Jesaja 47:8 - O Debleskro Drom 2021 (Sinte)

⁸ Shun kanna, tu, kai kameh o brawlepen, un patseh, kote kai beshdo hal, nai djal tuke tchi, un an tiro dji peneh: “Me hom i bareder. Kek well sorleder har me. Me hom kek, kolakro rom merella, un me hom kek, kolat kek tchawe hi.”

O Debleskro Lab 2024 (Sinte-Manouche)

⁸ Shoun kanna, tou, kay kameh o bravlepen, oun patseh, kote kay beshdo hal, nay djal touke či, oun an tiro dji peneh: “Me hom i bareder. Kek vell zorleder har me. Me hom kek, kolakro rom merella, oun me hom kek, kolat kek čave hi.”

Jesaja 47:8 Referans Kwoze

Zefanja 2:15

Jaake djala ko foreske, hoi hi jaake pre-phurdo, un koleskre menshe patsenn, te djal lenge kek tchilatchepen, un an pengro dji penenn: “Dell kek foro har maro foro!” Har muklo well ko foro! Diwje vieche djiwenna koi! Hakeno, kai nashell koi trujel, sal pral leste, un dell peskre wasta pral o shero khetne.

Jesaja 32:9

Shunenn mishto, tumer djuwja, kai tumenge kek shero krenn pral kowa, hoi wella! Tumer tcha, kai dikenn kokres ap tumende, krenn tumare kanda pre un shunenn, hoi me rakrau!

Jeremia 50:11

Ninna te han bachtelo un sharenn tumen, kai randan miro them win, un stenn har o terne grumja an o senlepen, un denn gole har i sorele graja,

Jesaja 47:10

Tu rikral tut ap tiro tchilatchepen un penal: “Kek dikas man!” Tiro goswepen un lauter, hoi djineh, kras tut pre-phurdo, jaake te penal an tiro dji: “Me hom i bareder. Kek well sorleder har me.”

Jesaja 45:6

te haiwenn le ap i tseli phub, te dell kek wawar dewel har man. Me hom o baro Dewel. Un dell kek wawar.

2. Tessalonikarja 2:4

Job hadell pes pral o Debleste un pral halauter, hoi i menshe an-mangenna, un beshell pes an o Debleskro baro kheer, un krell, har te wals job o Dewel.

Nahum 1:10

Tumer han tchi har subjengre kashta, hoi tchi-moldo hi, un hoi an i jag witsedo wenn, un pre-chatchenn har truk phuss, te atchell tchi lendar pral.

Daniel 11:36

Un ko baro rai krell, hoi job kamell. Job hadell pes un patsell, te hi lo bareder har hako dewel. Ninna pral o pralstuno Debleste rakrell lo sawo koowa, hoi nai rakrell kek win. Un kowa krell lo jek tsireske, un djal leske mishto, bis te well o Debleskri choli pral leste. Palle krell o Dewel, hoi las lo pes glan.

Daniel 5:30

An kai rat was o Belsazar, ko baro rai pral o them Babilonia, maredo.

Daniel 5:23

Un tu hadal tut pral leste, ko bolepaskro rajeste, un penal, te anenn le i khore dran leskro kheer glan tute. Un tumer pijan mool dran lende, tu un tire bare mursha, ninna tire romja un wawar djuwja. Un tu sharal i deblen dran rup un sonakai, dran lolo saster un wawar saster, kasht un bar, kol deblen, kai gar dikenn un gar shunenn. Ko Debles, koles tiro ducho an peskro wast hi, un pash koleste tire tsele dromma hi, koles hadal tu gar.

Daniel 4:30

Un gomme an ko tsiro, har lo koi pral tardo his, was kau lab tchatcho. Un job was pale-tchiddo un djiwas buder gar mank i menshende. Un job chas khass har i grumja. Un job tchiwas pes win tele. Un o brishin peras ap leste tele un kras les sapeno. Leskre balla wan jaake lengsto har i phora bare tchirklendar, un leskre naja bango har i tchirklengre tsebe.

Daniel 4:22

Tu weh pale-tchiddo un hunte djiwess pash i viechende un buder gar mank i menshende. Jon denn tut khass te chal har i grumjen. Un tu tchiweh tut win tele. Un o brishin perell ap tute tele un krell tut sapenes. Un efta bersha djan jaake trujel, bis te tu haiweh, te hi o pralstuno Debles i tsele rajengre themma an peskro wast, un job dell kol themma koleste job kamell.

