Jesaja 49:1 - O Debleskro Drom 2021 (Sinte)

¹ Shunenn ap mande, tumer kai pash o baro pani djiwenn! Denn jak ap miro rakepen, tumer an i themma, hoi dur krik hi! Har gomme gar boldo wom, das man o baro Dewel gole, un das man miro lab.

O Debleskro Lab 2024 (Sinte-Manouche)

¹ Shounenn ap mande, t'mer kay pash o baro pani djivenn! Denn yak ap miro rakepen, t'mer an i themma, hoy dour krik hi! Har gomme gar boldo vom, das man o baro Devel gole, oun das man miro lab.

Jesaja 49:1 Referans Kwoze

Jeremia 1:5

Me prindjrom tut, glan te krom tut an tiri dakro per, un rodom tut win, glan te wal boldo, te wess miro rakepaskro i menshenge dran i tsele themma.

Galatarja 1:15

O Debles his i wawar drom mange. Job kamas mande peskro tchawes te sikrell, te djinap, koon job hi. Har me gomme gar boldo homs, rodas job man win. Un job his mange latcho un das man gole, te djap pash kolende, kai kek bibolde hi, te penap lenge leskro tchawestar. Har o Dewel man pash lende bitchras, putchom gar i menshendar, te penenn le mange, hoi te krap,

Jesaja 44:2

Kowa hi, hoi me, o baro Dewel, tuke penau: Me krom tut un dom tut o djipen har gomme gar boldo hals; me hom ap tiri rig. Ma dare, miro budepaskro Jakob, tu Israel, koles me mange win rodom!

Jesaja 49:5

Kowa his o baro Dewel, kai kras man jaake, te wap leskro budepaskro, har gomme gar boldo wom. Job kamell, te anap o Jakobes pale pash leste, jaake te well o tselo Israel pash leste khetne. Un miri budi hi bud moldo an i jaka o baro Deblestar. Miro Dewel was miri soor. Kanna shunenn, hoi lo penas:

Louka 1:31

Shun, tu weh an wawar koowa, un leh i tchawes. Koles dess tu o lab Jesus.

1. Petro 1:20

Har i phub gar koi his, rodas o Dewel les win, te merell lo i menshenge. Un an kau tsiro, kai djiwah, was lo tumenge ap i phub.

Louka 1:15

Un job wella bares glan o Debleskre jaka. Mool un wawar sorelo pipen pijell job gar. Un har job gomme gar boldo hi, hi lo pherdo Debleskro Ducho.

Hebrearja 12:25

Denn jak, te shunenn ap o Debleste, kai ap tumende rakrella! Har job ap i phub ap i phure Israelitarja rakras, kaman le gar ap leste te shunell, un leskri choli was pral lende. Kitse budeder well o Debleskri choli pral mende, te shunah gar ap leste, kai dran o bolepen rakrella.

Johanni 10:36

Man hi o dadeskro wast. Un miro dad bitchras man ap kai phub. Me te penau, kai hom o Debleskro tchawo, har nai penenna tumer ap mande: Tu kreh, har te wess o Dewel?

Zefanja 2:11

Kanna krell o baro Dewel lenge bari daar, te krell lo i chochene deblen ap i tseli phub paash. Un an hake themma witsrenn pen i menshe glan leste tele, hakeno an peskro them.

Jesaja 60:9

Ap mande dikenn i menshe wergel o baro pani. Un i shiffe, hoi wenna dran Tarsis, ulerenna glan win, te anenn le tire tchawen, hoi dur krik his, khere. Un lengro sonakai un rup anenn le peha, te sharenn le tiro baro Debles. Job kokres hi o Israeleskro tchatcho Dewel, un kowa, kai kras tut railo.

Jesaja 57:19

tchiwau i gili an lengro mui, kolah sharenn le man. Kolenge, kai dur krik hi, ninna kolenge kai gar dur hi, lenge halauterenge mu djal mishto, penell o baro Dewel. Me krau len sasto.

Jesaja 55:3

Shunenn mishto, hoi penau, un awenn pash mande! Shunenn ap mande, te atchenn djido! Un me kamau tumentsa win te krell, te atchas mer mala hako tsireske. Ko latcho koowa, hoi o Davideske penom, well ap tumende.

