یُوحنّا 14:26 - کِتاب مُقدّس سرائیکی ترجمہ

²⁶ پر او مددگار یعنی رُوح القُدس جِینکُوں میڈا باپ میڈے ناں نال بھجیسی، اُوہو تُہاکُوں سارے گالھیں سکھیسی تے جیہڑا کُجھ مَیں تُہاکُوں آکھیا ہے، او سبھ تُہاکُوں یاد ڈیویسی۔

یُوحنّا 14:26 Referans Kwoze

یُوحنّا 15:26

پر جِیں ویلے او مددگار آسی جِینکُوں مَیں تُہاڈے کولھ باپ دی طرفوں بھجیساں، یعنی سچائی دا رُوح جیہڑا باپ دی طرفوں صادر تھیندا ہے تاں او میڈی گواہی ڈیسی۔

یُوحنّا 14:16

تے مَیں باپ کنُوں درخاست کریساں تے او تُہاکُوں ڈُوجھا مددگار بخش ڈیسی تاں جو او ہمیشاں تئیں تُہاڈے نال راہوے

1 یُوحنّا 2:27

پر رُوح القُدس جیندے نال مسیح تُہاکُوں مسح کیتے، تُہاڈے دِلاں ءچ قائم راہندے، اِیں واسطے ضرورت کائنی جو کوئی تُہاکُوں سِکھاوے۔ رُوح القُدس ای تُہاکُوں سارے گالھیں سکھیندے تے جیہڑا کُجھ او سکھیندے، سچائی ہے کُوڑ نئیں۔ بس جِینویں اُوں تُہاکُوں سِکھائے، اُونویں ای تُساں مسیح ءچ قائم راہو۔

یُوحنّا 16:7

پر مَیں تُہاکُوں سچ آدھا ہاں جو میڈا ونجنڑ تُہاڈے کیتے فائدہ مند ہے کیوں جو جے مَیں نہ وَنجاں تاں او مددگار تُہاڈے کولھ نہ آسی پر جے مَیں ویساں تاں اُونکُوں تُہاڈے کولھ بھیج ڈیساں۔

1 یُوحنّا 2:20

پر تُساں تاں اُوں قدُّوس دی طرفوں رُوح القُدس نال مسح کیتے گئے ہیوے تے تُساں سارے سچائی کُوں جانڑدے ہیوے۔

1کُرِنتھِیوں 6:19

کیا تُساں نئیں جانڑدے جو تُہاڈا بدن رُوح القُدس دی ہیکل ہے جیہڑا تُہاڈے ءچ وسدے تے جیہڑا تُہاکُوں خُدا دی طرفوں مِلے؟ تُساں آپنڑے مالک نئیں

اعمال 2:33

ہُنڑ اُونکُوں سرفراز کر تے خُدا دے سجے ہتھ بِلھایا گِیا ہے، تے اُوں باپ کنُوں وعدہ کیتا ہویا رُوح القُدس حاصل کر تے نازل کیتا جِیندا اثر تُساں ڈیدھے تے سُنڑدے ہیوے۔

اِفِسیوں 1:17

مَیں دُعا کریندا ہاں جو ساڈے خُداوند یسُوع مسیح دا خُدا جیہڑا جلال آلا باپ ہے، تُہاکُوں حِکمت تے مُکاشفے دی رُوح بخشے تاں جو تُساں اُونکُوں چنگی طرحاں جاݨ گِھنو

رومیوں 15:13

خُدا جیہڑا اُمید دا سرچشمہ ہے تُہاکُوں اِیمان رکھنڑ دے سببّوں ساری خوشی تے اِطمینان نال بھر ڈیوے تاں جو رُوح القُدس دی قُدرت نال تُہاڈی اُمید ودھدی ونجے۔

اعمال 2:4

تے او سارے رُوح القُدس نال بھریج گئے تے مختلف زباناں بولنڑ لگے جِینویں رُوح اُنہاں کُوں قابلیت بخشی ہئی۔

یُوحنّا 2:22

بس جِیں ویلے او مُردیاں ءچوں زندہ تھیّا تاں اُوندے شاگرداں کُوں یاد آیا جو اُوں ایہ آکھیا ہا تے اُنہاں کُوں خُدا دے کلام تے یسُوع دے آکھے ہوئے لفظاں اُتے یقین آ گِیا۔

