gami Ganumiyago tool gamoro subuu'yamju me'no soka kuvinono Kuullo tool kwiyokaikono. Toro wiyoduke tovi Jisasol ma'dowo aga toga nemi anekubweyadopiyo. Toro nekubweyoduke tovida'ai a'mwo abolo su tobuuravuro go'no go'no yogaljo adadokwopo tov kuvi kuunogano. Toro dodopure tonyu muugona'dupu kuu'numwakopo tov kuvigono.

Joon 14:26

Toro kuvi kuruv lukomgu mi Nyunumiyago tool gamoro Kuullo toolluno'gwowi kemi sobanyo mollekudaiyo'moneyokwe nomekwopiyabwonekono. Kuullo su tool moro yovo tovuro jurogudo tokwe bowo'ji yiuwi'nokai tonyuno yodekubwasumwalonekono. Aki moro yiuwi'nokai kuuguudo yodekubwosumelabodumdo tonyuno aki aiko te kuudo you'movlapino'moneyokwe ikullo'mwojumwalonekono.

Joon 1:17

Neya duu'nyulo. Gooti tool Moosesolluro ato tovi'aro loowo tov kwiyokaikono. Toro kuvi kuruv gamoro yasuwa'wino sugumaluko tokwe'aro gamoro nebaikuuguudo tokwe'aro tovalno'gwowi Jisas Kraisolluro ato tovi'aro abolovakono.

Luuk 24:49

Neya duu'nyulo. Moro Nyunumiyago tool gamoro Kuullo toollu kemi wolomekwopiyabiyo'mo tovino subuu'yamju me'no aikullajukekono. Toro te nuu gamoro Kuullo su toollu kemi noolomekwopiyamonyugono. Gooti toolluro Kuullo su tool wolabowo'ji muunyu kai'muuda'ai jurogudo aikubweyo'ji su tov kemoro poowokalago tonyu noullo'movaikwopiyonokwono. Toro kuvi kuruv Gooti toolluro Kuullo su tool yere mwolabodowo'jure akaga kevu wagwolago akavi sogwollo neya denomwalogaulo.” Kuudokaikono.

1 Pita 2:10

Aki sumdomgu kevu Gooti toolluro a'mwo abolo mwimo'nyajupo kugaikul kuruv aga'no'gwowi gamoro a'mwo abolo kuunodo me'no wimo'nodupudogaikikono. Aki kevu sumdomgu Gooti toolluro kemino kalo mamwonyo'moneyokwe tov mamallajupogaikikono. Toro kugaikul kuruv aga'no'gwowi kuvinono me'no ma'dupudogaikikono.

Room 6:17

Toro te aga nevu Gooti toollu, “Nenoloo,” neya wuudogawano. Su tov aro tovinokwono. Muudu'nodo toga kevu ma'no ma'nodo tovuro ki'nato womdokwe kwimo'nyajupo kugaikul kuruv Gooti toolluro nebaikuuguudo tovi wuu'no'mno kemi poowokalago kuunodo tokwe kuudo me'no kuubweyopogaikikono. Toro kuubweyopo toga'no'gwowi me'no birolo'nugolokwo'mno nebaikuuguudo su tovi uumjunodupudogaikikono. Toro togaikul sugupasudo yo'moneyokwe tovuro ki'nato womdokwe me'no wimo'nodupudogaikikono.

Kuurotokwe 1:4

Aki puga Jisasol gami a'mwo kuurotokwe toorogai wosamujuko i'bwo'nonomwalno sumaveyokwe aro kuudokaikono. “Kevu nemi Nellunumiyago toolluro subuu'yamju aikudo tovino kuudo nyallulo'gwonmwalpiyo. Subuu'yamju su tov arokwono. Joonol wonyo tokwe agalaikuvollajukekono. Toro kuvi kuruv Jisasolno'gwowi Gooti toolluro Kuullo tool ikullabodowo'jure su tomgu'aro mogalaikuvollumwalonekono. Subuu'yamju su tovino kuudo nyallulo'gwonmwalpiyo. Toro tovino tov kevu wagwolago Jeruusalemda'ai yere mabolokuupinorekikono. Toro kworekul kuruv iruko pubuul sogwollo mwalopi Gooti tool Kuullo toolluda'ai mogalaikuvollo'mo sogwollo neya kinpinorekikono.” Jisasol gami a'mwo kuurotokwe toorai toro kuudokaikono.

