Jesaja 1:23 - O Debleskro Drom 2021 (Sinte)

²³ Tire pralstune hadan pen pral mande un djan khetne i tchorepangre. Un hakeno lendar mukell pes te ginell. Un kol tchawe, kolen kek dai un kek dad hi, kolenge krenn le kek tchatchepen win. Un ko koowa kol djuwjendar, kolengro rom meras, mukenn le gar glan pende te well.

O Debleskro Lab 2024 (Sinte-Manouche)

²³ Tire pralstoune hadan pen pral mande oun djan khetne i čorepangre. Oun hakeno lendar moukell pes te ginell. Oun kol čave, kolen kek day oun kek dad hi, kolenge krenn le kek čačepen vin. Oun ko koova kol djouvyendar, kolengro rom meras, moukenn le gar glan pende te vell.

Jesaja 1:23 Referans Kwoze

Micha 7:3

Lengre wasta hi sik, te krenn le tchilatcho koowa. I pralstune un tchatchepangre raja denn kolen o tchatchepen, kai denn len lowe. Kol sorele an o them krenn, hoi le kamenn, chochenn un rissrenn o tchatchepen trujel.

Zakarie 7:10

Ma krenn tchilatchepen kol romjenge, kolengro rom meras, un kol tchawenge, kolen kek dad buder hi, witar gar kolenge, kai wi-themarja hi un kol tchorwelenge! Ma lenn tumenge glan an tumare djia, te dukrenn tumaro phrales!”

2. Mose 23:8

Te hi jek an o tchingepen i wawareha un kamell tut te ginell, te dess les tchatchepen, ma le kowa, hoi job kamell tut dell! Koon sau koowa an-lell, well korelo o tchatchepaske un dikell buder gar, koon an o tchatchepen hi.

Louka 19:46

un penas lenge: “An o Debleskro lab hi tchinlo: O Dewel penella: Miro kheer te well i kheer, kai sharenn man i menshe un mangenn man an. Tumer kran lestar i kheer, kai i menshe chochenna un randenna.”

Maleachi 3:5

Un me kamau pash tumende te well, te wap tumaro tchatchepaskro rai. Un mange nai patsenna, me rakrau o tchatchepen win pral i menshende, kai hadenn man gar: kolla, kai durkrenna, kol mursha, kai chochran pengri romjat, un kol djuwja, kai chochran pengri romes, kolla, kai phagenn pengri sowel, un kolla, kai djan djungeles kolentsa trujel, kai budrenn lenge, un kolla, kai chochenn kol djuwjen, kolengro rom meras, un kolla, kai chochenn kol tchawen, kolen buder kek dad hi, un kolla, kai rikrenn kol wi-themarjen tele, kai djiwenn mashkral tumende. Ko penell o baro Dewel, ko rai pral o bolepen un i phub.

Jesaja 3:14

Ap i phurende un rajende pral peskre menshende penell job: Tumer chan i tsele drake, hoi ap miro drakengro them bares wan, An tumare khera hi kowa, hoi tumer i tchorwelenge randan!

Markus 11:17

Un job penas lenge, hoi an o Debleskro lab tchinlo hi, un penas: O Dewel penella: Miro kheer te well i kheer, kai i tsele menshe ap i phub nai wenna, te sharenn le man, un te mangenn le man an. Tumer kran lestar i kheer, kai i menshe chochenna un randenna.

Mateo 21:13

Un job penas ap kol tsele menshende: “O Dewel penas: Miro kheer te well i kheer, kai sharenn man i menshe un mangenn man an. Tumer kran lestar i kheer, kai i menshe chochenna un randenna.”

Micha 3:11

Tumare tchatchepangre mursha mukenn pen te makell. Tumare rashaja lenn lowe koleske, hoi le i menshenge penenn. Un i lowenge penenn o Debleskre rakepangre, glan-wi, hoi wella. Un tumer penenn: “O baro Dewel hi ap mari rig. Kek bibacht nai well pral mende.”