اعمال 13:2

جِیں ویلے او خُداوند دی عبادت کریندے تے روزے رکھیندے پئے ہَن تاں رُوح القُدس آکھیا، ”میڈے کیتے برنباس تے ساؤل کُوں اُوں کم کیتے مخصوص کر ڈیؤ جیندے کیتے مَیں اُنہاں کُوں سڈیا ہے۔“

1 پطرس 1:12

رُوح القُدس نبیاں اُتے ایہ ظاہر کیتا جو ایہ گالھیں کریندے ہوئے او آپنڑی نئیں بلکہ تُہاڈی خدمت کریندے پئے ہِن تے ہُنڑ خوشخبری دی تبلیغ کرݨ آلیاں، اسمان کنُوں بھیجے ہوئے رُوح القُدس دی قُدرت نال تُہاکُوں ایہ گالھیں ڈسائیاں۔ ایہ گالھیں ایجھیاں ہِن جو فرشتے وی اِنہاں کُوں سمجھنڑ دی بہُوں سِک رکھیندے ہِن۔

1 یُوحنّا 5:7

تے گواہی ڈیوݨ آلے ترے ہِن

طِطُس 3:5

تاں خُدا ساکُوں نجات ڈِتی پر ساڈے نیک کماں دی وجہ کنُوں نئیں جیہڑے اساں کیتے بلکہ آپنڑے رحم دی وجہ کنُوں۔ ایہ نجات ساکُوں رُوح القُدس دے وسیلے مِلی جئیں ساکُوں دھو تے نویں سرے تُوں پیدا کیتا تے نوِیں زندگی ڈِتی۔

لُوقا 24:49

تے ڈیکھو، مَیں تُہاڈے اُتے اُونکُوں نازل کریساں جِیندا وعدہ میڈے باپ کیتے، پر جئیں تئیں تُہاکُوں اسمان کنُوں قوت نہ مِلے اِیں شہر ءچ ٹِکے راہو۔“

یہُوداہ 1:20

پر عزیزو! تُساں آپنڑے پاک اِیمان ءچ ترقی کر تے رُوح القُدس دی مدد نال دُعا کریندے راہو۔

عبرانیوں 9:8

اِیں تُوں رُوح القُدس ایہ اِشارہ ڈیندے جو جڈاں تئیں ایہ پہلا تمبُو موجود ہے، سبھ تُوں مُقدّس جاہ تئیں ونجنڑ دا رستہ نئیں کُھلیا۔

عبرانیوں 3:7

بس جِینویں رُوح القُدس فرمیندے ”جے اَج تُساں خُدا دی اواز سُنڑو

2کُرِنتھِیوں 13:14

خُداوند یسُوع مسیح دا فضل، خُدا دی محبت تے رُوح القُدس دی شراکت تُساں ساریاں نال تھیندی راہوے۔

1تھِسّلُنیکیوں 4:8

اِیں واسطے جیہڑا ایہ ہدایت نئیں منیندا او اِنسان کُوں نئیں بلکہ خُدا کُوں رَد کریندے، جیہڑا تُہاکُوں رُوح القُدس عطا کریندے۔

1کُرِنتھِیوں 12:3

اِیں واسطے مَیں تُہاکُوں سمجھاوݨ چاہندا ہاں جو جیہڑا بندہ خُدا دے رُوح القُدس دی ہدایت نال گالھ کریندے، او کڈھائیں وی ”یسُوع اُتے لعنت“ نئیں کر سگدا، تے کوئی وی رُوح القُدس دی ہدایت دے بغیر نئیں آکھ سگدا جو ”یسُوع خُداوند ہے۔“

2 پطرس 1:21

کیوں جو نبُوّت دی کوئی گالھ اِنسان دی خواہش نال کڈھائیں نئیں تھئی بلکہ بندے رُوح القُدس دی تحریک دے سببّوں خُدا دی طرفوں بُولیندے ہَن۔

لُوقا 11:13

جِیں ویلے تُساں بُرے ہووݨ دے باوجود آپنڑے بالاں کُوں چنگیاں چیزاں ڈیوݨ جانڑدے ہیوے تاں تُہاڈا اسمانی باپ آپنڑے منگنڑ آلیاں کُوں رُوح القُدس کیوں نہ ڈیسی؟“

