Zefanja 3:20 - O Debleskro Drom 2021 (Sinte)

²⁰ An ko tsiro anau tumen khere. un anau tumen khetne. An ko tsiro dikenn tumer: Me krau, te well tumenge pale lauter mishto. Me krau tumen bares un an-dikles an i tsele themma ap kai phub. Kowa penell o baro Dewel.

O Debleskro Lab 2024 (Sinte-Manouche)

²⁰ An ko tsiro anau t'men khere. oun anau t'men khetne. An ko tsiro dikenn t'mer: Me krau, te vell t'menge pale lauter mishto. Me krau t'men bares oun an-dikles an i tsele themma ap kay phoub. Kova penell o baro Devel.

Zefanja 3:20 Referans Kwoze

Jeremia 29:14

palle mukau man tumendar te hatsell, penell o baro Dewel. Un me lau tumen dran tumaro pandepen win, un anau tumen khetne dran i tsele menshende un themma, kai tradom tumen, penell o baro Dewel. Un me anau tumen pale an kau them, kai mukom tumen krik te anell.

Maleachi 3:12

Un i menshe an i tsele themma penenn pral tumende: “Dikenn, har bachteles jon hi! Hawo shukar them len hi!” Ko penell o baro Dewel, ko rai pral o bolepen un i phub.

Jesaja 56:5

palle dau tut i bar an miro kheer, kai tiro lab dren tchinlo hi. Kowa hi feteder har tchawe un tcha. Kau lab, hoi tut dau, well an kek tsiro bistedo.

Zefanja 3:19

O tsiro wella, kai dau i phagi halauterenge, kai tumen tele rikran, un wau kolenge tumendar ap i rig, kai dukedo hi. Un anau kolen khere, kai win tradedo wan. Un krau, te wenn le sharedo un hadedo an i tsele themma, kai i menshe rikrenn kanna tchi lendar.

Amos 9:14

Me anau mire menshen Israel pale an lengro them. Un jon krenn i tele-phagede forja pale newes, un djiwenn koi dren, un tchiwenn drakengre ruka an i phub, un pijenn lengri mool, tchiwenn ruka an i phub un chan lengre rukengre.

Joel 3:1

Un pal kowa tchorau miro ducho win pral i tsele menshende. Un tumare tchawen un tchen dau i lab mandar, hoi penenn le dureder. Un tumare phure denn sunja, un tumare terne mursha dikenn dikepen.

Ezekiel 34:16

Kolla, kai nashedo hi, rodau me. Un kolla, kai nashran pen, anau me pale. Un kolla, kai pen dukran, pandau i diklo trujel. Un kolla, kai nasselo hi, krau soreles. Un i thullen un sorelen lau an i jak. Me dau jak ap lende har mishto hi.

Jesaja 60:15

His i tsiro, kai hals muklo, un kek kamas tut un djas pash tute. Kanna krau tutar, te wess hako tsiro sharedo un shukar, i foro, kai hi hakeno bachtelo jaake rah har menshe ap kai phub hi.

Zefanja 2:7

Kau kotar them pash o baro pani well kolende dino, kai atchan djido dran o kheer Juda. Jon mukenn pengre bakre kote te chal. Un rati sowenn le an kol khera an o foro Ashkelon. Awa, lengro baro Dewel krell peskro dji lenge pre, un anell len dran lengro pandepen pale win.

Ezekiel 39:28

Palle dikenn un haiwenn i Israelitarja, te hom me, o baro Dewel, lengro Dewel, kowa kai anas len an o pandepen an wawar themma, un mukell len palpale te well an lengro them. Kek lendar atchell kote pale.

Ezekiel 37:21

Un pen ap lende: Kawa penell o baro Dewel, maro rai: Denn jak, me lau i Israelitarjen dran kol tsele themma win, an kolende jon hunte djan, un lau len khetne haki rigjatar, un anau len pale an lengro them.

Ezekiel 28:25

Me, o baro Dewel, tumaro rai, penau: An ko tsiro, kai anau me i Israelitarjen pale khetne dran i tsele wawar themma, kai wan le tradedo, sikrau koleha i menshen an i tsele themma te hom me o tchatcho Dewel. Un i Israelitarja djiwenn pale an pengro them, hoi dom me miro budepaskres, o Jakobeste.

Jesaja 66:22

Tumare tchawe un tumaro lab atchenn glan mande, jaake rah har o newo bolepen un i newi phub, hoi me krau, glan mande atchenna, penell o baro Dewel.