Joon 15:26

Toro kuvi kuruv nuu moro Nyunumiyago toolluda'ai kemi ikullo'mwojo'moneyokwe tool nomekwopiyamonyugono. Toro amekwopiyami su tool Gooti toolluro Kuullo yiuno nebal'no yogalo to'no jokwe tookono. Moro Nyunumiyago toolluda'ai amekwopiyami su tool bowo'ji numino kuu'maiyo toru'no nododoluwosonekono.

Kuurotokwe 13:26

Poolol toro wuujuno sumaiyokwe aki aro kuudokaikono. “Nevugeravoo, nemi kirumwallo tovida'ai bomollurolovonekumokalokwiyo'moneyokwe amonekwopiyaboka Jisasolluno kuuguudo tov Gooti tool nemi me'no anekullabokakwono. Kuuguudo sugudo su tov nevu Eburaiyamolluda'ai bodowado tonogai'aro a'mwo abolo Juu toonolluro miyawosunodupudo pugaikul Gooti toollu dolago tomuu mwalodupudo kugaikike'aro tonollu anekullabokakwono.

Joon 6:27

Toro wuujuno sumaiyokwe aki aro kuudokaikono. “Kevu wosamujuko bwiyo buu'dupudo tonyu mallo'mo womdo nyumwalpiyo. Toro kuvi kuruv kevu wosamujuko bwiyo mabuuropiyodupudo tonyu mallo'mo to'gwowi womdo neya jogaulo. Wosamujuko mabuuropiyodupudo su ton aiyo yiunokuudo mujomwekovlaiyo'moneyokweyogano. Toro te aiyo mujomwekovlaiyo'moneyokwe wosamujuko su ton nuvu A'mwo Kwolaiyo Kuunodo toonyu ikullamwalmokwono. Aki su toro ikullabiyo'moneyokwe jurogudo tov moro Nyunumiyago Gooti tool me'no anyabokaikono.” Kuudokaikono.

Luuk 11:13

Kevu kuunumiyago ma'no ma'nodokwe kworekul kuruv kemi kwoloraiyo tobuurai yasuwa'wino sugudo ton wiyodupudorekikono. Su toro to'busuko kubalno kemi Tellunumiyago muunyu kai'muu mwalodowodo kwol kuruv yiuwi'nokai a'mwo abolo, “donyabono,” kuudoganpi togaikullu gamoro Kuullo tool kuvinono ikullabwonekono. Aki Gooti su tool kwako akavida'ai tellunumiyago toorai uuwolo'mdowodo toolluno tov kevu kuudoganpi togaikullu muunyu toru'aro kuruv nekullamwalonekono.”

Adodolukuu'nosungiko 7:2

Aki nuu ensel pwol kuujo tool sulopiyamoka tomuuda'ai boduke toollu kwononyugono. Toro tool Gooti aiyo mwalodowodo toolluro a'mwo abolo tonyu nojeso'mo purukwe amokabokaikono. Toro mokabino sumaiyokwe ensel aral aral tooro kwako tokwe soolwara tokwe tovallu kaiyako igollo'moneyokwe jurogudo kuubweyopo su toorai ensel tool deko guureji aro kuudokaikono.

Jems 1:18

Toro te Gooti tool gavnokweyolluro ilaiyo winoduke tovi uumjunyuno sumaiyokwe gamoro nebal'no yogalo tokwe nemi a'mwo abolo aiyokwe sumo'nonekudapiyokaikono. Su tov aro tovino'mokwono. Nevu Gooti toolluro yiuwi'nokai sokwollosoka tonyuda'ai ikulsulo muudu'no ki'nodupudo tonbusuko gamoro yiuwi'nokai gabovo sokwollosoka tonyu neya uuwolo'mwalano'moneyokwe tovinokwono.

