Jeremia 44:17 - O Debleskro Drom 2021 (Sinte)

¹⁷ Mer kamah kowa te rikrell, hoi mer penam, un koi bolepaskri rajetsake sungepaskro koowa te chatchrell, un lake mool win tchorell. Kowa kram mer, un kran mare phure, mare bare raja un pralstune an i forja o themestar Juda un an i dromma o forestar Jerusalem. Har kowa kram, his men ninna doha maro, un menge djas mishto, un mer dikam kek bibacht.

O Debleskro Lab 2024 (Sinte-Manouche)

¹⁷ Mer kamah kova te rikrell, hoy mer penam, oun koy bolepaskri rayetsake soungepaskro koova te rhačrell, oun lake mool vin čorell. Kova kram mer, oun kran mare phoure, mare bare raya oun pralstoune an i forya o themestar Youda oun an i dromma o forestar Yerusalem. Har kova kram, his men ninna doha maro, oun menge djas mishto, oun mer dikam kek bibarht.

Jeremia 44:17 Referans Kwoze

Jeremia 7:18

Kol tchawe rodenn kasht, kol dada krenn jag, i djuwja krenn merklia koi bolepaskri rajetsake. Un kol wawar deblenge anenn jon pipaske, te choirap me man koi pral.

Nehemia 9:34

Mare bare raja un pralstune, mare rashaja un phure, kolla djan gar ap tiro drom, un shunan gar tire laba, hoi sikrenn, har te djiwenn le.

Ezekiel 20:8

Jon mukan pen tchi mandar te penell, un kaman gar ap mande te shunell. Kek witsras kol djungele figuren krik, hoi lo an-mangas. Kol egiptikre deblen kaman le gar te mukell. Kote kamom miri choli pral lende win te tchorell. Gomme kote an o them Egiptia kamom miri tseli choli ap lende win te mukell.

5. Mose 23:23

Te deh tu tut gar sowel, palle hi ninna kek doosh ap tute.

2. Mose 16:3

Un jon penan: “Wals feteder, te dals men o baro Dewel mulo an o them Egiptia, har hams beshdo pash i pirja pherdo mass, un kai his men doha maro, te nai cham men tchalo. Tumer anan men kate an o mulo tato them, te meras halauter i bokatar.”

Filiparja 3:19

Jon djan ap i drom, kai djan le nashedo. Lengro per hi lengro Dewel. Jon sharenn ko djungelo koowa, hoi kran le, un hunte ladjans pen pral kowa. Kowa, hoi an lengro shero trujel djala, hi phubjakro koowa.

Jeremia 44:25

Kowa penell o baro Dewel, ko rai pral o bolepen un i phub, kai o Israeleskro Dewel hi: Tumer un tumare romja penan: “Mer kamah mari sowel te rikrell, hoi mer i bolepaskri rajetsake dam, te chatchras sungepaskro koowa lake un te tchoras mool glan late win.” Un kowa kran tumer ninna. Palle mishto, palle rikrenn tumari sowel, un krenn, hoi dan lake sowel!

Jeremia 44:21

Ma patsenn, kai djinas o baro Dewel gar, hoi kran an i forja o themestar Juda un an i dromma o forestar Jerusalem, tumer un tumare phure, tumare bare raja, pralstune un i tsele menshe an o them! Kowa djas o baro Debleske an o dji,

Jeremia 19:13

Un kol khera an Jerusalem un kol khera kol bare rajendar an o them Juda, kolla wenn ninna pale-tchiddo har koi platsa Tofet, – i tsele khera, kai jon pral pre i tsele bolepangre momelenge sungepaskro koowa chatchran un i wawar chochene deblenge mool win tchoran.

2. Rajengro liil 17:16

Un jon mukan kol tsele laba o baro Deblestar, kai lengro Dewel hi, un kran penge dui terne gurma un i figura, hoi i debletsa Ashera sikras, un mangan i tsele bolepangre momlia an un ninna o debles Baal.

Čačepangre 11:36

Kote penas joi ap leste: “Miro dad, te dal tu tiro lab o baro Debleste, palle kre mantsa har les dran tiro mui win was. O baro Dewel kras, te nai dal tu i Ammonarjen lengro tchilatchepen pale, hoi jon ap tute kran.”

4. Mose 30:12

un lakro rom shunell kowa, un penell tchi koi pre, un penell gar, te hunte krell joi kowa gar, palle hunte rikrell li halauter, ap hoi joi pes sowel das.

