Jeremia 44:13 - O Debleskro Drom 2021 (Sinte)

¹³ Jaake har dom i menshende an Jerusalem i phagi, jaake dau ninna kol menshende dran Juda i phagi, kai an Egiptia djiwenn. Jon merenn o chareha, i bokatar un o djungelo nasslepah.

O Debleskro Lab 2024 (Sinte-Manouche)

¹³ Yaake har dom i menshende an Yerusalem i phagi, yaake dau ninna kol menshende dran Youda i phagi, kay an Egiptia djivenn. Yon merenn o rhareha, i bokatar oun o djoungelo nasslepah.

Jeremia 44:13 Referans Kwoze

Jeremia 43:11

Job peskre lurdentsa well dren an o them Egiptia un well o sorleder. Palle merenn bud menshen, wawar wenn pandles lino, un wawar o chareha maredo. Hakeno well jaake tapedo har leske glan-wi diklo hi

Jeremia 42:18

Doleske penell o baro Dewel, ko rai pral o bolepen un i phub, kai o Israeleskro Dewel hi: Te djan tumer an o them Egiptia, well miri soreli choli jaake pral tumende har was li pral i menshende an o foro Jerusalem. An o them Egiptia han har praassede menshe. Pral kolende denn le i wasta khetne pral o shero. Jon san pral tumende. Un te kamenn le jekes te praassell, penenn le: Mu djal tuke har i Israelenge an o them Egiptia! Un kau them, kai kanna han, dikenn tumer buder gar.

Jeremia 24:10

Me anau kurepen, bok un nasslepen mank lende, bis te kek lendar pral atchas an kau them, hoi dom len un lengre phurende.

Jeremia 21:9

Koon an kau foro atchella, hunte merella an o kurepen, i bokatar, un ap i pharo nasslepen. Koon win djala un pash kol Kaldearja nashella, kai trul tumaro foro tardo hi, kowa atchell djido. Leske atchell tchi har peskro djipen.

Jeremia 42:16

palle taprell tumen o charo an o them Egiptia, glan koleste tumer tumen kanna trashenn. Un koi bok, glan kolate tumer tumen kanna darenn, lenn tumen palla an o them Egiptia. Un tumer merenn kote.

Jeremia 42:17

Hi koon hi: Kowa kai krell pes ap o drom te djal lo an o them Egiptia, un te djiwell lo kote, kowa merell o chareha, i bokatar un o djungelo nasslepah. Un kek atchell djido lendar. Un kek nai nashell dran koi bibacht, hoi kamau me pral lende te anell.

Jeremia 24:9

Me anau sawi bibacht pral lende, te atchell i menshenge an i tsele themma ap kai phub o rakepen krik. Kote, kai len tradau, wenn le sapaske un praassepaske. Te kamell jek o wawares te praassell, penell lo: Tuke te djal har kol menshenge dran Jerusalem un Juda!

Jeremia 42:15

Palle shunenn o baro Debleskro lab, tumer kai atchan pral an o them Juda! Kowa penell o baro Dewel, ko rai pral o bolepen un i phub, kai o Israeleskro Dewel hi: Te krenn tumen ap o drom, te djan an o them Egiptia, un te djiwenn kote,

Hosea 9:6

Dran tumaro them, hoi paash kerdo hi, hunte djan tumenge krik. O them Egiptia lell tumen pash peste pre, un an o foro Memfis wenn tumer paskedo. Kote, kai kanna tumaro kutch rup hi, well subjengro senlepen baro, un subjengre burra wenn baro an tumare khera.