عبرانیوں 9:15 - کِتاب مُقدّس سرائیکی ترجمہ

¹⁵ اِیہو وجہ ہے جو مسیح نویں عہد دا درمیانی ہے تاں جو خُدا دی طرفوں سڈے گئے لوک وعدہ کیتی ہوئی ابدی میراث کُوں حاصل کر سگنڑ۔ ایہ صرف اِیں واسطے ممکن تھئے جو مسیح آپنڑی جان فِدیہ دے طور تے ڈے ڈِتی تاں جو اُنہاں کُوں اُنہاں گُناہاں دی سزا تُوں چُھڑاوے جیہڑے اُنہاں پہلے عہد دے دوران کیتے ہَن۔

عبرانیوں 9:15 Referans Kwoze

رومیوں 8:30

تے جِنہاں کُوں اُوں پہلے کنُوں مقرر کیتا اُنہاں کُوں سڈیا وی، تے جِنہاں کُوں سڈیا اُنہاں کُوں راستباز وی کھڑایا، تے جِنہاں کُوں راستباز کھڑایا اُنہاں کُوں جلال وی بخشیا۔

رومیوں 8:28

تے اساں جانڑدے ہیں جو ساریاں چیزاں مِل تے خُدا نال محبت رکھنڑ آلیاں کیتے بھلائی پیدا کریندیاں ہِن یعنی اُنہاں کیتے جیہڑے اُوندے اِرادے دے مطابق سڈے گئے ہِن۔

عبرانیوں 9:12

او بکریاں تے وچھیاں دا خون گِھن تے نئیں بلکہ آپنڑا خون گِھن تے ہِکے پھیری سبھ تُوں مُقدّس جاہ ءچ داخل تھی گِیا تے ساکُوں ایجھی مخلصی ڈِتی جیہڑی ہمیشاں کیتے ہے۔

عبرانیوں 10:36

تُہاکُوں وڈے صبر نال کم گِھننڑا چاہیدے تاں جو تُساں خُدا دی مرضی پُوری کر تے او چیز حاصل کر سگو جِیندا اُوں وعدہ کیتے۔

1 تِیمُتھِیُس 2:5

کیوں جو خُدا ہِک ہے تے خُدا تے اِنساناں دے وچال درمیانی وی ہِکو ای ہے یعنی مسیح یسُوع جیہڑا اِنسان ہے

عبرانیوں 12:24

تُساں نویں عہد دے درمیانی یسُوع تے اُوندے اُوں چِھنڈکے ہوئے خون دے کولھ آئے ہیوے جیہڑا ہابل دے خون دی نسبت چنگا پیغام ڈیندا ہے۔

عبرانیوں 7:22

قَسم دی وجہ تُوں یسُوع ہِک بہتر عہد دی ضمانت ڈیوݨ آلا بنڑیا۔

1 پطرس 3:18

کیوں جو مسیح جیہڑا راستباز ہا، بدکاراں دے گُناہاں دی خاطر ہمیشاں کیتے ہِکے پھیری ڈُکھ چاتا تاں جو ساکُوں خُدا تئیں پُچا ڈیوے۔ او جِسم دے اعتبار نال تاں ماریا گِیا پر رُوح دے اعتبار نال زندہ کیتا گِیا۔

عبرانیوں 13:20

اِطمینان دا خُدا جئیں اُوں ابدی عہد قائم کرݨ آلے خون دے ذریعے بھیڈاں دے عظیم آجڑی یعنی ساڈے خُداوند یسُوع کُوں مُردیاں ءچوں زندہ کیتا،

رومیوں 5:6

کیوں جو جِیں ویلے اساں سارے بے وس ہسے تاں مسیح عین موقع تے اساں بدکاراں کیتے آپنڑی جان ڈِتی۔

عبرانیوں 9:28

اُونویں ای مسیح وی بہُوں سارے لوکاں دے گُناہ آپنڑے سر اُتے چاوݨ کیتے ہِکے پھیری قُربان تھیّا۔ تے او ڈُوجھی پھیری گُناہ چاوݨ کیتے نئیں بلکہ اُنہاں لوکاں کُوں نجات ڈیوݨ کیتے ڈِکھالی ڈیسی جیہڑے اُوندے اِنتظار ءچ ہِن۔

عبرانیوں 6:13

جِیں ویلے خُدا ابرہام نال وعدہ کیتا تاں اُوں آپنڑے ای ناں دی قَسم کھادی کیوں جو قَسم کھاوݨ کیتے خُدا کنُوں وڈا کوئی نہ ہا۔

عبرانیوں 3:1

اِیں واسطے میڈے پاک بِھراؤ، تُساں جیہڑے اسمانی دعوتءچ شریک ہیوے، یسُوع اُتے غور کرو جیہڑا رسُول تے کاہِن ِ اعظم ہے تے جِیندا اساں اِقرار کریندے ہیں۔