1. Petro 1:18

Tumer djinenna, o Jesus Kristo plaissras kek sonakai un kek rup, – kowa lauter atchell gar, – te lell lo tumen win dran tumaro phuro djipen, hoi tchi moldo his, har djan ap ko drom, kai tumare phure djan.

Markus 6:26

Har o Herodes kowa shunas, dukas leskro dji. Ninna te khaitas les kowa, kamas lo peskro lab te rikrell, hoi job glan kolende das, kai pash leste trul i chapaskri beshdo his un shunan, har job pes sowel das.

Jeremia 44:9

Bistran tumer koi doosh, hoi tumare phure ap pende anan, i doosh i bare rajendar dran o them Juda, un i doosh lengre romjendar, ninna tumari doosh, kai anan pral tumende, un ko tchilatcho koowa, hoi tumare romja kran an o them Juda un ap i dromma an o foro Jerusalem?

Jesaja 48:5

Doleske penom me kowa tumenge glan i rah tsiro. Un glan kowa was, mukom me les tumen te shunell, te nai penenn gar: “Miri debleskri figura kras kowa, un koi figura dran kasht un saster, hoi an-mangom, kaja penas, te well kowa jaake.”

Debleskri gili 106:6

Mer anam doosh ap mende jaake har mare phure, un kram gar, hoi tchatcho hi. Na-a, mer kram tchilatcho koowa.

Debleskri gili 12:4

Baro Dewel, kre, te rikrenn le pengre muja, kolla, kai rakrenn dui tchipjentsa! Pande kolenge o mui, kai jaake bares rakrenna,

2. Rajengro liil 22:17

I menshe an Jerusalem mukan man un anan wawar deblenge viechen, te choirenn le man halautereha, hoi le pengre wastentsa kran; doleske well miri choli har i jag ap kau foro, un kek nai krell les win.”

4. Mose 30:2

Un o Mose rakras lengre pralstunentsa, un penas: Kawa hi kowa, hoi o baro Dewel kamell, te krenn tumer kowa.

2. Familjakro liil 28:23

Job chatchras viechen glan i chochene debla dran o foro Damaskus, ninna te dan i lurde dran Damaskus leskre lurden khetne. Job penas: “Kal debla wan i bare rajenge pral o them Syria ap i rig; doleske anau len viechen, te wenn le mange ninna ap i rig.” Kolla anan les un i tsele menshen an leskro them an i bari bibacht.

Jeremia 1:16

Un me dau i menshen an Juda i phagi lengro tchilatchepaske, hoi jon kran. Jon djan krik mandar un anan viechen wawar deblenge un mangan kol figuren an, hoi le pengre wastentsa kran.

Jeremia 11:12

Palle denn kol menshe an o them Juda un an Jerusalem gole pal kol deblende, kai chatchran jon lenge sungepaskro koowa. Kal debla nai haiwenn len gar dran lengri bibacht win te anell.

Jeremia 18:15

har mire menshe man bistran. Jon anenn viechen un sungepaskro koowa kol deblenge, kai kek hi. Kolla anan len o phureder drom tele, un mukenn len ap i djungele dromma te djal.

Ezekiel 8:16

Un job anas man dren ap koi tikni platsa glan o baro Debleskro kheer. Un glan o wudar o kherestar mashkral i glanstuni halla un i sasterni chatchepaskri his 25 (biish-te-pantch) mursha tardo. Kolla rissran pengre dume khatar o baro Debleskro kheer, un dikan ap koi rig, kai o kham pre djal. Un jon mukan pen ap i phub te perell, un mangan o kham an.

Ezekiel 20:32

Hoi was tumenge an o shero? Tumer penenn: “Mer kamah har i menshe an wawar themma te well! Mer kamah deblen dran kasht un bar an te mangell.” Me o baro Dewel, tumaro rai, penau: Sawo koowa te well kek tsireske! Me dau man sowel pash miro djipen, te atchap i sorelo rai pral tumende – i rai i sorelo wasteha, un i pre-hadedi mussjah, un i baro choljah.

Ezekiel 23:41

Un beshan tumen ap i raili beshepaskri. Un glan tumende his i chapaskri tardo, ap kolate latcho koowa his. Un koi pashel tchiwan tumer sungepaskro koowa un djet, hoi mange his.

Habakuk 1:16

Lengre matchengre gone un lengre netse hi lenge har debla. Lenge chatchrenn le viechen un sungepaskro koowa, te parkrenn len pen, kai jon lenge jaake bud brawlepen un latcho chapen anan.

Jeremia 7:17

Dikeh tu gar, hoi jon krenna an kol forja an Juda un ap kol dromma an Jerusalem?