2کُرِنتھِیوں 7:1 - کِتاب مُقدّس سرائیکی ترجمہ

¹ عزیزو، ساڈے نال ایجھے وعدے کیتے گئے ہِن، اِیں واسطے آؤ اساں آپنڑے آپ کُوں جِسم تے رُوح کُوں ناپاک کرݨ آلی ہر چیز کنُوں پاک کرُوں تے خُدا دا خوف منیندے ہوئے آپنڑی پاکیزگی کُوں کمال تئیں پُچاؤں۔

2کُرِنتھِیوں 7:1 Referans Kwoze

1تھِسّلُنیکیوں 4:7

کیوں جو خُدا ساکُوں ناپاکی کیتے نئیں بلکہ پاکیزگی کیتے سڈیا ہے۔

1 پطرس 2:11

عزیزو، مَیں تُہاڈی مِنت کریندا ہاں جو تُساں جیہڑے اِیں دُنیا ءچ پردیسیاں تے مسافراں وانگُوں ہیوے، اُنہاں بُریاں خواہشاں کنُوں دُور راہو جیہڑیاں تُہاڈے نال لڑائی کریندیاں راہندیاں ہِن۔

یعقُوب 4:8

خُدا دے نیڑے آؤ تاں او تُہاڈے نیڑے آسی۔ گُنہگارو، آپنڑے ہتھاں کُوں صاف کر گِھنو۔ تے ڈُو دِلیو، آپنڑے دِلاں کُوں پاک کر گِھنو۔

1 یُوحنّا 3:3

تے جیہڑا کوئی یسُوع تُوں ایہ اُمید رکھیندے، او آپنڑے آپ کُوں پاک رکھیندے، جِینویں او خود پاک ہے۔

1تھِسّلُنیکیوں 5:23

خُدا جیہڑا اِطمینان دا سر چشمہ ہے آپ ای تُہاکُوں مکمل طور تے پاک کرے۔ تے تُہاڈی رُوح، جان تے تُہاڈے جِسم خُداوند یسُوع مسیح دے آوݨ تئیں بے عیب تے محفوظ راہوݨ۔

1 پطرس 1:22

تُساں سچائی دے تابع تھی تے آپنڑے آپ کُوں پاک کیتے، جیندی وجہ کنُوں بِھرانواں ءچ سچی محبت پیدا تھئی۔ اِیں واسطے آپس ءچ دل و جان نال محبت رکھو۔

1کُرِنتھِیوں 6:20

کیوں جو قیمت نال مُل گِھدے گئے ہیوے۔ بس آپنڑے بدن تُوں خُدا دا جلال ظاہر کرو۔

1 یُوحنّا 1:7

پر جے اساں نُور ءچ ٹُردے ہیں جِینویں جو او خود نُور ءچ ہے تاں اساں ہِک ڈُوجھے نال رفاقت رکھیندے ہیں تے اُوندے پوتر یسُوع دا خون ساکُوں سبھ گُناہاں تُوں پاک کریندے۔

عبرانیوں 4:1

بس جڈاں خُدا دا ایہ وعدہ قائم ہے جو اساں اُوندے ارام دی جاہ ءچ داخل تھی سگدے ہیں تاں ساکُوں خبردار راہونڑا چاہیدے، کِتھائیں اِینویں نہ تھیوے جو تُہاڈے ءچوں کوئی اُوندے ءچ داخل تھیوݨ کنُوں محروم رہ ونجے۔

متّی 5:48

بس تُساں کامِل بنڑو جِینویں تُہاڈا اسمانی باپ کامِل ہے۔“

متّی 5:8

مُبارک ہِن او جیہڑے پاک دل ہِن، کیوں جو او خُدا کُوں ڈیکھسن۔

1 یُوحنّا 1:9

پر جے اساں آپنڑے گُناہاں دا اِقرار کرُوں تاں او ساڈے گُناہ معاف کرݨ تے ساکُوں بُرائی کنُوں پاک کرݨ ءچ وفادار تے عادل ہے۔

