مرقس 3:10 - کِتاب مُقدّس سرائیکی ترجمہ

¹⁰ کیوں جو اُوں بہُوں لوکاں کُوں چنگا کیتا ہا اِیں واسطے جِتّی لوک سخت بیماریاں ءچ گرفتار ہَن، اُوندے اُتے ڈھاندے ہَن جو اُونکُوں ہتھ لا گِھننڑ۔

مرقس 3:10 Referans Kwoze

مرقس 6:56

تے وستیاں، شہراں تے دیہاتاں ءچ جِتھاں وی او ویندا ہا لوک بیماراں کُوں بازاراں ءچ رکھ ڈیندے ہَن تے اُوندی مِنت کریندے ہَن جو او اُنہاں کُوں صرف آپنڑے کپڑے کُوں ہتھ لاوݨ ڈیوے۔ تے جیہڑے اُونکُوں ہتھ لا گِھندے ہَن، ٹھیک تھی ویندے ہَن۔

متّی 14:36

او اُوندی مِنت کرݨ لگے جو اُوندی پُشاک دے کنارے کُوں ای ہتھ لا گِھننڑ، تے جئیں جئیں ہتھ لایا تندرُست تھی گِیا۔

متّی 4:23

یسُوع سارے گلیل ءچ پِھردا ریہا تے عبادت خانیاں ءچ تعلیم ڈیندا تے بادشاہی دی خوشخبری سُنڑیندا ریہا، تے لوکاں کُوں ہر طرحاں دی بیماری تے کمزوری تُوں شِفا ڈیندا ریہا۔

اعمال 5:15

اِتُھوں تئیں جو لوک بیماراں کُوں کَھٹاں تے چٹائیاں اُتے گِھن گِھن تے سڑکاں اُتے سَٹ ڈیندے ہَن، تاں جو جِیں ویلے پطرس اُتھوں لنگھے تاں گھٹ و گھٹ اُوندا پرچھانواں ای اُنہاں اُتے پے ونجے۔

لُوقا 7:2

اُوں ویلے رومی فوج دے کہیں صوبہ دار دا ہِک نوکر جیہڑا اُونکُوں عزیز ہا، بیماری کنُوں مرݨ دے قریب ہا۔

عبرانیوں 12:6

کیوں جو جیندے نال رب محبت رکھیندے اُوندی تربیت وی کریندے، تے جِینکُوں پوتر بنڑا گِھندے اُونکُوں سزا وی ڈیندے۔“

مرقس 5:34

یسُوع اُونکُوں آکھیا، ”دِھی تیڈے اِیمان تیکُوں چنگا کر ڈِتے۔ خیر نال وَنج تے آپنڑی بیماری کنُوں بچی رہ۔“

متّی 14:14

یسُوع لہہ تے وڈی بِھیڑ ڈِٹھی تاں اُونکُوں اُنہاں اُتے ترس آیا تے اُوں اُنہاں دے بیماراں کُوں شِفا بخشی۔

متّی 12:15

یسُوع ایہ معلوم کر تے اُتھوں کنُوں روانہ تھیّا تے لوکاں دی ہِک بِھیڑ اُوندے پِچُھوں ٹُر پئی تے اُوں سبھ کُوں چنگا کر ڈِتا۔

مرقس 8:22

وَل او بیت صیدا ءچ آیا تے لوک ہِک اندھے کُوں اُوندے کولھ گِھن آئے تے اُوندی مِنت کیتی جو اُونکُوں ہتھ لاوے۔

لُوقا 5:3

یسُوع اُنہاں ڈُو کشتیاں ءچوں ہِک اُتے چڑھ تے جیہڑی شمعون دی ہئی، تے اُونکُوں درخاست کیتی جو ”کنارے کنُوں تھوڑا جِیہا دُور گِھن جُل۔“ وَل او کشتی ءچ بہہ تے لوکاں کُوں تعلیم ڈیوݨ لگا۔

لُوقا 6:19

سارے لوک اُونکُوں ہتھ لاوݨ دی کوشش کریندے ہَن کیوں جو اُوندے ءچوں قوت نِکلدی ہئی تے ساریاں کُوں شِفا بخشدی ہئی۔

لُوقا 7:21

اُونہی ویلے یسُوع بہُوں لوکاں کُوں بیماریاں تے مُصیبتاں تے بدرُوحاں کنُوں نجات بخشی تے بہُوں سارے اندھیاں دے اکھیں بحال کیتیاں۔