1 Timooti 2:6 - Gooti Toolluro Yogalokwono6 Toro tool yiuwi'nokai a'mwo abolo tonyu biyomorabiyo'moneyokwe abolokaikono. Nemi biyonekumorabiyo'moneyokwe kuuguudo su tov Gooti toolluro me'no ajesungiko kuunodo toga kuu'maiyo toru'no kuvinono abomollolupto'nosokakwono. Gade chapit la |
Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.
Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.
Kuudo neya jaullulo. Nevu Gooti toollu kalo buuropino yere mwinodowore toga Gooti toolno'gwowi sumdomgu nemino kalo buuropino me'no kwinyajukekono. Toro te Gooti su tool kalo buuropino pasudo tovino kuu'maiyo toru me'no anekuduuwallokaikono. Toro tool nemoro ma'no ma'nodo tovuro kirumwallo tovi monekudukwopiyo'moneyokwe gamoro Kwolaiyo toollu kwolomonekwopiyabokaikono.
Jisas Kraisol a'mwo noromiyoso'mo tooravuro ato tovi gavnokwe tool morubwenyuno sumaiyokwe yiuno'no abolokaikono. Gamoro aboloka su tov nevu yiuwi'nokai ma'no ma'nodo tonyuro womdo tovi ki'na'dowore tonollu amollurolovonekwapiyokaikono. Aki gamoro a'mwo abolo kuunodo wimo'nowa'ji sugupasudo to'no guureji yomjomwekovla'mwalano'moneyokwe amollol'movonekumarokanogano.
Jisas Kraisolluro nobiyalo'nono su tov Gooti toolluro me'no ajesungiko kuunodo toga suwiyo nyumo'nonokwono. Gooti pwolnodo su toolluno nevu ilaiyo yodowadekono. Toro tool jurogudo kuunodekono. Aki Gooti su tool yiuwi'nokai a'mwo aguto kig tooravuro Aguto Kig wimo'nodowodekono. Aki yiuwi'nokai a'mwo aguto tooravuro Aguto kuunodo wimo'nodowodekono.
Aki Krais tool nevu yiuwi'nokai tonolluno kalo buuropino winodowodekono. Toro toolluno tov nemi nonekullo'mwojo'moneyokwe Gooti toollu sipsip pwolbusuko wiroudapino'no Gooti toollu wobeya sudo kuunyokwe to'busuko kwimo'nokaikono. Krais tool nemino kalo buuropino wino'no toro sokaikono. Su toro to'busuko kubalno kev kugaikul kuruv yiuwi'nokai a'mwo abolo tonyuno kalo buuropino neya domollogaulo.
Krais su tool nemoro ma'no ma'nodo ton gavnokweyolluro kulako tovi ilomolloulloso'no amokavlavokaikono. Toro mokavla'mno sumaiyokwe i'noguropte tovi muunyu toru sulejuku'narokaikono. Nemoro ma'no ma'nodo ton gamoro kulako tovi sulomolloullosoka su tov aro'mokwono. Nemoro ma'no ma'no yo'moneyokwe kuudo tooro yiunokuudo neya bolopipinorogano. Aki nevu aiyo sumo'na'ji tovi'aro gamoro sugupasudo tonyuno'gwowi neya mujumovla'mwalano tovino'mokwono. Kuudo neya jaullulo. Krais toollu iwago aromiyopo tovida'ai imuulo amaroka su tovi'aro kevu ikulnodupu ilaiyo aiko te imo'nodupudogaikikono.
Toro tovino tov Gooti toolluro me'no ajesungiko toga gamoro subuu'yamju tov suwiyo imwojuno sumaiyokwe Gooti nekullo'mwojokwe tool gamoro kuuguudo tokwe a'mwo abolo tonyu modomollo'moneyokwe mi amonuwopiyabokaikono. Su toro amonuwopiyaboka tool mino aro kuudo me'no sanuurokaikono. “Oo a'mwo akal moro kuuguudo tokwe nokwo modomollonoldeyo.” Su toro kuudo yanuu'no sumaiyokwe anubweyokaikono.
