2تھِسّلُنیکیوں 2:16 - کِتاب مُقدّس سرائیکی ترجمہ

¹⁶ ہُنڑ ساڈا خُداوند یسُوع مسیح خود تے ساڈا باپ خُدا جئیں ساڈے نال محبت رکھی تے آپنڑے فضل نال ابدی تسلی تے چنگی اُمید بخشی،

2تھِسّلُنیکیوں 2:16 Referans Kwoze

یُوحنّا 3:16

کیوں جو خُدا دُنیا نال ایجھی محبت کیتی جو اُوں آپنڑا اِکلوتا پوتر بخش ڈِتا تاں جو جیہڑا کوئی اُوندے اُتے اِیمان گِھن آوے، ہلاک نہ تھیوے بلکہ ہمیشاں دی زندگی پاوے۔

طِطُس 1:2

تے اُوں ہمیشاں دی زندگی دی اُمید اُتے قائم راہوݨ، جِیندا وعدہ خُدا جیہڑا کُوڑ نئیں مریندا، زمانے دے شروع تھیوݨ کنُوں وی پہلے کر ڈِتے۔

1تھِسّلُنیکیوں 3:11

ہُنڑ ساڈا خُدا تے باپ خود، تے ساڈا خُداوند یسُوع تُہاڈے دو ساڈی راہنمائی کرے۔

مُکاشفہ 1:5

تے یسُوع مسیح دی طرفوں جیہڑا سچا گواہ تے مُردیاں ءچوں زندہ تھیوݨ آلیاں ءچوں پلوٹھا تے دُنیا دے بادشاہاں اُتے حُکمران ہے۔ او ساڈے نال محبت رکھیندے تے اُوں آپنڑے خون دے وسیلہ نال ساکُوں ساڈے گُناہاں تُوں رہائی بخشی،

کلُسِّیوں 1:23

پر شرط ایہ ہے جو تُساں آپنڑے اِیمان دی بنیاد اُتے مضبوطی نال قائم راہو تے خوشخبری دی اُوں اُمید کُوں نہ چھوڑو جیہڑی تُہاکُوں خوشخبری سُنڑن نال مِلی ہے۔ خوشخبری دی تبلیغ اسمان دے تلے ساری مخلوقات ءچ کیتی گئی ہے تے مَیں پولُس اُوندا خادم بنڑیا۔

اِفِسیوں 5:25

پایو! آپنڑیاں ذالاں نال اُونویں ای محبت رکھو جِینویں مسیح کلیسیا نال رکھی تے اُوندے کیتے آپنڑی جان ڈے ڈِتی،

اِفِسیوں 5:2

تے تُساں وی محبت نال زندگی گُزارو جِینویں مسیح ساڈے نال محبت کیتی تے ساڈے کیتے آپنڑے آپ کُوں خوشبو دار نذرانہ تے قُربانی دے طور تے خُدا کُوں ڈے ڈِتا۔

رومیوں 5:8

پر خُدا ساڈے اُتے آپنڑی محبت اِینویں ظاہر کیتی جو جِیں ویلے اساں گُنہگار ای ہسے تاں مسیح ساڈی خاطر آپنڑی جان ڈِتی۔

رومیوں 4:16

اِیں واسطے ایہ وعدہ اِیمان دے سببّوں مِلدے تاں جو فضل دے طور تے ہووے تے ابرہام دی یکی نسل کیتے ہووے، صرف اُنہاں کیتے نئیں جیہڑے شریعت دے مننڑ آلے ہِن بلکہ اُنہاں کیتے وی جیہڑے ابرہام وانگُوں اِیمان رکھیندے ہِن۔ کیوں جو ابرہام اساں ساریاں دا پِیُو ہے،

رومیوں 4:4

کم کرݨ آلے دی مزدُوری کوئی تحفہ نئیں بلکہ اُوندا حق سمجھی ویندی ہے۔

اعمال 18:27

جِیں ویلے اپُلّوس سمندر پار اَخیہ ونجنڑ دا اِرادہ کیتا تاں بِھرانواں اُوندی ہِمت ودھائی تے اُتھوں دے شاگرداں کُوں لِکھیا جو اُونکُوں گرم جوشی نال مِلنڑ۔ اُتھاں پُج تے اُوں لوکاں دی بہُوں مدد کیتی جیہڑے خُدا دے فضل نال اِیمان گِھن آئے ہَن۔

اعمال 15:11

جڈاں جو ساڈا اِیمان ہے جو ساکُوں خُداوند یسُوع دے فضل دے وسیلے نال نجات مِلسی، جِینویں اُنہاں کُوں مِلسی۔“

یُوحنّا 16:22

اِینویں ای ہُنڑ تُہاکُوں ڈُکھ تاں ہے پر مَیں تُہاکُوں ولا مِلساں تے تُہاڈا دل خوش تھیسی تے کوئی تُہاڈی خوشی کَھس نہ گِھنسی۔