رومیوں 15:16

جو مَیں غیریہُودیاں ءچ مسیح یسُوع دا خادم بنڑ تے خوشخبری دی خدمت کاہِن دی طرحاں کراں، تاں جو غیریہُودی رُوح القُدس دے ذریعے مُقدّس تھی تے ایجھی نذر بنڑ ونجنڑ، جیہڑی خُدا دے حضُور ءچ مقبول تھیوے۔

لُوقا 1:41

جِینویں ای اِلیشِبَع مریم دا سلام سُنڑیا تاں بال اُوندے پیٹ ءچ اُچھل پِیا۔ اِلیشِبَع رُوح القُدس نال بھریج گئی

متّی 3:11

مَیں تاں تُہاکُوں توبہ کیتے پانڑی نال بپتسمہ ڈیندا ہاں پر جیہڑا میڈے بعد آندے او مَیں تُوں زیادہ زور آور ہے۔ مَیں تاں اُوندیاں جُتیاں چاوݨ دے وی لائق نئیں۔ او تُہاکُوں رُوح القُدس تے بھاہ نال بپتسمہ ڈیسی۔

عبرانیوں 2:4

نال ای خُدا آپنڑی مرضی دے مطابق نشاناں، عجیب کماں، قِسم قِسم دے معجزیاں تے رُوح القُدس دیاں ونڈیاں ہوئیاں نعمتاں دے ذریعے خود وی اُوندی گواہی ڈیندا ریہا۔

2 تِیمُتھِیُس 1:14

تے رُوح القُدس دی مدد نال جیہڑا ساڈے ءچ وسدا پئے، اُوں چنگی امانت دی حفاظت کر جیہڑی تیڈے سپُرد کیتی گئی ہے۔

اِفِسیوں 4:30

خُدا دے رُوح القُدس کُوں ناراض نہ کرو جیندے نال تُہاڈے اُتے مخلصی دے ڈینہہ کیتے مُہر کیتی گئی ہے۔

رومیوں 14:17

کیوں جو خُدا دی بادشاہی کھاوݨ پِیوݨ دے بارے ءچ نئیں بلکہ راستبازی، میل مِلاپ تے اُوں خوشی دے بارے ءچ ہے جیہڑی رُوح القُدس دی طرفوں مِلدی ہے۔

رومیوں 5:5

ایجھی اُمید ساکُوں مایوس نئیں کریندی کیوں جو رُوح القُدس جیہڑا ساکُوں بخشیا گِیا ہے اُوں ساڈے دِلاں کُوں خُدا دی محبت نال بھر ڈِتے۔

اعمال 20:28

بس آپنڑا تے آپنڑے سارے اِجڑ دا خیال رکھو جیندے تُساں رُوح القُدس دی طرفوں نگہبان مقرر کیتے گئے ہیوے تاں جو خُدا دی کلیسیا دی نگہبانی کرو، جِینکُوں اُوں آپنڑے پوتر دے خون نال مُل گِھدے۔

اعمال 11:16

تے میکُوں خُداوند دی او گالھ یاد آئی جیہڑی اُوں آکھی ہئی جو ’یُوحنّا تاں پانڑی نال بپتسمہ ڈِتا پر تُساں رُوح القُدس نال بپتسمہ پے سو۔‘

اعمال 1:8

پر جِیں ویلے رُوح القُدس تُہاڈے اُتے نازل تھیسی تاں تُہاکُوں قوت مِلسی تے تُساں یروشلیم تے یہُودیہ تے سامریہ دے سارے علاقے ءچ بلکہ زمین دی اِنتہا تئیں میڈے گواہ ہوسو۔“

یُوحنّا 20:22

ایہ آکھ تے اُوں اُنہاں اُتے پُھونکا ڈِتا تے آکھیا، ”رُوح القُدس گِھنو۔

یُوحنّا 6:45

نبیاں دے صحیفیاں ءچ ایہ لِکھیا ہے جو ’او سبھ خُدا کنُوں تعلیم گِھنسن۔‘ جئیں کہیں باپ تُوں سُنڑیا تے سِکھیا ہے، او میڈے کولھ آندے۔

مرقس 13:11

پر جِیں ویلے تُہاکُوں پکڑ تے عدالت ءچ پیش کیتا ونجے تاں پہلے کنُوں فِکر نہ کرائے جو اساں کیا اکھیسوں۔ بلکہ جیہڑا کُجھ تُہاکُوں اُوں ویلے ڈسایا ونجے اُوہو اکھائے، کیوں جو آکھنڑ آلے تُساں نئیں بلکہ رُوح القُدس ہے۔

