Jeremia 31:12 - O Debleskro Drom 2021 (Sinte)

¹² Jon wenna pral ap i berga Zion, un denn gole i bachtjatar, un wenn bachteles pral kowa, hoi o baro Dewel len dell: djob, mool, djet un terne bakre un grumja. Lengre djia wenn sorelo har i garta, kolat hako tsiro doha pani hi. Un lenge hi buder gar ropaske.

O Debleskro Lab 2024 (Sinte-Manouche)

¹² Yon venna pral ap i berga Sion, oun denn gole i barhtyatar, oun venn barhteles pral kova, hoy o baro Devel len dell: djob, mool, djet oun terne bakre oun groumya. Lengre djia venn zorelo har i garta, kolat hako tsiro doha pani hi. Oun lenge hi bouder gar ropaske.

Jeremia 31:12 Referans Kwoze

Jesaja 35:10

Kolen, kai job dran o pandepen win las, wenn pale khere, un wenn o gipah pash i berga Zion. Lengri bacht lell kek lendar. Lengre djia giwenn un bashrenn i bachtjatar. Un duk un ropen dell gar buder.

Jesaja 58:11

Un hako tsireske sikrell tut o baro Dewel tiro drom. Ninna te djiweh an o mulo tato them, dell lo tut doha djipaske, un dell tut newi soor. Palle hal tu har i baar, kolat hako tsiro doha pani hi, awa, har i pani, hoi dran i phub pre djal, un koleskro pani hako tsiro nashell.

Johanni 16:22

Kanna rowell tumaro dji. Un me penau tumenge kanna: Me wau pale pash tumende. Un tumer wenn bachtelo. Un koi bacht nai lell tumendar kek krik.

Ezekiel 17:23

Pral ap koi bari berga an o them Israel, kote tchiwau les an i phub. Un job lell bud kashta un hidjrell rukengre, un well i railo zedertikro ruk. Un an leste djiwenn bud tchirkle un hi khere mank leskre kashta.

Jesaja 65:19

Me ninna, wau bachtelo pral Jerusalem, un miro dji giwell pral mire menshende. Ropen well kote buder gar shunlo, witar gar dell jek gole i darjatar.

Jesaja 60:20

Tiro kham djal gar buder tele, un tiro tchon atchell diklo. o baro Dewel well tuke i momeli hako tsireske. Un kol phare diwessa, an kolende tu rowal, hi palle trujel.

Debleskro tsiro 21:4

Un job khossella hake swa ap lengre jaka tele. Un o merepen dell gar buder, witar kek bibacht, kek ropen un kek duka. Kowa hoi his, dell gar buder.

Debleskro tsiro 7:17

O terno bakro, hoi mashkral o Debleskro beshepaskro hi, kowa dell jak ap lende, har i bakrengro rai ap peskre bakre jak della, un anell len pash o pani, hoi o djipen della. Un o Dewel khossell hake swa ap lengre jaka tele.

Remarja 2:4

Hi tuke o Debleskro baro latchepen tchi moldo? Les hi i baro dji un dell i menshen gar sik pre. Djineh tu gar o Debleskro latchepen, hoi kamell tut ap leskro drom te anell?

Hosea 3:5

Pal ko tsiro wenn i Israelitarja palpale pash o baro Debleste, kai lengro Dewel hi, un pash lengro baro rajeste – jekeste dran o kheer David. Un trisslepah wenn le pash o baro Debleste. Un job well lenge latches an ko tsiro, hoi wella.

Debleskri gili 130:4

Tu hal kowa, kai i doosh krik lella. Doleske dikah pre ap tute un shunah ap tute.

Ezekiel 20:40

Ap miri bari berga an Israel, kai me djiwau, kote mangenn man i tsele Israelitarja an, halauter kai an o them hi. Un me lau len an o latchepen an, un kamau, te anenn le mange kote viechen un djob, jaake har glan tchinlo hi, ninna ko koowa, hoi mange ap i rig tchiwan.

