Jeremia 47:2 - O Debleskro Drom 2021 (Sinte)

² Kawa penell o baro Dewel: Dik, panja wenna koi rigjatar, kai norden hi. Un kolla wenna i diwjo sorelo lengsto pani, hoi tchakrell kau tselo them tel peste, un halauter hoi koi dren hi, i forja un kol menshen, kai kote djiwenna. Un i menshe an kau them denn gole un rowenna.

O Debleskro Lab 2024 (Sinte-Manouche)

² Kava penell o baro Devel: Dik, panya venna koy rigyatar, kay norden hi. Oun kolla venna i divyo zorelo lengsto pani, hoy čakrell kava tselo them tel peste, oun halauter hoy koy dren hi, i forya oun kol menshen, kay kote djivenna. Oun i menshe an kava them denn gole oun rovenna.

Jeremia 47:2 Referans Kwoze

Jeremia 46:20

O them Egiptia hi har i shukar terni grumni. O marepaskro well koi rigjatar, kai norden hi, te marell lo lat.

Jeremia 8:16

Kolla, kai kamenn te kurenn pen mentsa, hi pash o foro Dan tardo. Fun kotar shunah koi gole lengre grajendar. O tselo them trissell koi goljatar hoi i graja denn. Jon wenna un chan ko tselo them pre, lauter, hoi ap ko them hi, kol forja un lauter, hoi koi dren djiwella.

Jeremia 1:14

Un o baro Dewel penas ap mande: Kotar, kai norden hi, well i bibacht pral halauterende, kai djiwenn an kau them.

Debleskro tsiro 17:15

Un o bolepaskro penas ap mande: “Tu dikal, kai beshell koi djuwel, hoi wi-ladjedo koowa krell, pash bud panja. Kol panja hi menshe dran haki harmenatsjona, dran hako them, haki natsjona, un hako rakepen.

Debleskro tsiro 17:1

Un jek kol efta bolepangrendar, kai hi len kol efta tchare an i wasta, kowa was pash mande, un penas: “Ab kai! Me kamau tut i phagi te sikrell, hoi ko foro lella, hoi pash bud panja tchiddo hi. Ko foro hi har i djuwel, kai kras wi-ladjedo koowa.

Jakobo 5:1

Kanna penau ap tumende, kai brawelo han: Rowenn un denn gole pral koi bibacht, hoi pral tumende wella!

1. Korintarja 10:28

Kowa hi wawartchandes, te penell tumenge jek: “Kau chapen was i debleste dran kasht un bar dino.” Palle ma chan ko mass, te well koleskro dji gar djungeles, kai kowa tumenge penas. Job nai penals: “Hi mishto, te chap ko chapen.”

1. Korintarja 10:26

Djinenn, i phub un lauter, hoi koi pre hi, hi o Debleskro.

Nahum 1:8

I baro sorelo panjeha khossell lo o foro krik kolendar, kai hadan pen pral leste. Un an i kali rat tradell lo len.

Daniel 11:22

Un kol lurde, kai har bare panja ap leste djan, thowell lo pestar tele, har te wans le tchi. Un ninna marell lo i rajes, kai hi o pralstuno pral o Debleskre menshende.

Jeremia 48:39

Dikenn, har hi o them khetne dino! Har bares denn le gole i ropastar! I ladjatar rikrenn le o shero tele. An i tsele themma trul o them Moab, san i menshe pral lende, un dikenn darene jakentsa ap lende.

Jeremia 46:13

Kawa hi o lab, hoi penas o baro Dewel ap leskro rakepaskro, o Jeremia, an ko tsiro, har o Nebukadnezar, ko baro rai dran o them Babilonia, an o them Egiptia djas, te lell lo les dren:

Jesaja 59:19

Palle taprell i daar i menshen ap i tseli phub glan o baro Debleste un leskro railepen. Job wella har i diwjo sorelo pani hoi nashella, koles o ducho o baro Deblestar glan peste phurdell.

Jesaja 28:17

An miro kheer djiwell o tchatchepen, un mire menshende dau tchatchepaskre laba. Sorelo brishin, kai brishineskre barra dren hi, dell palle o chochepen paash, ap koleste tumen rikrenn. Un panja hidjrenn tumaro khatepen krik.

Jesaja 22:1

Kate sikrell o Dewel, hoi pral i dikepaskri tala wella. Hoi djas tuha, Jerusalem? Hoske djan tumer lauter pral ap i khera?

Jesaja 15:8

Trul o tselo them Moab trujel well ko ropen shunlo, un djal bis Eglajim un Beer-Elim.

Jesaja 14:31

Denn soreles gole, tumer, kai han tardo pash o foreskre wudja! Rowenn bari goljah, tumer, kai djiwenn an o foro! Trissenn i darjatar an o tselo them Filistia! Fun kotar, kai norden hi, well jagakro ducho un bud bud lurde, un kek kolendar atchell pale.

Debleskri gili 98:7

Mu well o baro pani diwjo i bachtjatar, un lauter, hoi an leste djiwell, ninna i tseli phub, un kolla, kai ap late djiwenn.

Debleskri gili 96:11

O bolepen well bachtelo, un i phub sala. O baro pani stell i bachtjatar un lauter, hoi an leste hi.

Debleskri gili 50:12

Te wals man bok, me penoms tuke kowa gar. I tseli phub hi miro un lauter, hoi ap late hi, ninna.

Debleskri gili 24:1

I gili o Davidestar. O baro Debleske hi i phub un lauter, hoi koi pre hi, awa, i tseli phub un kolla, kai kote djiwenna.

Jeremia 6:22

Kowa penell o baro Dewel: Denn garda: Bud menshe wenna dran lengro them, hoi kote tchiddo hi, kai norden hi. Awa, bud menshe krenn pen ap o drom an ko dur them, te djan le an o kurepen.

Jeremia 46:12

Tiri ladj was an i wawar themma win gole dino. Halauter shunan tiro ropen. Tire sorele kurepangre peran jek pral o wawar, un atchan jek pash o wawareste tchiddo.

Jeremia 46:24

Palle hi i ladj ap o them Egiptia tchiddo. I Egiptarja hi an o wast kol menshendar dino, kai wenna koi rigjatar, kai norden hi.