Hosea 9:15

O baro Dewel penell: Lengro tselo tchilatchepen krenn le kote pash o foro Gilgal; kote choirom man pral lende ko tselo tchilatchepaske, hoi jon kran. Doleske tradau me len dran miro kheer win. Me kamau len buder gar. Lengre tsele pralstune mukenn pen tchi mandar te penell.

Hosea 4:18

Jon pijenn pen mates, un palle lubrenn le trujel. Jon nashenn wi-ladjedo koowa palla, un ladjenn pen gar.

Jeremia 22:17

Jojakim, tire jaka un tiro dji dikenn ap tchi wawares, har te wess brawleder tiro chochepah. Tu mareh kolen, kai kek tchilatchepen kran, un rikreh i menshen sorjah un dawentsa tele.

Jeremia 5:5

Me kamau pash i pralstunende te djal, te rakrap lentsa. Kolla djinenn o Debleskro drom un nai penenn mange, hoi an i jaka lengro Deblestar mishto hi. Palle haiwom: Ninna kolla kaman gar, te well job lengro rai, un kaman gar ap leste te shunell.

Jesaja 33:15

Kolla, kai an o tchatchepen tardo hi, un rakrenn, hoi tchatcho hi; kolla, kai kekeske chochepah lowe tele lenn, te wenn le brawelo, un tserdenn pengre wasta pale, te kamell jek len lowe te dell, te anenn le chochepen pre; kolla, kai shunenn gar ap kolende, kai kamenn jekes te marell, un kolla, kai djan gar kolentsa, kai o tchilatchepen krenn,

Gosewe laba 29:24

Kowa, kai djal khetne jekeha, kai tchorell, tchinell pes an peskro mass: job djinell, o praassepen hunte wals ap leste, te penell lo tchi. Un job kamell tchi te penell.

Gosewe laba 17:23

O tchilatcho kamell i lowe, hoi leske tchorchanes dino well, te rissrell lo o tchatchepen trujel.

2. Familjakro liil 36:14

Ninna i tsele pralstune an o them Juda un i rashaja un i menshe an o them kran pengri doosh gomme bareder pengro djipah: Jon djiwan pal ko djungelo koowa, hoi i menshe an i wawar themma kran, un kran o baro Debleskro kheer pale-tchiddo, ko kheer, hoi job wi-rodas, te djiwell lo kote an o foro Jerusalem.

5. Mose 16:19

Te hal tu i tchatchepaskro, hunte dess tu koles peskro tchatchepen, koon an o tchatchepen hi. Tu dikess gar koi pre, koon glan tute tardo hi. Te dell jek tut kutch koowa, te dess tu les tchatchepen, ma le kowa an! Koon sawo shukar kutch koowa an-lell, well korelo o tchatchepaske, un dikell buder gar, koon an o tchatchepen hi.

Louka 24:27

Palle penas o Jesus lenge, hoi o Mose un i tsele Debleskre rakepangre pral leste tchinan.

Jakobo 1:27

Kanna penau tumenge, hoi o Dewel, maro dad, kamella, un hoi hi latcho glan leskre jaka: Krenn latchepen i tchorwele djuwjenge, kolen kek rom buder hi! Krenn ninna latchepen kol tchorwele tchawenge, kolen kek dad un dai buder hi! Ma mukenn tumen dren an ko tchilatcho koowa, hoi i menshe ap kai phub krenna.

Jesaja 1:22

Tu Jerusalem, hals har djudjo rup, kanna wal har tchik, hoi rupenes win dikell. Tu hals har latchi mool, kanna hal har mool, kai pani dren hi.

Jesaja 5:23

Djungeles djal kolenge, kai i lowenge koles an o tchatchepen tchiwenn, kai doosh ap peste anas, un kolenge lengro tchatchepen krik lenn, kai an o tchatchepen tardo hi.

Jesaja 30:1

O baro Dewel penell: Djungeles djal mire tchawenge, kai mandar tele peran, un kai penge kowa glan lan, te krenn le hoi gar mandar win djas. Jon tchiwenn pen wawarentsa khetne, har me kowa gar kamau. Un jaake anenn pale te pale le doosh ap pende.