Kuudo neya jaullulo. Krais tool ma'no ma'no puru'monodo kuruv miyajukekono. Toro kuvi kuruv Gooti tool nemi nekullo'mwojo'moneyokwe tov nemoro ma'no ma'nodo ton Krais toollu muunyu toru sulloullubweyokaikono. Toro te aga nevu Krais ma'no ma'no miyajuko su toollu me'no uuguro'mwonyodowadonogano. Toro tovino tov Gooti toolluro sumdo tovi sugudo me'no wimo'nodowadonogano.
Nevu muudu'nodo toga nemi ma'no ma'nodo tonyu modukwopinyo'moneyokwe jurogudo nonaguto sumo'nyajuwonogano. Toro imo'nodowore kuvi kuruv Krais toolno'gwowi nevu kirovanyuvanyu kuumwiyo tonollu nekullo'mwojo'moneyokwe abwolabolokaikono. Gooti gavnokwe toolluro me'no ajesoka kuunodo toga kuvinono abwolabolokaikono.
Gooti toolluro ago muunyu kai'muuda'ai bret kwolaboka su tov nuu kwonyugono. Toro te yiuwi'nokai a'mwo abolo ton bret su tovi amanpi tov aiyo yiunokuudo mujomwekovla'mwalpinogano. Bret nonyo'mo su tov moro kulako tovino'busukokwono. Toro te moro kulako kwimi su tov a'mwo abolo kwako akavi mwalodupudo ton aiyo mujomwekovla'mwalpino'moneyokweyokwono.”
Toro wuujuno sumaiyokwe kuudokaikono. “Nuu A'mwo Kwolaiyo Kuunodo kwonyu kuruv mino womdo anyupureyokweyo'mo abonyumaiyo. Toro kuvi kuruv nuu a'mwo abolo tonyu wiyo'mwojo'moneyokwe womdo yo'mo abonyugono. Toro toonyu a'mwo abolo bwotonyago tonyu mubiyo biyomallo'moneyokwe tovino bollo'mo abonyugono.” Kuudokaikono.
Nevu ma'no ma'nodokwe tonol aro yodowadonogano. Sipsip tooro kemi kuudo tovida'ai gomno gomno younopiyodupudo to'busuko kubalno nevu ma'no ma'nodokwe tonol nemi kuudo tovida'ai to'no kirounomollodowadonogano. Toro kirounomollodowado tonollu Gooti Yawel nokwo aironekumwallowo'jujuko kunollu kuruv nemiyo'mo kirumwallo su tov a'mwo su tekwoji kuubweyokaikono.
Aki aiyokwe aral aral toorogai'aro 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe dato muuduko puruv aro adoporogano. “Guvu judo tookuno puukwollikwiyo aweyogunyugolowosungiko su tovi maro'bi gamoro 7-pela gwomalo amugutowopingiko su tonyu nokwo modogaipolodukwopibinekugono. Yo'bi puukwollikwiyo su tovi guu nokwo kuusogunyugolowosubinekugono. Su tov aro tovinokwono. Gumi aromiyagubweyopo toga guu judo tookujuro mujako abwoloka tokwe Gooti tool a'mwo abolo tonyu abiyomarokagano. A'mwo abolo abiyomaroka su ton yiuwi'nokai judo'no judo'no yovodolobunyo togai'aro aki judo'no judo'no yogaljo togai'aro aki judo'no judo'no kula'nokakwe togai'aro aki judo'no judo'no kantri tovida'ai togai'aro yiuwi'nokai su tonyuda'ai a'mwo abolo tonyu Gooti tool gamiyo'mo abiyomarokagano.
