یُوحنّا 8:44 - کِتاب مُقدّس سرائیکی ترجمہ

⁴⁴ تُساں آپنڑے پِیُو ابلیس کنُوں ہیوے تے آپنڑے پِیُو دیاں خواہشاں کُوں پُورا کرݨ چاہندے ہیوے۔ او شروع کنُوں ای خونی ہے تے سچائی اُتے قائم نئیں ریہا کیوں جو اُوندے ءچ سچائی کائنی۔ جِیں ویلے او کُوڑ بُلیندا ہے تاں آپنڑی فطرت دے مطابق آدھے، کیوں جو او کُوڑا ہے بلکہ کُوڑاں دا پِیُو ہے۔

یُوحنّا 8:44 Referans Kwoze

اعمال 13:10

تے آکھیا جو ”ابلیس دے پوتر! تُوں جیہڑا ہر قِسم دی مکاری تے شرارت نال بھریا ہویا تے ہر طرحاں دی نیکی دا دُشمنڑ ہیں، کیا تُوں خُداوند دے سِدھے رستیاں کُوں وِگاڑن تُوں باز نہ آسیں؟

1 یُوحنّا 3:12

قائن وانگُوں نہ بنڑو جیہڑا ابلیس دا بندہ ہا تے جئیں آپنڑے بِھرا کُوں قتل کیتا۔ اُوں کیوں اُونکُوں قتل کیتا؟ اِیں واسطے جو اُوندے کم بُرے ہَن پر اُوندے بِھرا دے نیک۔

2کُرِنتھِیوں 11:3

پر میکُوں ڈر ہے، کِتھائیں اِینویں نہ تھیوے جو جِینویں نانگ آپنڑی مکاری نال حوّا کُوں ورغلا گِھدا، اُونویں ای تُہاڈے خیال وی خراب تھی ونجنڑ تے تُساں مسیح کیتے اُوں خلوص دِلی تے پاک دامنی کُوں چھوڑ ڈیؤ۔

مُکاشفہ 12:9

تے او وڈا اژدہا یعنی اُوہو پُرانڑا نانگ جِیندا ناں ابلیس تے شیطان ہے تے جیہڑا ساری دُنیا کُوں گُمراہ کریندے، او تے اُوندے فرشتے وی زمین اُتے سَٹ ڈِتے گئے۔

یُوحنّا 8:38

مَیں جیہڑا کُجھ آپنڑے باپ دے حضُور ڈِٹھے، تُہاکُوں اکھیندا ہاں تے تُساں وی اُوہو کریندے ہیوے جیہڑا تُساں آپنڑے باپ کنُوں سُنڑیا ہے۔“

یُوحنّا 8:41

تُساں اُوہو کریندے ہیوے جیہڑا تُہاڈا پِیُو کریندا ہا۔“ اُنہاں اُونکُوں آکھیا، ”اساں ناجائز اولاد نئیں، ساڈا باپ ہِکو ہے یعنی خُدا۔“

1 یُوحنّا 3:15

جیہڑا کوئی آپنڑے بِھرا نال دُشمنڑی رکھیندے، او خونی ہے۔ تے تُساں جانڑدے ہیوے جو کہیں خونی ءچ ہمیشاں دی زندگی نئیں ہوندی۔

متّی 13:38

رَڑھ دُنیا ہے تے چنگا بیج بادشاہی دے فرزند تے کڑوے دانڑے اُوں شریر دے فرزند ہِن۔

یہُوداہ 1:6

تے جیہڑے فرشتیاں آپنڑے مقام کُوں قائم نہ رکھیا بلکہ آپنڑی مقررہ جاہ کُوں چھوڑ ڈِتا، اُنہاں کُوں خُدا ابدی زنجیراں نال بَدھ تے عدالت دے عظیم ڈینہہ تئیں اندھارے ءچ قید رکھیا ہے۔

1 یُوحنّا 2:4

جیہڑا آدھے جو ”مَیں مسیح کُوں جاݨ گِھدے“ پر اُوندے حُکماں اُتے عمل نئیں کریندا تاں او کُوڑا ہے تے اُوندے ءچ سچائی کائنی۔

مُکاشفہ 21:8

پر بُزدلاں، غیر اِیمانداراں، گندے کم کرݨ آلیاں، قاتلاں، حرام کاراں، جادُوگراں، بُت پرستاں تے سبھ کُوڑیاں دی جاہ بھاہ تے گندھک نال سڑن آلی جھیل ہوسی۔ ایہ ڈُوجھی موت ہے۔“

1 پطرس 5:8

ہوشیار تے خبردار راہو کیوں جو تُہاڈا دُشمنڑ ابلیس گجنڑ آلے ببرشیر وانگُوں گولھیندا ودے جو کہیں کُوں پھاڑ کھاوے۔

