1 Joon 3:22 - Gooti Toolluro Yogalokwono

²² Aki nevu noonyumwonyu pun mallo'moneyokwe tovino kuudogana'ji tov kuvinono nomaranonogano. Nevu gamoro yogalo adanekulloka tokwe'aro gamoro pasudo ilaiyo winodowodo tokwe'aro tonyu uumjunodowadonogano. Toro tovino tov nemoro kuudogana'ji su tonyu kuvinono nomaranonogano.

1 Joon 3:22 Referans Kwoze

Joon 15:7

Kevu mi nuguro'mwonyugovlavopi aki moro yogalo ton kemi aulaikworo'ji tov kevu moro Nyunumiyago toollu buro'nyo buro'nyo tonyuno kuudoganpi tov kuvino nekullumo'nonokwono.

Joon 9:31

Nevu aro tovino kuudo me'no youroma'dowadonogano. Oo a'mwo ma'no ma'no yodopure toorai Gooti tool kaduko mwiyokwekono. Toro kuvi kuruv a'mwo pwol Gooti toollu ilomoropiyawo'ji gamoro ilaiyo winodowo'jure tovi kuumjuno'ji su toolluno'gwowi Gooti tool kaduko wiyokwekono.

Matyuu 21:22

Toro te kevu Gooti toolluno kuudo kuubwepi toorekul buro'nyo buro'nyodeyo tonyuno subusu'nyogalo kuudoganpi tov kuvinono ikullumo'nonokwono.” Kuudokaikono.

1 Joon 5:14

Aki nevu Gooti toollu subusu'nyogalo wuudoganyo'mo tovino luko miyodowadonogano. Luko miyodowado su tovino kavlo tov arokwono. Nevu buro'nyo buro'nyodeyo Gooti toolluro ilaiyo winodowo'jure tovino kuudogana'ji tov kaduko nekullodowodekono.

Kuuguudo Sugudo akav Makolluro sakwollokakwono Mak 11:24

Toro te nuu aro ikudumo'mokwono. Kevu subusu'nyogalo tov, Kuvinono anyumo'nonoo, kuudo yauropi adupi tov kuvinono ikullumo'nonokwono.” Kuudokaikono.

Joon 14:13

Kevu moro yovo tovida'ai buro'nyo buro'nyodeyo tonyuno mi Nyunumiyago toollu kuudoganpi tov nuvnokwe toonyu kuvinono imonyugono. Moro Nyunumiyago su tool nuu gamoro Kwolaiyo toonyuro yodo'mure tovida'ai yovo aguto ma'mwalono'moneyokwe tovino'mo kuvinono imonyugono.

Jems 1:5

Aki kemida'ai pweku pi'mwo kuudo tovino supto subi tov Gooti toollu pi'mwo kuudo pun agujabwoneyokwe tovino neya duudoganogawono. Toro kuudoganbi tookuji Gooti tool yogalo mamodagujurugolonekono. Nemi Gooti su tool yanyagekono. Toro toolluno tov pi'mwo kuudo tovino kuudoganbi su tookuji kuvinono nogujabwonekono.

Joon 8:29

Aki mi amonuwopiyaboka su tool manugollu'mo'mdowodekono. Toro tool nuuge kuuno mwalodowodekono. Su tov aro tovinokwono. Nuvu mi amonuwopiyaboka su toolluro ilaiyo winodowo'jure tonyuno to'no yiuwi'nokai toga yodumdonyugono.” Kuudokaikono.

Kooloosi 1:10

Toro ikullabodowo'jure togai kevu aro tomgu'aro nokwo yomjomwekovla'mwalpinogaikikono. Yiuwi'nokai toga kevu Aguto toolluro sumdo tovi po'dogalo mujumovlavopi ilaiyo to'no igolmwalpinogaikikono. Aki kemoro yiuwi'nokai sugupasudo judo'no judo'no amjumovlapi su ton sulo ilaiyo tollovobusuko nokwo ki'numwalpinogano. Aki Gooti toolluno kuudo pugai'aro youromo'movlavopi aguto nokwo yogullumelamwalpinogaikikono.

Jems 5:16

Toro tovino tov Aguto tool kemi ikuloneyokweyo'mo kevu pwolno puru'monodo togaikul kemida'ai a'mwo abolo pubuurai kevnokweyogaikulluro ma'no ma'no pasudo tonyuno dodowiyoku'bworosunogaulo. Aki Gooti tool kemida'ai su tobuurai wiyo'mwojoneyokweyo'mo kevu pwolno puru'monodo togaikul subusu'nyogalo duudogaulo. A'mwo Gooti toolluro sumdo tovi sugudo wimo'nodowodo pwolluro subusu'nyogalo tov womdo bwotonyo yowo'ji aki jurogudo kurukweyokwono.