Jesaja 65:2

Me rikrom o tselo diwes mire wasta win kol menshenge, kai kaman gar ap mande te shunell, un djan i drom, hoi gar mishto hi, un djiwenn pal pengro shero.

Jeremia 4:17

Jon tchiwenn pen trujel o foro Jerusalem, har kol mursha, kai denn garda ap i kotar phub. Tumer menshe an Jerusalem mukan tumenge tchi mandar te penell. Kowa penell o baro Dewel.

Jeremia 32:32

Kowa hunte krap dran ko tselo tchilatchepen, hoi i menshe dran Israel un Juda kran, te choirenn le man. Jon, lengre bare raja, pralstune, rashaja un rakepangre, ninna kolla, kai djiwenn an o foro Jerusalem,

Ezekiel 12:2

Tu, mensho, djiweh mank sawe menshende, kai mukenn pen tchi te penell. Kolen hi jaka, te dikenn le, un kamenn tchi te dikell. Un len hi kanda, te shunenn le, un kamenn gar te shunell. Jon mukenn pen tchi te penell.

Hosea 5:10

I pralstune an o them Juda lan penge o themestar, hoi i Israelenge his. Jon hi har kolla, kai tchiwenn kol barra i kotar krik, hoi sikrenn har baro jekeskro kotar phub hi. Doleske tchorau miri choli pral lende win har pani.

Amos 5:12

Me djinau ko bud tchilatcho koowa, hoi kran tumer. Un dikau, har baro tumari doosh hi. Tumer rikrenn tumen gar pale, latche menshen palla te lell, un mukenn tumen te ginell. Kek tchatchepen denn tumer i tchorwelen.

Micha 3:9

Jaake shunenn kowa, tumer pralstune an o kheer Jakob, un tumer raja an o kheer Israel! Tumer, kai stakrenn tumare pirentsa ap o tchatchepen trujel, un penenn fun kowa, hoi tchatcho hi: Kowa hi chochepen.

Micha 6:12

I brawele an o foro lenn i tchorwelen win, un rikrenn len tele. Un tumer halauter an o foro han chochene un rakrenn chochepen.

4. Mose 22:7

Un i phureder kol menshendar Moab un Midian djan khetne pash o Bileam. Un lowe his an lengre wasta o durkepaske. Un jon wan pash leste, un penan leske kol laba, hoi o Balak penas.

1. Samuel 8:3

Jon djan gar o drom har lengro dad, un rodan kowa, hoi lenge o feteder his, un lan tchorchanes lowe, un phagan o tchatchepen.

Jesaja 1:17

Dikenn, har te krenn o latchepen, denn jak, te lell hakeno peskro tchatchepen. Awenn ap i rig kolenge, kai tele rikedo wenn. Kol tchawe, kolen kek dai un kek dad hi, kolenge krenn o tchatchepen win. Un kol djuwja, kolenge o rom meras, kolengro koowa lenn an tumaro wast!”

Jesaja 1:18

“Awenn”, penell o baro Dewel, “te kras men tel mende o tchatchepen win! Te hi i doosh, hoi tumer ap tumende anan jaake lolo har o rat, palle well li parno, jaake parno har gib. Un te hi li lolo har o purpur, palle well li jaake parno har o bakrengro bal.

Jesaja 28:14

Tumer pre-phurde, kai penenn i menshenge an o foro Jerusalem, hoi le hunte krenn, kanna shunenn o lab o baro Deblestar:

Jeremia 5:6

Doleske wenna lewe dran o weesh un marenn len; diwje djukle dran o diwjo un truk them dandrenn len an kotja, un bare diwje margodje lurenn glan lengre forja. Hakeno, koon win wella, wella an kotja dandedo. Lengri doosh hi bud un phari. Bud kope djan le mandar krik.

Ezekiel 22:27

Tire pralstune hi har diwje djukle, kai marenn, un hi boklo pal rat. Jon marenn menshen, te lenn le lengro koowa penge.