Hibruu 2:3

A'mwo abolo loowo tovi kisuvolo kwiyajupo ton kirumwallo tovi su toro amallajupogano. Loowo su tov jurogudo adaiyajuko kuvi kuruv Gooti tool nemi ma'no ma'nodo tovuro kirumwallo tovida'ai nobomollurolovonekumokalokwono tovino yogalo to'gwowi aguto kuunodokwono. Toro tovino tov yogalo su tovi nevu muu'nyubusuko to'no nyumwala'jo. Nevu yogalo su tovi muu'nyubusuko to'no sa'ji tov kirumwallo tovi mirukuruwolowanonogano. Kuuguudo su tovino muudu'no amoruudoka tool yiuno Aguto toolnodokwono. Aki lukomgu kuuguudo su tovi a'mwo pworo me'no kuu'nyajuporogano. Toro kuu'nyajupo su tooro aro anekujajuporogano. “Oo Aguto toolluro kuuguudo adoka tov yiuno nebal'nodokwono.” Anekujajuporogano.

2 Timooti 3:15

Guu kwolaiyo amwallajudo togada'ai Gooti gavnokweyolluro buukiyo tovida'ai yogalo anekullaboka tonyuno yodogubwosumelabodopure tovi kuudo me'no souromallajudekugono. Yogalo su tov pi'mwo kuudo aro gujabodowodokwono. Guu Krais Jisasollu kuudo kuubwebi tov Gooti tool gumi ma'no ma'nodo tovuro kirumwallo tovida'ai nobomollurolovogumokalokwonekugono. Su toro gujabodowodokwono.

2 Timooti 2:15

Aki Gooti tool gumoro womdo tovino ilaiyo neya amollogumaroneyokwe guu gamoro womnyago neya duuwimo'nogawono. Gooti toolluro womdo tovi pi'mwono subi tov Gooti toolluro yogalo nebal'nodo tovuro kavlo kunyu kuruv po'dogalo nokwo yainyubwo'mwalbinekugono. Yogalo ajainyubwo'bi su tokwe guu pi'mwono nokwo yodubwasumwalbinekugono. Toro subi tooku Gooti toolluro sumdo tovi wogulo mimwalbinekugono.

Efesos 4:21

Kevu Krais toolluno kuu'nopo toga kwollu me'no kuuguro'mwonyopogaikikono. Aki toro togaikul ilaiyo nyomjomwekovlaiyo'moneyokwe nebaikuudo yodekubwasodopure tovi me'no souromaropogaikikono. Nebaikuuguudo su tov Jisasollu tomuu kuula'dowodokwono. Toro tovida'ai kuudo me'no souromaropo tov arokwono.

2 Koorin 6:7

Aki toro toonol nebal'no yogalo to'no dodowadonogano. Aki yiuno Gooti toolluro jurogudo tokwe to'no momjumovla'mdowadonogano. Toro toonol nemoro anato tokwe kwonamo tokwe tovallu sugupasudo tov iro'mwomido to'busuko guureji gudupola'dowadonogano.

Joon 3:33

Toro kuvi kuruv a'mwo pwol muunyu kai'muuda'ai su toolluro yogalo dodoluwosodowo'jure tovi ilaiyo amollomaro'ji to'gwowi a'mwo abolo tonyuro sumdo tovi aro tovino kuu'maiyo wuuduuwallonekono. Oo Gooti tool nebal'no yogalo to'no jokwekono. Wuuduuwallonekono.

Jems 1:21

Toro te kevu yiuwi'nokai kaiyako igolamo'nyo'moneyokwe pasudo toorogai'aro ma'no ma'no kiroungovlaiyo'moneyokwe pasudo toorogai'aro toorai neya domodukwopiyogaulo. Toro kugaikul kuruv kemoro poowokalago tonyu Gooti toolluro yogalo puluko to'busuko amomguropingiko su tovino'gwowi ilaiyo neya domollomarogaulo. Aki yogalo su tovi kevu kwako tomuu'aro neya duuwiyogaulo. Yogalo su tov kemi kuullo tobuurai ma'no ma'nodo tovuro kirumwallo tovida'ai nokwo bomollurolovekumokalokwonokwono.