یُوحنّا 20:17 - کِتاب مُقدّس سرائیکی ترجمہ

¹⁷ یسُوع اُونکُوں آکھیا، ”میکُوں پکڑی نہ رکھ کیوں جو مَیں حالی تئیں باپ دے کولھ اُتے نئیں گِیا، بلکہ وَنج تے میڈے بِھرانواں کُوں ڈسا جو مَیں آپنڑے باپ تے آپنڑے خُدا دے کولھ ویندا ہاں جیہڑا تُہاڈا وی باپ تے خُدا ہے۔“

یُوحنّا 20:17 Referans Kwoze

یُوحنّا 16:28

مَیں باپ ءچوں نِکل تے دُنیا ءچ آیا ہاں۔ وَل دُنیا تُوں رُخصت تھی تے باپ کولھ ویندا ہاں۔“

1 پطرس 1:3

ساڈے خُداوند یسُوع مسیح دے خُدا تے باپ دی حمد تھیوے۔ اُوں یسُوع مسیح کُوں مُردیاں ءچوں زندہ کر تے آپنڑی وڈی رحمت نال ساکُوں نویں سرے تُوں پیدا کیتا، تے ہُنڑ ساکُوں ہِک زندہ اُمید مِلی ہے

گلتِیوں 3:26

کیوں جو تُساں سارے یسُوع مسیح اُتے اِیمان گِھن آوݨ دے وسیلے نال خُدا دی اولاد بنڑ گئے ہیوے۔

یُوحنّا 17:11

مَیں اگُوں تُوں دُنیا ءچ نہ راہساں پر او دُنیا ءچ ہِن تے مَیں تیڈے کولھ آندا ہاں۔ قدُّوس باپ! آپنڑے اُوں ناں دے وسیلہ نال جیہڑا تُوں میکُوں بخشیا ہے اُنہاں دی حفاظت کر، تاں جو او ہِک ہووݨ جِینویں اساں ہِک ہیں۔

1 یُوحنّا 3:2

عزیزو! اساں اِیں ویلے خُدا دے فرزند ہیں پر اجنڑ تئیں ایہ ظاہر نئیں تھیّا جو بِیا کیا کُجھ ہوسُوں۔ پر اِتنا جانڑدے ہیں جو جِیں ویلے یسُوع ظاہر تھیسی تاں اساں اُوندے وانگُوں ہوسُوں کیوں جو اساں اُونکُوں اُونویں ای ڈیکھسوں جِینویں او اصل ءچ ہے۔

یُوحنّا 14:6

یسُوع اُونکُوں آکھیا جو ”راہ، حق تے زندگی مَیں ہاں، میڈے وسیلہ دے بغیر کوئی باپ دے کولھ نئیں آندا۔

مرقس 16:19

خُداوند یسُوع اُنہاں نال کلام کرݨ تُوں بعد اسمان اُتے چا گِھدا گِیا تے خُدا دے سجے پاسُوں بہہ گِیا۔

مُکاشفہ 21:3

تے مَیں تخت ءچوں کہیں کُوں اُچی اواز نال ایہ آدھے سُنڑیا جو ”ڈیکھ خُدا دی سکونت گاہ ہُنڑ اِنساناں دے وچال ہے تے او اُنہاں نال سکونت کریسی۔ او اُوندے لوک ہوسن تے خُدا خود اُنہاں نال راہسی تے اُنہاں دا خُدا ہوسی۔

2کُرِنتھِیوں 6:18

تے تُہاڈا باپ ہوساں تے تُساں میڈے پوتر دِھیاں ہوسو۔ ایہ قول رب قادر مُطلق دا ہے۔“

رومیوں 8:29

کیوں جو جِنہاں کُوں خُدا پہلے کنُوں جانڑیا، اُنہاں کُوں اُوں پہلے کنُوں مقرر وی کیتا جو او اُوندے پوتر آلی کار بنڑݨ تاں جو اُوندا پوتر بہُوں سارے بِھرانواں ءچوں پلیٹھی دا ہووے۔

یُوحنّا 17:25

عادل باپ! دُنیا تاں تیکُوں نئیں جانڑدی پر مَیں تیکُوں جانڑدا ہاں تے اِنہاں بندیاں وی جاݨ گِھدے جو تُوں میکُوں بھیجیا ہے،

متّی 28:7

تے جلدی وَنج تے اُوندے شاگرداں کُوں آکھو جو او مُردیاں ءچوں زندہ تھی گئے تے تُہاڈے کنُوں پہلے گلیل کُوں ویسی۔ تُساں اُونکُوں اُتھاں ڈیکھسو۔ ڈیکھو مَیں تُہاکُوں ڈسا ڈِتے۔“

