Jesaja 6:10 - O Debleskro Drom 2021 (Sinte)

¹⁰ Rake lentsa, ninna te pandenn le pengre djia, un krenn pengre kanda kashteno, un pengre jaka pandlo. Te dikans le pengre jakentsa, un shunans pengre kandentsa, un haiwans pengre djijentsa, mukans le pengro tchilatcho drom un wans pash mande, un me kroms len sasto.

O Debleskro Lab 2024 (Sinte-Manouche)

¹⁰ Rake lentsa, ninna te pandenn le pengre djia, oun krenn pengre kanda kashteno, oun pengre yaka pandlo. Te dikans le pengre yakentsa, oun shounans pengre kandentsa, oun hayvans pengre djiyentsa, moukans le pengro čilačo drom oun vans pash mande, oun me kroms len sasto.

Jesaja 6:10 Referans Kwoze

Mateo 13:15

O Dewel penas: Kalla menshe kamenn gar te haiwell, hoi shunenn le. Jon kamenn gar te shunenn, hoi me penau. Witar gar kamenn le te dikell, hoi tchatcho hi. Te kamans le kowa te dikell, shunans le. Un te shunans le, haiwans le, un wans pash mande. Un me nai kroms len sasto.

Bičepangre 28:27

Kol menshengre djia hi har bar, un lengre kandentsa shunenn jon tchi. Lengre jaka hi pandlo, te nai dikenn jon tchi. Jon kamenn pengre jakentsa tchi te dikell, un pengre kandentsa tchi te shunell. Un pengro djijeha kamenn le tchi te haiwell. Jon kamenn gar pengro phuro djipen te mukell, un ap miro drom te djal. Doleske nai lau len gar dran o tchilatchepen win. ”

Jeremia 5:21

Shunenn kai, tumer menshe, kai tumen tchi an o shero hi, kai len jaka hi, un dikenn tchi, kai len kanda hi un shunenn tchi!

Jeremia 6:10

Koneha rakrap me? Koneske penap tutar? Koon shunella koi pre? Lengre kanda hi pandlo. Jon nai shunenn gar, hoi tu lenge kameh te penell, un san pral tire laba, un choirenn pen pral lende.

Zakarie 7:11

Mire menshe kaman gar jak te dell ap mire laba, un rissran mange pengro dumo, un pandan pengre kanda, te shunenn le gar, hoi me lenge penom.

Jesaja 63:17

Hoske, baro Dewel, mukeh tu men tire dromendar tele te djal, te kram mare djia har bar, jaake te djiwam buder gar tuha? Ab pale pash mende! Ma biste tire budepangre! Mer ham tire menshe.

Jesaja 29:10

O baro Dewel tchiwas i sopaskro ducho ap tumende. O Debleskre rakepangre hunte wans tumare jaka, – o Dewel kras len korelo, un i dikepangre dikenn buder tchi, har te wals i diklo trul lengre jaka pandlo.

5. Mose 2:30

O Sihon, ko baro rai an Heshbon, kamas men gar wergel leskro themestar te djal. Tumaro baro Dewel mukas leskro dji har bar te well, jaake te dikas lo tchi dren. Jaake das o baro Dewel les un leskro them an tumare wasta. Un kowa his gomme kau diwes jaake.

Debleskri gili 17:10

Lengre djia pandenn le, te khaitell len kek, un pengro mujeha krenn le pen bares.

5. Mose 32:15

O Jeshurun djiwas i shukar djipen, his tchalo un brawelo. Har was lo pesso, phurdas lo pes pre. Un mukas o Debles, kai les kras, un witsras les ap i rig. Leskro sorelo rikepaskro his leske tchi moldo.

Debleskri gili 119:70

Kolla menshe pandan pengre djia, te haiwenn le gar tiro lab. Me hom bachtelo, te djap tiro drom.

2. Mose 14:17

Me krau, te pandenn i Egiptarja pengre djia jaake, te lenn le tumenge palla. Un me sikrau miro barepen un miri soor ap o Farao, ap leskre wurdja un ap leskre kurepangre.

2. Mose 11:10

Un o Mose un o Aron kran ko tselo baro koowa an o Debleskri soor glan o Farao. Un o baro Dewel pandas leskro dji, te mukas lo i Israelitarjen gar dran peskro them te djal.

