Jesaja 8:19 - O Debleskro Drom 2021 (Sinte)

¹⁹ Nai well, te penenn i menshe tumenge: “Putchenn kolen, kai i mulentsa rakrenn, un putchenn i drawepangren, kolla, kai rakrenn lokes glan pende.” Ap kolende penenn: “Hunte putchenn gar i menshe pengro debles? Putchenn le i mulen i djidenge?”

O Debleskro Lab 2024 (Sinte-Manouche)

¹⁹ Nay vell, te penenn i menshe t'menge: “Poučenn kolen, kay i moulentsa rakrenn, oun poučenn i dravepangren, kolla, kay rakrenn lokes glan pende.” Ap kolende penenn: “Hounte poučenn gar i menshe pengro debles? Poučenn le i moulen i djidenge?”

Jesaja 8:19 Referans Kwoze

1. Familjakro liil 10:13

O Saul meras doleske, kai job gar kras, hoi o baro Dewel leske penas, un kai job pash koi djuwjate djas, kai i mulentsa rakras, un lat putchas.

3. Mose 20:6

Miri choli well ninna ap koleste, kai djal pash i durkepangre un pash kolende, kai i mulen putchenn, te putchell lo lendar, hoi te krell lo. Me mukau les buder gar mank peskre menshende te djiwell.

2. Familjakro liil 33:6

Un job mukas peskre tchawen an i jag te djal an i tala Ben-Hinnom, un shunas ap tchirklengre golja un wawar sikepen, un kras durkepen un rikras peske drawepangre un sawe menshen, kai i mulen putchan. Jaake kras lo bud koowa, hoi tchilatcho hi glan o baro Debleskre jaka, te choirell lo les.

Debleskri gili 106:28

Pal i tsiro witsran pen i Israelitarja glan kol wawarengro debleste Baal tele ap i berga Peor, un chan ko mass kol viechendar, hoi wan maredo i mulenge.

3. Mose 19:31

Ma djan pash i durkepangre un pash kolende, kai i mulen putchenn! Ma rodenn sawen pre, te krenn tumen gar pale-tchiddo ap lende. Me, o baro Dewel, hom tumaro Dewel.

Jesaja 29:4

Palle han tchiddo ap i phub. Un dran i tchik rakrenn tumer palle jaake, har te wans tel i phub. Un tumaro rakepen well gar mishto shunlo, un hi har o rakepen i mulestar, kai dran i phub rakrell.

Jesaja 19:3

Palle djinenn i Egiptarja gar buder, hoi te krenn le. Un me krau, te djal lenge gar, hoi kamenn le te krell. Un palle djan le pash pengre chochene deblen, te putchenn le lendar, un pash kolende, kai i mulen putchenn, un pash i durkepangren un drawepangren.

1. Samuel 28:8

Un o Saul kras pes jaake, te prindjrell les kek pale, un riwas wawar koola an, un djas koi pash late. Un job las gomme dui murshen peha. Un jon wan an i rat pash koi djuwjate. Un o Saul penas: “De i mules mange gole, un durke mange, hoi wella! Me penau tuke, kones te less pre!”

5. Mose 18:11

kek, kai rakrell bibacht win an o bengeskri soor, kek, kai i mulentsa rakrell oder i mulen putchell.

Jeremia 10:10

O baro Dewel hi o tchatcho Dewel, ko djido Dewel, kai hako tsireske o baro rai atchell. Te well job chojedo, trissell i phub, un i menshe nai rikrenn leskri choli gar win.

2. Rajengro liil 21:6

Un job mukas peskro tchawes an i jag te djal un shunas ap tchirklengre golja un wawar sikepen, un rikras peske drawepangre un sawe menshen, kai i mulen putchan. Jaake kras lo bud koowa, hoi tchilatcho hi glan o baro Debleskre jaka, te choirell lo les.

2. Rajengro liil 1:3

Koi penas o baro Debleskro bolepaskro ap o Elija, – kowa his dran Tishbe: “Dja pash kol bitchepangre o baro rajestar dran Samaria, un pen ap lende: ‘Hi kai kek Dewel an Israel? Hoske djan tumer, te putchenn kol deblestar dran Ekron, o Baal-Sebub?

