Jesaja 49:12 - O Debleskro Drom 2021 (Sinte)

¹² Dikenn, mire menshe wenn fun dural: dran i themma, hoi serwes un tchatches tchiddo hi, un fun kotar, kai o kham tele djal.

O Debleskro Lab 2024 (Sinte-Manouche)

¹² Dikenn, mire menshe venn foun doural: dran i themma, hoy serves oun čačes čiddo hi, oun foun kotar, kay o kham tele djal.

Jesaja 49:12 Referans Kwoze

Debleskro tsiro 11:15

Un ko eftato bolepaskro phurdas an peskri phurdepaskri. Koi his i rakepen an o bolepen, un bud dan bari gole, un penan: “Kanna hi o Dewel un leskro tchawo, o Jesus Kristo, i raja pral i tsele menshende ap i phub hako tsireske.”

Debleskro tsiro 7:9

Pal kowa dikom me bud menshen, jaake bud, te nai penell kek, kitse jon hi. Kolla wenna dran hako them, haki natsjona, haki harmenatsjona un hako rakepen. Un jon his khetne tardo glan o rajeskro beshepaskro un glan ko terno bakro. Len his parne ripja ap lende un bare patria an lengre wasta.

Louka 13:29

Dran hako them wenna i menshe pash o Debleste an o bolepen khetne, un beshenn pen tele, te chan le.

Mateo 8:11

Bud menshe wenna dran bud wawar themma pash o Debleste an o bolepen, un beshenn pen tele, te chan le o Abrahameha un o Isaakeha, un o Jakobeha khetne.

Zakarie 2:11

Stenn pre, tumer menshe dran Zion, kai djiwenn an o them Babilonia, nashenn tumenge!”

Micha 4:2

Bud menshe dran wawar themma wenn kai, un penenn: “Awenn, djas pral ap i berga o baro Deblestar, pash ko kheer kolestar, kai o Jakobeskro Dewel hi. Kote sikrell job mende, har te djas ap leskro drom, te djiwas mer jaake har job kamell.” I berga Zion hi koi platsa, kai sikrell job i menshende, hoi lo lendar kamell. Un dran Jerusalem djan sawe menshe win, kai penenn i wawarenge o baro Debleskro lab.

Debleskri gili 72:17

Leskro lab mu atchell hako tsireske. Jaake rah har o kham ap o bolepen hi, mu well leskro lab sharedo! Lestar mu well latchepen ap i menshende an i tsele themma. Un jon te rakrenn i bacht pral leste win.

Debleskri gili 22:27

Mu chan i tchorwele un wenn tchalo! Un kolla, kai ap o baro Debleste gole denna, mu sharenn les! Lenge te well i djipen, hoi gar pre-herella!

Jesaja 45:22

Tumer menshe ap i tseli phub, awenn pash mande! Un me lau tumen dran o tchilatchepen win. Me hom o Dewel un dell kek wawar har man!

Jesaja 49:1

Shunenn ap mande, tumer kai pash o baro pani djiwenn! Denn jak ap miro rakepen, tumer an i themma, hoi dur krik hi! Har gomme gar boldo wom, das man o baro Dewel gole, un das man miro lab.

Jesaja 49:18

Dik, hoi an i themma trul tute djal! Kol menshe wan khetne, te wenn le pash tute! Me dau man sowel pash miro djipen, penell o baro Dewel: Jon hi tuke har i sonakaskri werkli, hoi trul tiri meen tchiweh, un har i shukar pereskri dori, hoi i tchai trul late pandell, te hi lat bijab.

Jesaja 55:5

Ninna tumer denn menshen pash mande gole, kolen gar prindjrenn. Un sawe, kai prindjrenn tumen gar, wenn pash tumende naashedo, te dikenn le, hoi me, tumaro baro Dewel, tumenge krom. Me, o tchatcho Dewel pral o Israel, krau tumen baro un railo.

Jesaja 59:19

Palle taprell i daar i menshen ap i tseli phub glan o baro Debleste un leskro railepen. Job wella har i diwjo sorelo pani hoi nashella, koles o ducho o baro Deblestar glan peste phurdell.

Jesaja 60:4

Dik trujel, un dik, hoi djal! Tire menshe wenn khetne, te djan le khere. Tire mursh tchawe wenn fun dural, un tire tcha wenn hidjedo ap mussja.

Jesaja 11:12

Un job tchiwell i sikepen pre, te sikrell lo kol menshen an i wawar themma, te anell lo kolen khetne, kai dran Israel un Juda win tradedo his. Kolen anell lo pale dran hake rigja i phubjatar.

Jeremia 30:10

Doleske ma dare, tu, miro budepaskro Jakob! Ma traash, Israel, penell o baro Dewel. Shun, me lau tut un tire tchawen win dran ko dur them, kai pandle han. Tumer wenn khere an tumaro them. Kote djal tumenge mishto. Kek krell tumenge kote tchilatchepen. Tchi hunte krell tumenge daar.

Zakarie 6:15

Dran dur themma wenna kolla, kai krenn o baro Debleskro kheer. Un palle dikenn tumer, kai o baro Dewel, ko rai pral o bolepen un i phub, kowa hi, kai bitchras man pash tumende. Te krenn tumer kowa, hoi tumaro baro Dewel tumenge penell, wella kowa halauter jaake.