2. Mose 10:27

Un pale pandas o baro Dewel o Faraeskro dji, te mukas lo len pale gar te djal.

2. Korintarja 2:16

Kolenge, kai djan nashedo, hi kowa har i djungeli khand, hoi anell len an o merepen. Kolenge, kai lenn o Debleskro djipen, hi kowa i latcho sungepen, hoi anell len an o djipen. Kaja hi i bari budi. Koon nai krell kowa lauter mishto? Kek.

Bičepangre 3:19

Mukenn tumaro phuro djipen un awenn pash o Debleste, te lell job tumari doosh tumendar!

Jesaja 19:22

Un pal kowa, kai das o baro Dewel i Egiptarjen, krell lo len sasto. Un jon wenn pale pash leste. Un job mukell pes lendar te mangell un krell len sasto.

2. Mose 7:3

Me kamau leskro dji har i bar te krell, jaake te nai krap bud baro koowa an o tselo them Egiptia, te sikrap miri bari soor.

Johanni 12:40

O Dewel kras, kai dikenn jon nai gar. Un lengro dji kras job pandlo. Kowa kras job, te dikenn jon nai tchi pengre jakentsa, un te djal tchi dren an lengro dji. Te nai mukenn le gar pengro tchilatcho drom un wenn pash o Debleste, te krell lo len sasto.

5. Mose 29:4

40 (star-deesh) bersha djas lo glan tumende an o mulo tato them: Tumare koola djan gar paash, un tumare kircha ap tumare pire nashan pen gar tele.

5. Mose 31:20

Me anau len an ko them, jaake har man sowel dom glan lengre phurende, te krap kowa. Kowa hi i them, an koleste bud thud un gwin hi. Un jon chan un wenn tchalo un thullo. Un kote nashenn le wawar deblenge palla, un mangenn kolen an. Un ap mande dikenn le tele, un phagenn koi sowel, hoi le mantsa dren djan.

Debleskri gili 69:23

An kol diwessa, kai wenn le khetne te chan shukar chapen, muk lengro chapen lenge te well i netsa, kai perenn le dren!

Jesaja 29:14

Doleske krau kal menshentsa pale sawo koowa, hoi le gar haiwenn, un hoi win dikell, har te wals kowa gar mandar, jaake te atchell lenge o rakepen krik. Lengre gosewe menshe hi palle buder gar gosewo. Un kolla, kai bud haiwan, haiwenn buder tchi.

Jesaja 44:18

Kolla, kai mangenn i figuren an, haiwenn tchi, kek goswepen hi an lende, lengre jaka hi pandlo, te nai dikenn le tchi. Un lengro dji haiwell tchi.

Jeremia 17:9

Koon nai prindjrell o mensheskro dji? Tchi hi jaake tchilatcho un chocheno har o mensheskro dji.

Ropaskre gilja 3:65

Kre lengre djia har i barra, un tchip tiro praassepen ap lende!

Zakarie 11:15

O baro Dewel penas mange palle: “Le tuke pale o bakrengro koowa, te wess kanna i bakrengro, kai tchi moldo hi!

5. Mose 29:3

Un bis ap kau diwes das o baro Dewel tumen gomme gar djia, hoi haiwenn un jaka, hoi nai dikenn un kanda, hoi nai shunenn.

Gosewe laba 16:30

Kowa kai i jakentsa dell un peskro mui khetne tserdell, koles hi tchilatchepen an o shero.

Sikepaskro 3:3

Dell jek tsiro, kai well maredo, un jek tsiro, kai well o dukepen sasto; jek tsiro, kai well o kheer tele phagedo, un jek tsiro, kai well o kheer pre-tchiddo.

Jesaja 28:13

Doleske haiwenn le gar, hoi o baro Dewel lenge penell. Leskro lab hi lenge tchi wawar koowa har sau koowa, hoi i ternepen rakrell: ba-ba-ba, ma-ma-ma. Jaake te djan le koi un perenn, un phagenn pen i herja, taprenn pen an i dori, un wenn pandlo.

Jesaja 29:9

Krenn dureder, har te wans dinelo an o shero! Krenn dureder, har te wans korelo ap i dui jaka! Tumer han mato – un pijan kek mool. Tumer perenn jek rigjatar ap i wawar – un pijan kek sorelo pipen.