2. Rajengro liil 23:24

Ninna tradas o Josia i tsele drawepangren krik, un kolen, kai i mulen putchenn, un mukas i khereskre deblen un i wawar chochene deblen krik te anell dran o them Juda un dran o foro Jerusalem. Kowa kras lo, te well halauter jaake kerdo, har tchinlo hi an ko liil, kai lenge o Debleskro drom siklo well, – ko liil, hoi o rashai Hilkija an o baro Debleskro kheer hatsas.

1. Samuel 28:16

Un o Samuel penas: “Hoske putcheh tu mandar, te djas o baro Dewel tutar, un job buder gar tuha hi?

2. Petro 2:1

Glan i rah tsiro his chochene rakepangre an o them Israel, kai kran, har te bitchras len o Dewel. Jaake wenna ninna mashkral tumende chochene sikepangre, kai sikrenn tumen i chocheno drom, kai anell tumen krik o Deblestar. Kol sikepangre denn o Jesuses, maro rajes, buchoste, kai plaissras peskro rateha lenge, te lell lo len dran o tchilatchepen win. Jon nashenn an pengri bibacht.

1. Samuel 28:11

Kote penas koi djuwel: “Kones dap tuke pre gole?” Un job penas: “De mange o Samueles pre gole!”

1. Tessalonikarja 1:9

Jon hi kolla, kai penenn i wawarenge, har lan tumer men pash tumende pre, har mukan tumaro phuro drom, te djan ap o Debleskro drom, un mangenn buder gar wawar koowa an har o djido un tchatcho Debles kokres.

Bičepangre 16:16

Jek diwes, har mer djam pale pash o pani, kai jon mangan o Debles an, tapram mer i rakli, an kolate his i beng, kowa das lat o durkepen. Lakro durkepah anas li lakre rajenge bud lowe dren.

1. Mose 41:24

Un kol sane halme chan kol efta pesse halme. Un me penom kowa, hoi dom suni, kol durkepangre. Un kek his koi, kai penell nashte mange, hoi kol sunja mange penenna.”

Jesaja 26:14

I mule wenn buder gar djido, un stenn buder gar pre. Kolen, kai pral mende i raja his, dal tu lengri phagi: Jon hi buder gar koi. Un i menshe bistran len.

Jesaja 30:2

Mandar putchenn le gar, hoi te krenn le. Na-a, jon djan tele pash i Egiptarjen, te mangenn le o rajestar Farao, te well job ap lengri rig, un te rikrell lo peskre wasta pral lende.

Jesaja 45:11

Kawa penell o baro Dewel, kai kokres o tchatcho Dewel hi. Job hi o Israeleskro Dewel, un kowa, kai les kras: Hunte penap tumenge, hoi mire tchawentsa krau? Kamenn mange glan te tchinell, hoi te krap mire wastentsa?

Jesaja 47:12

Stake glan, pen kol tsele laba pre, hoi te rikrenn i bibacht dur tutar! Kre tiro bengeskro koowa, hoi kral fun tiknes pre! Dik, har tu tut koi nai win leh!

Jesaja 47:13

Bud gosewe penan tuke, hoi te kress, jaake te wal khino kol bud labendar. Mu wenn le kanna un lenn tut dran i bibacht win, kolla, kai drawerenn an i bolepangre momlia, te djinenn le, hoi wella, un hako newo tchon tuke penenn, hoi pral tute well.

Jeremia 27:9

Ma shunenn ap tumare chochene rakepangre un ap i durkepangre, witar gar ap kolende, kai sikrenn, hoi sunja penenn, witar gar ap kolende, kai krenn bengeskro koowa un kai putchenn i mulen. Kolla lauter penenn tumenge, te hunte krenn gar, hoi o baro rai pral Babilonia tumendar kamell.

Micha 5:12

Tumare figure, hoi an-mangenn, un tumare pre-tchidde barra dau paash, te mangenn tumer buder gar kowa an, hoi tumare wastentsa kran.

5. Mose 18:10

Kek mank tumende hunte chatchrell peskro mursh tchawes oder peskri tchat an i jag o Debleske. Kek mank tumende hunte well i durkepaskro, kek i drawepaskro, kek, kai krell wawar bengeskri koowa,

1. Samuel 28:7

Kote penas o Saul ap peskre budepangre: “Rodenn mange i djuwel, kai i mulen putchell. Kamau te djap koi, te nai putchap latar!” Un leskre budepangre penan ap leste: “Dik, an o foro En-Dor hi i djuwel, kai i mulen putchell.”