Jesaja 10:21 - O Debleskro Drom 2021 (Sinte)

²¹ Kol Israelitarja, hoi pral atchan, mukenn pengro drom un djan pale pale ap o drom o sorelo Deblestar.

O Debleskro Lab 2024 (Sinte-Manouche)

²¹ Kol Israelitarya, hoy pral ačan, moukenn pengro drom oun djan pale pale ap o drom o zorelo Deblestar.

Jesaja 10:21 Referans Kwoze

Jesaja 9:6

I rajeskri soor, hoi les hi, well baro un bareder. Un an kek tsiro dell tchingepen. Job well beshdo ap o Davideskri beshepaskri, un hi i rai, kai krell o tchatchepen jaake win, har o Dewel kamell un mishto hi kanna un hako tsireske. O baro Dewel, ko rai pral o bolepen un i phub, krell kowa lauter. Jaake las lo pes kowa soreles glan.

Bičepangre 26:20

Me djom an o foro Damaskus, un palle an ko foro Jerusalem. Un i tsiro koi pre djom an ko them Judea. Un pal kowa djom pash kolende, kai kek bibolde hi, un penom lauterenge, te mukenn le pengro tchilatcho drom, un te djan le ap o Debleskro drom, un te djiwenn le jaake, kai i wawar dikenna, kai jon pengro phuro djipen mukan.

Hosea 14:1

I menshe an o foro Samaria lenn pengri phagi. Jon mukan pen tchi te penell pengro Deblestar. Doleske wenn le o chareha maredo. Un lengre tikne tchawe wenn mulo dino. Un i djuwja, kai lenn i tchawo, wenn pre tchinle.

Hosea 7:16

Jon rissrenn pash i debleste, koles kek soor hi. Jon hi har i bango bogo, koleha kek failo kote djal, kai te djal lo. Lengre pralstune hi bare mujengre. Doleske wenn le maredo o chareha. Palle san i Egiptarja pral lende.

Hosea 7:10

I Israelengre pre-phurde djia sikrenn, har bud doosh ap lende hi. Ninna te hi kowa jaake, wenn le gar pale pash mande, lengro baro Debleste, un rodenn man gar.

Hosea 6:1

Awenn, te djas pale pash o baro Debleste! Job dukas men, un job krell men pale sasto. Job das men dawa, un job pandell men pale khetne.

Jesaja 55:7

Koon kamas tchi o Deblestar te djinell, kowa te djal kanna peskro tchilatcho dromestar tele! Un kowa, kai tchilatcho koowa an peskro shero hi, job te mukell sawo koowa, un well pale pash maro baro Debleste, jaake te krell job peskro dji leske pre, un lell leskri doosh krik.

Jesaja 19:22

Un pal kowa, kai das o baro Dewel i Egiptarjen, krell lo len sasto. Un jon wenn pale pash leste. Un job mukell pes lendar te mangell un krell len sasto.

Jesaja 9:13

Ap jek diwes las o baro Dewel lendar i pralstunen krik, ninna kol chochene rakepangren, kai penan, kai lengre laba o Deblestar wan. Kowa hi, har te tchinals jek i matchestar o shero un o pori tele, un i rukestar i patria un i telstuno kotar. I phurende un i an-dikle hi o shero. Kol chochene, kai penenn, lengre laba wans o Deblestar, hi o pori.

Jesaja 7:3

Un o baro Dewel penas ap o Jesaja: Dja win, dja pash o Ahas, tu un tiro tchawo Shear-Jashub. Tu hatseh les kote, kai o panjeskro drom gar dureder djal, pash ko pralstuno pani, ap ko drom pash koi platsa, kai kolla budrenn, kai plachte krenna.

Jesaja 46:3

Tumer dran o kheer Jakob, tumer, kai pral atchan dran o kheer Israel, shunenn ap mande, tumer, kolen rikrom jaake rah har ap i phub han. Awa, jaake rah har boldo wan, hidjrom tumen.

Esra 1:4

Un hakeno, kai pral atchas o Debleskre menshendar, kai lo ninna djiwell an kau them, koleske hunte wenn kolla ap i rig, pash kolende job djiwell, un hunte denn les rup un sonakai un vieche un wawar latcho koowa. Un hoi hakeno pestar kamell te dell, te well o baro Debleskro kheer pre-tchiddo an o foro Jerusalem, kowa hi hakeneskro koowa kokres.

Jesaja 37:31

Un kol menshe, kai pral atchan dran o kheer Juda, wenna pale har i sorelo ruk, koleskre draba dur an i phub djan un ap koleskre kashta rukengre bares wenna.

Jesaja 59:20

O baro Dewel penell: Mire menshenge an o foro Zion wau, te lap len dran o merepen win. Kolenge dran o kheer Jakob wau, kai mukan pengro tchilatcho drom.

Jeremia 50:20

An ko tsiro un an kol diwessa well koi doosh rodedo, hoi o Israel un o Juda ap pende anan. Un kote well kek doosh hatslo. Me lau lat kolendar krik, kai mukom pral atchell. Kowa penau me, o baro Dewel.