یُوحنّا 15:13

اِیں کنُوں زیادہ محبت کوئی نئیں کریندا جو آپنڑی جان آپنڑے دوستاں کیتے ڈے ڈیوے۔

یُوحنّا 15:9

جِینویں باپ میڈے نال محبت کیتی ہے اُونویں ای مَیں تُہاڈے نال محبت کیتی ہے۔ تُساں میڈی محبت ءچ قائم راہو۔

یُوحنّا 13:1

عید ِ فسح شروع تھیوݨ آلی ہئی تے یسُوع کُوں معلوم ہا جو اُوندا دُنیا تُوں رُخصت تھی تے باپ کولھ ونجنڑ دا ویلا آ گئے۔ او آپنڑے لوکاں نال جیہڑے دُنیا ءچ ہَن محبت رکھیندا ہا تے آخر تئیں محبت رکھیندا ریہا۔

یُوحنّا 4:14

پر جیہڑا کوئی اُوں پانڑی ءچوں پِیندے جیہڑا مَیں اُونکُوں ڈیساں، اُونکُوں کڈھائیں تریھ نہ لگسی بلکہ جیہڑا پانڑی مَیں اُونکُوں ڈیساں او اُوندے ءچ چشمہ بنڑ ویسی جیہڑا ویہہ تے ہمیشاں دی زندگی ڈیسی۔“

لُوقا 16:25

ابرہام آکھیا، ’پوتر، یاد کر جو تُوں آپنڑی زندگی ءچ چنگیاں چیزاں گِھن گِھدیاں تے اِینویں ای لعزر بُریاں چیزاں۔ پر ہُنڑ او اِتھاں ارام ءچ ہے تے تُوں عذاب ءچ۔

مُکاشفہ 22:5

وَل کڈھائیں رات نہ تھیسی تے او چراغ تے سِجھ دی روشنی دے مُتھاج نہ ہوسن کیوں جو خُداوند خُدا خود اُنہاں کُوں روشن کریسی تے او ہمیشاں تئیں بادشاہی کریندے راہسن۔

مُکاشفہ 3:9

ڈیکھ! مَیں شیطان دی جماعت دے اُنہاں لوکاں نال جیہڑے آپنڑے آپ کُوں بنی اِسرائیل آدھے ہِن پر ہِن نئیں بلکہ کُوڑے ہِن، اِینویں کریساں جو او آ تے تیڈے پیراں اُتے ڈھے تے سجدہ کریسن تے منیسن جو مَیں تیڈے نال محبت رکھیندا ہاں۔

1 یُوحنّا 3:16

اساں محبت کُوں اِیں تُوں جانڑیا ہے جو یسُوع مسیح ساڈے کیتے آپنڑی جان قُربان کر ڈِتی۔ تے ساڈے اُتے وی ایہ فرض ہے جو اساں آپنڑے بِھرانواں کیتے آپنڑی جان قُربان کرُوں۔

عبرانیوں 7:19

کیوں جو شریعت کہیں چیز کُوں کامِل نئیں کیتا تے اُوندی جاہ تے ساکُوں ہِک زیادہ چنگی اُمید عطا کیتی گئی ہے جیندے وسیلے اساں خُدا دے نزدیک وَنج سگدے ہیں۔

طِطُس 2:13

تے نال نال اُوں مُبارک اُمید یعنی آپنڑے عظیم خُدا تے نجات ڈیوݨ آلے یسُوع مسیح دے جلال ظاہر تھیوݨ دے اِنتظار ءچ راہوں۔

کلُسِّیوں 1:5

ایہ اُنہاں اُمید کیتیاں ہوئیاں برکتاں دی وجہ کنُوں ہے جیہڑیاں تُہاڈے کیتے اسمان اُتے رکھیاں ہِن تے جِیندا ذِکر تُساں خوشخبری دے سچے کلام ءچ پہلے سُنڑ گِھدے،

رومیوں 1:7

ایہ خط اُنہاں سارے خُدا دے پیاریاں دے ناں ہے جیہڑے روم ءچ ہِن تے مُقدّس تھیوݨ کیتے سڈے گئے ہِن۔ ساڈے باپ خُدا تے خُداوند یسُوع المسیح دی طرفوں تُہاکُوں فضل تے اِطمینان حاصل تھیندا راہوے۔

2تھِسّلُنیکیوں 2:13

پر بِھراؤ تے خُداوند دے پیاریو! تُہاڈے کیتے خُدا دا شُکر کریندے راہوݨ ساڈے اُتے فرض ہے کیوں جو اُوں تُہاکُوں شروع کنُوں ای چُنڑ گِھدے جو تُساں رُوح القُدس دے ذریعے پاکیزگی حاصل کر تے، تے حق اُتے اِیمان گِھن آ تے نجات پاؤ۔

1تھِسّلُنیکیوں 1:3

اساں تُہاڈے کم جیہڑے اِیمان دی وجہ کنُوں ہِن، تے تُہاڈی محنت جیہڑی محبت دا نتیجہ ہے، تے تُہاڈے صبر کُوں جیہڑا ساڈے خُداوند یسُوع المسیح اُتے اُمید رکھنڑ دے سببّوں تُہاڈے ءچ پیدا تھئے، آپنڑے خُدا تے باپ دی حضُوری ءچ یاد کریندے ہیں۔