اِفِسیوں 2:3

ہِک وقت ہا جِیں ویلے اساں وی اُنہاں ءچ شامل ہسے تے نفسانی خواہشاں ءچ زندگی گُزریندے تے دل تے دماغ دی ہر ہَوس کُوں پُورا کرݨ ءچ لگے راہندے ہسے۔ اساں ڈُوجھیاں وانگُوں فطرتی طور تے غضب دے حقدار ہسے۔

رومیوں 5:20

بعد ءچ شریعت آ گئی تاں جو گُناہ زیادہ تھی ونجے پر جِتھاں گُناہ زیادہ تھیّا اُتھاں فضل اُوں کنُوں وی زیادہ تھیّا۔

1 پطرس 5:10

تُہاڈے تھوڑی دیر تئیں ڈُکھ چاوݨ تُوں بعد، خُدا جیہڑا سارے فضل دا مالک ہے تے جئیں مسیح دے ذریعے تُہاکُوں آپنڑے ابدی جلال ءچ شریک تھیوݨ کیتے سڈے، اُوہو خود تُہاکُوں کامِل، مضبوط، قائم تے زورآور کریسی۔

عبرانیوں 12:28

اِیں واسطے جڈاں ساکُوں ایجھی بادشاہی مِلدی پئی ہے، جیہڑی ہلائی نئیں وَنج سگدی، تاں آؤ اساں شُکر کرُوں تے خوف تے احترام نال خُدا دی ایجھی عبادت کرُوں جیہڑی اُونکُوں پسند ہے۔

عبرانیوں 12:23

تے اُنہاں پلوٹھیاں دی جماعت دے کولھ جِنہاں دے ناں اسمان اُتے لِکھے ہِن، تے سبھ دے مُنصف خُدا، تے کامِل کیتے ہوئے راستبازاں دیاں رُوحاں دے کولھ آئے ہیوے۔

1تھِسّلُنیکیوں 3:13

او تُہاڈے دِلاں کُوں ایجھا مضبوط کرے جو جِیں ویلے ساڈا خُداوند یسُوع آپنڑے سارے مُقدّساں نال آوے تاں تُہاڈے دل ساڈے خُدا تے باپ دے سامنڑے پاک تے بے عیب ہووݨ۔

2کُرِنتھِیوں 1:20

کیوں جو خُدا دے سارے وعدے مسیح ءچ ”ہاں“ دے نال پُورے کیتے گئے ہِن۔ اِیں واسطے اساں اُوندے وسیلے نال ”آمین“ آدھے ہیں تاں جو ساڈے وسیلے خُدا دا جلال ظاہر تھیوے۔

اعمال 9:31

بس پُورے یہُودیہ، گلیل تے سامریہ ءچ کلیسیا کُوں سکون تھی گِیا تے اُوندی ترقی تھیندی گئی۔ او خُداوند دے خوف ءچ زندگی گُزار تے، تے رُوح القُدس دی مدد نال گِنتری ءچ ودھدی ویندی ہئی۔

متّی 12:33

یا تاں درخت کُوں چنگا آکھو تے اُوندے پھل کُوں وی چنگا، یا درخت کُوں وی بُرا آکھو تے اُوندے پھل کُوں وی بُرا، کیوں جو درخت آپنڑے پھل کنُوں سُنجانڑیا ویندے۔

عبرانیوں 6:9

عزیزو! بھانویں اساں ایہ گالھیں آدھے ہیں، وَل وی اساں تُہاڈے کیتے اِنہاں کنُوں چنگے گالھیں دا یقین رکھیندے ہیں جِنہاں دا تعلق نجات نال ہے۔

1 پطرس 1:15

بلکہ جِینویں تُہاڈا سڈݨ آلا پاک ہے اُونویں ای تُساں وی آپنڑے سارے چال چلنڑ ءچ پاک بنڑو۔

1 پطرس 1:17

خُدا، جِیں تُوں تُساں باپ آکھ تے دُعا کریندے ہیوے، بغیر طرفداری دے ہر بندے دے عمل دے مطابق اُوندا اِنصاف کریندے، اِیں واسطے جئیں تئیں تُساں دُنیا ءچ مسافر دے طور تے راہندے ہیوے، خُدا دے خوف ءچ زندگی گُزارو۔