Toro te Krais tool muunyu kai'muuda'ai Gooti toolluro pwekwapto kuunodo su toru yiuno puru'monodo toga'no aulokaikono. Toro tool meme toorogai'aro buulmokau taiyo toorogai'aro tooravuro mujako tokwe amokaulokalmaiyo. Toro kwol kuruv gavnokweyolluro mujako abwoloka tokwe amokaulokaikono. Gamoro mujako abwoloka su tovi'aro a'mwo abolo tonol aiyo yiunokuudo mujomwekovlaiyo'moneyokwe nemi ma'no ma'nodo tovuro kirumwallo tovida'ai abomollurolovonekumokalokwokaikono.
Toro tovino tov guu a'mwo abolo punyu nemi Aguto toolluno kuu'maiyo toru moruujo'moneyokwe tovino wogulo mibinono. Aki nuu Aguto toollu uumjunodumdo tovida'ai wuulo killo'mo ago tovi kuule'na'dumdo kwonyuno kuruv kuu'maiyo toru moruujo'mo tovino wogulo mibinono. Nuu Krais toolluno kuuguudo sugudo tokwe moruudodore tovida'ai tagunyo ama'mwakonyugono. Toro ama'mwako toonyuge guu kweku kuruv Gooti toolluro jurogudo gubweyodowo'jure tokwe Krais toolluno kuuguudo sugudo tov amoruudubi tovida'ai jul'nyo pun nokwo ma'binekugono. Su toro ama'bi tovino'mo guu neya jovrowosunogawono.
Aguto tool iruko su tollugwoji kwolabwo'ji toga gamoro kuunodo wimo'nyo'moneyokwe kuudo uubweyodupudo tono'gwowi yovo aguto wipinekono. Aki toro toolluno ilaiyo bwotonyo mollomapinekono. Kev kugaikul kuruv nemoro kuuguudo kuu'maiyo toru adodoluvaikubweyowo tovi kuudo me'no kuubweyopogaikikono. Toro togaikulluno tov ilaiyo aval'no mollomapinekono.
Nevu yiulo yogalo sumo'nyajuko su tovi yiuwi'nokai a'mwo abolo tonyu kuu'maiyo toru'no moruudomollodowadonogano. Yiuwi'nokai a'mwo abolo Juu tooravuro miyawosunodupudo kunyu kuruv Jisasolluno kuudo neya uubwepino'moneyokwe nevu proofet tooravuro puukwollo sakwollajupo togai yodubwasodowadonogano. Su toro yodubwasodowore tovi'aro yiulo yogalo sumo'nyajuko su tov yiuno kuu'maiyo toru'no bomollupto'nubweyodowadonogano. Aki Gooti aiyo yiunokuudo mujomwekovla'mdowodo toolluro yogalo nekudodowo'jure tomgu'aro kuvinono moruudomollodowadonogano.
Toro kwonyu kuruv nemi Aguto Jisas Kraisolluro Gooti toollu kuuno wuudumovla'mwalmonyugono. Gooti su tool bako bwotonyo pwopiyodowodo tomuuda'ai Nellunumiyago kuunodekono. Toro toollu nuu aro tonyuno subusu'nyogalo wuudodumdonyugono. Gooti toolluro Kuullo tool pi'mwo kuudo tov kemi nokwo ikubwemwalonekono. Gamoro pi'mwo kuudo ikubweyodowo'jure tokwe kevu Gooti toolluno kuudo bwotonyago nyouroma'mwalpinogaikikono.
Krais Jisasolluno yiulo yogalo su tov aiyogasuro amwallajupo tonyu Gooti tool kuu'maiyo toru'no mabomollolupto'nubweyajukekono. Toro kuvi kuruv aga'no'gwowi Gooti toolluro Kuullo tool nevu gavnokweyolluro kuurotokwe kuunodo toonogai'aro proofet kuunodo toorogai'aro toonollu kuu'maiyo toru'no me'no bomollolupto'nanekubweyodowodekono. Toro tovino tov nevu yiulo yogalo su tovi kuu'maiyo toru'no kuudo me'no youroma'dowadonogano.
Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.