Jeremia 2:20 - O Debleskro Drom 2021 (Sinte)

²⁰ O baro Dewel penell: Hako tsiro hadal tut pral mande, un kamal mange gar palla te djal. Tu penal: Me kamau kek rai pral mande. Un tchiwal tut koi har i lubni ap i berga tel hako senelo ruk.

O Debleskro Lab 2024 (Sinte-Manouche)

²⁰ O baro Devel penell: Hako tsiro hadal tout pral mande, oun kamal mange gar palla te djal. Tou penal: Me kamau kek ray pral mande. Oun čival tout koy har i loubni ap i berga tel hako zenelo rouk.

Jeremia 2:20 Referans Kwoze

5. Mose 12:2

Te was ko tsiro, kai lan tumer ko them dren un tradan kol wawar menshen win, palle denn kol tsele platse paash, kai jon pengre deblen an-mangan, ap i bare un tikne berge, ninna tel bare senele ruka.

3. Mose 26:13

Me, o baro Dewel, hom tumaro Dewel, un anom tumen dran o them Egiptia win, te atchenn gar buder lengre pandle budepangre. Kote hans har grumja, kai hunte budrenn i kashteha trul lengri meen. Ko kashtes phagom me, te nai djan pale pre hadede sherja.

Jeremia 17:2

Ninna lengre tchawe witsrenn pen tele glan kol chatchepangren un glan kol figuren, hoi sikrenn i debletsa Ashera, un hoi le pre tchiwan tel kol senele ruka, un ap i tikne un bare berge un ap o them. Me dau tumaro tselo brawlepen un kutch koowa wawarende, te tchorenn le kowa tumendar. Koja hi koi phagi ko tchilatchepaske, hoi tumer an kau tselo them kran.

Hosea 3:3

Un me penom ap late: “Tu atchess pash mande i rah tsiro, un lubress tut gar trujel, un sowess gar wawar murshentsa. Un an kau tsiro kamau me witar gar tuha te sowell.”

Jeremia 30:8

O baro Dewel, ko rai pral o bolepen un i phub penell: An ko tsiro phagau ko kasht, hoi hi trul lengre menja, un lau i shelle tele, hoi rikrenn len pandles. Jon hunte budrenn buder gar wawar menshenge,

Jesaja 1:21

Har nai was kowa? Kau foro, hoi rikras pes ap mande peskro tselo djijeha, was har i lubni! O foro his pherdo tchatchepen, un i menshe djiwan pal o Debleskre tchatchepaskre laba. Un kanna djiwenn kate lauter marepangre, kai wawaren mulo denn!

Nahum 1:13

Kanna phagau koi soor, hoi i Assirjen pral tumende hi, – koi soor, hoi har ko kasht hi, hoi i grumjat trul peskri meen hi. Un kol shelle, hoi pandenn tumen, tchinau paash.

Hosea 2:5

Te krell li kowa gar, palle riwau lat win, te hi li nanges tchiddo, har ap ko diwes, kai li boldo was. Un krau, te well o them i mulo them, kai kek pani hi, kai hunte merell li i trushatar.

Ezekiel 23:5

Un an ko tsiro, har his li miro, lubras i Ohola trujel, un nashas wawar murshenge palla. Lakre pirne his kurepangre dran o them Assur,

Ezekiel 20:28

Har me len an o them anom, kolestar man sowel dom, te dap les lende, mangan le wawar deblen an. Hako kopo, kai dikan le i tikni berga oder i baro ruk bud patjentsa, chatchran le viechen i chochene deblenge, un kran man chojedo koleha, hoi le lenge anan. Jon chatchran sungepaskro koowa lenge, un tchoran mool win lenge.

Ezekiel 16:41

Un tire khera chatchrenn le an i jag pre, un denn tut tiri phagi glan i jaka bud djuwjendar. Jaake krau, te nai lubreh buder gar trujel, un nai gineh tuke buder kek pirnes.

Ezekiel 16:31

Kote kai i dromma khetne wenn, un ap haki platsa kral mangepaskre platse, kai chochene deblen an-mangal. Un tu hals gar har wawar lubja: Tu kamal kek lowe koleske, hoi kral.

Ezekiel 16:28

Tu lal gar doha, un lubral kolentsa dran o them Assur trujel. Un ninna kowa his tuke gar doha.