عبرانیوں 2:14

بس کیوں جو خُدا دے فرزند خون تے گوشت نال بنڑے ہوئے اِنسان ہِن، اِیں واسطے یسُوع خود وی اُنہاں آلی کار اِنسان بنڑیا تاں جو آپنڑی موت دے وسیلے نال موت دی قُدرت رکھنڑ آلے یعنی ابلیس کُوں تباہ کرے،

مُکاشفہ 5:9

تے او ایہ نواں گیت گاوݨ لگے جو ”تُوں ای اِیں لائق ہیں جو طُومار کُوں گِھن تے اُوندیاں مُہراں کھولیں، کیوں جو تَیں ذبح تھی تے آپنڑے خون نال ہر قبیلہ، ہر زبان، ہر اُمت تے ہر قوم ءچوں لوکاں کُوں خُدا دے واسطے مُل گِھن گِھدے۔

عبرانیوں 8:13

خُدا ”نویں عہد“ دا ذِکر کر تے پہلے کُوں پُرانڑا قرار ڈِتا۔ تے جیہڑی چیز پہلے دی ہے او پُرانڑی تے ناکارہ ہے، او جلدی ختم تھی ویسی۔

طِطُس 3:7

تاں جو اساں اُوندے فضل دے طفیل راستباز کھڑائے ونجُوں تے اُوں ہمیشاں دی زندگی دے وارث بنڑوں جیندی اساں اُمید رکھیندے ہیں۔

طِطُس 1:2

تے اُوں ہمیشاں دی زندگی دی اُمید اُتے قائم راہوݨ، جِیندا وعدہ خُدا جیہڑا کُوڑ نئیں مریندا، زمانے دے شروع تھیوݨ کنُوں وی پہلے کر ڈِتے۔

2 تِیمُتھِیُس 2:10

اِیں واسطے مَیں خُدا دے چُنڑے ہوئے لوکاں دی خاطر سبھ کُچھ سہندا ہاں تاں جو او وی اُوں نجات کُوں جیہڑی مسیح یسُوع دے ذریعے مِلدی ہے، ابدی جلال سمیت حاصل کرݨ۔

یُوحنّا 10:28

مَیں اُنہاں کُوں ہمیشاں دی زندگی ڈیندا ہاں تے او کڈھائیں ہلاک نہ تھیسن، تے کوئی اُنہاں کُوں میڈے ہتھ کنُوں کَھس نہ سگسی۔

متّی 19:29

تے جئیں کہیں گھراں یا بِھرانواں یا بھینڑاں یا پِیُو یا ماء یا بالاں یا رَڑھاں کُوں میڈے ناں دی خاطر چھوڑ ڈِتے اُونکُوں سو گُنا مِلسی، تے او ہمیشاں دی زندگی دا وارث تھیسی۔

1 یُوحنّا 2:25

تے جیہڑا وعدہ اُوں ساڈے نال کیتے، او ہمیشاں دی زندگی ہے۔

1 پطرس 5:10

تُہاڈے تھوڑی دیر تئیں ڈُکھ چاوݨ تُوں بعد، خُدا جیہڑا سارے فضل دا مالک ہے تے جئیں مسیح دے ذریعے تُہاکُوں آپنڑے ابدی جلال ءچ شریک تھیوݨ کیتے سڈے، اُوہو خود تُہاکُوں کامِل، مضبوط، قائم تے زورآور کریسی۔

یعقُوب 1:12

مُبارک ہے او بندہ جیہڑا ازمائش ویلے ثابت قدم راہندے، کیوں جو کامیاب تھیوݨ اُتے اُونکُوں اِنعام ءچ زندگی دا او تاج مِلسی جِیندا وعدہ خُداوند آپنڑے سبھ پیار کرݨ آلیاں نال کیتے۔

عبرانیوں 11:13

ایہ سارے لوک اِیمان رکھیندے ہوئے مر گئے تے وعدہ کیتیاں ہوئیاں چیزاں نہ پاتیاں، بلکہ صرف دُور کنُوں ای ڈیکھ تے خوش تھئے، تے اِقرار کیتا جو اساں زمین اُتے پردیسی تے مسافر ہیں۔

2تھِسّلُنیکیوں 2:14

خُدا تُہاکُوں اِیں نجات کیتے ساڈی سُنڑائی ہوئی خوشخبری دے ذریعے سڈیا تاں جو تُساں ساڈے خُداوند یسُوع مسیح دے جلال ءچ شامل تھی ونجو۔

رومیوں 6:23

کیوں جو گُناہ دی مزدُوری موت ہے پر خُدا دی نعمت ساڈے خُداوند یسُوع مسیح ءچ ہمیشاں دی زندگی ہے۔