مُکاشفہ 9:11

کھڈے دا فرشتہ اُنہاں دا بادشاہ ہا۔ اُوندا ناں عبرانی ءچ ”ابدّون“ تے یُونانی ءچ ”اپُلّیون“ یعنی ہلاک کرݨ آلا ہے۔

اعمال 5:3

پر پطرس آکھیا، ”حننیاہ! شیطان تیڈے دل ءچ ایہ گالھ کیوں پا ڈِتی جو تُوں رُوح القُدس نال کُوڑ ماریں تے زمین دی قیمت ءچوں کُجھ رکھ چھوڑیں؟

یُوحنّا 6:70

یسُوع اُنہاں کُوں جواب ڈِتا، ”کیا مَیں تُساں بارہاں کُوں نئیں چُنڑ گِھدا؟ وَل وی تُہاڈے ءچوں ہِک شیطان ہے۔“

مُکاشفہ 2:10

جیہڑے ڈُکھ تیکُوں سہنڑے ہوسن اُنہاں کنُوں نہ ڈر۔ ڈیکھ ابلیس تیڈے لوکاں ءچوں کُجھ کُوں قید ءچ بند کراوݨ آلا ہے تاں جو تیکُوں ازماوے تے تُوں ڈاہ ہِک ڈینہہ تئیں مُصیبت چانویں۔ جان ڈیوݨ تئیں وفادار رہ تاں مَیں تیکُوں زندگی دا تاج ڈیساں۔

2 پطرس 2:4

ڈیکھو، خُدا اُنہاں فرشتیاں کُوں نئیں چھوڑیا جِنہاں گُناہ کیتا، بلکہ اُنہاں کُوں اندھارے دیاں زنجیراں نال بَدھ تے دوزخ ءچ سَٹ ڈِتا تاں جو عدالت دے ڈینہہ تئیں قید ءچ راہوݨ۔

مُکاشفہ 13:14

اُنہاں کرِشمیاں دے ذریعے جیہڑے اُونکُوں اُوں پہلے حیوان دی خاطر ڈِکھاوݨ دا اِختیار ڈِتا گِیا ہا، او زمین آلیاں کُوں گُمراہ کریندا ہا۔ تے اُنہاں کُوں حُکم ڈیندا ہا جو اُوں حیوان دا بُت بنڑاؤ جِینکُوں تلوار نال ہلاک کرݨ آلا زخم لگیا ہا پر وَل وی او زندہ ہے۔

مُکاشفہ 22:15

پر کُتے، جادُوگر، حرام کار، خونی، بُت پرست، کُوڑی گالھ گھڑن تے پسند کرݨ آلے باہر راہسن۔

متّی 12:34

نانگ دے بالو! تُساں بُرے تھی تے کِینویں چنگے گالھیں آکھ سگدے ہیوے؟ کیوں جو جیہڑا دل ءچ ہوندے اُوہو زبان اُتے آندے۔

متّی 13:15

کیوں جو اِیں اُمت دے دل اُتے چربی چڑھ گئی ہے تے او کَناں کنُوں اُچا سُنڑدے ہِن تے اُنہاں آپنڑے اکھیں بند کر گِھدیاں ہِن کِتھائیں اِینویں نہ تھیوے جو او اکھیں کنُوں ڈیکھنڑ تے کَناں نال سُنڑݨ دل نال سمجھنڑ تے رجُوع گِھن آوݨ تے مَیں اُنہاں کُوں شِفا بخشاں۔‘

یُوحنّا 7:17

جے کوئی اُوندی مرضی اُتے چلنڑ چاہوے تاں او اِیں تعلیم دے بارے ءچ جاݨ گِھنسی جو خُدا دی طرفوں ہے یا مَیں آپنڑے کولُھوں آدھا ہاں۔

یُوحنّا 8:55

تُساں اُونکُوں نئیں جانڑیا، پر مَیں اُونکُوں جانڑدا ہاں تے جے آکھاں جو اُونکُوں نئیں جانڑدا تاں تُہاڈے وانگُوں کُوڑا ہوساں۔ پر مَیں اُونکُوں جانڑدا ہاں تے اُوندے کلام اُتے عمل کریندا ہاں۔

1 یُوحنّا 1:8

جے اساں بے گُناہ ہووݨ دا دعویٰ کرُوں تاں آپنڑے آپ کُوں دوکھا ڈیندے ہیں تے ساڈے ءچ سچائی کائنی۔

1 یُوحنّا 2:21

مَیں تُہاکُوں اِیں واسطے نئیں لِکھیا جو تُساں سچائی کُوں نئیں جانڑدے بلکہ اِیں واسطے جو تُساں سچائی کُوں جانڑدے ہیوے تے اِیں واسطے وی جو کوئی کُوڑ سچائی دی طرفوں نئیں۔

اعمال 24:9

یہُودی وی وکیل نال رَل تے آکھنڑ لگے جو ”ایہ گالھیں بالکل سچ ہِن۔“