متّی 1:20

او اِنہاں گالھیں دے بارے ءچ سوچیندا ای پِیا ہا جو رب دے فرشتے اُونکُوں خواب ءچ نظر آ تے آکھیا، ”یُوسف! داؤد دے پوتر، آپنڑی ذال مریم کُوں آپنڑے کولھ گِھن آوݨ تُوں نہ ڈر، کیوں جو جیہڑا اُوندے پیٹ ءچ ہے او رُوح القُدس دی قُدرت نال ہے۔

عبرانیوں 10:15

رُوح القُدس وی ساکُوں اِیں گالھ دی گواہی ایہ آکھ تے ڈیندے جو،

یُوحنّا 12:16

اُوں ویلے تاں اُوندے شاگرد ایہ گالھیں نہ سمجھے پر جِیں ویلے یسُوع آپنڑے جلال کُوں پُجیا تاں اُنہاں کُوں یاد آیا جو ایہ سارے گالھیں اُوندے بارے ءچ لِکھیاں ہَن تے لوکاں اُوندے نال ایہ سلوک کیتا ہا۔

مرقس 12:36

داؤد خود رُوح القُدس دی ہدایت نال آکھیا جو ’رب میڈے مالک کُوں آکھیا میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دے تلے نہ کر ڈیواں۔‘

مُکاشفہ 2:11

جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی اُونکُوں ڈُوجھی موتکنُوں کوئی نُقصان نہ پُجسی۔“

اِفِسیوں 1:13

تے جِیں ویلے تُساں وی سچائی دے کلام کُوں یعنی آپنڑی نجات دی خوشخبری کُوں سُنڑیا تے مسیح اُتے اِیمان گِھن آئے تاں خُدا تُہاڈے اُتے وی وعدہ کیتے ہوئے رُوح القُدس دی مُہر لائی۔

2کُرِنتھِیوں 6:6

پاکیزگی، علم، تحمل، مہربانی، رُوح القُدس، سچی محبت،

اعمال 20:35

مَیں تُہاکُوں ایہ سبھ کر تے ڈِکھایا جو اساں کِینویں محنت کر تے کمزوراں کُوں سنبھال سگدے ہیں۔ خُداوند یسُوع دے لفظاں کُوں یاد رکھو جو اُوں آکھیا، ’ڈیونڑا گِھننڑ کنُوں زیادہ مُبارک ہے‘۔“

اعمال 15:8

تے خُدا جیہڑا دِلاں دا حال جانڑدے، اُنہاں کُوں وی ساڈے آلی کار رُوح القُدس ڈے تے گواہی ڈِتی جو اُوں اُنہاں کُوں قبول کر گِھدے،

اعمال 7:51

ضِدی لوکو، تُساں دل تُوں تے کَن تُوں اُنہاں آلی کار ہیوے جِنہاں دا ختنہ نہ تھیّا ہووے، تُساں رُوح القُدس دی ہمیشاں مخالفت کریندے ہیوے جِینویں تُہاڈے پِیُو ڈاڈا کریندے ہَن۔

اعمال 1:4

جِیں ویلے او اُنہاں دے نال ہا تاں اُوں اُنہاں کُوں حُکم ڈِتا، ”یروشلیم کنُوں باہر نہ وَنجائے بلکہ باپ دے اُوں وعدے دے پُورے تھیوݨ دا اِنتظار کرائے جِیندا ذِکر تُساں مَیں کنُوں سُنڑ چُکے ہیوے۔

اعمال 1:2

اُوں ڈینہہ تئیں جِیں ویلے او اسمان اُتے چاتا گِیا۔ چاتے ونجنڑ تُوں پہلے اُوں آپنڑے چُنڑے ہوئے رسُولاں کُوں رُوح القُدس دے وسیلہ نال ہدایت کیتی۔

یُوحنّا 7:39

اُوں ایہ گالھ اُوں رُوح دے بارے ءچ آکھی جیہڑا یسُوع اُتے اِیمان رکھنڑ آلیاں اُتے نازل تھیوݨ آلا ہا، کیوں جو رُوح القُدس اجنڑ تئیں نازل نہ تھیّا ہا، اِیں واسطے جو یسُوع اجنڑ آپنڑے جلال کُوں نہ پُجیا ہا۔