متّی 12:50

کیوں جو جیہڑا کوئی میڈے اسمانی باپ دی مرضی اُتے چلدے اُوہو میڈا بِھرا تے میڈی بھینڑ تے میڈی ماء ہے۔“

مُکاشفہ 21:7

جیہڑا غالب آسی او اِنہاں چیزاں دا وارث ہوسی۔ مَیں اُوندا خُدا ہوساں تے او میڈا پوتر ہوسی۔

عبرانیوں 8:10

رب ایہ وی فرمیندے جو جیہڑا عہد مَیں اُنہاں ڈینہاں تُوں بعد بنی اِسرائیل نال بدھیساں، او ایہ ہوسی جو مَیں آپنڑے حُکم اُنہاں دے ذہناں ءچ پیساں تے اُنہاں دے دِلاں اُتے لِکھیساں مَیں ای اُنہاں دا خُدا ہوساں تے او میڈی قوم ہوسن۔

یُوحنّا 20:27

وَل اُوں توما کُوں آکھیا، ”آپنڑی انگل اِتھاں رکھ تے میڈے ہتھاں کُوں ڈیکھ تے آپنڑا ہتھ ودھا تے میڈی پسلی ءچ پا۔ بےاعتقاد نہ تھی بلکہ اعتقاد رکھ۔“

یُوحنّا 17:5

تے ہُنڑ اے باپ! میکُوں آپنڑے حضُور ءچ جلال ڈے، او جلال جیہڑا مَیں دُنیا دے بنڑݨ کنُوں پہلے تیڈے نال رکھیندا ہم۔

یُوحنّا 14:28

تُساں میڈے کنُوں سُنڑیا ہے جو مَیں ویندا ہاں تے تُہاڈے کولھ ولا آساں۔ جے تُساں میڈے نال محبت کریندے تاں اِیں گالھ تُوں خوش تھیندے جو مَیں باپ دے کولھ ویندا ہاں کیوں جو باپ مَیں کنُوں وڈا ہے۔

یُوحنّا 14:2

میڈے باپ دے گھر ءچ بہُوں سارے مکان ہِن، جے نہ ہوندے تاں مَیں تُہاکُوں ڈسا ڈیندا کیوں جو مَیں ویندا ہاں تاں جو تُہاڈے کیتے جاہ تیار کراں۔

یُوحنّا 13:3

یسُوع ایہ جاݨ تے جو باپ ساریاں چیزاں میڈے ہتھ ءچ کر ڈِتیاں ہِن، تے مَیں خُدا دے کولُھوں آیا تے خُدا ای دے کولھ واپس ویندا ہاں،

یُوحنّا 13:1

عید ِ فسح شروع تھیوݨ آلی ہئی تے یسُوع کُوں معلوم ہا جو اُوندا دُنیا تُوں رُخصت تھی تے باپ کولھ ونجنڑ دا ویلا آ گئے۔ او آپنڑے لوکاں نال جیہڑے دُنیا ءچ ہَن محبت رکھیندا ہا تے آخر تئیں محبت رکھیندا ریہا۔

یُوحنّا 7:33

یسُوع آکھیا، ”مَیں بِیا کُجھ ڈینہاں تئیں تُہاڈے کولھ ہاں، وَل مَیں آپنڑے بھیجنڑ آلے کولھ چلیا ویساں۔

لُوقا 10:4

نہ بٹوا گِھن وَنجائے، نہ تھیلا، نہ جُتیاں تے نہ رستے ءچ کہیں کُوں سلام کرائے۔

متّی 25:40

بادشاہ جواب ڈیسی مَیں تُہاکُوں سچ آدھا ہاں جو ’جِیں ویلے تُساں میڈے اِنہاں سبھ کنُوں چھوٹیاں بِھرانواں ءچوں کہیں ہِک نال ایہ سلوک کیتا تاں میڈے نال کیتا۔‘

عبرانیوں 11:16

پر حقیقت ءچ او ہِک بہتر یعنی اسمانی مُلک دی سِک ءچ ہَن۔ اِیں واسطے خُدا اُنہاں دا خُدا اکھواوݨ تُوں نئیں شرمیندا بلکہ اُوں اُنہاں کیتے ہِک شہر تیار کیتا۔

مرقس 12:26

پر اِیں بارے ءچ جو مُردے زندہ تھیندے ہِن، کیا تُساں مُوسیٰ دی کتاب ءچ بلدی ہوئی جھاڑی دے بیان ءچ ایہ نئیں پڑھیا جو خُدا مُوسیٰ کُوں آکھیا، ’مَیں ابرہام دا خُدا تے اِضحاق دا خُدا تے یعقُوب دا خُدا ہاں؟‘