Jesaja 51:11

Kolen o baro Dewel dran o pandepen win las, wenn pale khere, un wenn o gipah pash i berga Zion. Lengri bacht lell kek lendar. Lengre djia giwenn un bashrenn i bachtjatar. Un duk un ropen dell gar buder.

Jesaja 1:30

Un tumer kokres wenn har i ruk, koleskre patria buder gar senelo hi, un har i baar, an kolate kek pani buder hi.

Jeremia 31:4

Israel, miri pirni! Me krau tut pale baro. Tutar well pale i natsjona. Tu kress tut pale shukar, bashress un djas win ap o khelepen.

Jeremia 3:14

Awenn pale, tumer tchawe, kai nashan mandar krik, penell o baro Dewel. Me hom tumaro rai. Me kamau tumendar te lell jekes dran hako foro un dui dran haki familja, un kamau tumen an Zion te anell.

Jeremia 31:6

Ko tsiro wella, kai denn le gole ap i berge Efrajim: Awenn, te djas pre an o foro Zion pash maro baro Debleste!

Jeremia 31:7

O baro Dewel penell: Giwenn un denn gole i bachtjatar pral o Israel, o pralstuno mank i natsjone! Denn bari gole, hoi was! Sharenn o baro Debles un penenn: O baro Dewel was peskre menshenge ap i rig, kolenge, kai i Israelendar pral atchan!

Jeremia 31:24

An o them Juda un an leskre tsele forja djiwenn pale menshe, ninna hache un bakrengre, kai djan pengre bakrentsa trujel.

Jeremia 31:25

Kolen, kai khino hi, dau me pale soor, un kolen kai bokenna, dau doha te chal.”

Jeremia 32:15

O baro Dewel, ko rai pral o bolepen un i phub, kai o Israeleskro Dewel hi, penell: O tsiro well, kai wenn pale khera ginlo an kau them, ninna hachetikri phub un drakengro them.

Jeremia 33:12

Kowa penell o baro Dewel, ko rai pral o bolepen un i phub: Ninna te dikell kau them kanna win har i mulo them, kai nai djiwenn kek menshe un kek vieche, well i tsiro, kai hi hako fores pale latcho them, kai i bakrengre pengre bakren anenna.

Jeremia 33:13

Un i bakrengre ginenn pale pengre bakre, kitse jon hi, te djan le win un dren glan kol forja, kai hi ap i bare un tikne berge, un an o them Negev, un an o them Benjamin un trul Jerusalem, un an i forja o themestar Juda. Kowa penell o baro Dewel.

Ezekiel 34:14

Kote, kai latcho senlepen hi, anau len. Ap latche platse pral ap i berge an Israel nai tchiwenn le pen tele un chan pen tchalo.

Haggai 2:19

An tumare djobengre khera atchell doha djob. I drakengre ruka hidjrenn pale drake, i faigetikre ruka hidjrenn faige, i granatikre phabjengre ruka hidjrenn phabja, un i djeteskre ruka hidjrenn djeteskre drake. Kau diwesseha tchiwau miri bacht un miri soor ap tumaro them.

Jesaja 52:8

Shunenn, hoi kol mursha gole denn, kai jak denn ap o foro! Jon halauter denn gole i bachtjatar. Pengre jakentsa dikenn le, har o baro Dewel an o foro Zion pale well.

Ezekiel 36:30

Me krau, te anenn i ruka bud rukengre. Un kowa hoi ap i phub pre djal, well bud un budeder. I menshe dran wawar themma nai san buder gar pral tumende, doleske, kai hi tumen tchi te chal.

Zakarie 8:12

Na-a, kanna nai witsrenn le djob an i phub kek darjah. I drakengre ruka hidjrenn drake, i phub anell senlepen win, un o bolepen dell brishin. Un kolenge, kai pral atchan kal menshendar, dau kowa lauter, te atchell kowa lenge.