Jeremia 51:53

Ninna te stakrals o foro Babilon pral an o bolepen, un te krans le pengre massurja jaake baro, te nai stakrals kek pral wergel, bitchrau me marepangre, kai wenn pral lende. Kowa penell o baro Dewel.

Jesaja 45:18

O baro Dewel hi o Dewel, kai o bolepen kras. Job hi o Dewel, kai i phub kras un soreles pre tchiwas. Job kras lat gar jaake, te nai djiwell tchi koi pre. Na-a, job kras lat jaake, te well djipen ap late. Job penell: Me hom o baro Dewel, un dell kek wawar Dewel har man!

Čačepangre 18:27

Jaake lan le kau koowa pentsa, hoi o Micha peske kras, un koi pashel leskro rashajes. Un jon wan pash o foro Lajish un peran pral kol menshende, kai kote kek darjah un kek kurepah djiwan. Un jon dan len o chareha mulo. Un o foro chatchran le pre.

Čačepangre 18:7

Un kol pantch mursha djan dureder un wan an o foro Lajish. Un jon dikan i menshen, kai koi his. Kolla djiwan kek darjah, jaake har i Sidonarja ninna djiwan, kek darjah un kek kurepah. Un an o tselo them his kek, kai dals len trad un rikrals len tele. Un jon his dur krik o forestar Sidon. Un tchi un kek his penepaske pral lende.

Jesaja 14:14

Me djau dureder pre har i wolke hi, un krau man jaake bares har o Dewel, ko pralstuno, hi.”

Jesaja 32:11

Trissenn, tumer djuwja, kai tumenge kek shero krenn, trissenn i darjatar, tumer, kai dikenn kokres ap tumende! Riwenn tumare ripja win, un tchiwenn i gono trul tumende!

Jesaja 45:5

Me hom o baro Dewel un dell kek wawar. Me kokres hom o Dewel. Me dom tut bari soor, ninna te prindjral man gar,

Jeremia 49:31

Me, o baro Dewel, penom ap i Babilonarja: Djan pre an o kurepen! Kurenn tumen i menshentsa, kai djiwenn kek darjah an pengro them, un kolenge kek tchilatchepen kamell. Jon djiwenn kokres, un lengre forja, len hi kek massurja, witar kek wudja.

Ezekiel 28:2

Tu mensho, pen ap o rajeste pral o foro Tirus: Kawa penell o baro Dewel, maro rai: Tiro dji hadas pes un penas: “Me hom i dewel! Un hom beshdo ap i debleskri beshepaskri mashkral dren an baro pani!” Ninna te kreh, har te wals i dewel, hal tchi har i mensho!

Ezekiel 30:9

An kau tsiro bitchrau murshen win, kai djan ap i shiffe an o them Etiopia. Kolla, kai kote djiwenn, patsenn, te well lenge kek tchilatchepen. Te wenn mire bitchepangre un penenn lenge, har o themeske Egiptia djas, taprell len i bari daar. Te shunenn le, kai Egiptia paash hi, trissenn le i darjatar. Tchatchepah, kau diwes wella!

Daniel 4:4

Kote wan pash mande: i tsele durkepangre un drawepangre, un kolla, kai an i bolepangre momlia drawerenn, un kolla, kai i mulen putchenn. Un me penom lenge, hoi me suni dom. Un jon nai penan mange gar, hoi koi suni kamell te penell.

Ezekiel 16:49

Koi doosh tiri phenjatar Sodom his kaja: Joi his pre-phurdo. Lat his budeder har doha chapen un djiwas pengre tchentsa i shukar djipen. Kol tchorwelenge un kolenge, kai tele rikede wan, wan le gar ap i rig.

Daniel 4:27

kharas lo win: “Ake, o baro foro Babilon! Me tchiwom les pre miri bari sorjah, te well lo miro foro, kai hom baro rai. Lauter, kai dikenn les, sharenn miro railepen.”

Nahum 3:4

Kowa hi i phagi o foreske Ninive. O foro his har i shukar djuwel, kolat bud mursha hi, un o bengeskro koweha trujel djal, un jaake i menshen an wawar themma ap peste pandas.

Habakuk 1:7

Daar un traash krenn le. Jon krenn penge pengro tchatchepen, un krenn jaake har jon kamenn.