Jesaja 49:7 - O Debleskro Drom 2021 (Sinte)

⁷ O baro Dewel, kowa, kai o Israel dran o tchilatchepen win lell, un kokres leskro Dewel hi, job penell koleske, kai i menshe tele dikenn ap leste, un koles i menshe dran bud themma gar kamenna, un lengre raja lestar pengro budepaskro krenn, ap koleste penell o baro Dewel: Bare raja dikenn tut, un stenn pre glan tute. Un pralstune dikenn tut un witsrenn pen ap i phub glan tute, Jon dikan, kai rikrau pash tute, me, o Israeleskro Dewel, kai tut win rodom.

O Debleskro Lab 2024 (Sinte-Manouche)

⁷ O baro Devel, kova, kay o Israel dran o čilačepen vin lell, oun kokres leskro Devel hi, yob penell koleske, kay i menshe tele dikenn ap leste, oun koles i menshe dran boud themma gar kamenna, oun lengre raya lestar pengro boudepaskro krenn, ap koleste penell o baro Devel: Bare raya dikenn tout, oun stenn pre glan toute. Oun pralstoune dikenn tout oun vitsrenn pen ap i phoub glan toute, Yon dikan, kay rikrau pash toute, me, o Israeleskro Devel, kay tout vin rodom.

Jesaja 49:7 Referans Kwoze

Mateo 26:67

Un palle tchungran le leske an o mui, un dan les ap o shero. Wawar dan les an o mui,

1. Petro 2:4

Awenn pash leste! Job hi ko djido bar, hoi o Dewel win rodas. O Debleske hi lo o kutch bar, ninna te witsran les i menshe ap i rig.

Jesaja 53:3

I menshe dikan tele ap leste, un tchiwan les ap i rig. I mursh pherde duka un nasslepen his lo. I grecho his lo lenge, glan koleste jon pengro shero krik rissran. Un menge his lo tchi-moldo.

Mateo 20:28

Ninna o Mensheskro Tchawo was gar ap i phub, te budrenn i menshen leske. Na-a. Job was ap i phub, te well lo lenge koi, un te merell lo budenge. Un jaake lell lo len dran o tchilatchepen un o merepen win.”

Jesaja 48:17

O baro Dewel, kowa, kai tut, Israel, win las dran o pandepen, job, o tchatcho Dewel, hi o Israeleskro Dewel un penell: Me, o baro Dewel, hom tiro Dewel, kowa, kai tute sikrell, hoi tuke mishto hi, un ap hawo drom tu hunte djas.

Jesaja 49:23

Un bare raja wenn tuke koi un lengre romja denn jak ap tire tikne tchawende. Un bare raja witsrenn pen glan tute ap i phub, un tchumrenn i tchik tire pirendar. Kote haiweh tu palle, te hom me o baro Dewel. Un kolla, kai dikenn ap mande, te wap ap lengri rig, dikenn gar tchitcheske ap mande.

Jesaja 49:1

Shunenn ap mande, tumer kai pash o baro pani djiwenn! Denn jak ap miro rakepen, tumer an i themma, hoi dur krik hi! Har gomme gar boldo wom, das man o baro Dewel gole, un das man miro lab.

Zakarie 11:8

Un an jek tchon krom me, te hunte djan penge kol triin wawar bakrengre. Me nai dikom len buder gar glan i jaka. Un jon his chojedo ap mande.

Jesaja 52:15

Un kanna dikenn bud menshe dran wawar themma bare jakentsa ap leste, un lengre rajenge atchell o rakepen krik. Kowa, hoi lenge gar dren ginlo was, dikenn le kanna. Un kolestar jon tchi shunan, kowa dikenn le un haiwenn les.

Jesaja 42:1

O baro Dewel penell: Ake, miro budepaskro; les hi miro wast. Me rikrau les, un rodom les mange win, un hom bachtelo pral leste. Miro ducho tchiwom ap leste, te anell lo miro tchatchepen pash i menshende an i tsele themma.

Johanni 19:15

Jon dan gole: “Mare les! Mare les, un de les ap o trushel!” Koi putchas o Pilato lendar: “Kamenn tumer te dap tumaro baro rajes ap o trushel?” “Men hi kek wawar rai har o baro rai an o foro Rom kokres,” penan kol bare rashaja.

Louka 23:35

Un i menshe, kai koi pashel tardo his, dikan kowa lauter, hoi o Jesuseha djas. Kol pralstune bibolde, kai kote tardo hi, san pral leste, un penan: “Wawaren las job dran o merepen win. Te hi lo tchatchepah o Kristo, ko baro rai, kones o Dewel win rodas, te well lo pash mende, palle nai djals job o trushelestar tele.”

Louka 23:23

Jon dan sorleder gole, te well lo ap o trushel dino. Un har jon gar tele mukan, shunas o Pilato ap lende un penas:

Jesaja 60:10

Un i wi-themarja tchiwenn tire massurja pale pre, un lengre bare raja wenn tuke pash o wast. An miri choli dom me tut, an miro latchepen lau tut pale pre.

Jesaja 60:3

Un i menshe dran wawar themma wenna, te dikenn le, har railo tu hal. Un lengre raja wenna, te dikenn le ko railepen, hoi pral tute pre djas.

Jesaja 50:6

Me rikrom kolenge miro dumo, kai dan mange dawa, un rikrom mire tchamja kolenge koi, kai tserdan balla dran miri tchora. Me khatrom gar miro mui, har praassan le man un tchungran ap mande.

