Louka 17:3 - O Debleskro Drom 2021 (Sinte)

³ Denn jak ap tumende! Te krell tiro phraal tchilatcho koowa ap tute, pen leske, kai kowa gar mishto hi, hoi job kras! Te khaitell les ko tchilatcho koowa, hoi job ap tute kras, jaake ab buder gar chojedo ap leste!

O Debleskro Lab 2024 (Sinte-Manouche)

³ Denn yak ap t'mende! Te krell tiro phraal čilačo koova ap toute, pen leske, kay kova gar mishto hi, hoy yob kras! Te khaytell les ko čilačo koova, hoy yob ap toute kras, yaake ab bouder gar rhoyedo ap leste!

Louka 17:3 Referans Kwoze

3. Mose 19:17

Te choiral tut pral jekeste tire menshendar, ma hidje tiri choli tuha trujel. Pen leske, hoi lo gar mishto kras, te aness kek doosh ap tute.

Mateo 18:21

Koi djas o Petro pash leste, un putchas lestar: “Rai, te hi miro phraal bud kope tchilatcho ap mande, kitse kope hunte bistrap ko tchilatcho koowa, hoi job ap mande kras? Hi efta kope doha?”

Gosewe laba 9:8

Te peneh i pre-phurdes, kai kowa, hoi lo kras, gar mishto hi, palle well lo chojedo ap tute. Te peneh i gosewes, kai kowa, hoi lo kras, gar mishto hi, palle kamell lo tut.

Jakobo 5:19

Mire phrala, djinenn: Te peras jek tumendar o tchatcho dromestar tele, un jek wawar anell les pale ap o tchatcho drom,

Gosewe laba 27:5

Feteder hi, te well jekeske an o mui penlo, hoi lo gar mishto kras, har te penell jek leske gar, te kamell lo les o djijestar.

5. Mose 4:23

Kanna denn tumen jak, te bistrenn gar, hoi tumaro baro Dewel tumentsa win kras! Ma krenn tumenge i figura tchomonestar, hoi mangenn an, har te wals i dewel. Tumaro baro Dewel penas tumenge soreles, te krenn kowa gar.

5. Mose 4:9

Denn soreles jak ap tumende, te bistrenn gar – jaake rah har djiwenn, – hoi tumare jakentsa dikan! Un penenn tumare tchawenge un lengre tchawenge,

2. Mose 34:12

Ma awenn mala kol menshenge an ko them, kai tumer wenna! Te wans lengre mala, nai anans le tumen miro dromestar tele.

2. Johanni 1:8

Denn jak, te nashrenn gar kowa, hoi mer tumen sikram, te well tumen ninna ko tselo brawlepen, hoi o Dewel kamell tumen te dell.

Hebrearja 12:15

Denn jak, te tchiwell kek o Debleskro latchepen ap i rig! Denn jak, te djal kek tchilatcho rakepen mashkral tumende trujel, un krell o patsepen bud patslendar paash! Sawo rakepen hi har i tchilatcho chuchur, hoi krell kolen nasselo, kai les chana.

Efesarja 5:15

Denn jak koi pre, har tumer tumaro djipen djiwenna! Ma djiwenn har dinele menshe! Djiwenn har kolla, kai djinenna, hoi mishto hi!

Louka 21:34

“Denn garda, te well tumaro dji gar pherdo phubjakro koowa, jaake te bistrenn o Debles! Pijenn tumen gar mato! Ma darenn tumaro djipaske! Denn jak, te well ko diwes gar ap jek kopo ap tumende jaake, te han tumer tapedo!

Gosewe laba 17:10

Te tchingreh jekeha, kai mukell pes tchomone te penell, lell job kowa peske budeder an o dji, har te dell jek sheel kope an i dineleste dren.

Debleskri gili 141:5

Latche menshe mu denn man i phagi, un tchingrenn mantsa an o latchepen. I tchilatchendar kamau gar, te sharenn le man. Un me mangau o Deblestar, te krenn le mange kek tchilatchepen.

5. Mose 4:15

Jaake denn jak, te bistrenn gar: Ap ko diwes, har o baro Dewel pash i berga Horeb, dran i jag win tumentsa rakras, dikan tumer les gar.