Remarja 2:9 - O Debleskro Drom 2021 (Sinte)

⁹ Bibacht un daar well ap i tsele menshende, kai o tchilatchepen kran, gar kokres ap i biboldende, na-a, ninna ap kolende, kai kek bibolde hi.

O Debleskro Lab 2024 (Sinte-Manouche)

⁹ Bibarht oun daar vell ap i tsele menshende, kay o čilačepen kran, gar kokres ap i biboldende, na-a, ninna ap kolende, kay kek bibolde hi.

Remarja 2:9 Referans Kwoze

1. Petro 4:17

Kanna was ko tsiro, kai wenna i tchilatche diwessa pral o Debleskre tchawende. Pal kowa wella bari bibacht pral kolende, kai patsan gar ap o Debleskro latcho lab!

Remarja 1:16

Me ladjau gar glan i menshende, te penap lenge o latcho lab o Jesus Kristestar. An kau lab hi o Debleskri soor. Un o Debleskri soor lell kolen dran o tchilatchepen un o merepen win, kai ap ko lab patsenna, – i bibolden un kolen, kai kek bibolde hi.

Ezekiel 18:4

Djinenn, man hi o djipen hakenestar an miro wast – o dadeskro djipen jaake har o tchaweskro djipen. Kokres kowa, kai anell doosh ap peste, hunte merell.

2. Tessalonikarja 1:6

Job djal ninna pal o tchatchepen, te dell lo kolen i phagi, kai tumen palla lan.

Remarja 9:24

Un mank kolende ham mer. Dran i tsele menshende rodas lo men win, gar dran i bibolde kokres.

Remarja 2:10

Railepen, tchatchepen un bacht dell o Dewel kolen, kai kran o latchepen, – gar kokres i bibolden, na-a, ninna kolen, kai kek bibolde hi.

Bičepangre 3:26

Doleske bitchras o Dewel peskro budepaskres, o Jesuses, glanstunes pash tumende, te anell job tumenge o Debleskri bacht, te djal hakeno tumendar peskro tchilatcho dromestar tele.”

Louka 24:47

Un an peskro lab hunte well i menshenge an hake themma penlo, te mukenn le pengro tchilatcho drom, un djan ap o Debleskro drom, jaake kai lell o Dewel lengri doosh lendar krik. Penenn kowa i menshenge an o foro Jerusalem, un palle an i wawar themma!

Kolossarja 3:11

Kote, kai o Dewel i menshen newes kras, kote hi jek jaake bud moldo har o wawar: I bibolde un kolla, kai kek bibolde hi; kolla, kai ap o mass tchinlo hi un kolla, kai gar ap o mass tchinlo hi; wi-themarja un diwje; raja un budepangre. O Jesus Kristo djiwell an hakeneste mendar.

Galatarja 3:28

Jaake djiwah lauter o Jesuseha khetne. Kanna hi jek, koon tumer han: bibolde un kolla, kai kek bibolde hi, budepangre un raja, mursha un djuwja. An o Jesus Kristeste hi jek har o wawar.

Remarja 10:12

Kau lab hi i tsele menshenge: i biboldenge, ninna kolenge, kai kek bibolde hi. Len halauteren hi jek rai. Un job dell o djipen lauterende, kai les mangenna.

Bičepangre 28:28

Un o Paulo penas: “Djinenn! Kanna well o Debleskro latcho lab o Jesus Kristestar pash kolende, kai kek bibolde hi, un jon shunenna.”

Bičepangre 28:17

Pal triin diwessa das o Paulo kol pralstune bibolden pash peste gole. Har jon lauter khetne his, penas o Paulo ap lende: “Tumer mursha, mire phrala, mare menshenge krom tchi, hoi tchilatcho his. Witar gar rakrom djungeles pral kowa, hoi mare phure menge penan. Un ninna te krom lenge kek tchilatchepen, tchiwan le man stildo an o foro Jerusalem, un dan man an i Remarjengre wasta.

Bičepangre 26:20

Me djom an o foro Damaskus, un palle an ko foro Jerusalem. Un i tsiro koi pre djom an ko them Judea. Un pal kowa djom pash kolende, kai kek bibolde hi, un penom lauterenge, te mukenn le pengro tchilatcho drom, un te djan le ap o Debleskro drom, un te djiwenn le jaake, kai i wawar dikenna, kai jon pengro phuro djipen mukan.

Bičepangre 20:21

Me penom i biboldenge un kolenge, kai kek bibolde hi, te mukenn le pengro tchilatcho drom, un te djan le ap o Debleskro drom, un te patsenn le ap maro rajeste, o Jesuseste.

Bičepangre 13:26

Mire phrala, tumer, kai han o Abrahameskre menshe, un tumer wawar, kai mangenn o Debles an, tumenge penau: O Dewel bitchras tumenge peskro latcho lab, hoi dell tumen o djipen, hoi gar pre-herella.

Bičepangre 11:18

Har jon kowa shunan, tchingran le buder gar ap o Petreste. Jon sharan o Debles un penan: “O Dewel sikras ninna kolende peskro drom an o newo djipen, kai hi kek bibolde. Jon nai mukenn pengro tchilatcho drom un wenn ap o Debleskro drom.”

Mateo 16:26

I mensheske wals kowa gar mishto, te lals lo o tselo brawlepen ap kai phub, un nashrals o djipen. I mensho nai dell tchi o Debleste, te lell lo ko djipen pale.

Amos 3:2

Mank i tsele natsjone ap kai phub han tumer kokres kolla, kolen mange win rodom, un ap lende jak dom. Doleske hi tumari doosh jaake baro, un me hunte dap tumen i phagi.

2. Familjakro liil 6:23

palle shun tu an o bolepen, un kre o tchatchepen win pral tire budepangre. Kre te well o tchilatchepen, hoi jek kras, ap leskro shero. Un ko wawares, kai an o tchatchepen his, de les leskro tchatchepen, te well diklo, kai kek doosh ap leste hi.

Debleskri gili 32:10

Ap i tchilatche menshende wenn bud duka. Koon tchiwell peskro tselo patsepen ap o baro Debleste, trul koleste tchiwell job peskro latchepen.

Gosewe laba 11:23

Kowa, hoi kolla kamenn, kai o tchatchepen krenn, anell lenge latchepen. Un kowa, hoi i tchilatche kamenn, anell lenge o Debleskri choli.

Ezekiel 22:31

Doleske tchorau miri choli win pral lende. Miri tati choli well pral lende har i jag, un jon merenn. Jaake anau lengro tchilatchepen pale ap lengro shero. Kowa penell o baro Dewel, maro rai.

Remarja 8:35

Tchi nai lell mendar o Jesus Kristeskro kamlepen krik! Kek duka, kek daar. Ninna te lenn le men palla, ninna te hi men tchi te chal un tchi an-ripaske, ninna te kamenn le men tchilatchepen te krell, ninna te marenn le men, ko tselo koowa nai lell gar o Jesus Kristeskro kamlepen mendar krik.