Nahum 3:11 - O Debleskro Drom 2021 (Sinte)

¹¹ Ninna tu, Ninive, weh mato i dukatar un dinelo an o shero. Ninna tu rodeh, kai tut nai khatress kolendar, kai kamenn tut te marell.

O Debleskro Lab 2024 (Sinte-Manouche)

¹¹ Ninna tou, Ninive, veh mato i doukatar oun dinelo an o shero. Ninna tou rodeh, kay tout nay khatress kolendar, kay kamenn tout te marell.

Nahum 3:11 Referans Kwoze

Jesaja 49:26

Kolla, kai chan tut, kolla hunte chan pengro mass un hunte pijenn pengro rat, un wenn kolestar jaake mato, har te pijans le gudli mool. Palle haiwenn i tsele menshe, te hom me o baro Dewel, kowa, kai lell tut win dran o merepen, un tserdell tut win dran i tchilatche wasta, me o sorelo Dewel o Jakobestar.

Jesaja 2:10

Dja mank i bare barra, un khate tut an i tchik, i darjatar o baro Deblestar un glan leskro railo barepen.

Louka 23:30

Ap ko tsiro penenn le ap i berge: Perenn pral mende!

Nahum 1:10

Tumer han tchi har subjengre kashta, hoi tchi-moldo hi, un hoi an i jag witsedo wenn, un pre-chatchenn har truk phuss, te atchell tchi lendar pral.

Hosea 10:8

Khetne dine wenn i mulne platse, kai i Israelitarja i chochene deblen an-mangan, un o baro Deblestar tele peran. Subjengro senlepen un subjengre burra wenn bares ap lengre altare. Un jon penenna: Tumer bare un tikne berge, perenn pral mende, un tchakrenn men!

Jeremia 4:5

Denn soreles gole an Juda, kharenn win an Jerusalem, un penenn: Phurdenn koi phurdepaskri an o tselo them! Denn win gole, te wenn le an i sorele forja khetne!

Jesaja 2:19

Ap ko diwes, kai o baro Dewel pre stell, te anell lo i traash pral i phub, khatrenn pen i menshe an i grotte, mank i bare barra un an i phub, i darjatar o baro Debleskri choljatar un glan leskro railo barepen.

Debleskri gili 75:8

Na-a, o Dewel hi o tchatchepaskro rai, kai ko jekeske i soor krik lell, un o wawares bares krell.

Nahum 2:1

Tumer menshe an Juda, dikenn: Pral i berge well i mursh, kai anell i latcho lab. Job penell: O kurepaskro tsiro hi trujel! Rikrenn pale tumare bare diwessa un awenn bachtelo koi dren! Denn o Debleske kowa, koleske tumen sowel dan. Ko tchilatcho, kai halauter paash das, well buder gar an tumaro them. Job hi buder gar koi.

Micha 7:17

Jon hunte tchiwenn pen ap i phub pengre mujentsa an i tchik har i sapa un i kirme. Un trisslepah wenn le win dran pengre sorele khera, un wenn glan tute, maro baro Debleste, bari darjah.

Amos 9:3

Ninna te khatrenn le pen pral ap i berga Karmel, rodau me len un lau len tele. Ninna te khatrenn le pen mandar tele an o baro pani, jaake penau o panjeskro sap, te dandrell lo len.

Jeremia 51:57

O baro Dewel penell: Me krau len mato, kol pralstunen an Babilon, kol gosewe murshen, themeskre rajen, pralstune lurden, un kol wawar lurden an Babilon, te perenn le an i sopen, kolestar jon buder gar pre stenn. Kowa penell o baro rai, koleskro lab hi: baro Dewel, ko rai pral o bolepen un i phub.

Jeremia 8:14

Hoske ham mer kai trujel beshdo? [putchenn i menshe dran Juda.] Mer was khetne, te djas mer an kol sorele forja, te was koi maredo! Mer mukam o baro Debles, maro rajes. Doleske kamell lo maro merepen, un dell men sawo pani te pijell, hoi marell men.

Jesaja 63:6

Un me stakrom i menshen an wawar themma khetne an miri choli. Un jon wan mato dran miro choli. Un me mukom lengro rat ap i phub te nashell.

Jesaja 29:9

Krenn dureder, har te wans dinelo an o shero! Krenn dureder, har te wans korelo ap i dui jaka! Tumer han mato – un pijan kek mool. Tumer perenn jek rigjatar ap i wawar – un pijan kek sorelo pipen.

1. Samuel 14:11

Un kol dui sikran pen kol Filistarengre lurdenge, kai koi jak dan. Un kolla penan ap pende: “Ake, i Hebrearja wenn dran pengre chebja win, an kolende jon pen khatran!”

1. Samuel 13:6

Har i Israelitarja dikan, har sorelo i Filistarja hi, tapras len i daar, un jon khatran pen an i phub, pal subjengre burra, mank bare barra, an grufte un panjengre chebja.