Jesaja 14:25

Me dau i Assirjen an miro them, ap mire berge stakrau len khetne, te nai rikrenn le buder gar mire menshen tele, un krenn lenge buder gar i pharo djipen.

Jesaja 10:27

Ap ko diwes lau tumen win dran i wasta kolendar dran o them Assur, te nai rikrenn le tumen buder gar tele. Palle han buder gar lengre pandle budepangre. I lurde dran o them Assur djan pre an Rimmon,

Jesaja 9:4

I lurdengre kircha, kolentsa i lurde phares pre stakran un lengre baja, kai rat ap lende hi, wenn an i jag witsedo un chatchrenn pre.

Debleskri gili 78:58

Jon mangan i wawarengre deblen an. Un choiran o Debles, har kran le penge chochene deblen.

1. Rajengro liil 12:32

Un job tchiwas i baro diwes dren an o ochtato tchon, ap o deesh-te-pantchto diwes, te wals ko diwes har kol bare diwessa an o them Juda. Un ap i chatchepaskri chatchras lo viechen. Kowa kras lo an Betel, kote chatchras lo viechen kol terne grumjenge dran sonakai, hoi lo kras. Un kote an Betel tchiwas lo rashajen an pengri budi dren, te his le rashaja ap kol mulne platse, hoi lo kras, kai mangenn le i mule deblen an.

1. Samuel 12:10

Koi dan le gole ap o baro Debleste, te well lo ap lengri rig, un penan: “Mer lam doosh ap mende, te djam krik tutar, baro Deblestar, un mangam kol deblen an, kai kharenna Baal un Astarte. Kanna le men win dran i wasta kolendar, kai men tele rikrenn. Palle wess tu kokres maro Dewel.”

Josua 24:26

Un o Josua tchinas kal tsele laba an o liil, hoi sikrell o Debleskro drom. Un job las i baro bar un tchiwas les koi tardo, tel ko baro ruk, hoi pash o baro Debleskro plachteno kheer tardo his.

Josua 24:24

Un i tsele menshe penan ap o Josua: “O baro Debles, kai maro Dewel hi, koles kamah an-te-mangell. Un ap kowa, hoi job penella, kamah mer te shunell.”

Josua 1:16

Un jon penan ap o Josua: “Lauter, hoi tu penal te kras, kowa krah mer! Un kai tu men bitchreh, kote djah mer!

5. Mose 26:17

Kau diwes penas o baro Dewel tuke, te hi lo tiro Dewel, un kamell, te djas tu ap leskre dromma un kress, hoi lo tutar kamell, un djiwess pal leskre laba un leskro tchatchepen, un shuness ap leste.

5. Mose 15:15

Un tu bistress gar, te hals i budepaskro an o them Egiptia, un tiro baro Dewel las tut kote win. Doleske penau me tuke kowa kau diwes.

5. Mose 5:27

Dja tu koi, un shun halauter, hoi maro baro Dewel penell, un pen kowa menge. Halauter, hoi maro baro Dewel tuke penell, kamah te shunell un les krell.”

5. Mose 4:34

Kek wawar dewel djas un las peske menshen win dran i wawar them, har job kras, har las lo tumen win dran o them Egiptia. Job sikras peskri bari soor un kras sau koowa, hoi kek wawar nai krell, un anas bud bibacht ap i Egiptarjen. Job kuras pes tumenge. Peskro sorelo wasteha un peskri pre-hadedi mussjah las lo tumen win, un kras i Egiptarenge bari daar. Kowa lauter dikan tumer.

5. Mose 4:20

Tumen las o baro Dewel dran o them Egiptia win, har dran i sasterno jagakro bob, jaake bud duka hunte lan kote ap tumende. Tumen las lo koi win, te wenn tumer leskre menshe, kai kokres leske koi hi, jaake har kowa ap kau diwes kate ninna hi.

2. Mose 24:3

Un o Mose was pash i menshende un penas lenge hako lab, hoi o baro Dewel penas, kol tsele laba, hoi penenn, hoi job lendar kamella. Un i tsele Israelitarja penan har dran jek mui: “Lauter, hoi o baro Dewel penas, kamah mer te krell.”

2. Mose 19:8

Un i tsele menshe penan har dran jek mui: “Lauter kowa, hoi o baro Dewel penas, kowa kamah te krell.” Un o Mose penas o baro Debleske, hoi i tsele Israelitarja penan.