لُوقا 3:22

تے رُوح القُدس جِسمانی صورت ءچ کبوتر وانگُوں اُوندے اُتے نازل تھیّا تے اسمان کنُوں اواز آئی جو ”تُوں میڈا پیارا پوتر ہیں، تَیں کنُوں مَیں بہُوں خوش ہاں۔“

لُوقا 1:67

وَل اُوندا پِیُو زکریاہ رُوح القُدس نال بھریج گِیا تے نبُوّت کرݨ لگا،

لُوقا 1:35

فرشتہ جواب ءچ اُونکُوں آکھیا، ”رُوح القُدس تیڈے اُتے نازل تھیسی تے خُدا تعالیٰ دی قُدرت تیڈے اُتے چھاں کریسی۔ اِیں وجہ کنُوں او مُقدّس بچّہ، خُدا دا پوتر اکھویسی۔

لُوقا 1:15

کیوں جو او خُداوند دے حضُور ءچ بزُرگ ہوسی۔ او ہرگز نہ انگُور دی نہ کوئی بئی شراب پی سی، تے آپنڑی ماء دے پیٹ تُوں ای رُوح القُدس نال بھریج ویسی۔

متّی 28:19

اِیں واسطے تُساں ونجو تے ساریاں قوماں کُوں شاگرد بنڑاؤ تے اُنہاں کُوں باپ تے بیٹے تے رُوح القُدس دے ناں ءچ بپتسمہ ڈیؤ۔

اعمال 28:25

جِیں ویلے او آپس ءچ مُتفق نہ تھئے تاں پولُس اُنہاں دے روانہ تھیوݨ تُوں پہلے ایہ گالھ آکھی جو ”رُوح القُدس یسعیاہ نبی دی معرفت ساڈے پِیُو ڈاڈا دے بارے ءچ ٹھیک ای آکھیا ہا جو

اعمال 16:6

وَل پولُس تے سِیلاس فروگیہ تے گلِتیہ دے علاقے ءچوں لنگھے کیوں جو رُوح القُدس اُنہاں کُوں آسِیہ ءچ کلام سُنڑاوݨ تُوں روک ڈِتا ہا۔

اعمال 15:28

کیوں جو رُوح القُدس تے اساں مناسب سمجھیا جو اِنہاں لازمی گالھیں دے علاوہ تُہاڈے اُتے کوئی بِیا بھار نہ سَٹُوں،

اعمال 13:4

بس او ڈوہائیں رُوح القُدس دے بھیجے ہوئے، سِلُوکیہ گئے تے اُتھوں کنُوں جہاز اُتے کُپرُس چلے گئے۔

اعمال 7:55

پر ستِفُنس رُوح القُدس نال بھریج تے اسمان دو غور نال نِگاہ کیتی تے خُدا دے جلال تے یسُوع کُوں خُدا دے سجے پاسُوں کھڑا ڈیکھ تے

اعمال 5:3

پر پطرس آکھیا، ”حننیاہ! شیطان تیڈے دل ءچ ایہ گالھ کیوں پا ڈِتی جو تُوں رُوح القُدس نال کُوڑ ماریں تے زمین دی قیمت ءچوں کُجھ رکھ چھوڑیں؟

لُوقا 2:25

یروشلیم ءچ ہِک بندہ ہا جِیندا ناں شمعون ہا۔ او نیک تے خُدا ترس تے اِسرائیل دی نجات دا اِنتظار کریندا پِیا ہا تے رُوح القُدس اُوندے اُتے ہا۔

متّی 1:18

یسُوع مسیح دی پیدائش اِینویں تھئی جو جِیں ویلے اُوندی ماء مریم دی منگنڑی یُوسف نال تھی گئی تاں اُنہاں دے کٹھے تھیوݨ تُوں پہلے او رُوح القُدس دی قُدرت نال حاملہ تھی گئی۔

یُوحنّا 1:33

مَیں تاں اُونکُوں پچھانڑدا نہ ہم پر جئیں میکُوں پانڑی نال بپتسمہ ڈیوݨ کیتے بھیجیا ہا اُوں میکُوں ڈسایا جو ’جیندے اُتے رُوح القُدس کُوں لہندے تے کھڑ دا ڈیکھیں، اُوہو رُوح القُدس نال بپتسمہ ڈیسی۔‘

یُوحنّا 14:25

مَیں ایہ سبھ گالھیں تُہاڈے نال راہندے ہوئے تُہاکُوں ڈسائیاں۔