Micha 1:8 - O Debleskro Drom 2021 (Sinte)

⁸ Pral kowa halauter hunte dap i bari gole un hunte rowap, me nashau pirkenes un nanges, te sikrap har miro dji rowella. Har i diwjo djuklo dau gole, un rowau har ko tchirklo, hoi kharell straussa.

O Debleskro Lab 2024 (Sinte-Manouche)

⁸ Pral kova halauter hounte dap i bari gole oun hounte rovap, me nashau pirkenes oun nanges, te sikrap har miro dji rovella. Har i divyo djouklo dau gole, oun rovau har ko čirklo, hoy kharell straussa.

Micha 1:8 Referans Kwoze

Jesaja 22:4

Doleske penau tumenge: Ma dikenn ap mande! Mukenn man te rowell. Miro dji hi jaake pharo. Ma rakrenn latches ap mande, kamau gar te bistrap koi bibacht, hoi ap mire menshende was.

Jeremia 9:19

Shunenn, tumer djuwja, o baro Debleskro rakepen! Denn garda ap leskre laba! Sikrenn tumare tchende, har te giwenn le koi ropaskri gili; jek te anell i wawarat kai gili pashel:

Jeremia 9:10

O baro Dewel penell: Me kamau Jerusalem tele te phagell, jaake te atchenn kokres barra pral, un kai diwje djukle dren djiwenna. Un dran kol forja an Juda krau i mulo them, kai nai djiwell kek buder dren.

Jeremia 9:1

Te wals man an o mulo tato them i kheer, kai nai atchau, mukoms me mire menshen, un djoms mange. Jon lauter hi har romma, kai mukan pengre romjen beshdo. Jaake mukan kal phukepangre o baro Debles.

Jeremia 4:19

Har dukell man kowa, hawi daar hi an mande! Miro dji djal soreles an miro betch, me nai atchau gar pokones; me shunau koi phurdepaskri, un ko kurepaskri gole.

Jesaja 21:3

Hoi shunom, hi jaake djungelo, kai phagau khetne. Hoi dikom, krell man bari traash. Mire kokale trissenna, duka tapran man har i djuwjat, kai lell i ternepen.

Jesaja 16:9

Doleske rowau me khetne kolentsa, kai an o foro Jaser djiwenn, rowau pral i drakengre ruka pash o foro Sibma. Bud hi mire swa, hoi rowau pral tute, Heshbon, un pral tute, Elale. Pral tumare rukengre un pral tumari djob denn kolla gole i bachtjatar, kai kuran pen tumentsa.

Jesaja 13:21

Diwje vieche dran o mulo them djiwenn koi. I khera wenn pherde ratsjakre tchirkle. Bare diwje tchirkle djiwenn koi, un diwje busja khelenn koi.

Debleskri gili 102:6

Me hom jaake sano, kai nai dikeh i kokale, jaake bud rowau un dau gole.

Hiob 30:29

Miri gole hi har i gole i diwje djuklendar un kol tchirklendar, kai kharenn Strausse.

1. Samuel 19:24

Kote riwas job ninna peskre koola win, un rakras glan o Samuel o Debleskro rakepen win, un peras ap i phub un his nanges koi tchiddo o tselo diwes un i tseli rat. Doleske well penlo: “Hi o Saul ninna mank o Debleskre rakepangre?”

Jesaja 13:22

Diwje djukle rowenna an i rajengre khera, kai his jaake shukar un railo. I tsiro o foreske Babilon was, te lell li peskri phagi. Un leskre diwessa hi trujel.

Jesaja 32:11

Trissenn, tumer djuwja, kai tumenge kek shero krenn, trissenn i darjatar, tumer, kai dikenn kokres ap tumende! Riwenn tumare ripja win, un tchiwenn i gono trul tumende!

Ezekiel 32:18

Tu, mensho, rob pral i menshende an o them Egiptia, khetne kol djuwjentsa dran i wawar sorele themma! Un bitche i Egiptarjen tele an o mulengro them pash i mulende.

Micha 2:4

An ko tsiro giwenn le i sapaskri gili pral tumende, un krenn tumen palla, har tumer rowenn: “Halauter hi nashedo. Mer ham khetne maredo! Maro them las o Dewel mendar, un das les kolende, kai lan men pandlo.”

2. Rajengro liil 18:13

O Hiskija his an o 14. (deesh-te-starto) bersh baro rai pral o them Juda, koi djas o baro rai pral o them Assur, o Sanherib, an o them Juda un las i tsele sorele forja peske dren. Kote bitchras o Hiskija murshen pash o baro rajeste pral o them Assur. Kowa his an o foro Lakish, un mukas leske te penell: “Me anom doosh pral mande. Dja mandar krik! Hoi tu mandar kameh, ko kamau te plaissrell.” Kote mangas o Sanherib lestar triin-sheel zentnarja rup un trijanda zentnarja sonakai.

Ester 4:1

Un har o Mordekai shunas, hoi djas, kras lo peskre koola paash, hoi ap leste his. Un riwas peske i gono an, un tchiwas jagakri tchik ap peste. Un djas dren mashkral o foro un rowas un das gole.