1 تِیمُتھِیُس 2:1 - کِتاب مُقدّس سرائیکی ترجمہ

¹ سبھ تُوں پہلے مَیں ایہ نصیحت کریندا ہاں جو سبھ لوکاں کیتے درخاستاں، دُعاواں، مِنتاں تے شُکر گُزاریاں کیتیاں ونجنڑ،

1 تِیمُتھِیُس 2:1 Referans Kwoze

2تھِسّلُنیکیوں 1:3

بِھراؤ! ساڈے اُتے فرض ہے جو ہر ویلے تُہاڈے کیتے خُدا دا شُکر کریندے راہوں۔ تے ایہ مناسب وی ہے کیوں جو تُساں اِیمان ءچ بہُوں ترقی کریندے پئے ہیوے تے تُہاڈی آپس دی محبت وی ودھدی ویندی ہے۔

یعقُوب 5:16

اِیں کیتے تُساں ہِک ڈُوجھے دے سامنڑے آپنڑے گُناہاں دا اِقرار کرو تے ہِک ڈُوجھے کیتے دُعا کرو تاں جو شِفا پاؤ۔ کیوں جو راستباز دی دُعا دے اثر نال بہُوں کُجھ تھی سگدے۔

اِفِسیوں 5:20

تے ہمیشاں ہر گالھ ءچ ساڈے خُداوند یسُوع مسیح دے ناں نال خُدا باپ دا شُکر کریندے راہو۔

2 تِیمُتھِیُس 2:24

تے خُداوند دے خادم کُوں جھیڑا نئیں کرنڑا چاہیدا بلکہ او ساریاں نال نرمی نال پیش آوے، تعلیم ڈیوݨ دے لائق تے برداشت کرݨ آلا ہووے۔

1 تِیمُتھِیُس 2:4

او چاہندے جو سبھ لوک نجات پاوݨ تے سچائی کُوں پچھاݨ گِھننڑ۔

فِلِپّیوں 1:3

مَیں جڈاں وی تُہاکُوں یاد کریندا ہاں، آپنڑے خُدا دا شُکر کریندا ہاں۔

عبرانیوں 6:11

اساں چاہندے ہیں جو تُہاڈے ءچوں ہر ہِک اِینویں ای آخر تئیں کوشش کریندا راہوے تاں جو جِنہاں گالھیں دی تُساں اُمید رکھیندے ہیوے، او پُوریاں تھی ونجنڑ۔

طِطُس 3:2

کہیں دی بدگوئی نہ کرݨ، تکراری نہ ہووݨ بلکہ نرم دل ہووݨ تے سبھ لوکاں نال بہُوں حلیمی نال پیش آوݨ۔

طِطُس 2:11

کیوں جو خُدا دا او فضل ظاہر تھی گِیا ہے جیہڑا یکے اِنساناں دی نجات دا سبب ہے۔

1 تِیمُتھِیُس 5:5

جیہڑی عورت واقعی ضرورت مند بیوہ ہے تے جِیندا کوئی نئیں، او خُدا اُتے اُمید رکھیندی ہے تے ڈینہہ رات خُدا کنُوں مدد منگدی تے دُعا کریندی ہے۔

1کُرِنتھِیوں 15:3

کیوں جو مَیں تُہاکُوں سبھ تُوں زیادہ ضروری گالھ پُچا ڈِتی ہے جیہڑی میکُوں وی پُجی ہئی، جو مسیح خُدا دے کلام دے مطابق ساڈے گُناہاں کیتے مویا،

اعمال 17:30

خُدا ماضی دی ایجھی جہالت کُوں نظرانداز کر ڈِتا پر ہُنڑ او سارے اِنساناں کُوں ہر جاہ حُکم ڈیندے جو توبہ کرݨ۔

1تھِسّلُنیکیوں 3:12

خُداوند کرے جو جِینویں ساکُوں تُہاڈے نال محبت ہے اُونویں ای تُہاڈی محبت وی آپس ءچ تے سبھ لوکاں نال ودھدی ونجے۔

رومیوں 6:17

پر خُدا دا شُکر ہے جو بےشک پہلے تُساں گُناہ دے غُلام ہَوے پر ہُنڑ دل نال اُوں تعلیم دے تابع تھی گئے ہیوے جیہڑی تُہاڈے سپُرد کیتی گئی۔

رومیوں 1:8

پہلے تاں مَیں تُساں ساریاں کیتے یسُوع مسیح دے وسیلے نال آپنڑے خُدا دا شُکر کریندا ہاں جو تُہاڈے اِیمان دی مشہوری ساری دُنیا ءچ تھیندی پئی ہے۔

2کُرِنتھِیوں 8:6

اِیں واسطے اساں طِطُس کُوں نصیحت کیتی جو جِینویں اُوں اِیں خیرات دے کم کُوں پہلے شروع کیتا ہا، اُونویں ای تُہاڈے ءچ اِیں کم کُوں پُورا کرے۔

اِفِسیوں 3:13

اِیں واسطے مَیں مِنت کریندا ہاں جو تُساں میڈی اِنہاں مُصیبتاں دی وجہ کنُوں جیہڑیاں مَیں تُہاڈی خاطر سہندا ہاں ہِمت نہ ہارو کیوں جو او تُہاڈے کیتے عزت دا سبب ہِن۔

اِفِسیوں 6:18

ہر ویلے رُوح القُدس ءچ ہر طرحاں نال دُعا تے مِنت کریندے راہو۔ تے اِیں مقصد کیتے جاگدے راہو تے سارے مُقدّساں کیتے ہر ویلے دُعا کریندے راہو۔

فِلِپّیوں 4:6

کہیں گالھ دی فِکر نہ کرو، بلکہ ہر حالت ءچ دُعا تے مِنت دے ذریعے تُہاڈیاں درخاستاں خُدا دے سامنڑے شُکرگزاری نال پیش کیتیاں ونجنڑ۔