عبرانیوں 9:16

جِتھاں وصیّت ہے اُتھاں وصیّت کرݨ آلے دی موت دا ثابت تھیوݨ وی لازمی ہے،

2کُرِنتھِیوں 3:6

جئیں ساکُوں نویں عہد دے خادم ہووݨ دے لائق وی بنڑایا ہے۔ ایہ عہد لِکھے ہوئے حُکماں اُتے نئیں بلکہ رُوح اُتے قائم ہے کیوں جو لِکھے ہوئے حُکم مار سٹیندے ہِن پر رُوح القُدس زندگی ڈیندے۔

رومیوں 9:24

یعنی ساڈے ذریعے جِنہاں کُوں اُوں نہ صرف یہُودیاں ءچوں بلکہ غیریہُودیاں ءچوں وی سڈیا۔

رومیوں 5:10

کیوں جو جِیں ویلے خُدا دے دُشمنڑ ہووݨ دے باوجود اُوندے پوتر دی موت دے وسیلے ساڈی اُوندے نال صُلح تھی گئی تاں صُلح تھیوݨ تُوں بعد اساں اُوندی زندگی دے سببّوں ضرور ای بچ ویسوں۔

رومیوں 5:8

پر خُدا ساڈے اُتے آپنڑی محبت اِینویں ظاہر کیتی جو جِیں ویلے اساں گُنہگار ای ہسے تاں مسیح ساڈی خاطر آپنڑی جان ڈِتی۔

لُوقا 18:18

وَل کہیں سردار اُوں کنُوں ایہ پُچھیا جو ”نیک اُستاد! مَیں کیا کراں جو ہمیشاں دی زندگی دا وارث بنڑاں؟“

مرقس 10:17

جِیں ویلے یسُوع نِکل تے آپنڑے رستے ویندا پِیا ہا تاں ہِک بندہ بھجدا ہویا آیا تے اُوندے سامنڑے گوڈے ٹیک تے پُچھنڑ لگا جو ”نیک اُستاد! مَیں کیا کراں جو ہمیشاں دی زندگی دا وارث بنڑاں؟“

متّی 25:36

ننگا ہم تے تُساں میکُوں کپڑے پوائے۔ بیمار ہم تے تُساں میڈی ڈیکھ بھال کیتی، قید ءچ ہم تے تُساں میکُوں مِلنڑ آئے۔‘

متّی 25:34

وَل بادشاہ آپنڑے سجے پاسے آلیاں کُوں اکھیسی، ’آؤ میڈے باپ دے مُبارک لوکو، اُوں بادشاہی کُوں جیہڑی دُنیا بنڑݨ تُوں پہلے تُہاڈے کیتے تیار کیتی گئی ہے، میراث ءچ گِھنو۔

اِفِسیوں 1:7

ساکُوں مسیح دے خون دے وسیلے نال مخلصی یعنی گُناہاں دی معافی مِلی ہے۔ ایہ خُدا دے اُوں بے حد فضل دے سببّوں تھیّا،

متّی 22:3

تے آپنڑے نوکراں کُوں بھیجیا جو اُنہاں لوکاں کُوں جِنہاں کُوں شادی دی دعوت ڈِتی گئی ہئی سڈ آوݨ، پر او نہ آئے۔

لُوقا 22:20

تے اِینویں ای کھانڑے دے بعد اُوں پیالہ گِھدا تے آکھیا، ”ایہ پیالہ میڈے اُوں خون ءچ نواں عہد ہے، جیہڑا تُہاڈے کیتے وہایا ویندے۔

اعمال 20:32

ہُنڑ مَیں تُہاکُوں خُدا تے اُوندے فضل دے کلام دے سپُرد کریندا ہاں جیہڑا تُہاڈے اِیمان دی ترقی دا سبب بنڑ سگدے تے تُہاکُوں سارے مُقدّساں ءچ شامل کر تے میراث دا حقدار بنڑا سگدے۔

گلتِیوں 3:20

درمیانی ہِک تُوں زیادہ بندیاں کیتے ہوندے، پر خُدا ہِک ای ہے [تے ابرہام نال وعدہ کرݨ ویلے کوئی درمیانی استعمال نئیں کیتا۔]

عبرانیوں 6:15

اِینویں ابرہام صبر نال اِنتظار کر تے وعدہ کیتی ہوئی برکت گِھدی۔

عبرانیوں 10:34

تُساں قیدیاں نال ہمدردی کیتی تے آپنڑے مال دے لُٹے ونجنڑ کُوں وی خوشی نال قبول کیتا کیوں جو تُساں جانڑدے ہَوے جو ہِک بہتر تے ابدی ملکیت تُہاڈے کولھ ہے۔