Jesaja 46:3

Tumer dran o kheer Jakob, tumer, kai pral atchan dran o kheer Israel, shunenn ap mande, tumer, kolen rikrom jaake rah har ap i phub han. Awa, jaake rah har boldo wan, hidjrom tumen.

Jesaja 44:24

Kawa penell o baro Dewel, kowa, kai ginas tut win dran i bibacht, un kowa, kai tut kras har gomme gar boldo hals: Me, o baro Dewel hom kowa, kai lauter kras, Me kokres krom o bolepen buchlo pral i phub, Un har me i phub soreles pre tchiwom, his kek kote pash mande.

Efesarja 2:17

O Jesus Kristo was, un sikras lauteren o drom pash o Debleste. Tumen, kai tumer dur o Deblestar hans, un ninna i bibolden, kai gar dur o Deblestar his, sikras lo ko drom, te djiwas mer lauter pash leste khetne.

Jesaja 51:5

O tsiro, kai miro tchatchepen well, hi gar dur. Un ko diwes well sik, kai lau tumen win dran o tchilatchepen. Un me wau o tchatchepaskro rai pral i wawar themma. I menshe, kai djiwenn pash o baro pani, dikenn ap mande, te lap o kurepen krik.

Jesaja 45:22

Tumer menshe ap i tseli phub, awenn pash mande! Un me lau tumen dran o tchilatchepen win. Me hom o Dewel un dell kek wawar har man!

Jesaja 42:12

Tumer lauter, sharenn o baro Debles! Un kolenge an i panjeskre themma penenn, har baro job hi!

Jesaja 41:1

O Dewel penell ap i menshende an dur themma: Atchenn, un shunenn ap mande! Awa, ap kolende an wawar themma penell lo: Lenn tumen khetne un awenn pash mande! Palle nai rakrenn. Mukenn men khetne o tchatchepen win te krell!

Jesaja 9:6

I rajeskri soor, hoi les hi, well baro un bareder. Un an kek tsiro dell tchingepen. Job well beshdo ap o Davideskri beshepaskri, un hi i rai, kai krell o tchatchepen jaake win, har o Dewel kamell un mishto hi kanna un hako tsireske. O baro Dewel, ko rai pral o bolepen un i phub, krell kowa lauter. Jaake las lo pes kowa soreles glan.

Jesaja 66:19

Un me tchiwau i sikepen pre mank lende. Un kolendar, kai djides atchan, bitchrau me pash i menshende an themma Tarsis, Put un Lud, Meshech, Rosh, Tubal, Jawan un pash kolende dur wergel o baro pani, kai mandar gomme tchi shunan, un miro railepen gomme gar dikan. Un mire bitchepangre penenn kol menshenge, har railo me hom.

Jesaja 7:14

Doleske dell o baro Dewel kanna kokres i sikepen, te sikrell lo, kai hi lo ap tumari rig: I terni tchai well wawartchandes un lell i mursh tchawes. Un koles dell li o lab Immanuel.

Debleskri gili 22:10

Tu, mo Dewel hals kowa, kai kras te wom boldo, tu mukal man kek darjah te sowell ap o betch miri datar.

Jesaja 11:11

Un ap ko diwes hadell o Dewel peskro wast i duito kopo, te ginell lo kolen win, kai peskre menshendar pral atchan an i themma Assur un Egiptia, Patros, Kush, Elam, Shinar, Hamat, un an kol panjeskre themma.

Jesaja 24:15

Hadenn o baro Debles, tumer kai djiwenn kote, kai o kham pre djal! Un an i panjengre themma denn win gole: “Har railo hi o baro Dewel, kai o Israeleskro Dewel hi!”

Jesaja 33:13

Tumer, kai dur krik han, un tumer kai gar jaake dur han, shunenn, hoi me krom un haiwenn hawi soor man hi!

Jesaja 45:3

Me dau tut brawlepen, hoi khatedo his, un kutch koowa, hoi mishto tchakedo his. Te haiwess tu, te hom me o baro Dewel, ko Dewel pral o Israel, un dom tut gole pash tiro lab.

Jesaja 49:12

Dikenn, mire menshe wenn fun dural: dran i themma, hoi serwes un tchatches tchiddo hi, un fun kotar, kai o kham tele djal.

Jesaja 52:13

Dik, kowa, hoi miro budepaskro krell, djal leske mishto. Job well sharedo un bares kerdo, un well dur pral tardo.