Jeremia 13:13 - O Debleskro Drom 2021 (Sinte)

¹³ Palle pen lenge: Kowa penell o baro Dewel: Me kamau lauteren mato te krell, kai djiwenn an kau them: kol bare rajen, kai ap o Davideskri beshepaskri beshdo hi, i rashajen un o Debleskre rakepangren un i tsele menshen, kai djiwenn an o foro Jerusalem.

O Debleskro Lab 2024 (Sinte-Manouche)

¹³ Palle pen lenge: Kova penell o baro Devel: Me kamau lauteren mato te krell, kay djivenn an kava them: kol bare rayen, kay ap o Davideskri beshepaskri beshdo hi, i rashayen oun o Debleskre rakepangren oun i tsele menshen, kay djivenn an o foro Yerusalem.

Jeremia 13:13 Referans Kwoze

Jesaja 63:6

Un me stakrom i menshen an wawar themma khetne an miri choli. Un jon wan mato dran miro choli. Un me mukom lengro rat ap i phub te nashell.

Jesaja 51:17

Ste pre! Ste pre! Hade tut, Jerusalem! Tu pijal dran o baro Debleskro khoro, hoi his pherdi leskri choli. Tu hunte pijal ko khoro win, bis te tchi buder an leste his. Kolestar wal har jek, kai hi mato, un nai well buder gar tardo ap peskre herja.

Debleskri gili 75:8

Na-a, o Dewel hi o tchatchepaskro rai, kai ko jekeske i soor krik lell, un o wawares bares krell.

Debleskri gili 60:3

Miro Dewel, tu tchiwal men pale, un tradal men kate te kote. Bari choli hi tut ap mende. Rake mentsa pale latches!

Habakuk 2:16

Tu anal ladj ap tute un kek sharepen. O baro Dewel dell tut dran leskro khoro pherdi peskri choli te pijell. Kanna pi, bis te nai rikreh tut buder gar ap tire pire! Palle well i ladj pral tute, un tiro railepen hi gar buder.

Jeremia 51:7

O foro Babilon his har i sonakaskro khoro an o baro Debleskro wast, i khoro, hoi pherdi mool his, kolestar i menshe an i tsele themma pijan un mato wan. Doleske wan jon jaake narwelo.

Jeremia 25:27

Un o baro Dewel penas mange: Pen lenge: Kowa hi, hoi penell o baro Dewel, ko rai pral o bolepen un i phub, kones i Israelitarja an-mangenn: Pijenn, te wenn mato un hunte tchadenn, bis te perenn tele un nai stenn gar buder pre! Perenn an o charo, hoi bitchrau mank tumende!

Jesaja 49:26

Kolla, kai chan tut, kolla hunte chan pengro mass un hunte pijenn pengro rat, un wenn kolestar jaake mato, har te pijans le gudli mool. Palle haiwenn i tsele menshe, te hom me o baro Dewel, kowa, kai lell tut win dran o merepen, un tserdell tut win dran i tchilatche wasta, me o sorelo Dewel o Jakobestar.

Jeremia 51:57

O baro Dewel penell: Me krau len mato, kol pralstunen an Babilon, kol gosewe murshen, themeskre rajen, pralstune lurden, un kol wawar lurden an Babilon, te perenn le an i sopen, kolestar jon buder gar pre stenn. Kowa penell o baro rai, koleskro lab hi: baro Dewel, ko rai pral o bolepen un i phub.

Jesaja 51:21

Doleske shun tu kawa, tu bibachteli, kai mati hal, i moljatar hal gar mati:

Jesaja 29:9

Krenn dureder, har te wans dinelo an o shero! Krenn dureder, har te wans korelo ap i dui jaka! Tumer han mato – un pijan kek mool. Tumer perenn jek rigjatar ap i wawar – un pijan kek sorelo pipen.

Jeremia 13:12

O baro Dewel penas mange: Pen kal menshenge: Kowa penell o baro Dewel, kai o Israeleskro Dewel hi: An i tsele khore well mool tchoredo. Un te penenn jon ap tute: Koon djinell kowa gar, kai an i khore mool dren tchoredo wella?

Jeremia 25:29

Shunenn, ko foro, hoi pal mande kharedo hi, hi kowa, kai anau i bibacht glanstunes ap leste. Patsenn tumer, kai lenn gar tumari phagi? Na-a! Tumer ninna lenn tumari phagi. Me bitchrau o kurepen pral halauterende, kai djiwenn ap kai phub. Kowa penell o baro Dewel, ko rai pral o bolepen un i phub.