Jesaja 48:7

Kau koowa was kanna kerdo un gar an o phuro tsiro. Un tumer shunan tchi kolestar, te nai penenn gar: “Kau koowa, mer djinam les.”

Debleskri gili 68:31

de ko themes Egiptia trad, ko diwjo vieches pash o pani. Tchinge kol sorelentsa un rajentsa pral bud menshende! Tchip tut kolenge an o drom, kai pal o rup nashenna. Trade kol natsjone, kolenge o marepen shukar hi.

Debleskro tsiro 11:15

Un ko eftato bolepaskro phurdas an peskri phurdepaskri. Koi his i rakepen an o bolepen, un bud dan bari gole, un penan: “Kanna hi o Dewel un leskro tchawo, o Jesus Kristo, i raja pral i tsele menshende ap i phub hako tsireske.”

Debleskro tsiro 3:7

“Tchin kau liil ap o Debleskro budepaskro, kai dell jak ap i patslende an o foro Filadelfia: Kawa penell o Debleskro tchatchepaskro. Koles hi o Davideskro klidepaskro an o wast. Job te krell o wudar pre, palle nai krell les kek pale pandlo. Job te krell o wudar pandlo, palle nai krell les kek pre.

Johanni 19:6

Har kol bare rashaja un kol kliste o Jesuses dikan, dan jon gole: “De les ap o trushel! De les ap o trushel!” “Lenn tumer les,” penas o Pilato, “un denn les ap o trushel! Me hatsau kek doosh ap leste.”

Johanni 18:40

Jon dan pale gole: “Gar koles! Mer kamah, te mukess o Barabes dran o stilepen win!” Kowa his i marepaskro.

Louka 23:18

Koi dan i tsele menshe gole: “Mare les, un de men o Barabes!”

Louka 22:27

Koon kol dujendar hi bareder: Kowa, kai pash i chapaskri beshdo hi? Kowa, kai tchiwell o chapen ap i chapaskri? Tchatchepah, kowa, kai pash i chapaskri beshdo hi! Un me hom mashkral tumende har jek, kai tumenge budrella.

Jesaja 60:16

Tu leh o brawlepen i menshendar dran wawar themma un kutch koowa lengre rajendar. Palle haiweh, te hom me, o baro Dewel, kowa, kai las tut win dran o pandepen, te hom me, o Israeleskro sorelo Dewel, kowa, kai tuke plaissras.

Debleskri gili 69:19

Ab pash mande un le man win! Le man win dran i wasta kolendar, kai kamenn miro merepen.

1. Korintarja 1:9

Kowa, hoi o Dewel penella, kowa rikrell job ninna. O Dewel das tumen gole, te wenn hako tsiro peskro Tchaweha, o Jesus Kristeha, khetne. Un kowa hi maro rai.

1. Mose 27:29

Menshe dran wawar themma hunte budrenn tuke un witsrenn pen tele glan tute. Wess rai pral tire phralende. Un tiri dakre tchawe hunte witsrenn pen tele glan tute. Kolla kai penenna, te well tut bibacht, ap kolende well bibacht. Un kolla, kai penenna, te well tut bacht, ap kolende well bacht.

5. Mose 7:9

Djinenn: tumaro baro Dewel hi kokres o tchatcho Dewel. Job rikrell peskro lab, un hoi lo tumentsa win kras. Latchepen un kamlepen dell lo kolende, hoi les o djijestar kamenn un krenn, hoi lo penell. Ninna lengre tchawenge, kai pal lende wenna, hi lo latcho, jaake rah har seri familje jek pal i wawar djiwenn.

Debleskri gili 47:9

O Dewel hi o baro rai pral i tsele themma. O Dewel beshas pes ap peskri rajeskri beshepaskri, hoi leske kokres hi.

Jesaja 14:1

O baro Dewel krell peskro dji peskre menshenge pre. Un pale rodell lo peske i Israelitarjen win, un mukell len an pengro them te djiwell. Un wi-themarja wenna un djiwenna khetne lentsa.

Jesaja 19:21

Un o baro Dewel sikrell pes palle i Egiptarende, un jon prindjrenn les un mangenn les an, un anenn leske viechen un chapen, hoi well leske chatchedo. Un denn pen glan leste sowel, te denn le les tchomone, un rikrenn koi sowel ninna.

Jesaja 19:23

Ap ko diwes dell i drom, hoi djal dran o them Egiptia pash o them Assur. Un i menshe dran Assur wenn an Egiptia, un i Egiptarja wenn an Assur. Un khetne mangenn le o Debles an.

Jesaja 27:13

Un ap ko diwes well an i bari phurdepaskri phurdedo. Un i Israelitarja, kai his nashedo an o them Assur, un kai his win tradedo an o them Egiptia, kolla lauter wenna un mangenn o baro Debles an ap o Debleskri berga an o foro Jerusalem.

Jesaja 49:26

Kolla, kai chan tut, kolla hunte chan pengro mass un hunte pijenn pengro rat, un wenn kolestar jaake mato, har te pijans le gudli mool. Palle haiwenn i tsele menshe, te hom me o baro Dewel, kowa, kai lell tut win dran o merepen, un tserdell tut win dran i tchilatche wasta, me o sorelo Dewel o Jakobestar.

Jesaja 66:23

Un hako tchon, ap ko diwes, kai well o newo tchon diklo, un hako kurko ap o Debleskro diwes, wenna menshe dran hake themma glan mande, te witsrenn le pen glan mande tele, penell o baro Dewel.