اِفِسیوں 4:25 - کِتاب مُقدّس سرائیکی ترجمہ

²⁵ اِیں واسطے کُوڑ مارݨ چھوڑ تے ہر بندہ آپنڑے ہمسائے نال سچ بولے کیوں جو اساں سارے ہِک بدن دے اَنگ ہیں۔

اِفِسیوں 4:25 Referans Kwoze

کلُسِّیوں 3:9

ہِک ڈُوجھے نال کُوڑ نہ بولو کیوں جو تُساں آپنڑی پُرانڑی فطرت کُوں اُوندے کماں سمیت لہا ڈِتے۔

رومیوں 12:5

اُونویں ای بھانویں اساں بہُوں سارے ہیں، وَل وی مسیح ءچ شامل تھی تے ہِک جِسم ہیں تے آپس ءچ ہِک ڈُوجھے دے اَنگ۔

اِفِسیوں 4:15

بلکہ اساں محبت نال سچائی اُتے قائم رہ تے ہر گالھ ءچ مسیح آلی کار بنڑدے ونجُوں، جیہڑا سر ہے۔

مُکاشفہ 21:8

پر بُزدلاں، غیر اِیمانداراں، گندے کم کرݨ آلیاں، قاتلاں، حرام کاراں، جادُوگراں، بُت پرستاں تے سبھ کُوڑیاں دی جاہ بھاہ تے گندھک نال سڑن آلی جھیل ہوسی۔ ایہ ڈُوجھی موت ہے۔“

طِطُس 1:2

تے اُوں ہمیشاں دی زندگی دی اُمید اُتے قائم راہوݨ، جِیندا وعدہ خُدا جیہڑا کُوڑ نئیں مریندا، زمانے دے شروع تھیوݨ کنُوں وی پہلے کر ڈِتے۔

1 تِیمُتھِیُس 4:2

ایہ تعلیم اُنہاں کُوڑے آدمیاں دی منافقت دی وجہ کنُوں آندی ہے جِنہاں دے ضمیر سڑ تے بے حِس تھی گئے ہِن۔

مُکاشفہ 22:15

پر کُتے، جادُوگر، حرام کار، خونی، بُت پرست، کُوڑی گالھ گھڑن تے پسند کرݨ آلے باہر راہسن۔

1 تِیمُتھِیُس 1:10

تے اُنہاں کیتے ہے جیہڑے زِنا کار ہِن، چھوہر باز ہِن، اغوا کرݨ آلے ہِن، کُوڑ مریندے ہِن، کُوڑیاں قَسماں چیندے ہِن، تے ایجھے بہُوں سارے کم کریندے ہِن جیہڑے صحیح تعلیم دے خلاف ہِن۔

2کُرِنتھِیوں 7:14

مَیں اُوندے سامنڑے تُہاڈے بارے ءچ فخر کیتا ہا تے میں شرمندہ نئیں تھیّا۔ بلکہ جِینویں اساں تُہاکُوں ہمیشاں سچے گالھیں ڈسائیاں ہِن، اُونویں ای جیہڑا فخر اساں تُہاڈے بارے ءچ طِطُس دے سامنڑے کیتا او وی سچ ثابت تھیّا۔

طِطُس 1:12

اُنہاں دے آپنڑے نبیاں ءچوں ہِک تاں اِتُھوں تئیں آکھ ڈِتے جو ”کریتی لوک ہمیشاں کُوڑے، ظالم جنگلی جانور، سُست پیٹُو ہوندے ہِن۔“

1کُرِنتھِیوں 10:17

روٹی ہِکو ہے اِیں واسطے اساں جیہڑے بہُوں سارے ہیں ہِکو بدن ہیں کیوں جو اساں سارے اُوہو ہِک روٹی ءچ شریک تھیندے ہیں۔

یُوحنّا 8:44

تُساں آپنڑے پِیُو ابلیس کنُوں ہیوے تے آپنڑے پِیُو دیاں خواہشاں کُوں پُورا کرݨ چاہندے ہیوے۔ او شروع کنُوں ای خونی ہے تے سچائی اُتے قائم نئیں ریہا کیوں جو اُوندے ءچ سچائی کائنی۔ جِیں ویلے او کُوڑ بُلیندا ہے تاں آپنڑی فطرت دے مطابق آدھے، کیوں جو او کُوڑا ہے بلکہ کُوڑاں دا پِیُو ہے۔

اِفِسیوں 5:30

کیوں جو اساں اُوندے بدن دے اَنگ ہیں۔ [جِینویں کلام ءچ لِکھیا ہے]

اِفِسیوں 4:22

آپنڑی پُرانڑی فطرت کُوں اُوندے پہلے چال چلنڑ سمیت لہا سٹو جیہڑی دوکھے باز خواہشاں دے سببّوں وِگڑدی ویندی ہے،

اِفِسیوں 4:31

ہر قِسم دی نفرت، قہر، تکرار، بدگوئی تے بُرائی کُوں آپنڑے ءچوں کڈھ ڈیؤ۔

کلُسِّیوں 3:8

پر ہُنڑ تُساں اِنہاں ساریاں کُوں چھوڑ ڈیؤ یعنی کاوڑ، ناراضگی، بُغض، بدگوئی، تے آپنڑے مُنہ کنُوں مندھے کڈھنڑ۔

عبرانیوں 12:1

اِیں واسطے جڈاں گواہاں دی اِتنی وڈی بِھیڑ ساکُوں چارے پاسُوں ولھیٹی کھڑی ہے تاں آؤ، اساں وی ہر ہِک چیز کُوں جیہڑی ساڈے کیتے رکاوٹ دا سبب ہے تے اُوں گُناہ کُوں جیہڑا ساکُوں اسانی نال پَھسا گِھندے پرے کرُوں، تے اُوں دوڑ ءچ صبر نال بھجدے راہُوں جیہڑی ساڈے کیتے مقرر کیتی گئی ہے۔

یعقُوب 1:21

اِیں واسطے ساری ناپاکی تے بُرائی کُوں دُور کر تے اُوں کلام کُوں فروتنی نال قبول کر گِھنو جیہڑا تُہاڈے دِلاں ءچ رہایا گئے تے تُہاکُوں نجات ڈے سگدے۔

1 پطرس 2:1

اِیں واسطے ہر قِسم دی بُرائی، فریب، منافقت، حسد تے بدگوئی کُوں چھوڑ ڈیؤ۔