Hibruu 13:21

Toro te kevu Gooti toolluro ilaiyo winodowo'jure tovi uumjunmwalpino'moneyokwe yiuwi'nokai supto supi ton Gooti su tool kemi nomollovrovaikubwemwalonekono. Aki Gooti tool Jisas Kraisollu'aro nemoro poowokalago tovi anakuuto tomuu womdo jurogudo noulanekullonekono. Womdo jurogudo nekullodowo'jure su tov nevu Gooti toolluro pasudo ilaiyo winodowodo tonyu yomjomwekovlaiyo'moneyokwe nomollerovonekudapiyonekono. Toro te nevu Gooti su toolluno yovo tovi yiunokuudo ilomoropino ilomoropino neya imwolowanonogano. Nebal'nodokwono.

Joon 6:29

Toro kuudopo tonyu Jisasol aro kuudokaikono. “Gooti toolluro womdo imwalpino tov arokwono. Kevu Gooti toolluro amonuwopiyaboka toonyuno kuudo donubweyogaulo.” Kuudokaikono.

Filipai 4:18

Aga toga nuvu noonyumwonyu punyuno supto mimwakono. Toro kwonyu kuruv yiuwi'nokai noonyumwonyu nomjonomwekovlaiyo'moneyokwe ton kurukwenyugono. Su tov aro tovinokwono. Kemoro mi nonyo'mwojo'moneyokwe yasuwa'wino anuwopiyamwa'jupo ton Epafroodaitosol miyomno me'no amokamwa'jukekono. Kemoro yasuwa'wino amokamwa'juko su tonyu nuu me'no ama'mwa'jonyugono. Kemoro yasuwa'wino anuwopiyamwa'jupo su ton wobeya sudokwe pun Gooti toollu kwiroudapiyajupo tonbusuko wimo'nodupudogano. Toro te Gooti tool kemoro yasuwa'wino wobeya sudokwe tonbusuko su tonyu ilaiyo molloma'dowodekono. Toro molloma'dowodo su tonyuno ilaiyo winodowodekono.

Kuurotokwe 17:30

Aki aiyogasuro tooro Gooti toolluno kuudo miyouroma'dopure toorai gavnokwe tool nokwo airumwallowo'jujuko kwol kuruv kuudo maiyokwe su tooravuro yodopure tonyu majagillajukekono. Toro kuvi kuruv aga'no'gwowi Gooti su tool yiuwi'nokai tomuuda'ai mujomwekwodowado a'mwo abolo pwolno puru'monodo tonollu aro danekullodowodekono. “Kevu Gooti toollomno kuudo neya jouragunyumo'nogaulo,” danekullodowodekono.

Joon 15:10

Kuudo neya jaullulo. Nuu mi Nyunumiyago toolluro loowo tonyu uumjunodumdo toonyu kwollu me'no uuguro'mwonyodumdonyugono. Toro toonyu gamoro kalo buuropino tovi anakuuto tomuu mujomwekovla'mdumdonyugono. Toro to'busuko kubalno kevu moro loowo daikullodumdo tonyu kuumjunpi toga mi kuvinono nonuguro'mwonyumwalpinorekikono. Toro toorekul moro kalo buuropino tovi anakuuto tomuu nomjomwekovla'mwalpinorekikono.

Matyuu 17:5

Pital toro wuudoduke toga sulu'wo bako awopingikokwe puruv Jisasollu abwolobu'duvolomarokakwono. Sulu'wo abwolobu'duvolomaroka su tovi anakuuto tomuuda'ai yogaimaguurai puruv alokabokakwono. Toro tov aro adokakwono. “Akal moro Kwolaiyo kalo buuropino nyunodowodo tookono. Toro toolluno ilaiyo kuunodo anyunumaiyoo. Gamoro yogalo dodowo'jure tonyu kevu neya duu'nogaulo.” Adokakwono.

Kuurotokwe 20:21

Yiuwi'nokai Juu toorogai'aro Grik toorogai'aro toorai duudapi yogalo ton yiuno aval'no kuujajonyugono. Toro toonyu aro sodubwasajonyugono. “Kevu kemi ma'no ma'nodo tonyuno buulo uugunyumopiyopi Gooti toollomno kuudo neya jouragunyumo'nyulo. Aki nemi Aguto Jisas Kraisolluno kuudo neya duubweyulo.” Sodubwasajonyugono.

Jems 4:3

Aki kevu Gooti toollu kuudoganpi kuga kuruv mama'dupudogaikikono. Su tovino kavlo tov arokwono. Kevu po'dogalo muudoganodupudogaikikono. Toro togaikul kaiya'no kuudo aro yaullokweyogaikikono. Oo nevnokwenolluno ilaiyo igollunyo'moneyokwe noonyumwonyu pun neya amarano. Toro amara'ji su ton yasuwa'no nokwo anopiyogawano. Kevu kaiya'no kuudo su toro yau'dupudo tovino tov noonyumwonyu ton ku'nono mama'dupudogaikikono.

1 Joon 2:3

Nevu Gooti toolluro yogalo adanekulloka tonyu kuvinono kuumjuna'ji tov nevnokwenolluno aro kuudo nokwo youromaranonogano. Oo nevu Gooti toolluno kuudo jouroma'mwakuuwono. Kuudo nokwo youromaranonogano.