2. Mose 3:8

Me wom tele, te lap len dran o wast kol menshendar an o them Egiptia win, un anau len dran kau them win un dau len i latcho un baro them, kai hi bud thud un gwin. An ko them djiwenn kanna i Kanaanitarja, i Hetarja, i Amorarja, i Perisarja, i Hiwarja un i Jebusarja.

Debleskro tsiro 17:1

Un jek kol efta bolepangrendar, kai hi len kol efta tchare an i wasta, kowa was pash mande, un penas: “Ab kai! Me kamau tut i phagi te sikrell, hoi ko foro lella, hoi pash bud panja tchiddo hi. Ko foro hi har i djuwel, kai kras wi-ladjedo koowa.

1. Rajengro liil 14:23

Ap i tsele berge un tel hako baro ruk kran le penge mulne platse, tchiwan bare barra pre lengre chochene deblenge, ninna figure, hoi i debletsa Ashera sikrenn.

Debleskri gili 107:14

un anas len win dran i kali rat, kai kek momeli his, un kras lengre sasterne shelle pre.

Jeremia 2:31

O baro Dewel penell: Tumer tchilatche menshe! Denn garda ap kowa, hoi me tumenge penau! Hom me i Israelenge i mulo them, i them, kai kek pani hi? Hoske penenn mire menshe: ‘Mer nai djah, kai kamah, un hunte nashas tuke gar buder gar pal.’

Jeremia 3:13

Tu hunte kress tchi, har te dikess dren, kai anal doosh ap tute, har hadal tut pre pral o baro Debleste, kai tiro Dewel hi. Tu nashal kai te koi trujel, te mangess wawar deblen an tel hake senele ruka, un shunal gar ap mire laba, penell o baro Dewel.

Jeremia 5:5

Me kamau pash i pralstunende te djal, te rakrap lentsa. Kolla djinenn o Debleskro drom un nai penenn mange, hoi an i jaka lengro Deblestar mishto hi. Palle haiwom: Ninna kolla kaman gar, te well job lengro rai, un kaman gar ap leste te shunell.

Jeremia 13:27

Jerusalem, me dikom, har mukal man, dikom tiri chantch pal wawar deblen, tiro wi-ladjedo koowa, tire figure, kolentsa choiral man ap i berge un ap o them. Tu bibachteli, hal pale-tchiddo glan mande! Har rah kameh tu kowa te atchell?

Hosea 4:13

Pral ap i berge marenn le viechen pengre chochene deblenge, un ap i tikne berge chatchrenn le lenge sungepaskro koowa, tel i bare un buchle ruka, kai gar jaake tato hi un shukar te beshell. Doleske wenn lengre tcha lubja, un lengre tchawengre romja chochenn pengre romen.

Čačepangre 2:11

Un koi kran i Israelitarja kowa, hoi tchilatches hi glan o baro Debleskre jaka. Un jon mangan ko debles an, hoi kharas Baal,

Čačepangre 2:13

Un jon mukan o baro Debles un mangan o debles Baal an un ninna i debletsa Astarte.

Čačepangre 10:6

Un i Israelitarja kran pale kowa, hoi tchilatches his glan o baro Debleskre jaka. Un jon mangan i wawar deblen an: ko debles, kai kharell Baal, un i debletsa, kai kharell Astarte, un kol deblen, kai mangenn kol menshe an, kai djiwenn an Syria, an Sidon, an Moab, an Ammon un an Filistia. Un i Israelitarja mukan o baro Debles un mangan les buder gar an.

Debleskri gili 2:3

“Mer kamah buder gar te wenn le rai pral mende”, penenn le. “Witsras lengre shelle mendar, kolentsa jon men pandan!”

Hosea 1:2

Har rakras o baro Dewel o ersto kopo ap o Hosea, te penell job leskre laba i menshenge, penas lo ap leste: Rode tuke i lubni un romedine lat! Tut hunte well tchawe, kai i lubjatar ap i phub anlo wenn. Jaake sikreh: I menshe an kau them hi har i lubni: Jon mukan man un nashenn wawar deblenge palla.

Hosea 9:1

Ma de gole i bachtjatar, Israel, har i menshe an wawar themma krenna! Tiro Deblestar djal tu krik un wawar deblenge palla. Tu bikreh tut ap lende ap haki platsa, kai o djob win dino wella.