Mateo 18:28 - O Debleskro Drom 2021 (Sinte)

²⁸ Un o mursh djas dran ko kheer win, un tapras i wawar budepaskres ap o drom. Kales his sheel beme sijaan pash leste. Koi tchiwas lo peskre wasta trul koleskri meen, te tassrell lo les, un penas ap leste: De man kanna mire lowe pale!

O Debleskro Lab 2024 (Sinte-Manouche)

²⁸ Oun o morsh djas dran ko kheer vin, oun tapras i vavar boudepaskres ap o drom. Kales his sheel beme siyaan pash leste. Koy čivas lo peskre vasta troul koleskri meen, te tassrell lo les, oun penas ap leste: De man kanna mire love pale!

Mateo 18:28 Referans Kwoze

Mateo 20:2

Kolentsa kras job win, te dell lo len jek rupeni bema kau diweske. Palle bitchras lo len ap peskro kotar them, te budrenn le leske.

Ezekiel 45:9

Kawa penell o baro Dewel, maro rai: Kanna hi doha! Tumer raja pral o Israel, herenn pre, te rikrenn i menshen i sorjah tele! Dukrenn len buder gar! Krenn, hoi mishto un tchatcho hi! Mukenn tele, te tradenn mire menshen dran pengre khera win! Kawa penell o baro Dewel, maro rai.

5. Mose 15:2

Krenn kowa jaake: Hakeno, kai i wawar Israelitares lowe patsas, mukell leske kanna koi sijaan. Job te mangell gar koi sijaan pale leskro phralestar. Hi i baro Debleskro bersh, kai i tseli sijaan muklo well.

Jesaja 58:3

Bud kope cham tchi, penenn le, te dikess latches ap mende. Hoske dikeh tu kowa gar? Mer rikram men pale o chapastar, un tu haiweh kowa gar! Dikenn, penell o baro Dewel, ap ko diwes, kai tumer mange tchi chan, krenn tumer, hoi tumenge mishto hi, un rikrenn tumare budepangre tele.

Nehemia 10:31

Mer kamah mare tchen gar i murshentsa i wawar menshendar an kau them te romedinerell, un ninna lengre tchen gar mare tchawenge te lell.

Nehemia 5:7

Un rakrom miro djijeha, un djom pash i pralstunende un i tchatchepangre murshende un tchingrom ap lende un penom: “Tumer pijenn o rat tumare phralendar win!” Un me krom i baro tsillo,

Gosewe laba 28:3

I tchorwelo mursh, kai was baro un rikrell i tchorwelen tele, hi har depen, hoi lauter krik thowell un o djob paash krell.

Mateo 18:27

Un o rajes khaitas kowa, un job mukas leske leskri tseli sijaan te perell, un mukas les te djal.

Mateo 18:29

Koi witsras pes kau mursh glan o wawareste ap i phub un penas: Me mangau tut: Ab latches ap mande, un de man i tsiro, te nai plaissrap me tuke len pale!

Markus 6:37

Koi penas lo ap lende: “Denn tumer len te chal!” Penan le: “Kameh, te las dui-sheel rupene beme, te ginas maro un das len te chal?”

Markus 14:5

Te bikrams ko djet, lams budeder har triin-sheel rupene beme. Un kol lowe nai dams mer i tchorwelende.” Un jon tchingran ap late.

Louka 7:41

Koi penas o Jesus: “Dui kran sijaan pash i rajeste kai lowe win patsella. Ko jekes his pantch-sheel (500) rupene beme sijaan, ko wawares pantch-deesh (50).

Louka 10:35

O wawar diwes taissarlake das lo dui rupene beme o rajeste an koi kertchima, un penas: De les chapen un pipen! Te hi kol lowe gar doha leske, dau tute budeder, te wau pale.”

Johanni 6:7

O Filipo penas: “Ninna te wals men dui-sheel rupene beme, wals kowa gar doha, te lell hakeno i tikno kotar maro.”