Jesaja 42:11 - O Debleskro Drom 2021 (Sinte)

¹¹ Giwenn i bari goljah, tumer an i forja an i mule tate themma, un tumer menshe dran Kedar, kai an i gaba djiwenn! Giwenn bari goljah, tumer, kai an o foro Sela djiwenn! Denn gole i bachtjatar, tumer, kai pral ap i berge djiwenn!

O Debleskro Lab 2024 (Sinte-Manouche)

¹¹ Givenn i bari golyah, t'mer an i forya an i moule tate themma, oun t'mer menshe dran Kedar, kay an i gaba djivenn! Givenn bari golyah, t'mer, kay an o foro Sela djivenn! Denn gole i barhtyatar, t'mer, kay pral ap i berge djivenn!

Jesaja 42:11 Referans Kwoze

Jesaja 32:16

Un an o tselo them djiwenn le pal o Debleskre tchatchepaskre laba, un an o mulo tato them har an o latcho them krenn le, hoi tchatcho hi.

Jesaja 60:7

I tsele bakre dran Kedar un Nebajot wenn anlo pash tute, te wenn le maredo un chatchedo o baro Debleske, te dikell lo latches ap tute. Un jaake krell o baro Dewel peskro railo kheer gomme shukeder.

Jesaja 52:7

Har shukar hi, te well kowa pral i berge, kai penell menge latcho newo koowa, un penell: Hi buder kek kurepen. I latcho tsiro was. Tumer han buder gar pandlo. Un ap mende an Zion penell lo: Tiro Dewel hi o baro rai!

Jesaja 35:6

Un har i wesheskri busni stell kowa, kai nai nashas gar. Un kowa, kai nai rakras gar, rakrell nai un dell gole i bachtjatar. An o mulo tato them well pani win dran i phub. Un an o diwjo truk them nashenn lengste panja.

Jesaja 21:16

Jaake rakras o baro Dewel, maro rai, ap mande: An jek bersh – kek diwes sikeder un kek diwes palla – well o tselo railepen dran o them Kedar krik lino.

Jesaja 16:1

Bitchrenn bakre dran Sela an o mulo tato them pash o rajeste an o them Juda ap i berga Zion!

Debleskri gili 120:5

Hawi bibacht hi mange, te hunte djiwap mank i wi-themarja, pash i menshende, kai prindjrenn gar miro Debles.

1. Mose 25:23

O baro Dewel penas ap late: “Tu weh i dai dui tchawendar. Kol dujendar wenna bud menshe, jaake bud, kai hakenestar jek natsjona wella. Ko terneder well sorleder har ko phureder un well o rai pral leste.”

Jeremia 48:28

Tumer menshe an o them Moab, nashenn win dran tumare forja, un djiwenn mank i bare barra! Un krenn les har i taube, kai krenn pengre khera kote, kai i barra dur tele djan.

Jeremia 21:13

Denn jak, penell o baro Dewel: Kanna wau me pral tumende, kai djiwenn pral i tala ap ko baro bar. Tumer penenn: Kek nai well pral mende. Kek nai well an maro kheer.

Jesaja 43:19

Dik, me krau newo koowa! Kanna well kowa! Haiwenn un dikenn les gar? Awa, me krau i drom an o mulo them, un mukau bare sorele panja te nashell an o tato them.

Jesaja 35:1

Bachteles well ko them, hoi kanna tato un mulo hi. Un o diwjo truk them sal, un lauter an leste djiwell pre un anell blume win.

Obadja 1:3

Tiro sorelo foro hi tardo ap i bare barra, tu djiweh pral an i berge. Doleske phurdal tu tut pre. Dik, tiro dji chochras tut, har lo tuke dren rakras: ‘Kek nai witsrell tut tele ap i phub.’

Jesaja 40:3

Shunenn! Koi dell jek gole: “Krenn o baro Debleske o drom an o mulo tato them, te nai well lo pash i menshende! Lenn halauter krik, hoi maro Debleske an o drom tchiddo hi!

Jesaja 12:5

Giwenn gilja o baro Debleske! Railo koowa kras lo. Hakeno ap i phub te shunell lestar.

Jeremia 49:31

Me, o baro Dewel, penom ap i Babilonarja: Djan pre an o kurepen! Kurenn tumen i menshentsa, kai djiwenn kek darjah an pengro them, un kolenge kek tchilatchepen kamell. Jon djiwenn kokres, un lengre forja, len hi kek massurja, witar kek wudja.

Ezekiel 27:21

I menshe dran Arabia un i raja dran o them Kedar paran tuha un dan tut bakre un busja.