Jesaja 61:9

Lengre tchawe, kai pal lende wenna, hi prindjedo un an-diklo pash i menshende an hake themma. Un koon len dikell, haiwell: Kolla hi i menshe, ap kolende o baro Dewel peskri bacht tchiwas.

Debleskri gili 35:6

Lengro drom te well kalo un sapeno, te dikenn le tchi un perenn le! Un o baro Debleskro bolepaskro te lell len palla!

Ezekiel 37:12

Doleske pen lenge laba, hoi mandar wenna. Pen lenge: Kawa penell o baro Dewel, maro rai: Mire menshe, me krau tumare grufte pre. Un mukau tumen dran tumare grufte win te well. Un me anau tumen an o them Israel.

Jesaja 62:12

Un jon wenn kharedo ‘Debleskre menshe’ un ‘wi-ginle o baro Deblestar’. Un tut denn le gole ‘o foro, hoi o Dewel kamell’ un ‘o foro, hoi buder gar muklo hi’.

Ezekiel 16:53

O diwes well, kai krau, te well lauter pale latches i forjenge Sodom un Samaria un kol gabenge trul lende. Un ninna tuke well lauter pale mishto.

Jesaja 62:7

Jon denn jaake rah gole, bis te job o foro Jerusalem pale pre tardo tchiwas, un bis te job les jaake kras, te well o foro ap i tseli phub sharedo.

Jesaja 56:8

O baro Dewel, maro rai, kowa kai anas i krik-tradede Israelitarjen pale an lengro them, penell: Me anau gomme budeder khetne pash kolende, kai khetne anlo wan.

5. Mose 26:18

Kau diwes penan tumer glan leste: ‘Awa, mer kamah leskre menshe te well, jaake har job penas, un kamah leskre tsele laba te rikrell.’

5. Mose 26:19

Un job krell, te weh tu o pralstuno pral i tsele wawar natsjone, hoi job kras, te wess hadedo, sharedo un railo. Tumer wenn o baro Debleskre menshe, kai leske kokres koi hi, un kek wawareske har lengro Debleske. Kowa penas job.”

Jeremia 30:3

Dik, o tsiro wella, kai lau o pandepen krik mire menshendar, o kherestar Israel un o kherestar Juda, penell o baro Dewel; Un me anau len pale an ko them, hoi lengre phurende dom, te well kowa lengro them.

Ezekiel 39:13

Un i tsele menshe an o them Israel paskrenn len. Koleske wenn le sharedo i wawar menshendar ap ko diwes, kai sikrau har baro un railo hom. Kowa penell o baro Dewel, maro rai.

Zakarie 8:8

Me anau len khere un mukau len an o foro Jerusalem te djiwell. Jon te wenn mire menshe. Un me wau lengro Dewel: Me mukau len gar, un jon djiwenn mantsa an o tchatchepen.”

Jeremia 23:3

Un me lau khetne kolen, kai djido atchan mire menshendar dran i tsele themma, kai tradom len. Me anau len pale khere. Kote djal lenge mishto, un jon wenn pale bud menshe.

Jeremia 33:9

Palle well o foro Jerusalem mange i foro, pral koleste bachtelo hom. I menshe an i tsele themma sharenn man, un hadenn man, te shunenn le ko tselo latcho koowa, hoi me o foreske Jerusalem krau. Lenge atchell o rakepen krik, un jon krenn bare jaka, te dikenn le ko tselo latchepen un koi tseli bacht, hoi dau kau foreske.

Micha 2:12

Tumer, Jakobeskre tchawe, me anau tumen khetne, – halauteren, kai atchan pral fun o tselo Israel. Anau tumen khetne, har anell i bakrengro peskre bakren an lengro kheer. Jaake har anell lo peskre bud bakren kote, kai le khere hi, jaake anau tumen an tumaro them. Un o them well pherdo tumendar.

Micha 4:7

Un me krau, te wenn lendar bud menshe. Awa, kolendar, kai krik tradedo his un pale khere anlo wan, well i baro natsjona. Un palle hom me, o baro Dewel, o baro rai pral lende ap i berga Zion hako tsireske.

Zakarie 8:13

Tumer menshe dran o them Juda un dran o them Israel, hans i menshenge an wawar themma har menshe, ap kolende i bibacht tchiddo hi. Kanna krau tumentsa jaake, te dikenn le miri bacht ap tumende. Doleske ma darenn! Krenn tumare wasta soreles!”